Εἰδύλλια

VI.

___________________________________________________

Βουκολιασταί αʹ

Δάφνις καὶ Δαμοίτας

Δαμοίτας καὶ Δάφνις ὁ βουκόλος εἰς ἕνα χῶρον

τὰν ἀγέλαν ποκ᾽, Ἄρατε, συνάγαγον· ἦς δ᾽ ὃ μὲν αὐτῶν

πυρρός, ὃ δ᾽ ἡμιγένειος· ἐπὶ κράναν δέ τιν᾽ ἄμφω

ἑσδόμενοι θέρεος μέσωι ἄματι τοιάδ᾽ ἄειδον.

5

πρᾶτος δ᾽ ἄρξατο Δάφνις, ἐπεὶ καὶ πρᾶτος ἔρισδεν.

ΔΑΦΝΙΣ

Βάλλει τοι Πολύφαμε τὸ ποίμνιον ἁ Γαλάτεια

μάλοισιν, δυσέρωτα καὶ αἰπόλον ἄνδρα καλεῦσα·

καὶ τύ νιν οὐ ποθόρησθα τάλαν τάλαν, ἀλλὰ κάθησαι

ἁδέα συρίσδων. πάλιν ἅδ᾽ ἴδε τὰν κύνα βάλλει,

10

ἅ τοι τᾶν ὀίων ἕπεται σκοπός· ἃ δὲ βαΰσδει

εἰς ἅλα δερκομένα, τὰ δέ νιν καλὰ κύματα φαίνει

ἅσυχα καχλάζοντος ἐπ᾽ αἰγιαλοῖο θέοισαν.

φράζεο μὴ τᾶς παιδὸς ἐπὶ κνάμαισιν ὀρούσηι

ἐξ ἁλὸς ἐρχομένας, κατὰ δὲ χρόα καλὸν ἀμύξηι.

15

ἃ δὲ καὶ αὐτόθε τοι διαθρύπτεται· ὡς ἀπ᾽ ἀκάνθας

ταὶ καπυραὶ χαῖται, τὸ καλὸν θέρος ἁνίκα φρύγει,

καὶ φεύγει φιλέοντα καὶ οὐ φιλέοντα διώκει,

καὶ τὸν ἀπὸ γραμμᾶς κινεῖ λίθον· ἦ γὰρ ἔρωτι

πολλάκις, ὦ Πολύφαμε, τὰ μὴ καλὰ καλὰ πέφανται.

20

τῶι δ᾽ ἔπι Δαμοίτας ἀνεβάλλετο καὶ τάδ᾽ ἄειδεν·

ΔΑΜΟΙΤΑΣ

Εἶδον ναὶ τὸν Πᾶνα, τὸ ποίμνιον ἁνίκ᾽ ἔβαλλε,

κοὔ μ᾽ ἔλαθ᾽, οὐ τὸν ἐμὸν τὸν ἕνα γλυκὺν (ὧι ποθορῶιμι

ἐς τέλος, αὐτὰρ ὁ μάντις ὁ Τήλεμος ἔχθρ᾽ ἀγορεύων

ἐχθρὰ φέροιτο ποτὶ οἶκον, ὅπως τεκέεσσι φυλάσσοι),

25

ἀλλὰ καὶ αὐτὸς ἐγὼ κνίζων πάλιν οὐ ποθόρημι,

ἀλλ᾽ ἄλλαν τινὰ φαμὶ γυναῖκ᾽ ἔχεν· ἃ δ᾽ ἀΐοισα

ζαλοῖ μ᾽, ὦ Παιάν, καὶ τάκεται, ἐκ δὲ θαλάσσας

οἰστρεῖ παπταίνοισα ποτ᾽ ἄντρα τε καὶ ποτὶ ποίμνας.

σίξα δ᾽ ὑλακτεῖν νιν καὶ τᾶι κυνί· καὶ γὰρ ὅκ᾽ ἤρων

30

αὐτᾶς, ἐκνυζεῖτο ποτ᾽ ἰσχία ῥύγχος ἔχοισα.

ταῦτα δ᾽ ἴσως ἐσορῶσα ποεῦντά με πολλάκι πεμψεῖ

ἄγγελον. αὐτὰρ ἐγὼ κλαιξῶ θύρας, ἔστε κ᾽ ὀμόσσηι

αὐτά μοι στορεσεῖν καλὰ δέμνια τᾶσδ᾽ ἐπὶ νάσω.

καὶ γάρ θην οὐδ᾽ εἶδος ἔχω κακόν, ὥς με λέγοντι.

35

ἦ γὰρ πρᾶν ἐς πόντον ἐσέβλεπον, ἦς δὲ γαλάνα,

καὶ καλὰ μὲν τὰ γένεια, καλὰ δέ μευ ἁ μία κώρα,

ὡς παρ᾽ ἐμὶν κέκριται, κατεφαίνετο, τῶν δέ τ᾽ ὀδόντων

λευκοτέρα αὐγὰν Παρίας ὑπέφαινε λίθοιο.

ὡς μὴ βασκανθῶ δέ, τρὶς εἰς ἐμὸν ἔπτυσα κόλπον·

40

ταῦτα γὰρ ἁ γραία με Κοτυτταρὶς ἐξεδίδαξε.

[ἃ πρᾶν ἀμάντεσσι παρ᾽ Ἱπποκίωνι ποταύλει].

Τόσσ᾽ εἰπὼν τὸν Δάφνιν ὁ Δαμοίτας ἐφίλησε,

χὢ μὲν τῶι σύριγγ᾽, ὃ δὲ τῶι καλὸν αὐλὸν ἔδωκεν.

αὔλει Δαμοίτας, σύρισδε δὲ Δάφνις ὁ βούτας·

45

ὠρχεῦντ᾽ ἐν μαλακᾶι ταὶ πόρτιες αὐτίκα ποίαι.

νίκη μὰν οὐδάλλος, ἀνήσσατοι δ᾽ ἐγένοντο.