Evangelistarium

fol. 40r-41v

Ih. 11:1-45

____________________________________________________________

Manuscriptum

Feria VI

Sequentia sancti evangelii

secundum Iohannem.

11:1

In illo tempore. Erat quidam languens Lazarus a Bethania, de castello Mariae et Marthae sororis eius.

11:2

Maria autem erat quae unxit Dominum unguento, et extersit pedes eius capillis suis: cuius frater Lazarus infirmabatur.

11:3

Miserunt ergo sorores eius ad eum dicentes: Domine, ecce quem amas infirmatur.

11:4

Audiens autem Ihesus dixit eis: Infirmitas haec non est ad mortem, sed pro gloria Dei, ut glorificetur Filius Dei per eam.

11:5

Diligebat autem Ihesus Martham, et sororem eius Mariam, et Lazarum.

11:6

Ut ergo audivit quia infirmabatur, tunc quidem mansit in eodem loco duobus diebus;

11:7

deinde post haec dixit discipulis suis: Eamus in Iudaeam iterum.

11:8

Dicunt ei discipuli: Rabbi, nunc quaerebant te Judaei lapidare, et iterum vadis illuc?

11:9

Respondit Ihesus: Nonne duodecim horae sunt diei? Si quis ambulaverit in die, non offendit, quia lucem huius mundi videt:

11:10

si autem ambulaverit in nocte, offendit, quia lux non est in eo.

11:11

Haec ait, et post haec dixit eis: Lazarus amicus noster dormit: sed vado et a somno suscitem eum.

11:12

Dixerunt ergo discipuli eius: Domine, si dormit, salvus erit.

11:13

Dixerat autem Ihesus de morte eius: illi autem putaverunt quia de dormitione somni diceret.

11:14

Tunc dixit eis Ihesus manifeste: Lazarus mortuus est:

11:15

et gaudeo propter vos, ut credatis, quoniam non eram ibi, sed eamus ad eum.

11:16

Dixit ergo Thomas, qui dicitur Didymus, ad condiscipulos: Eamus et nos, ut moriamur cum eo.

11:17

Venit itaque Ihesus: et invenit eum quatuor dies iam in monumento habentem.

11:18

Erat autem Bethania iuxta Hierosolymam quasi stadiis quindecim.

11:19

Multi autem ex Iudaeis venerant ad Martham et Mariam, ut consolarentur eas de fratre suo.

11:20

Martha ergo ut audivit quia Ihesus venit, occurrit illi: Maria autem domi sedebat.

11:21

Dixit ergo Martha ad Ihesum: Domine, si fuisses hic, frater meus non fuisset mortuus:

11:22

sed et nunc scio quia quaecumque poposceris a Deo, dabit tibi Deus.

11:23

Dicit illi Ihesus: Resurget frater tuus.

11:24

Dicit ei Martha: Scio quia resurget in resurrectione in novissimo die.

11:25

Dixit ei Ihesus: Ego sum resurrectio et vita: qui credit in me, etiam si mortuus fuerit, vivet:

11:26

et omnis qui vivit et credit in me, non morietur in aeternum. Credis hoc?

11:27

Ait illi: Utique Domine, ego credidi quia tu es Christus, Filius Dei, qui in hunc mundum venisti.

11:28

Et cum haec dixisset, abiit, et vocavit Mariam sororem suam silentio, dicens: Magister adest, et vocat te.

11:29

At illa ut audivit, surgit cito, et venit ad eum;

11:30

nondum enim venerat Ihesus in castellum: sed erat adhuc in illo loco, ubi occurrerat ei Martha.

11:31

Iudaei igitur, qui erant cum ea in domo, et consolabantur eam, cum vidissent Mariam quia cito surrexit, et exiit, secuti sunt eam dicentes: Quia vadit ad monumentum, ut ploret ibi.

11:32

Maria ergo, cum venisset ubi erat Ihesus, videns eum, cecidit ad pedes eius, et dicit ei: Domine, si fuisses hic, non esset mortuus frater meus.

11:33

Ihesus ergo, ut vidit eam plorantem, et Iudaeos, qui venerant cum ea, plorantes, fremuit spiritu, et turbavit seipsum,

11:34

et dixit: Ubi posuistis eum? Dicunt ei: Domine, veni, et vide.

11:35

Et lacrimatus est Ihesus.

11:36

Dixerunt ergo Iudaei: Ecce quomodo amabat eum.

11:37

Quidam autem dixerunt ex ipsis: Non poterat hic, qui aperuit oculos caeci, facere ut hic non moreretur?

11:38

Ihesus ergo rursum fremens in semetipso, venit ad monumentum. Erat autem spelunca, et lapis superpositus erat ei.

11:39

Ait Ihesus: Tollite lapidem. Dicit ei Martha, soror eius qui mortuus fuerat: Domine, iam faetet, quatriduanus enim est.

11:40

Dicit ei Ihesus: Nonne dixi tibi quoniam si credideris, videbis gloriam Dei?

11:41

Tulerunt ergo lapidem: Ihesus autem, elevatis sursum oculis, dixit: Pater, gratias ago tibi quoniam audisti me.

11:42

Ego autem sciebam quia semper me audis, sed propter populum qui circumstat, dixi: ut credant quia tu me misisti.

11:43

Haec cum dixisset, voce magna clamavit: Lazare, veni foras.

11:44

Et statim prodiit qui fuerat mortuus, ligatus pedes, et manus institis, et facies illius sudario erat ligata. Dixit Ihesus eis: Solvite eum et sinite abire.

11:45

Multi ergo ex Iudaeis, qui venerant ad Mariam, et viderant quae fecit, crediderunt in eum.