Incerti auctoris priapea

Textus priapei I:

Tibull und sein Kreis

latine et germanice

ed. W. Willige, München 1966

Textus priapei II:

Carmina Priapea

Gedichte an den Gartengott

latine et germanice

ed. Bernhard Kytzler, tr. Carl Fischer

Zürich/München 1978

___________________________________________________

Priapeum I

Vilicus aerari quondam, nunc cultor agelli

 Haec tibi Perspectus templa, Priape, dico

Pro quibus officiis, si fas est, sancte, paciscor,

 Assiduus custos ruris ut esse velis,

5

Improbus ut siquis nostrum violabit agellum,

 Hunc tu, sed tento - scis, puto, quod sequitur.

Priapeum II

Quid hoc novi est? quid ira nuntiat deum?

Silente nocte candidus mihi puer

Tepente cum iaceret abditus sinu,

Venus fuit quieta, nec viriliter

5

Iners senile penis extulit caput.

Placet, Priape, qui sub arboris coma

Soles sacrum revincte pampino caput

Ruber sedere cum rubente fascino?

At, o Triballe, saepe floribus novis

10

Tuas sine arte deligavimus comas

Abegimusque voce saepe, cum tibi

Senexve corvus impigerve graculus

Sacrum feriret ore corneo caput.

Vale, nefande destitutor inguinum,

15

Vale, Priape: debeo tibi nihil.

Iacebis inter arva pallidus situ,

Canisque saeva susque ligneo tibi

Lutosus affricabit oblitum latus.

At, o sceleste penis, o meum malum,

20

Gravi piaque lege noxiam lues.

Licet querare: nec tibi tener puer

Patebit ullus, intremente qui toro

Iuvante verset arte mobilem natem,

Puella nec iocosa te levi manu

25

Fovebit apprimetve lucidum femur.

Bidens amica Romuli senis memor

Paratur, inter atra cuius inguina

Latet iacente pantice abditus specus

Vagaque pelle tectus +annuo+ gelu

30

Araneosus obsidet forem situs.

Tibi haec paratur, ut tuum ter aut quater

Voret profunda fossa lubricum caput.

Licebit aeger, angue lentior, cubes,

Tereris usque, donec, ah miser miser,

35

Triplexque quadruplexque compleas specum.

Superbia ista proderit nihil, simul

Vagum sonante merseris luto caput.

Quid est, iners? pigetne lentitudinis?

Licebit hoc inultus auferas semel:

40

Sed ille cum redibit aureus puer,

Simul sonante senseris iter pede,

Rigente nervus excubet lubidine

Et inquietus inguina arrigat tumor

Neque incitare cesset usque dum mihi

45

Venus iocosa molle ruperit latus.