Tractatus bipartitus de contractibus

Pars prima

________________________________________________________________

Capitulum VII.,

in quo arguitur, qui presunt pro eo, quod penuriis modis

quibus possunt non obviant

Verumtamen ubi et quando hac de causa accidit penuria in po|pulo, illi, qui presunt, necessitati communitatis succurrere debent et possunt diversis modis, videlicet precium rationabile secundum exigentiam rerum que habentur taxando, fraudes mensurarum puniendo, divites ut superflua vendant compellendo, mercatores ad regiones abundanter mittendo, rerum advectores utilium undecumque venerint admittendo, abductores rerum de civitate vel regione prohibendo, iterum inutiles de communitate ejiciendo, ociosos ad labores victui necessarios coercendo. His itaque aliisque talibus modis presides regionum et magistratus civitatum possunt notabiliter relevare inopiam, que ex defectu vel paupertate rerum utilium accidit communitati vel propter peccata vel aliunde. Ex quibus potest videri, quam perverse et impie agunt illi civitatum rectores, qui temporibus defectus rerum utlium, ut vini, bladi et similium, non procurant ut adducantur aliunde, sed nimium perversi prohibent adduci nedum vinum, sed et cervisiam, medonem et alios pauperum potus usque ad hoc, quod vix potus aque pauperibus permittitur, ut divites, qui presunt, vina sua et res ceteras tam care vendere possint sicut volunt, etc.