Sacramentarium Gregorianum

_________________________________________________________

74.

Feria ii ad sanctam Praxidem

Da quaesumus omnipotens deus, ut qui in tot aduersis ex nostra infirmitate deficimus, intercedente unigeniti filii tui passione respiremus: per.

Super oblata. Haec sacrificia nos omnipotens deus potenti uirtute mundatos ad suum faciant puriores uenire principium: per.

Ad completa. Praebeant nobis domine diuinum tua sancta feruorem, quo eorum pariter et actu delectemur et fructu: per.

Super populum. Adiuua nos deus salutaris noster, et ad beneficia recolenda quibus nos instaurare dignatus es tribue uenire gaudentes: per.