De imitatione Christi

Liber internae

consolationis.

[Liber III]

____________________________________________________________

CONTRA LINGVAS

OBTRECTATORVM.

CAPITVLVM  XXVIII.

Fili. Non aegre feras si quidam de te male senserint: et dixerint quod non libenter audias. Tu deteriora de te ipso sentire debes: et neminem infirmiorem te credere. Si ambulas ab intra: non multum ponderabis volantia verba. Est non parva prudentia silere in tempore malo et introrsus ad me converti: nec humano iudicio disturbari. Non sit pax tua in ore hominum. Sive enim bene sive male interpretati fuerint: non es ideo alter homo. Vbi est vera pax et vera gloria? Nonne in me? Et qui non appetit hominibus placere nec timet displicere: multa perfruetur pace. Ex inordinato amore et vano timore: oritur omnis inquietudo cordis et distractio sensuum.