| |
|
- L i b r i o d a r u m q u a t t u o r
C o n r a d i C e l t i s
P r o t u c i i G e r m a n i
l i b e r p r i m u s c a r m i n u m
i n c i p i t f o e l i c i t e r .
I Ad Fridericum Caesarem pro laurea proseutice.
X De nocte et osculo Hasilinae, erotice.
XI Ad Sigismundum Fusilium Vratislaviensem: De his quod futurus philosophus scire debeat.
XVI Ad Sepulum dissidaemonem.
Textus:
Humanistische Lyrik
des 16. Jahrhunderts
ed. Wilhelm Kühlmann
und Christof Bodamer
Frankfurt am Main 1997.
Lateinische Gedichte
deutscher Humanisten
ed. Harry C. Schnur
Stuttgart 1966
- _______________________________________________
- Oda I
Ad Fridericum Caesarem pro laurea proseutice.
(ed. Kühlmann)
Caesar magnificis laudibus inclytus,
Rex regum, & dominus maxime principum.
Si quis prisca tuis tempora saeculis
Vel conferre velit regna prioribus,
- 5
- Non te crede queunt vincere gloria.
Te vivo redeunt aurea saecula,
Et pax atque fides, canaque sanctitas,
Et vitae integritas atque benignitas.
Germanis populis, te duce, maximus
- 10
- Laudis surgit honos, dum fugit horrida
Morum barbaries, foedaque saecula
Commutata nitent per vaga sidera.
Saltamus, canimus, nec male pingimus,
Et chordas resonas pollice tangimus.
- 15
- Nil nobis peregre est difficile, aut modo
Rimantes varijs artibus abditam
Naturae seriem, Dorica & Itala
Miscentes pariter non sine gloria.
Te vivo, latijs gloria litteris,
- 20
- Antiquumque decus iam redit artibus.
In lucem veniunt cum modo singula
Quae Grai & Latii condiderant viri,
Et quae Niliaco littore sederant,
Quique Euphratis habent conflua flumina:
- 25
- Hinc coelum omne patet, terraque cognita est,
Et quid quadrifidis continet angulis,
In lucem veniunt arte alemanica,
Quae praessis docuit scribere litteris.
Te vivo, Lyricos iam canimus modos,
- 30
- Et laudata viris plectra prioribus,
Concinnis fidibus pollice tangimus.
Qua virtutis honos, & meritum decus,
Cultum perpetuis temporibus manet,
Et semper viridi fronde repollulat.
- 35
- Hoc Grai studio nomen ad aethera
Fuderunt, Italis deinde sequacibus.
Et nos nunc facili tenuia barbito
Illorum celeres dum sequimur pedes,
Coelo sub rigido carmina spargimus,
- 40
- Dum vires dabis ac ingenium mihi,
Atque inculta probes si mea carmina,
Ornans laurigeris tempora frondibus,
Me gustasse putem nectar olympicum.
Oda X
De nocte et osculo Hasilinae, erotice.
(ed. Schnur)
Illa quam fueram beatus hora,
inter basia et osculationes,
contrectans teneras Hasae papillas,
et me nunc gremio inferens venusto,
- 5
- nunc stringens teneris suum lacertis
pectus, languidulo gemens amore.
Quod me in reciproco fovebat aestu,
cogens deinde suos meare in artus,
dum nostros animos per ora mixtos
- 10
- cum vinclis adamantinis ligavit
Diva ex caeruleo creata ponto.
O nox perpetuis decora stellis,
quae divum facies levas coruscas,
et fessis requiem refers salubrem.
- 5
- Nunc stes Herculeo velut sub ortu,
aut qualis Suetiis soles sub oris,
dum Phoebus pluvium revisit Austrum,
nullam per spatium bimestre lucem
fundit, perpetuas ferens tenebras,
- 20
- sic fervens satiabitur voluptas.
Oda XI
Ad Sigismundum Fusilium Vratislaviensem:
De his quod futurus philosophus scire debeat.
(ed. Schnur)
Fusili, binis mihi notus annis,
dum peragranti mihi Sarmatarum
terra lustratur gelido propinqua
frigida coelo,
- 5
- qua duas torpet polus inter ursas
arcticus pigro revolutus orbe,
gnosiae secum radiosa volvens
serta puellae,
candidos inter fueras amicos,
- 10
- cui dedit fidus patrium decoros
pectoris mores et honesta sanctae
pignora mentis.
Primus exosus fueras veternum
exutus scabras nitidus loquelas,
- 15
- barbaras voces et avita crassae
murmura linguae.
Iamque Romano erudiendus ore
induis pulchrum decus expetendo,
quae probant docti ingenuo calentes
- 20
- pectoris igne.
Sperne mendacis rabiosa vulgi
murmura indoctam fugiens catervam
et datum paucis poteris beatus
noscere verum.
- 25
- Magnus exemplo tibi sit Molossus.
Quem premunt vasto fremitu catelli,
ille sed serpit tacitus minorum
murmura temnens.
Perge tres sacras modo nosse linguas,
- 30
- quae tibi magnum tribuent honorem,
cum Palestina Latioque claro
Cecrope scriptam.
Perge confusum chaos intueri,
qua scatent pulchris elementa formis
- 35
- sorte discordi et reditura versant
semina mundi.
Perge consurgens animo volucri
singulis rebus reperire causas,
flabra ventorum refer et furentis
- 40
- aequoris aestus.
Perge cur terrae quatiente motu
concidant urbes trepidentque montes,
ignium cur diluviis aquarum
regna laborent.
- 45
- Perge cur caecae generent cavernae
sulphura et pulchris scateant metallis,
curque languentum reparent calentes
corpora thermae.
Perge cur tanto crepitet fragore
- 50
- nubibus coeli eiaculatus ignis,
imbris, et lentae nivis et gelatae
grandinis iras.
Perge diverso expatiata motu
sidera et Phoebi referens labores
- 55
- lurido vultu sibi cum fugavit
Cynthia currus.
Perge convexo fugitiva coelo
astra mirari, geminum cubile
solis inquirens alioque gentes
- 60
- orbe sepultas.
Perge diffusos populos per orbem
dicere, et linguas, hominumque mores,
quo situ coeli teneant volantem
aere terram.
- 65
- Perge priscorum relegens virorum
gesta, Tarpeio celebrata Colle,
quicquid et claris Macedum triumphis
Graecia gessit.
Perge fortunae instabilis favorem
- 70
- spernere et duros tolerare casus,
et tibi cuncti fugient beato
tempore soles.
Perge virtutis generosus arctum
et perangustum superare callem,
- 75
- illa securam tibi sola donat
ducere vitam.
Sola coelesti faciat beatum
sede promittens placidos honores,
nec sinit taetras Stygii timere
- 80
- carceris umbras.
Oda XVI
Ad Sepulum dissidaemonem.
(ed. Schnur)
Miraris nullis templis mea labra moveri
murmure dentifrago.
Est ratio, taciti quia cernunt pectoris ora
numina magna poli.
- 5
- Miraris videas raris me templa deorum
passibus obterere.
Est deus in nobis, non est quod numina pictis
aedibus intuear.
Miraris campos liquidos Phoebumque calentem
- 10
- me cupidum expetere.
Hic mihi magna Iovis subit omnipotentis imago,
templaque summa dei.
Silva placet musis, urbs est inimica poetis
et male sana cohors.
- 15
- I nunc, et stolidis deride numina verbis
nostra, procax Sepule.
|
|