BIBLIOTHECA AUGUSTANA

 

Q. Horatius Flaccus

65 - 8 a. Chr. n.

 

Carminum liber tertius

 

Carmen XV

 

___________________________________________________

 

 

 

Metrum:

Asclepiadeum quartum

 

Uxor pauperis Ibyci,

tandem nequitiae fige modum tuae

famosisque laboribus;

maturo propior desine funeri

 

5

inter ludere virgines

et stellis nebulam spargere candidis.

non, siquid Pholoen satis,

et te, Chlori, decet: filia rectius

 

expugnat iuvenum domos,

10

pulso Thyias uti concita tympano.

illam cogit amor Nothi

lascivae similem ludere capreae:

 

te lanae prope nobilem

tonsae Luceriam, non citharae decent

15

nec flos purpureus rosae

nec poti vetulam faece tenus cadi.