Sacramentarium Gregorianum

_________________________________________________________

50.

Feria vi ad sanctum Uitalem

Da quaesumus omnipotens deus, ut sacro nos purificante ieiunio sinceris mentibus ad sancta uentura facias peruenire: per.

Super oblata. Haec in nobis sacrificia deus et actione permaneant et operatione firmentur: per.

Ad complendum. Fac nos domine quaesumus accepto pignore salutis aeternae sic tendere congruenter, ut ad eam peruenire possimus: per.

Super populum. Da quaesumus domine populo tuo salutem mentis et corporis, ut bonis operibus inhaerendo tuae semper uirtutis mereantur protectione defendi: per.