Tristrant

Antret und seine Gesellen

(3081 - 3216)

_________________________________________________________________________________________

Dar nâch in korzin stundin

dô wart âne wundin

Tristrant sêre vorsnetin.

nû merket rechte wâ mete:

3085

he wart besagit und belogin

von dren bôsin herzogin

und von vîr grâbin

die des koninges hofes plâgin.

ich wil ûch sagin umme waz:

3090

sie wârin im des gehaz

daz he mit schalle lebete

und nâch den êrin strebete

und daz beste ted zu allir zît:

dar umme hâtin sie den nît,

3095

wan sie wârin selbe nicht vrome.

sô ist daz sint vil dicke komen

und geschît manchem frumen man,

daz im der bôse nicht en gan

und sînen prîs zustôret.

3100

swen he in ergin lobin hôret,

mag he ez nicht wedir reden,

er gêt lîhte von dem wege

und sprichet «ez ist ein lugene.»

daz gezême ûch allin ubele,

3105

woldet ir daz rechte merkin;

wen mit sulchin werkin

selten nie kein man

prîs und êre gewan

alsô stêt an der minne.

3110

nurâ jungelinge,

gedenkit an die vromigheit

und lât ûch die bôsheit wesin leit!

swer gôt von herzin minnet

und nâch den êrin ringet,

3115

dem volgit selden unheil.

ouch mag her wol sîn teil

gewinnen, al des er bedarf.

ôwol in daz er î wart!

Swer bedirwe und getrûwe ist

3120

unde dan wîse list

mit setin an sîme herzin hât,

der mag des habin gûtin rât,

ab in die bôsen nîden.

sie mogen es nicht vormîden,

3125

sie mûzin im unwillig sîn;

sô ist im abir mîn trechtîn

und alle gûte lûte holt:

daz hât he dicke wol vorscholt

und noch alle tage tût.

3130

dennoch ist der bôsin mûd

sô harte zû im irbolgin,

wolden in die vromen volgin,

sie nêmen im gerne den lîp:

alsô michel ist der nît

3135

den die bôsin zû den gûten hân

um daz sie vromigheit begân.

Daz wart an Tristrande schîn.

dar um muste he genedin sîn

von den hêren die ich nande êr:

3140

he en hâte keine schult mêr,

wen daz he nâch den êren rang

und î zu vorderôst drang

swâ man manheit solde tûn,

wen he um êre unde rûm

3145

zu allin zîten gerne warp.

ouch was he milde biz he starp:

dar umme wârin sie im gehaz.

ouch was he geminnet baz

von dem koninge, den ir kein.

3150

dô wordin die sibene des in ein

daz sie im vornichtigen woldin

sînes hêren [des koninges] hulde,

und daz geschêge schiere.

von den sibenen viere

3155

die wârin im alsô gram:

die hâtin einen houbetman,

Antrêt der zage hîz.

sîn valsche in nicht lîz

nî nicht gûtis getûn.

3160

he was des koninges swestir son

und solde Tristrandes nebe sîn.

der tûfil senke in in den Rîn!

wan, swie he was sîn frûnt,

frûntschaft tet he im nicht kunt.

3165

Di bôsheit was im alsô lîp:

he lîz ez dorch die sebbe nît,

he rît im an sîn êre.

he gîng zu dem koninge hêre,

beide he und sîne gesellin,

3170

und begundin im vorzellin

nîdesch lugenmêre:

«ab ez dir, hêre, wêre

nicht leit, sô woldin wir dir sagin

swaz wir vornomen habin.

3175

wiltû nicht vordenkin mich,

Tristrant der wil hônen dich.

daz ist uns sebenen harte leit,

wen wir wizzen des die wârheit,

daz he minnet dîn wîp.

3180

dar umme sal he den lîp

vorlîsen ab got wil;

wen der schanden ist ze vil

die he dir alle tage tût.

ouch hâstû, hêre, dînen mûd

3185

zu sêre an in gelâzin.

daz dunket mir eine unmâze,

daz dû dorch einen man

uns alle wilt vor nicht hân:

daz dunket mir unmogelîch.»

3190

«nû swîg!» sprach der koning rîch

«nebe, als lîp wir dir sîn,

Tristrant sal uns wesen bî,

wen ich en mag sîn nicht entperen.

dû en darft des nimmir geren,

3195

daz ich im dorch dich werde gram.

den schadin den ich sîn î gewan

den mag ich lîchte vorclagin.

die schande wil ich ouch vordagin:

ich habe sîn vil dicke genomen

3200

beide êre unde vromen:

he wart dor mich tôdwunt

dô he Môroldin bestunt,

und behîlt mir mîne êre.

hête he mir nicht mêre

3205

gedienet wan daz eine,

sô mag er mir bescheine

trûwe unde gunst mê,

dan sît adir ê

ûwer kein ie getête:

3210

ich habe ouch sîner stête

dicke vil genozzen.

he was î unvordrozzen

zu tûne swaz ich im gebôt.

ich wil im lîp unde gût

3215

mete teilin die wîle ich lebe:

daz lâz dir lîp sîn, mîn nebe!»