Tristrant

Neid der Verwandten,

Fahrt nach dem Frauenhaar

(1337 - 1472)

_________________________________________________________________________________________

Dem koninge wart he sô lîp,

daz he dorch sînen willen nît

êlîches wîbes wolde plegin.

1340

he dâchte daz he den degin

wolde ze eime sone hân

und daz her im undirtân

sîn rîche wolde machen.

daz begunde sêre swachen

1345

des koninges nêste mâge.

dicke sie im an lâgen,

daz he ein wîp nême

di sînem namen wol gezême.

he sprach, daz he keine wolde:

1350

des wart âne scholde

Tristrant sêre geniden.

ouch en wart es nicht vormiden,

man sprach ez, daz er ez vornam,

ouch wânden etlîche man,

1355

daz ez wêre sîn rât:

und was es âne missetât.

Zu einem mâl frûnd unde man

gîngen vor den koning stân.

die bestin von dem lande

1360

die nâmen Tristrande

und gîngen mit im zu râte,

daz sie den koning alle bâtin,

daz he wolde nemen ein wîp.

do bescheide her in eine zît,

1365

daz her in sagite sînen mûd.

die rede dûchte sie alle gût,

daz he sô unzwîvellîche sprach,

wen he dicke bevorn jach,

daz her keine wolde.

1370

dô her kunden solde

waz sîn wille wêre,

dô saz der koning mêre

in sîme sale aleine;

sîn sorge was nicht cleine,

1375

wen he gar hertlîchen dâchte,

wie he die sîne brâchte

wîslîchen von der rede,

daz sie in woldin lân mit vrede,

wen he enwolde wîbes nît,

1380

ez wêre on leit adir lîp.

Dô begundin sich zwû swalen

bîzen in des koninges sale.

des wart der hêre geware

und sach ernstlîchin dare.

1385

diz merkit recht, wen ez ist wâr:

do entvîl in beidin ein hâr

daz was schône unde lang.

do gewan der koning den gedang

daz he daz wolde schauwin.

1390

«diz ist einer vrauwin»

sprach he selbe wedir sich,

«hie mit wil ich werin mich.

der wil ich zu wîbe gerin:

sie enmogen mich ir nicht geweren.

1395

wâ mit werte ich mich baz?

sie sîn mîme neben haz

dar umme daz he bederwe is,

doch bin ich selbe des gewis,

daz es im nicht moge geschadin.

1400

he sal doch mîn rîche habin,

daz sie im werden undirtân.»

seht, dô quam Tristrant gegân

und die hêren alle mede!

ein vorste ir allir rede tede,

1405

daz er sich lieze vorstân,

wie er ez wolde ane vân

um des rîches êre.

dô sprach der koning hêre

«ich habe hie einer vrauwin hâr,

1410

ich wil ûch sagin daz vor wâr:

die neme ich, ab daz mag gesîn,

wizzet des den willin mîn.

mag mir abir die nicht werdin,

sô ist nergin ûf der erdin

1415

keine die ich nemen welle:

ê wolde ich die helle

bûwen êwiglîche,

daz geloubit mir gelîche!»

Dô der koning diz gesprach,

1420

ez was den hêren ungemach

und vrâgetin, wer sie wêre.

dô sprach der koning hêre,

daz he des niht en wiste.

sie sprâchin «he wil uns mit listen

1425

von desir rede bringen,»

und sprâchin hêlingen,

ez wêre Tristrandes scholt,

der en wêre im nicht holt;

des hête he grôze sunde,

1430

daz her im nicht engunde

sîner êre und sînes vromen.

doch hêtin sie alle gerne vornomen,

wanne im daz hâr komen wêre:

die rede was in zû swêre.

1435

Tristrant der werde sprach dô

«wie tût ir, lîbir hêre, sô?

daz ir nicht nemet wîbes,

daz ist sorge mînes lîbes

und steit mir an der wâge.

1440

jâ redin ûwir mâge,

ir tût daz dorch den willin mîn.

ir sollit in nû tûn schîn,

daz ich ez ûch nî gerît.

ist ûch die vrauwe icht lîp

1445

dâ ir abe hât gesagit,

sie sî wîb adir magit,

ich gewinne sîn vromen adir schadin,

heizzet mir ein schif ladin

mit deme daz ich bedarf dar zû:

1450

ich wil ez dorch ûwern willen tûn

und wil sie wîte sûchin,

ab got des wil gerûchin,

daz ich sie vinde eteswâ.

des antwurtet mir daz hâr,

1455

daz ich sie irkenne dâ bî,

ab ich ummir kome dâ sie sî.

wen mir ûwir êre lîbir is

denne îmans, des sît gewis,

und wil ûwer gerne entgelten.»

1460

«daz mûze dir got vorgelten!»

sprach der koning rîche

und hîz im gar snellîche

ein gût schiffelîn berâtin

mit al dem daz he dar zû hâte.

1465

der trugsêze Tînas,

wol hundert ritter harnas

hîz he in daz schif tragin,

ouch wart der kîl wol beladin

mit golde und mit gewande.

1470

dô vûren mit Tristrande

wol hundert ritter dannen,

des koninges dînstmanne.