Hieronymi Cardani

de propria vita liber

____________________________________________________________________________

capvt xxiv

Domus

―――――

Infans Mediolani in porta Ticinensi loco qui dicitur uia arenae, post in uia Mayni e regione arcis, et in propinquo in domo Lazari Soncini medici, dum essem puer paruulus; adolescentulus in uia Rouellorum in domo Hieronymi Hermenulfi, post in domo Cusanorum; adolescens et usque ad XIX annum in domo Alexandri Cardani.

Papiae ad Sanctum Ioannem in Burgo, ad Sanctam Mariam ad Venerem in domo Cataneorum, et ad Sanctum Gregorium in Monfalcono in Burgoliate, inde prope scholas, prope Ceranouam, procuratorem, et exinde in domo mea quam emi iuxta templum B. Mariae in Pertica.

Bononiae autem in uia Gombru, inde in Galera in domo Ranutii, post in domo mea quam emi prope Sanctum Ioannem in Monte. Romae ad Populum, in area B. Hieronymi, prope curiam Sabellam, inde in uia Iulia prope B. Mariam Montis Serrati.

Antea uero Mediolani in domo quam emerat mater iuxta templum B. Michaelis ad Clusiam, inde in P. Orientali, post ad Quinque uias inde, exaedificata domo quae erruerat, redii ad B. Michaelem.