Sacramentarium Gregorianum

_________________________________________________________

37.

Feria vi ad sanctos Iohannem et Paulum

Incoata ieiunia quaesumus domine benigno fauore prosequere, ut obseruantiam, quam corporaliter exhibemus, mentibus etiam sinceris exercere ualeamus: per.

Super oblata. Sacrificium domine obseruantiae paschalis offerimus: praesta quaesumus, ut tibi et mentes nostras reddat acceptas et continentiae promptioris nobis tribuat facultatem: per.

Ad complendum. Spiritum nobis domine tuae caritatis infunde, ut quos uno caelesti pane satiasti, tua facias pietate concordes: per.

Super populum. Tuere domine populum tuum et ab omnibus peccatis clementer emunda, quia nulla ei nocebit aduersitas, si nulla dominetur iniquitas: per.