BIBLIOTHECA AUGUSTANA

 

Gregorius Magnus

ca. 540 - 604

 

Sacramentarium Gregorianum

 

_________________________________________________________

 

 

 

31.

viii kalendas apriles id est xxv die mensis martii

adnuntiatio sanctae Mariae

 

Deus qui de beatae uirginis utero uerbum tuum angelo nuntiante carnem suscipere uoluisti: praesta supplicibus tuis, ut qui uere eam genetricem dei credimus, eius apud te intercessionibus adiuuemur: per.

Ad missas. Deus qui hodierna die uerbum tuum beatae uirginis aluo coadunare uoluisti: fac nos ita peragere, ut tibi placere ualeamus: per.

Super oblata. In mentibus nostris domine uerae fidei sacramenta confirma, ut qui conceptum de uirgine deum uerum et hominem confitemur, per eius salutiferae resurrectionis potentiam ad aeternam mereamur peruenire laetitiam: per.

Ad complendum. Gratiam tuam domine mentibus nostris infunde, ut qui angelo nuntiante Christi filii tui incarnationem cognouimus, per passionem eius et crucem ad resurrectionis gloriam perducamur: per.