Vita S. Elisabeth

Liber VIII

________________________________________________________________

CAPUT VIII

De examinatione miraculorum

IGITUR pater sanctissimus Gregorius Papa nonus de transmissis a venerabili Seufrido Moguntino Archiepiscopo beatissimae Elizabeth miraculis facta examinatione diligenti, maturo nihilominus ac prudenti fretus consilio, et super omnia sancti Spiritus ordinante providentia, disponente clementia, praemonenteque gratia; decrevit beatam Elizabeth sanctorum in terris ascribendam catalogo, quae in vitae conscripta libro cum ipsis exultat in aeternae beatitudinis regno.

Lectis ergo coram omnibus, quae de sanctitate vitae et miraculorum gloria beatae Elizabeth fuerant recitanda; accensa multitudinis devotio in ejus canonizationem unanimiter et ardentissime declamavit.