Sacramentarium Gregorianum

_________________________________________________________

38.

In quadragesima ad sanctum Iohannem in lateranis

Deus qui ecclesiam tuam annua quadragesimali obseruatione purificas: praesta familiae tuae, ut quod a te obtinere abstinendo nititur, hoc bonis operibus exsequatur: per.

Super oblata. Sacrificium quadragesimalis initii sollemniter immolamus, te domine deprecantes, ut cum epularum restrictione carnalium a noxiis quoque uoluptatibus temperemur: per.

Ad complendum. Tui nos domine sacramenti libatio sancta restauret, et a uetustate purgatos in mysterii salutaris faciat transire consortium: per.

Ad uesperum. Da nobis quaesumus omnipotens deus, et aeternae promissionis gaudia quaerere et quaesita citius inuenire: per.

Ad fontes. Adesto quaesumus domine supplicationibus nostris, et in tua misericordia confidentes ab omni nos aduersitate custodi: per.