De diversis artibus libri III

Liber primus

____________________________________________________________

Caput XXXVI.

De cenobrio.

SI desideras cenobrium componere, tolles sulphur, cujus sunt tria genera, album, nigrum et croceum, quod frangens super lapidem siccum, adde ei duas partes vivi argenti, aequo pondere staterae; et cum diligentius miscueris, mitte in vitream ampullam, cooperiens eam ex omni parte argilla, et os obstrue, ne fumus exeat, et pone eam ad ignem ut siccetur. Deinde pone eam inter carbones ardentes, et mox cum coeperit calefieri, audies fragorem interius, quomodo se vivum argentum commiscet ardenti sulphuri; et cum sonus cessaverit, statim ejice ampullam et aperiens tolle colorem.