<<< auctoris paginam



B  I  B  L  I  O  T  H  E  C  A    A  U  G  U  S  T  A  N  A
 
 
 
 
 
 
 
 
 
 
  Wipo
ante 1000 - post 1046

 
 
   
   



S e q u e n t i a   p a s c h a l i s

____________________________________
 
 
 
Victimae paschali laudes
immolent Christiani.

Agnus redemit oves:
Christus innocens patri
5
reconciliavit
peccatores.

Mors et vita duello
conflixere mirando,
dux vitae mortuus
10
regnat vivus.

«Dic nobis, Maria,
quid vidisti in via?»
«Sepulchrum Christi viventis
et gloriam resurgentis,

15
angelicos testes,
sudarium et vestes.
Surrexit Christus spes mea,
praecedet suos in Galilaea.»

Credendum est magis soli
20
Mariae veraci
quam Judaeorum turbae fallaci.

Scimus Christum surrexisse
a mortuis vere;
tu nobis, victor rex, miserere!


Melodia sequentiae
(mp3, ca. 320 kb)

____________________________________


Textus:
Wiponis Gesta Chuonradi II
ceteraque quae supersunt opera
ed. H. Bresslau, Hannover 1878/1915


 
 
 
 
<<< auctoris paginam