Dialogi de vita et miraculis

patrum Italicorum

Liber II

_________________________________________________________

Caput XXX

De monacho

a daemone liberato.

Quadam die dum ad beati Joannis oratorium, quod in ipsa mantis celsitudine situm est, pergeret, ei antiquus hostis in mulomedici specie ¹⁾ obviam factus est, cornu et tripedicam ²⁾ ferens. Quem cum requisisset, dicens: Quo vadis ³⁾? ille respondit: Ecce ad fratres vado potionem eis dare. Itaque perrexit venerabilis [0188B] Pater Benedictus ad orationem; qua completa concitus rediit. Malignus vero spiritus unum seniorem monachum invenit aquam haurientem, in quem statim ingressus est, eumque in terram projecit, et vehementissime vexavit. Quem cum vir Dei ab oratione rediens tam crudeliter vexari conspiceret, ei solummodo alapam dedit, et malignum ab eo spiritum protinus excussit, ita ut ad eum redire ulterius non auderet.

Petrus. Velim nosse, si haec tanta miracula virtute semper orationis impetrabat, an aliquando etiam solo voluntatis exhibebat nutu.

Gregorius. Qui devota mente Deo adhaerent, cum rerum necessitas exposcit, exhibere signa modo utroque [0188C] solent, ut mira quaeque aliquando ex prece faciant, aliquando ex potestate. Cum enim Joannes dicat: Quotquot autem receperunt eum, dedit eis potestatem filios Dei fieri (Joan. I, 12) . Qui filii Dei ⁴⁾ ex potestate sunt, quid mirum si signa facere ex potestate valeant? Quia enim utroque modo miracula exhibeant, testatur Petrus (Act. IX) , qui Thabitham mortuam orando suscitavit, Ananiam vero et Sapphiram (Act. V) mentientes morti increpando tradidit. Neque enim orasse in eorum exstinctione legitur, sed solummodo culpam quam perpetraverant increpasse. Constat ergo quod aliquando haec ex potestate, aliquando vero exhibent ex postulatione, dum et istis vitam increpando abstulit, et illi reddidit [0188D] orando. Nam duo quoque fidelis famuli Dei Benedicti facta nunc replico, in quibus aperte clareat, aliud hunc accepta divinitus ex potestate, aliud ex oratione potuisse.

――――――――

1) [0187D] Longip., sedens in mulo in medici specie. Consentit Val-cl. Hunc locum restituimus ex mss. et ex [0188D] Versione Graeca quae veterinarium seu equorum medicum habet. Sane hic apparatus omnis veterinarii describitur, tripedica seu triplex pedica qua pedes equorum impediantur, et cornu quo aegris jumentis potio seu medicina infunditur. 

2) [0188D] In Germ. et Longip., quibus concinit ed. Gil., trepidicam. In primo Theod., tripedicum. 

3) [0188D] Germ. et pene omnes mss., ubi vadis? 

4) [0188D] Germ. et nonnulli Norm., quod si filii Dei.