Epistolarum heroicarum libri III

Liber tertius

_________________________________________________________

Antonii Astensis

Epistolarum heroicarum incipit

prologus libri tercii.

Ad illustrem et inclitum principem dominum

Johannem, comitem angolismensem.

Cum me non fugiat, comes illustrissime, quod tu

Et legis et relegis carmina nostra libens,

Hoc ego constitui carmen tibi mittere, quod nunc

In patria cecinit nostra camena tua,

5

In quo descripsi quæ plurima digna relatu

Gallorum in terris visa fuere mihi.

Quod misi, princeps, idcirco libentius ad te,

Cui res est omnis Gallica nota magis,

Ut, si fortassis fuerim deceptus in illo,

10

Cernere et id valeas significare mihi,

Quo prius emendem quam doctas tendat ad aures,

Quam divulgetur carmen in ora virum.

Id facias, quæso, non solum propter amorem

Quo me prosequeris, sed bonitate tua:

15

Quo non est melior, quo non humanior alter,

Nec mage virtutis seu probitatis amans.

Non bene tornatum mihi sit fas reddere carmen

Incudi, et limæ supposuisse tuæ,

Quem non solum ornat rerum prudentia, sed qui

20

Doctus es, et doctas excolis usque deas.

Non vereor ne quis possit reprehendere nostros

Versus, si tanti principis ora probent.

Quod si forte meo facies, ut spero, rogatu,

Pro magno ascribas munere deinde mihi,

25

Qui tuus existo, qui viribus ardeo totis

Efficere acceptam rem tibi posse. Vale.