Lectio XXXI

Grammatica

Morphologia:

Declinatio tertia sive consonantica: neutra.

―――――――――――――――――――――

1. Fratri meo nomen est Felix, sorori nomen Beata. Parentes optant, ut nomina omina sint.

2. Quattuor sunt tempora anni: ver, aestas, autumnus, hiems. Varia sunt munera temporum

anni. Senes tempus aestatis amant, iuvenibus etiam hiems cara est.

3. Graeci ad honorem Iovis certamina Olympia celebrabant; Pindarus, poeta Graeci generis,

victores certaminum carminibus celebravit.

―――――――

De principibus comitibusque Germanorum.

Tacitus, rerum scriptor Romanus, multa de maioribus nostris narravit. Principes Germanorum in bello plerumque magnam multitudinem comitum secum habebant. Multos comites habere non modo ius, sed etiam magnum decus erat. Comites una cum principibus pugnabant et periculum a capite principis arcebant. Vulnera in pectore habere honestum erat, in tergo habere inhonestum.

Etiam in pace comites corporum robur exercebant; erant varia certamina virtutis, velut armorum vel pedum. Princeps comitibus victum praebebat et eos multis et magnis muneribus donabat. Inter cenam laeti sermones habebantur, et poetae carminibus facinora et nomina principis et comitum celebrabant. Memoria nominum clarorum eo modo diuturna fuit.

―――――――

Nomen est omen.

―――――――

Vocabularium

nōmen, -inis n.

ōmen, -inis n.

tempus, -oris n.

vēr, vēris n.

mūnus, -eris n.

certāmen, -inis n. [certāre]

genus, -eris n.

carmen, -inis n.

iūs, -iūris n. [iūstus]

decus, -oris n. [decorāre]

caput, -itis n.

vulnus, -eris n.

pectus, -oris n.

corpus, -oris n.

rōbur, -oris n.

facinus, -oris n.

aestās, -ātis  f.

autumnus

hiems, -mis  f.

senex, -nis m. [senātus]

iuvenis, -nis m.

scrīptor, -ōris m.

scrīptor rerum = historicus

maiōrēs, -um

princeps, -ipis m.

comes, -itis m.

comitēs, -um

pēs, pedis m.

varius, -a, -um

inhonestus, -a, -um

diūturnus, -a, -um [diū]

Fēlix, -īcis

Pindarus (518 - post 446 a. Chr. n.)

Dictionarium latine-anglice