BIBLIOTHECA AUGUSTANA

 

Heliand

um 830

 

Heliand

 

Fitte LVI

 

______________________________________________________________________________

 

 

 

Giuuêt imu thô ût thanen| inuuideas gern

Iudas gangan:| habde imu grimmen hugi

4630

thegan uui{d} is thiodan.| Uuas thô iu thiustri naht,

suî{d}o gisuorken.| Sunu drohtines

uuas ima [at] them gômun for{d}| endi is iungarun [thar]

uualdand uuîn endi brôd| uuîhide bê{d}iu,

hêlagode he{b}encuning,| mid is handun brak,

4635

gaf it undar them is iungarun| endi gode thancode,

sagde them ôlat,| [the] thar al giscôp,

uuerold endi uunnea,| endi sprak uuord manag:

«gilô{b}iot gi thes liohto», [qua{d} he],| «that thit is mîn lîchamo

endi mîn blôd sô same:| gi{b}u ik iu hêr bê{d}iu samad

4640

etan endi drinkan.| Thit ik an er{d}u scal

ge{b}an endi geotan| endi iu te godes rîkie

lôsien mid mînu lîchamen| an lîf êuuig,

an that himiles lioht.| Gihuggeat gi simlun,

that gi [thiu fulgangan],| thiu ik an thesun gômun dôn;

4645

mâriad thit [for] menegi:| thit is mahtig thing,

mid thius sculun gi iuuuomu drohtine| diuri{d}a frummien,

habbiad thit mîn te gihugdiun,| hêlag bili{d}i,

that it eldibarn| aftar lêstien,

uuaron an thesaru uueroldi,| that that uuitin alle,

4650

man o{b}ar thesan middilgard,| that it is thurh mîna minnea giduan

hêrron te huldi.| Gehuggiad gi [simlun,]

hueo ik iu hêr gebiudu,| that gi iuuuan brô{d}erskepi

fasto [frummiad:]| habbiad ferhtan hugi,

minniod iu an iuuuomu môde,| that that manno barn

4655

o{b}ar irminthiod| alle farstanden,

that gi [sind] gegnungo| iungaron mîne.

Ôk scal ik iu cû{d}ien,| huô hêr uuili craftag fîund,

hetteand herugrim,| umbi iuuuan hugi niusien,

[Satanas sel{b}o:| he cumid] iuuuaro seolono herod

4660

frôkno frêson.| Simlun gi fasto te gode

berad iuuua breost[githâht]:| ik scal an iuuuaru bedu standen,

that [iu] ni mugi the mênsca{d}o| môd getuîflean;

ik [fullêstiu iu] uui{d}er themu fîunde.| Ôk quam he herod giu frêson mîn,

thoh imu is uuilleon hêr| uuiht ne gistôdi,

4665

lio{b}es an [themu mînumu] lîchamon.| Nu [ni] uuilliu ik iu leng helen,

huat iu hêr nu sniumo scal| te sorgu gistanden:

gi sculun mi gesuîkan,| gesî{d}os mîne,

iuuues theganscepies,| êr than thius thiustrie naht

liudi farlî{d}a| endi eft lioht cume,

4670

morgan te [mannun].»| Thô uuar{d} môd gumon

suî{d}o gisuorken| endi sêr hugi,

hriuuig umbi iro herte| endi iro hêrron uuord

suî{d}o an sorgun.| Sîmon Petrus thô,

thegan uui{d} is thiodan| thrîst[uuordun] sprac

4675

bi huldi uui{d} is hêrron:| «thoh thi all thit heli{d}o folc», quathie,

«gisuîcan thîna gisî{d}os,| thoh ik sinnon mid thi

at allon thara{b}on| tholoian uuilliu.

Ik biun garo sinnon,| ef mi god lâti{d},

that ik an thînon fullêstie| fasto gistande;

4680

thoh sia thi an carcaries| clûstron hardo,

thesa liudi bilûcan,| thoh ist mi luttil tueo,

ne ik an them bendion mid thi| bîdan uuillie,

liggian mid thi [sô] lie{b}en;| ef sia thînes lî{b}es thann

thuru eggia nî{d}| âhtian [uuilliad,]

4685

frô mîn thie guodo,| ik gi{b}u mîn ferah furi thik

an uuâpno spil:| nis mi uuer{d} iouuiht

te bimî{d}anne,| sô lango sô mi mîn uuarod

hugi endi handcraft.»| Thuo sprak im eft is hêrro angegin:

«huat, thu thik biuuânis», [quathie,| «uuissaro] treuuono,

4690

thrîstero thingo:| thu ha{b}is thegnes hugi,

uuillion guodan.| Ik mah thi seggian, huô it thoh giuuer{d}an scal,

that thu uuir{d}is sô uuêkmuod,| thoh thu nu ni uuânies sô,

that thu thînes thiadnes te naht| thrîuuo farlôgnis

êr hanocrâdi| endi qui{d}is, thak ik thîn hêrro ni sî,

4695

ac thu farmanst mîna mundburd.»| Thuo sprac eft thie man angegin:

«ef it gio an uueroldi», quathie,| «giuuer{d}an muosti,

that ik samad midi thi| sueltan muosti,

dôian diurlîco,| thann ne uuur{d}i gio thie dag cuman,

that ik thîn farlôgnidi,| lie{b}o drohtin,

4700

gerno for theson Iu{d}eon.»| Thuo quâ{d}un alla thia iungron sô,

that sia thar an them [thingon mid im]| tholian uueldin.