Balade des menus propos

1458

Texte:

François Villon, Oeuvres

Édition critique avec notices et glossaire

par Louis Thuasne, Paris: Auguste Picard 1923

Fac-similé: Internet Archive

__________________________________________________________________________________

Balade des menus propos

Je congnois bien mouches en let,

Je congnois a la robe l'omme,

Je congnois le beau temps du let,

4

Je congnois au pommier la pomme,

Je congnois l'arbre a veoir la gomme,

Je congnois quant tout est de mesmes,

Je congnois qui besongne ou chomme,

8

Je congnois tout, fors que moy mesmes.

Je congnois pourpoint au colet,

Je congnois le moyne a la gonne,

Je congnois le maistre au varlet,

12

Je congnois au voille la nonne,

Je congnois quant pipeur jargonne,

Je congnois fols nourris de cresmes,

Je congnois le vin a la tonne,

16

Je congnois tout, fors que moy mesmes.

Je congnois cheval et mulet,

Je congnois leur charge et leur somme,

Je congnois Bietris et Belet,

20

Je congnois get qui nombre et somme,

Je congnois vision et somme,

Je congnois la faulte des Boesmes,

Je congnois le povoir de Romme,

24

Je congnois tout, fors que moy mesmes.

Prince, je congnois tout en somme,

Je congnois coulourez et blesmes,

Je congnois Mort qui tout consomme,

28

Je congnois tout, fors que moy mesmes.