Sacramentarium Gregorianum

_________________________________________________________

72.

Sabbato ad sanctum Petrum quando

helemosyna datur

Proficiat quaesumus domine plebs tibi dicata piae deuotionis affectu, ut sacris actionibus erudita, quanto maiestati tuae fit gratior, tanto donis potioribus augeatur: per.

Super oblata. Cunctis nos domine quaesumus reatibus et periculis propitiatus absolue, quos tantis mysteriis tribuis esse consortes: per.

Ad completa. Diuini satiati muneris largitate quaesumus domine deus noster, ut huius semper participatione uiuamus: per.

Super populum. Tueatur quaesumus domine dextera tua populum tuum deprecantem et purificatum dignanter erudiat, ut consolatione praesenti ad futura bona proficiat: per.