Hymnus II

Textus:

Sedulii opera omnia

(Corpus scriptorum ecclesiasticorum latinorum, vol. X)

ed. Iohannes Huemer, Vindibonae 1885

(Litteras u et v separavi - U.H.)

____________________________________________________________

Hymnus II.

A solis ortus cardine

Adusque terrae limitem

Christum canamus principem,

Natum Maria virgine.

5

Beatus auctor saeculi

Servile corpus induit,

Ut carne carnem liberans

Non perderet quos condidit.

Clausae parentis viscera

10

Caelestis intrat gratia,

Venter puellae baiulat

Secreta quae non noverat.

Domus pudici pectoris

Templum repente fit Dei,

15

Intacta nesciens virum

Verbo creavit filium.

Enixa est puerpera

Quem Gabrihel predixerat,

Quem matris alvo gestiens

20

Clausus Iohannes senserat.

Faeno iacere pertulit,

Praesepe non abhorruit,

Parvoque lacte pastus est,

Per quem nec ales esurit.

25

Gaudet chorus caelestium,

Et angeli canunt Deum,

Palamque fit pastoribus

Pastor creatorque omnium.

Hostis Herodes impie,

30

Christum venire quid times?

Non eripit mortalia

Qui regna dat caelestia.

Ibant magi qua venerant,

Stellam sequentes praeviam;

35

Lumen requirunt lumine,

Deum fatentur munere.

Katerva matrum personat,

Conlisa deflens pignora,

Quorum tyrannus milia

40

Christo sacravit victimam.

Lavacra puri gurgitis

Caelestis agnus attigit,

Peccata qui mundi tulit

Nos abluendo sustulit.

45

Miraculis dedit fidem

Habere se Deum patrem,

Infirma sanans corpora

Et suscitans cadavera.

Novum genus potentiae:

50

Aquae rubescunt hydriae,

Vinumque iussa fundere

Mutavit unda originem.

Orat salutem servulo

Nixus genu centurio,

55

Credentis ardor plurimus

Extinxit ignes febrium.

Petrus per undas ambulat

Christi levatus dextera:

Natura quam negaverat

60

Fides paravit semitam.

Quarta die iam fetidus

Vitam recepit Lazarus,

Mortisque liber vinculis

Factus superstes est sibi.

65

Rivos cruoris torridi

Contacta vestis obstruit,

Fletu rigante supplicis

Arent fluenta sanguinis.

Solutus omni corpore,

70

Iussus repente surgere,

Suis vicissim gressibus

Aeger vehebat lectulum.

Tunc ille Iudas carnifex

Ausus magistrum tradere,

75

Pacem ferebat osculo,

Quam non habebat pectore.

Verax datur fallacibus,

Pium flagellat impius,

Crucique fixus innocens

80

Coniunctus est latronibus.

Xeromyrrham post sabbatum

Quaedam vehebant compares,

Quas adlocutus angelus

Vivum sepulchro non tegi.

85

Ymnis venite dulcibus,

Omnes canamus subditum

Christi triumpho tartarum,

Qui nos redemit venditus.

Zelum draconis invidi

90

Et os leonis pessimi

Calcavit unicus Dei

Seseque caelis reddidit.