BIBLIOTHECA AUGUSTANA

 

Eilhart von Oberg

um 1170/80

 

 

Tristrant

 

Kampf mit dem Drachen

(1619 - 1685)

 

_________________________________________________________________________________________

 

 

 

Zu hant des morgenes vrû

1620

wâpente he sich dar zû

gar vlîziclîche

und reit vormezzenlîche

dâ he grôzen prîs gewan.

ûf dem velde sach he vunf man

1625

haldin an einer warte.

dar drabete he vil harte,

ûf die strâze vor sie.

dô sach he einen man vlien

swaz he mochte, wen im was gâch.

1630

deme reit he îlande nâch

und vîng in bî dem hâre

und vrâgete in offenbâre,

wer in sô harte jagete.

der man im schîre sagete,

1635

daz ez ein trache tête

der der lûte hête

in dem lande vel vorbrant.

«der komt mit zorne nû ze hant,

der wil mir den lîp nemen:

1640

hêre, lâzit mich entvlien deme,

daz ûch got ummir mûze lône!»

her hîz on varin schône

und vrâgete in, wâ he gîng.

zu om wîsete in der jungeling.

1645

Dô wart Tristrant wol geware,

wâ der serpant quam gevarin.

he reit in einen tîfen grunt

und hîlt stille biz an die stunt,

daz he nebin in quam.

1650

dô sprengte zu im der edele man.

daz sper stach he ûf im en zwei,

daz schatte dem trachen nicht ein ei. 

nû vornemet, wie her stêche:

eir he den schaft zubrêche,

1655

dô hâte he sîn swert in der hant.

joch brante im der serpant

sîn ros undir im tôd.

an lîf in der helt gût,

wen he sînes lîbes gerte.

1660

her heu in mit dem swerte

daz he an sîner hant trûg:

swâ he ez mit zorne slûg,

dar en mochte nicht vor bestân.

der helt dô den sige genam

1665

an dem trachin, der was grôz.

swie vele her des sint genôz,

her kouftez doch vil tûre,

wen he was von dem vûre

nâ zu tôde vorbrunnen.

1670

den sege hâte he gewunnen

mit menlîchir deginheit.

die zungin her im ûz sneit.

her stackte sie an sîne hûte;

und ist ûch wol zu mûte,

1675

sô mogit ir daz gerne losen:

dô kârte he zu einem mose,

dâ wolde he kûlen sich.

dô was der degin hêrlich

gewordin swarz als ein brant.

1680

ein kôlez spring he dô vant,

dâ legete sich der helt în,

he meinte he solde tôd sîn:

daz îsen hâte in sô vorbrant.

dô lach der hêre Tristrant

1685

in engestlîchin swêrin.