BIBLIOTHECA AUGUSTANA

 

La Danse Macabre

1485

 

La Danse Macabre

 

Tableau XVII

 

______________________________________________________________________________

 

 

 

 

 

Le mort.

Passes cure sans plus songer

Je sens questez abandonne

Le vif le mort solies menger

Mais vous seres aux vers donne.

Vous futes iadis ordonne

Miroer dautrny et exemplaire

De vous fais seres guerdonne

A toute painne est deu salaire.

 

 

Le cure.

Veuille ou non il fault que me rende

Il nest homme que mort nassaille

Hee / de mes parrosiens offrende

Nauray iamais ne funeraille

Devant le iuge fault que ie aille

Rendre compte las doloreux

Or ay ie grant peur que ne faille:

Qui dieu quitte bien est eureux.

 

Le mort.

Laboureur qui en soing et painne

Avez vescu tout votre temps

Morir fault / cest chose certainne

Reculler ny vault ne contens

De mort deves estre contens

Car de grant soussy vous delivre

Approchez vous ie vous actens

Folz est qui cuyde tousiours vivre.

 

 

Le laboureur.

La mort ay souhaite souuent

Mais volentier ie la fuisse

Jamasse mieulx fist pluye ou vent

Estre es vignes ou ie fouisse

Encor plus grant plaisir y prisse

Car ie pers de peur tout propos

Or nest il qui de ce pas ysse:

Au monde na point de repos.