BIBLIOTHECA AUGUSTANA

 

Eilhart von Oberg

um 1170/80

 

 

Tristrant

 

Ankunft in Irland,

Bestechung des Marschalks

(1473 - 1618)

 

_________________________________________________________________________________________

 

 

 

Ez was eine grôze kintheit,

daz he sô michel erbeit

1475

bestunt umme den wint.

dô hûbin sie sich ûf den sint.

einen mânen vûrin sie ûf dem sê,

daz sie gesâgin nicht mê,

wen himel unde vlût.

1480

sie hâtin ellenthaftin mûd

und bestundin eine grôze nôd.

Tristrant dem stûrmanne entbôt

daz he Îrlant vormede,

ab he den tôd nicht gerne lede.

1485

he sprach «ich habez wol vornomen,

ab wir mit schiffen dare komen,

daz wir vorlîsen den lîp;

wir sullin sûchin ein wîp

und mûzen al die lant irjagin

1490

dar uns der kîl mag henne tragin

und dar man gerîten mag,

adir wir lebin noch den tag,

daz wir die vrauwin vinden.»

dô hûb sich von den winden

1495

ein stormwetir vreissam.

den kîl ez mit gewalt nam

und mit michellîcher macht

und warf in an der selbin nacht

rechte hen kein Îrlant

1500

vor eine borg an daz sant,

dâ Tristrant geheilet wart.

daz was ein engestlîche vart!

Dô der hêre sich besach,

zu sînen mannen he dô sprach

1505

«alhîr wart ich geheilet:

ich wêne wir sîn vorteilet,

daz uns sô leide geschê hie,

als mir dô lîbe irgie.

wen diz des koninges borg is

1510

in Îrland, des sît gewis,

wir bedorfen wol wîser sinne.

sulle wir komen hinnen,

daz mûz mit grôzin listen geschîn.

nû tût daz dorch den willin mîn

1515

und swîget ir algemeine

und lât mich redin aleine!

ich versûche, ab ich mit listen

uns den lîp mag gevristen.»

 

Dô der koning diz vornam,

1520

sêre he zurnen began,

daz der kîl sô nâhe lach.

zu sînem marschalke er daz sprach,

daz he des nicht vortrûge

und in die houbet abe slûge.

1525

des en torste he gelâzin nît,

iz wêre im leit adir lîp:

zu dem schiffe quam he gegân

und sagete den hêren sân,

he solde on den lîp nemen.

1530

«daz mag ûch obele gezemen»

sprach dô der hêre Tristrant

unde bôt om al zuhant

einen gûtin guldînen kop,

daz he vûre ûf den hof

1535

und dem koninge wolde sagen

sîne rede und sîne clage

und sie die wîle lîze lebin:

dar um wolde he im den kop gebin.

der marschalk in gewerte

1540

swes her an in begerte:

wen her war ein hobisch man.

den kop man her vore nam,

der marschalk den von in entvîng:

dar an he hobischeit begîng.

1545

dô sprach der hêre Tristrant

«wir sîn gekomen in diz lant,

sus sult ir dem koninge vorzellin,

ich und zwelfe mîner sellin

der allir tûrestin koufmanne.

1550

wir vûren ûz von Engellande.

wir hôrtin sagin mêre,

daz hie grôz hungir wêre

in disem koningrîche.

dô lûden wir flîzlîche

1555

zwelf kîle mit spîse:

die habe wir brâcht zu ûwir wîse,

und begundin her kêren.

wir meinten gût und êre

beide hie gewinnen.

1560

ez fûren lûte hinnen

die man sêre jagete:

der ein uns sagete,

swer dâ her quême,

daz man ime den lîp nême.

1565

Des begunden wir sêre clagin

den vil michellîchin schadin

den wir hâten vornomen:

sus kunde wir nicht zu rucke komen.

dô giengen wir ze râte

1570

daz wir ein urteil tâten

und dar umme worfin daz lôz

(des ist mîn rûwe wordin grôz),

ûf swen daz gevîle,

daz der mit sîme kîle

1575

fûre und versûchte,

ab man des hie gerûchte,

daz wir mit koufe vûren here.

mîne sellin swebin ûf dem mere.

die botschaft quam und vîl ûf mich.

1580

nû betit den koning rîch,

daz her uns lâze den lîp:

sô brenge wir im in korzir zît

dese gûte spîse allentsamen.

ouch solt ir im sagen mînen namen:

1585

ich bin geheizzin Tantris.»

dô was der marschalk gewis,

daz ez alsô wêre,

und sagete deme koninge mêre,

als im der koufman entbôt:

1590

des wart gelengit in der tôt.

dô lâgen die geste

mit sorgen vor der veste

biz ûf den mitten tag.

hôret wie ein ze dem andern sprach!

1595

«sal unsir nû ichein genesin,

der mûz ummir mêre wesin

in Îrlande gefangen.»

dô quam ein man gegangen,

der sagete Tristranden

1600

von einem serpande,

der vorterbete daz rîche,

und sprach wêrlîchen,

swer den serpand bestunde

und swem got der êren gunde

1605

daz her im den lîp nême,

daz im der koning gêbe

âne zwîbel die tochtir sîn.

dâ wart abir wol schîn

daz die unvorvêrte Tristrant

1610

was ein kûner wîgant.

he dâchte he wolde sînen lîp

wâgin um daz selbe wîp,

und ouch durch den willen,

daz die sîne gesellen

1615

mochten alsô genesen;

und dâchte im sulde lîbir wesin,

daz he von dem worme vortorbe,

den daz he âne wer irstorbe.