Carminum liber primus

Carmen XXIII

___________________________________________________

Metrum:

Asclepiadeum tertium

Vitas inuleo me similis, Chloe,

quaerenti pavidam montibus aviis

matrem non sine vano

aurarum et siluae metu.

5

nam seu mobilibus veris inhorruit

adventus foliis seu virides rubum

dimovere lacertae,

et corde et genibus tremit.

atqui non ego te tigris ut aspera

10

Gaetulusve leo frangere persequor:

tandem desine matrem

tempestiva sequi viro.