BIBLIOTHECA AUGUSTANA

 

Evangelistarium Sangallense

875 - 900

 

Evangelistarium

 

fol. 31v-32r

Lc. 11:14-28

 

____________________________________________________________

 

 

 

Manuscriptum

 

Ebdomada IIII

Sequentia sancti evangelii

secundum Lucam.

 

11:14

In illo tempore. Erat Ihesus eiiciens daemonium, et illud erat mutum. Et cum eiecisset daemonium, locutus est mutus, et admiratae sunt turbae.

11:15

Quidam autem ex eis dixerunt: In Beelzebub principe daemoniorum eiicit daemonia.

11:16

Et alii temptantes, signum de caelo quaerebant ab eo.

11:17

Ipse autem ut vidit cogitationes eorum, dixit eis: Omne regnum in seipsum divisum desolabitur, et domus supra domum cadet.

11:18

Si autem et Satanas in seipsum divisus est, quomodo stabit regnum ipsius? quia dicitis in Beelzebub me eiicere daemonia.

11:19

Si autem ego in Beelzebub eiicio daemonia: filii vestri in quo eiiciunt? ideo ipsi iudices vestri erunt.

11:20

Porro si in digito Dei eiicio daemonia: profecto pervenit in vos regnum Dei.

11:21

Cum fortis armatus custodit atrium suum, in pace sunt ea quae possidet.

11:22

Si autem fortior eo superveniens vicerit eum, universa arma eius auferet, in quibus confidebat, et spolia eius distribuet.

11:23

Qui non est mecum, adversum me est: et qui non colligit mecum, dispergit.

11:24

Cum immundus spiritus exierit de homine, ambulat per loca inaquosa, quaerens requiem: et non inveniens dicit: Revertar in domum meam unde exivi.

11:25

Et cum venerit, invenit scopis mundatam.

11:26

Et tunc vadit, et adsumit septem alios spiritus secum, nequiores se, et ingressi habitant ibi. Et sunt novissima hominis illius peiora prioribus.

11:27

Factum est autem, cum haec diceret: extollens vocem quaedam mulier de turba dixit illi: Beatus venter qui te portavit, et ubera quae suxisti.

11:28

At ille dixit: Quinimmo beati, qui audiunt verbum Dei et custodiunt illud.