Vita S. Elisabeth

Liber III

________________________________________________________________

CAPUT I

De claris actibus Landgravii Ludewici,

conjugis sanctae Elisabeth

LIBRUM oportet hic annectere de Ludewico Principe glorioso Thuringorum, ut quemadmodum beatae Elizabeth in hac vita dignus habitus est consortio, ita nunc expers et alienus non sit ab ipsius laudis praeconio. Omnium namque beneficiorum ejus dulcis fautor, fidelis exhortator, et efficax extitit coadjutor. Sed virtutes ejus quis valet enarrare? quis virtutem animi? quis corporis ejus pulchritudinem explicet? Extulit eum mediocris staturae decens valde proceritas, et gratiosi vultus serenitas, speciosi forma prae filiis hominum imagine, ut aiunt, repraesentans. Nec erat, qui ejus aspectui amabili non haereret. Erat pudicus sensibus, carne mundus.

Qui die quadam stans de fenestra spectabat de subter ducentes choream. Cui astans aliquis, demonstrata una de ducentibus chorcas faeminis ait; Hujus amplexu si volueris, mi domine, frui te faciam. Tunc vehementer iratus Princeps, Obmutesce, inquit, et nunquam talia deinceps auribus meis inferas; si meam volueris gratiam et amicitiam retinere. Confusus a pudico ille miser impudicus, stupens tremuit, et obmutuit refutatus. Fuit insuper eloquio dulcis, moribus suavis, animo constans, et virilis, exercitiis militaribus strenuus, et agilis.