BIBLIOTHECA AUGUSTANA

 

Eilhart von Oberg

um 1170/80

 

 

Tristrant

 

Das belauschte Stelldichein

(3277 - 3625)

 

_________________________________________________________________________________________

 

 

 

Nû wêne ich daz zwei herzen

gewunnen nie sô grôze smerze,

als dô sich die vil lîben

3280

sô unbesprochin schîden

und ein andir mîden soldin.

Tristrant dô wolde

rûmen daz lant sân.

mit sorgin quam her gegân

3285

vor sîne herbergen.

vor leide mochte er sterben.

im wart zu sîme herzin wê,

im dûchte daz he ez nimmir mê

vorwunne, rite he dannen.

3290

ouch was die koningîn bevangin

mit vil grôzir leide.

dâr lâgin sie abir beide,

daz sie nichtes entbizzen.

dô wart dem koninge zu wizzen

3295

daz Tristrant sîch wêre.

«daz ist mir gar unmêre»

sprach der koning rîche,

«wen he ungetrûwelîchin

wedir mich getân hât.»

3300

nu en mag des nicht werdin rât,

daz sie beide mûzin sterbin,

ir enmogit denne irwerbin

daz sie sich abir wedir sên.

râtet, wie mag daz geschên?

3305

wie wirt in des leides bûz?

ich wêne, Brangêne mûz

sie abir zu samene bringen.

dô clagete die koninginne

irer maget die grôzen swêre,

3310

daz sie des tôdis wêre,

sie en sêge den helt gût.

des gewan Brangêne swêren mûd.

dô muste sie abir schîre gân,

als sie dicke hâte vor getân,

3315

nâch hêren Tristrande.

dô sie dô quam gegangin,

lîse rûrte sie die tore.

Kurnevâl stunt dâ vore

und lîz sie dar în gân.

3320

dô sie daz hâte getân,

vor den hêren sie gîng.

minneglîche er sie entvîng:

«wie hât sich die koningîn?»

«obele, dorch den willen dîn:

3325

hête sie dich besprochin

und wêre gerochin

an den nîdêren

die or manche swêre

und grôz leit habin getân,

3330

sô wêre ir sîchtûm vorgân.»

 

Der rede her antworte

mit korzlîchem worte

«nû sage mîner vrauwin

daz ich dorch nîmans drauwin

3335

sie lengir wil vormîden.

ich en rûche wer ez nîde,

ich wil sie noch hînt gesên,

ab ez ummir mag geschên,

in ireme bômgartin:

3340

dar inne sal sie mîn wartin.

swen sô ir kumt gerunnen

ein loub in den brunnen

dorch ire kemenâte,

sô gê sie hin vil drâte

3345

und warte eines spâns dâ bî.

dar an sal gemâlet sîn

ein crûce mit vunf orten,

wen ich sie mit den worten

besprechin leidir nicht en mag.

3350

ez sî nacht adir tag,

swen sie daz crûce vinde,

sô bin ich bî der linde

die dâ bî deme brunnen stât

die dorch die kemenâten gât:

3355

diz sage dû der vrauwen mîn!»

dô hîz sie in gesunt sîn

und sagete irer vrauwin sô.

des wart die koninginne vrô

und hîz ir zu ezzene gebin.

3360

dô quam ir wedir daz lebin

von der grôzin unmacht.

Brangêne hâte ir brâcht

einen trang die ir lîp was,

dâ sie wol von genas.

3365

Von der lîben botschaft

quâmen sie in mittirnacht

in den bômgarten zu samene.

mit vroudin und mit gamene

vortriben sie di sorgen.

3370

Brangêne hâte in irworbin

daz sie beide in korzir stunt

wârin wordin gesunt.

die hûte sie zubrâchen

des nachtes sie sich besprâchen,

3375

îdoch lag Tristrant den tag

und clagete sîn ungemach

als ab he tôdsiech wêre.

der kûne helt mêre,

sîne heimlîcheit hal he harte

3380

und was in dem bômgarten

als dicke, als in des luste.

die nîdêre die musten

die minne abir zubrechin.

sie begundin zû ên ander sprechen,

3385

ab noch die koninginne

Tristranden gêbe ir minne.

«nein» sprach ir ein, der ander «jâ,»

der dritte «ich, hêre, zwîvel dâ.»

dô sprach sich Antrêt ir herre

3390

«hîr bî en ist nicht verre

ein getwerg, daz hât sulche list:

alliz daz geschên ist

adir ergin mag geschên,

daz kan he wol besên

3395

an dem gesterne, swen he wil.

dem gebe wir schatzes alsô vil,

daz her uns sage die wârheit.»

dô wârin sie des vil bereit

und worbin um daz mennelîn.

3400

dô quam der geselle sîn

den die lûte heizzin Satanâs,

und wîsete in recht wâ he was.

Do sie den getwerg vundin, 

und her in solde kundin,

3405

wie ez dar umme stunde,

der vâlant dô begunde

daz gesterne schauwin

und sprach «mîne vrauwin

Tristrant sicherlîchin hât:

3410

wil nû der koning mînen rât

tûn, ich wil in lâzin sên,

daz he mir daz mûz jên,

daz ich ûch wâr habe gesagit,

und ab ich loge, daz ir habit

3415

mînen lîp gewunnen

zu swelchin marterungen

sô mîn hêre welle.»

ich wêne, sîn geselle

der tûfil ûz im sprach,

3420

daz her es allis vorjach,

daz Tristrant wêre lugensiech.

her sprach «ne sî daz wâr niet,

sô heizzet mir mîn hôbit abe slân!»

dô brâchtin si in vor den koning sân

3425

und sageten, wie ez sich vormaz

«ich wil ûch bescheidin baz»

sprach der unholde;

«ab mîn hêre selbe wolde,

her mochte ez wol irvindin:

3430

he nême sîn gesinde

und rete jagin in den walt,

sô worde Tristrant sô balt,

daz he quême zû der vrauwin.

sô lîze ich in wol schauwin,

3435

wâ he zû ir quême,

und brêchte in daz he vornême

selbe wol die wârheit.»

daz was dem koninge rechte leit

und wart sêre irbolgin:

3440

des muste he im gevolgin

und gebôt al offinbâre

allen den [die] dâ wâren

daz sie sich bereitin dar zû:

he wolde des morgenes vrû

3445

in den walt rîten jagin,

und hîz in offinbâre sagin,

he wolde siben nacht ûze sîn: 

des vrauwete sich die koningîn.

Do der koning in den walt quam,

3450

und der vil cleine man

vil rechte hâte vornomen

daz Tristrant ze der vrauwen wolde komen,

her en wolde nicht lengir bîten,

den koning hîz her rîten

3455

dar mit im aleine

und wolde im bescheinen

swes he sich hête vormezzin.

do der koning ûf was gesezzin,

den getwerg he hinder sich nam.

3460

dô der hêre dar gequam,

dar in daz getwerg rîten bat,

und her im wîsete die stat,

dâ die linde bî dem brunnen stunt, 

«ich sage ûch, hêre, waz ir tûnt»

3465

sprach der bôse getwerg

«wir nehabin hîr anders kein geberg,

wene ir sulit her ûf stîgen

und sult rechte stille swîgen:

ûf desim selben bôme

3470

sule wir nemen gôme,

waz hie geschê von disen zwein.»

der mâne dô vil lîchte schein,

recht ab ez tag wêre.

dô hafte der koning mêre

3475

sîn ros dâ bî an ein rîs.

dô steig der koning wîs

ûf den boim als her in hîz.

daz getwerg des nicht en lîz,

her enstege im nâch dar ûf.

3480

ich wêne in sîn geselle hûf,

Satanâs der tûfel;

ich bin des âne zwîvel,

er hûb in sicherlîche,

wan her wil sîn rîche

3485

mit im hân gemeine.

wie mochte er in dan aleine

ûf den bôm stîgen lâzen?

daz si beide got verwâze!

Dâr ne stundin sie nicht lange.

3490

Tristrant quam gegangin.

des lôbes brach her in den vlîz,

den spân her ouch mete lîz

dar daz crûce ane was geschrebin.

der koning was belebin

3495

ûf dem boime und sîn gegate;

do irsach her Tristrant iren schatin

von dem mânen in dem brunnen:

dô was her des wol vorsunnen,

daz her nicht ûf en sach.

3500

wedir sich selbin he dô sprach

«nû mûz ich leidir tôd sîn.

eiâ, wuste die koningîn

dese hûte die uns ist getân!»

dô vlôz daz loup und der spân

3505

dorch die kemenâte.

die vrauwe dô vil drâte

zu ireme nezzelîne gîng,

dâ sie den spân mede vîng,

und begunde dez crûce schauwin.

3510

dô wuste wol die vrauwe

Tristranden in der warte;

sie îlete dô vil harte

dâ sie den kûnen helt vant.

dô saz der hêre Tristrant

3515

und wenkete alliz hindir sich.

«der rîche got beware mich» 

dâchte die koninginne,

«waz werret deme jungelinge,

daz her nicht ûf en steit

3520

und kegin mir al her geit:

des bin ich harte ungewone,

ich en weiz war abe daz kome.»

Do irsach sie daz wenkin

und begunde sân denkin

3525

«im werret swaz sô ez sî;

ich wêne, hîr ist etswer bî,

der unsir hîr hât gehût.»

dô wart ouch die vrauwe gût

der spegêre wol geware.

3530

der mâne trûg den schaten dare

in den brunnen von in zwein.

der vrawin wîsheit dâ schein,

daz sie ire ougen nî dar kârte

und rechte alsô gebârte,

3535

als ob sie es nicht en wiste,

und sprach mit grôzir liste

«Tristrant, waz sal ich her zû dir?»

«vrauwe, daz ir helfet mir,

daz mir mîn hêre sîne hulde gebe,

3540

und mich abir lâze lebin,

als ich eir was, in sîme hove.»

«ich wil dir zwâre gelovin:

dar zû en helfe ich dir nît,

wen mir ist von herzin lîp,

3545

daz dir mîn hêre gram is.

des wis sichir und gewis,

daz ich dir nicht dar zû vrome,

wen ich bin zu worte komen

von dir âne mîne scholt.

3550

ich was dir dorch mînen hêren holt,

wen dû sîn nebe wêrist

und im êre gebêrist

mêr wen die andern alle.

nû bin ich zu schalle

3555

von dir wordin âne nôt;

têde dir mîn hêre den tôd,

daz wêre mir zu lîbir wîs.»

«nein, vrauwe, dorch dînen prîs,

dû salt mich des genîzin lân,

3560

daz ich dorch dich geledin hân

manche grôze erbeit, 

und lâz dir doch wesin leit

daz he mir unrecht tût.

wiltû mir aleine wesin gût,

3565

sô wirt mir wol sîn hulde,

wen her âne schulde

gezornet hât wedir mich.»

dô sprach die koninginne rîch

«ich en helfe dir nicht dar zû.

3570

wil dir mîn hêre gnâde tûn,

des gan ich dir wol und ist mir lîp,

ich bete in abir dar umme nît.»

Dô sprach der hêre Tristrant

«sô mûz ich rûmen daz lant.

3575

swie wênig daz mîn hêre clage,

iedoch ne mag he den schadin

nimmir mêr vorwinnen,

ab ich mit unminnin

ûz sîme lande vare.

3580

es wirt gût rât: ich kome dare,

dâr man mir daz bûtet baz,

und mich die lûte âne haz

êren unde habin lîp.

mîn hêre wil gedenkin nît:

3585

swen ich zu lande kêre,

sô bin ich ein koning hêre

alsô rîche als he is.

ouch bin ich selbe des gewis,

wil ich belîbin andirswâ,

3590

daz man mich nicht vortrîbe dâ,

und aleine wol vordîne daz,

daz man mich schôner unde baz

haldit unde nicht en hazzet

und mit zênzig rittern vazzet,

3595

und gibit in ros unde pfert.

vrauwe, wêre ich wedir ûch des wert,

daz ir den koning woldit betin,

daz her ez dorch sîn êre tete

und lîze mir lôsen mîn pfant,

3600

sô wolde ich im al zuhant

rûmen sîn rîche.»

«nein ich, wêrlîchin.

ich bete in nicht umme dich,

wen he hât irzornet sich

3605

kein mir von dîner schulde:

daz dû sîne hulde

nimmer mêre gewinnest,

daz ist mir daz allir minnest.»

Dô gîng die vrauwe wedir în.

3610

«nû mûze gote leit sîn»

sprach Tristrant der helt gût,

«daz mir mîn hêre unrecht tût.»

zu herberge begunde her gân.

dô her ûz dem gartin quam,

3615

dô zoug der koning ûz sîn swert

und hête gerne daz getwerg

ûf dem boime ze tôde geslân.

dô vîl der cleine man

von dem boime unde vlô.

3620

dô wart der hêre vil vrô

des he gehôrt habete;

îdoch he harte clagete

daz im daz getwerg entrunnen was:

dô half im abir Satanâs,

3625

daz daz getwerg von im quam.