bibliotheca Augustana

BIBLIOTHECA AUGUSTANA

Hartmann von Aue

um 1160 - nach 1210

	Erec vollendet um 1185, nach Chrestien de Troyes Textgrundlage: Hartmann von Aue, Erec Hrsg.: Thomas Cramer, Frankfurt 1972
______________________________________________________________________________
	Der Anfang des Gedichts ist verloren. («Nach dem französischen Gedichte Christian's von Troies war der Inhalt des verloren gegangenen Eingange folgender: Um Ostern hält König Artus Hof zu Kardigan und beschließt den weißen Hirsch zu jagen. Vgl. Erec 1102. In seinem Gefolge befindet sich auch ein Ritter Namens Erec, der an der Tafelrunde großes Lob genießt. Er bietet der Königin Ginover, die hinten nachfolgt, seine Begleitung an, die sie dankbar annimmt; vgl. Bartsch in der Germania 7, 141.) Während der Reise bemerken sie in der Ferne einen Ritter nebst einer Dame und einem Zwerge. Die Königin entsendet eine ihrer Hofdamen, sich nach ihnen zu erkundigen. Diese wird aber von dem Zwerg hart angelassen und mit Geißelhieben zur Umkehr genöthigt. Nicht besser ergeht es Erec, als er sich dem Zwerge nähert. Da er unbewaffnet ist, kann er sich nicht gleich rächen; er beurlaubt sich von seiner Herrin und reitet den Fremden unbemerkt von Ferne nach. Auf Tulmein, der Burg des Herzogs Imain, gehen diese zur Herberge; dort soll ein großes Volksfest gehalten werden, bei welchem der fremde Ritter den Siegespreis für seine Dame zu gewinnen hofft. Erec findet weder auf der Burg noch in dem dabei gelegenen Marktflecken Herberge.» (nach F. Bechs Erec-Edition, Leipzig 1867). · · · · · · · · · · · · bî ir und bî ir wîben. diz was Êrec fil de roi Lac, der vrümekeit und sælden phlac, durch den diu rede erhaben ist.
5	nû riten si unlange vrist neben einander beide, ê daz si über die heide verre in allen gâhen zuo rîten sâhen
10	einen ritter selbedritten, vor ein getwerc, dâ enmitten eine juncvorouwen gemeit, schœne unde wol gekleit. Nû wunderte die künegîn
15	wer der ritter möhte sîn. er was ze harnasche wol, als ein guot kneht sol. Êrec der junge man sîn vrouwen vrâgen began
20	ob erz ervarn solde. diu vrouwe des niht enwolde: si bat in dâ bî ir tweln. ein juncvrouwen begunde si ûz weln die si möhte senden dar.
25	si sprach: «rît und ervar wer der ritter müge sîn und sîn geverte, daz magedîn.» diu juncvrouwe huop sich an die vart, als ir geboten wart,
30	dâ siz getwerc rîten sach. mit zühten si zuo im sprach: «got grüeze iuch, geselle, und vernemet waz ich welle. mîn vrouwe hât mich her gesant,
35	diu ist künegîn überz lant: durch ir zuht gebôt si mir daz ich iuch gruozte von ir, und weste gerne mære wer der ritter wære
40	und disiu maget wol getân. muget ir mich daz wizzen lân, âne schaden ir daz tuot: mîn vrouwe vrâget wan durch guot.» daz getwerc enwolde ir niht sagen
45	unde hiez si stille dagen, unde daz si in vermite: ez enweste war nâch si rite. diu maget enlie niht umbe daz si enwolde rîten vürbaz,
50	den ritter vrâgen mære selben wer er wære. daz getwerc werte ir den wec: daz sach diu künegîn und Êrec daz ez si mit der geisel sluoc
55	die ez in der hant truoc, über houbet und über hende ze sîner missewende, daz si mâl dâ von gewan. Mit solher antwurt schiet si dan
60	wider zuo ir vrouwen unde liez si schouwen wie sêre si was geslagen. daz begunde si vil tiure klagen dazz ir sô nâhen was geschehen
65	daz siz muoste ane sehen. Êrec dô ahten began, der ritter enwære dehein vrum man, daz er ez vor im vertruoc daz sîn getwerc die maget sluoc.
70	er sprach: «ich wil rîten dar, daz ich iu diu mære ervar.» diu vrouwe sprach: «nû rît enwec.» Zehant huop sich Êrec, unz er in sô nâhen kam
75	daz daz getwerc die rede vernam. «muget ir wêniger mir gesagen, wes hânt ir die maget geslagen? ir hânt sêre missetân. ir soldetz durch zuht lân.
80	iuwern herren sult ir mir nennen: mîn vrouwe wolde in erkennen und daz schœne magedîn.» daz getwerc sprach: «lâ dîn klaffen sîn. ich ensage dir anders niht
85	wan daz dir alsam geschiht. waz wolde si der mære wer mîn herre wære? ir ensît niht wîse liute, daz ir sô vil hiute
90	gevrâget von mînem herren: ez mac iu wol gewerren. wiltû daz ich dichs erlâze, sô rît dîne strâze und hebe dich der sunnen haz.»
95	Êrec der wolde ouch vürbaz, wan daz getwerc imz niht vertruoc: mit der geisel ez in sluoc, als ez die maget hete getân. ouch wolde er sich gerochen hân,
100	wan daz er wîslîchen sînem zorne kunde entwîchen. der ritter hete im genomen den lîp, wan Êrec was blôz als ein wîp. er gelebete im nie leidern tac
105	dan umbe den geiselslac und schamte sich nie sô sêre wan daz dise unêre diu künegîn mit ir vrouwen sach. Als im der geiselslac geschach,
110	mit grôzer schame er wider reit. alsô klagete er sîn leit (schamvar wart er under ougen): «vrouwe, ich enmac des niht verlougen, wan irz selbe habet gesehen,
115	mir ensî vor iu geschehen eine schande alsô grôz daz ir nie dehein mîn genôz eines hâres mê gewan. daz mich ein sus wênic man
120	sô lasterlîchen hât geslagen und ich im daz muoste vertragen, des schame ich mich sô sêre daz ich iuch nimmer mêre vürbaz getar schouwen
125	und dise juncvrouwen, und enweiz zwiu mir daz leben sol, ez ensî daz ich mich des erhol daz mir vor iu geschehen ist. ich ensterbe in kurzer vrist,
130	sô sol ichz versuochen. vrouwe, ir sult geruochen daz ich in iuwern hulden var. der himelkeiser bewar, vrouwe, iuwer êre.
135	ir gesehet mich nimmer mêre, ichn gereche mich an disem man von des getwerge ich mâl gewan. ist daz mich got sô gêret daz er mîn heil mêret,
140	daz mir dar an gelinget sô doch mîn muot gedinget, sô kum ich über den dritten tac, ob ich vor siechtuome mac.» der küneginne was vil leit
145	daz er alsô junger reit ûf sô grôze vreise: si bat in lân die reise. sô lange er dô urloubes gerte unz daz si ins gewerte.
150	Ouch dâhte der juncherre, im wære daz ze verre, ob er zen selben zîten hin wider wolde rîten dâ er sînen harnasch hâte,
155	und daz er alsô drâte in nimmer genæme (swie schiere er wider kæme, sô wæren si im entriten gar), und îlte in nâch alsô bar.
160	Dô er in begunde gâhen nâ, dô kam er rehte ûf ir slâ von den im schade was geschehen. vil schiere begunde er si ane sehen. zuo in enwas im niht ze gâch:
165	er reit in alsô verre nâch daz er si sach und si in niht. er tete als dem dâ leit geschiht: der vlîzet dicke sich dar zuo wie erz mit vuoge widertuo.
170	si enkâmen ûf dem wege ûzer sîner ougen phlege des vil langen tages nie unz daz der âbent ane gie. nû sach er wâ engegen im schein
175	ein hûs geheizen Tulmein, des wirt der herzoge Îmâîn. dâ reit der ritter vor im in: dâ wart er emphangen wol, sô man ze vriundes hûse sol
180	und als dem wirte wol gezam. Ich sage iu durch waz er kam mit sîner vriundîn. ez hete der herzoge Îmâîn hôchzît dâ vor zwei jâr:
185	saget diu âventiure wâr, sô hete er si dô zem dritten. an eine wise enmitten hete er hôhe an eine stat einen sparwære ûf gesat
190	ûf eine stange silberîn. diz muoste jærlîche sîn ze vreunden sîner lantdiet. von der rede er niemen schiet, niuwan daz gelîche
195	arme unde rîche, alte unde junge durch schœne handelunge ze sîner vreude kæmen swenne siz vernæmen.
200	swes vriundinne den strît behielte ze sîner hôchzît daz si diu schœniste wære, diu næme den sparwære. den hete der ritter genomen
205	zwir, ouch was er komen daz er in zem dritten næme: und ob ez alsô kæme, sô hete er in immer mêre âne strît mit voller êre.
210	nû sagete man daz mære daz dâ manec wîp schœner wære dan des ritters vriundîn. dô was sîn vrümekeit dar an schîn: er was alsô vorhtsam
215	daz er in mit gewalte nam. in getorste dâ nieman bestân: strîtes wart er gar erlân. Nû enweste Êrec niht umbe dise geschiht,
220	wan daz er im durch sîn leit ûf âventiure nâch reit. nû begunde sîgen der tac. ein market underm hûse lac: dâ kam er geriten in.
225	die burc meit er durch den sin daz er sîn iht würde gewar dem er hete gevolget dar. Nû er suochende reit wer in durch sîne vrümekeit
230	des nahtes næme in sîne phlege, nû vant er an dem wege von den liuten grôzen schal. diu hiuser wâren über al beherberget vaste:
235	der sich sîn ze gaste wolde underwinden, den kunde er niender vinden. ouch was er habelôs dâ gar. er enhete sich niht gewarnet dar:
240	wan in kam diu reise gâhes an, als ich iu dâ vor gesaget han. er enhete dâ niht mêre (daz bekumberte in dô sêre) wan daz phert und sîn gewant.
245	ouch was er dâ unerkant, daz im niemen zuo sprach noch ze guote ane sach. die gazzen wâren spils vol, als ez ze hôchzîten sol.
250	nû reit er also wîselôs unz daz er verre vor im kôs ein altez gemiure. dô im dô sô tiure die herberge wâren,
255	eins weges begunde er vâren der in dar brâhte: wan er im gedâhte des nahtes belîben dâ, wan er enmöhte anderswâ.
260	daz hûs er schouwen begunde und enwânde daz er vunde ieman dar inne: daz vreute sîne sinne. er gedâhte: «mîn dinc daz vert nû wol,
265	wan ich in einem winkel sol belîben hinne unz an den tac, sît ich niht wesen baz enmac. des gan man mir doch âne strît: ich sihe wol daz ez œde lît.»
270	als er in daz hûs kam und er der winkel war genam, welher im dar zuo töhte dâ er inne belîben möhte, dô sach er sitzen dâ
275	einen man, der was grâ, sîn hâr von alter snêwîz. des hete er dannoch guoten vlîz daz ers nâch reinem site phlac: vil wol gestrælet ez lac
280	über sîn ahsel ze tal. nâch der âventiure zal sô hete der selbe altman eine schâfkürsen an und des selben ûf einen huot:.
285	diu wâren beidiu alsô guot als in sîn state leite: er enphlac niht rîcheite. sîn gebærde was vil hêrlîch, einem edeln manne gelîch.
290	ein krücke was sîn stiure, der dâ saz in dem gemiure. Diz was Êrecke leit: wan er vorhte die gewonheit, er solde in ûz getriben hân,
295	als im vor was getân. daz phert er ze stete bant: dar ûf leite er sîn gewant. sîn hende habete er vür sich, einem wol gezogenem manne gelich,
300	und gienc dâ er den alten sach. mit zwîvel er zuo im sprach: «herre, mir wære herberge nôt.» diu bete machete in schamerôt. als in der alte hete vernomen,
305	er sprach: «nû sît mir willekomen ze dem und ich nû haben mac.» des genâdete im Êrec fil de roi Lac. Nû hete er ingesindes niuwan eines kindes
310	(diu was ein diu schœniste maget von der uns ie wart gesaget) und der hûsvrouwen. dar an man mohte schouwen daz er rîches muotes wielt,
315	daz er den gast sô arm enthielt. dem kinde rief er dar. er sprach: «genc und bewar dises herren phert, tohter mîn, der unser gast geruochet sîn,
320	und begenc ez sâ ze vlîze daz ich dirs iht verwîze.» si sprach: «herre, daz tuon ich.» Der megede lîp was lobelich. der roc was grüener varwe,
325	gezerret begarwe, abehære über al. dar under was ir hemde sal und ouch zebrochen eteswâ: sô schein diu lîch dâ
330	durch wîz alsam ein swan. man saget daz nie kint gewan einen lîp sô gar dem wunsche gelîch: und wære si gewsen rîch, sô engebræste niht ir lîbe
335	ze lobelîchem wîbe. ir lîp schein durch ir salwe wât alsam diu lilje, dâ si stât under swarzen dornen wîz. ich wæne got sînen vlîz
340	an si hâte geleit von schœne und von sælekeit. Êrecken muote ir ungemach. zuo ir vater er sprach: «wir sulns die juncvrouwen erlân.
345	ich wæne siz selten habe getân: ez zimt mir selbem vil baz.» dô sprach der alte daz: «man sol dem wirte lân sînen willen, daz ist guot getân.
350	uns gebristet der knehte: von diu tuot siz mit rehte.» Diu juncvrouwe des niht enliez si entæte als si ir vater hiez. daz phert begienc ze vlîze
355	ir hende vil wîze: und wære daz got hie ûf erde rite, ich wæne in genuocte dâ mite, ob er solhen marschalc hæte. swie si schine in swacher wæte,
360	sô weiz ich daz wîp noch man süezern schiltkneht nie gewan dan Êrec fil de roi Lac, dô si sînes pherdes phlac. im zam von solhem knehte
365	sîn vuoter wol mit rehte. Hie wart der gast berâten als si des state hâten. guote teppeche gespreit unde dar ûf geleit
370	alsô rîchiu bettewât sô si diu werlt beste hât, mit samîte bezogen, dem daz golt was unerlogen, daz daz bette ein man nie möhte erwegen
375	und selbe vierde müeste legen, und dar über gebreit nâch grôzer herren werdekeit kulter von zendâle, rîche und gemâle--
380	diu wâren bî dem viure des âbendes vil tiure. si geleisten wol ein reine strô: dar über genuocte si dô eines bettes âne vlîz,
385	daz bedahte ein lîlachen wîz. ouch was dâ ritters spîse: swes ein man vil wîse möhte in sînem muote erdenken ze guote,
390	des heten si die überkraft und volleclîche wirtschaft, doch mans ûf den tisch niht truoc. in gap der reine wille genuoc den man dâ ze hûse vant:
395	wan er ist aller güete ein phant. Nû muget ir hœren mære wer dirre alte wære, daz er den gast sô wol emphie und ers durch armuot niht enlie.
400	er hete dâ vor gehabet ê guotes und ouch êren mê. er was ein grâve rîche, vil gar unlasterlîche sîns erbes verstôzen
405	von sînen übergenôzen. in enhete dehein sîn bôsheit in dise armuot geleit: ez was von urliuge komen. im hete diu überkraft genomen
410	allez daz er ie gewan. sô vil enwas dem rîchen man grôzer êren niht verlân daz er einen kneht mohte hân. nû truoc er dise armuot
415	und diu hûsvrouwe guot in ir alter mit listen: und swâ si der habe misten, ir nôt si bedahten mit zühten swie si mahten,
420	daz mans iht würde gewar. daz ouch ir ie alsô gar diu armuot oberhant gewan, daz weste lützel ieman. dem wirte was diu arbeit
425	die er von grôzer armuot leit dâ wider süeze als ein mete dâ engegen und im diu schame tete. der alte wirt hiez Koralus und diu hûsvrouwe sus,
430	Karsinefîte, ir tohter Ênîte. swen dise edelarmen niht enwolden erbarmen, der was herter dan ein stein.
435	der juncvrouwen œheim was der herzoge Îmâîn, des diu hôchzît solde sîn, der herre von dem lande. ir geburt was âne schande.
440	Nû sagen wir ouch dâ bî von wiu diu rede erhaben si. dô daz phert was begangen, «nû enlât iuch niht belangen» sprach der wirt zem gaste.
445	Êrecken muote vaste sîn schade den er dâ vor gewan: den wirt er vrâgen began waz der schal von den liuten möhte bediuten
450	den er in dem markete hete gesehen. dô begunde im der wirt jehen wiez umbe die rede was getân, als ich iu gesaget hân, beide umbe die hôchzît
455	und ouch des sparwæres strît. Als er im gesagete daz, dô vrâgete er aber vürbaz von dem ritter mære, ob er weste wer er wære,
460	der vor im ûf daz hûs reit, als ich iu ê habe geseit, und hal in doch sîn ungemach. der alte alsus sprach: «in erkennet allez diz lant:
465	erst Îdêrs fil Niut genant» und sagete sîn geverte gar unde daz er komen dar mit sîner âmîen wære ze nemen den sparwære.
470	alsô schiere er diz vernam, mit vrâge er vürbaz kam, unz im der wirt tete erkant wiez umbe in selben was gewant. Als er ims begarwe jach,
475	Êrec stuont ûf unde sprach: «genâde, wirt und herre, daz ez mir iht gewerre. sît ez sô umbe iuch stât, sô suoche ich helfe unde rât.
480	ûf genâde sô sî iu bejehen, mir ist ein leit von im geschehen daz ich immer klagen sol, ez ensî daz ich michs erhol. sîn getwerc mich harte sêre sluoc,
485	daz ich im durch nôt vertruoc: er was gewâfent und ich blôz, des ez dô benamen genôz. grôz laster muoste ich dô vertragen. daz sol mîn herze immer klagen,
490	mirn gevüege got noch den tac daz ich ez gerechen mac. ûf solher âventiure wân, als ich nû gesaget hân, sô bin ich im her nâch geriten.
495	râtes muoz ich iuch biten: beide helfe unde heil stât vil gar âne teil, herre, in iuwer hant. möhtet ir mir umbe îsengewant
500	getuon deheiner slahte rât (ich sage iu wie mîn muot stât), sô enwürde er strîtes niht vermiten. mit rosse bin ich wol geriten: sô soldet ir mich lân rîten
505	mit iuwer tohter Ênîten ûf die selben hôchzît. ich behabete den strît daz si schœner wære (und næme den sparwære)
510	dan des ritters vriundîn. nû sehet ob ez müge sîn und tuotz ûf daz gedinge, ob mir alsô gelinge daz mir der sige belîbe,
515	sô nim ich si ze wîbe. dar umbe endurfet irz niht lân, si enhât an mir niht missetân, ez mac wol mit êren sîn. ich künde iu den vater mîn:
520	der ist der künec Lac genant. beide liute unde lant, lîp und allez daz ich hân mache ich ir undertân, daz si des muoz walten.»
525	Dô begunden dem alten von jâmer vil tougen truoben diu ougen: weinens sîn herze wart gemant mit dirre rede sâ zehant
530	daz er kûme vür brâhte die rede der er gedâhte. Er sprach: «herre, disen spot sult ir lâzen durch got. iuwer rede ist vil verlâzenlich.
535	nû hât got über mich verhenget swes er wolde: anders dan ez solde sô ist mîn leben nû getân. daz wil ich von gote hân:
540	des gewaltes ist alsô vil, er mac den rîchen swêne er wil dem armen gelîchen und den armen gerîchen. sîn gewalt ist an mir worden schîn.
545	durch got sult ir erbeten sîn daz dirre schimph belîbe. ir getuot ze wîbe mîner tohter wol rât, wan si des guotes niht enhât.
550	swie grôzen bresten ich nû dol, doch sult ir mir gelouben wol, ich hân gesehen ê den tac daz iuwer vater der künec Lac mich gesellen nande.
555	wir nâmen in sînem lande beide mit ein ander swert. daz ir nû mîner tohter gert, mich entriege mîn wân, daz hânt ir durch schimph getân.»
560	Êrec wart von der rede rôt. er sprach: «herre, welch nôt twinget iuch ûf den wân daz ichz durch schimph habe getân? daz sult ir ûz dem muote lân
565	und mîniu wort vür ernest hân. waz solde mir iezuo der spot? jâ bite ich mir sô helfen got ze sêle und ze lîbe, als ich mir ze wîbe
570	iuwer tohter gerne nemen wil. des engibe ich iu kein langer zil wan an die selben hôchzît, daz sich endet der strît, ob mir nû iuwer helfe vrumt
575	daz mir mîn dinc ze heile kumt. ir armuot hœre ich iuch klagen: der sult ir stille gedagen. ez enschadet iu niht gegen mir, wan ich ir guotes wol enbir.
580	ouch hete ich einen swachen muot, næme ich vür mînen willen guot. nû gedenket dar zuo. sît daz der strît sol wesen vruo, sô ensûmet uns niht mêre.
585	an iu stât gar mîn êre: und wizzet rehte âne wân, ich leiste als ich gelobet hân.» Der alte was der rede vrô. er sprach: «sît irz meinet alsô,
590	sô haben wir hie zehant vil schœnez îsengewant, beidiu behende unde guot. des kunde mich diu armuot noch nie betwingen
595	noch ûf den zwîvel bringen daz ichs würde âne, ichn behieltez nâch wâne, ob es mînem vriunde würde nôt, (der selbe wille mirz gebôt
600	daz ichz im lîhen solde) unz mirs got gunnen wolde. sô hete ich ie einen site daz ich im selbe dâ mite vil willeclîchen was bereit,
605	unz mir daz alter an gestreit: daz hât mir gar die kraft benomen. nû ist ez uns ze staten komen, daz ez uns vremder bete erlât und tuot uns unwirde rât.
610	ouch hân ich unze her beide schilt unde sper zesamene behalten.» des genâdete er dem alten. Er bat im ez zeigen dar,
615	durch daz er næme war ob ez im reht wære, ze enge noch ze swære. dô was ez behende unde guot. des gewan er vil rîchen muot,
620	Êrec fil de roi Lac. vil schiere gienc ûf der tac daz si solden rîten hin zen hôchzîten. Dô der tac vol erschein,
625	dô riten si ûf Tulmein. dâ hiez si der herzoge Îmâîn grôze willekomen sîn. ir komennes nam in wunder. nû nâmen si in besunder
630	und sageten im ir geverte gar, war umbe Êrec was komen dar, und bâten in râtes dar zuo. er sprach: «ich sage iu waz ich tuo. beide lîp unde guot
635	unde willeclîcher muot sol iu dar zuo sîn bereit, her gast, durch iuwer vrümekeit und durch mîner nifteln êre. ouch volget mîner lêre
640	und lât mich si vazzen baz.» Êrec der widerredete daz. er sprach: «des ensol niht geschehen. er hæte harte missesehen, swer ein wîp erkande
645	niuwan bî dem gewande. man sol einem wîbe kiesen bî dem lîbe ob si ze lobe stât unde niht bî der wât.
650	ich lâze ouch hiute schouwen ritter unde vrouwen, und wære si nacket sam mîn hant unde swerzer dan ein brant, daz mich sper unde swert
655	volles lobes an ir wert, oder ich verliuse daz leben.» «got sol iu gelücke geben» sprach der herzoge Îmâîn: «ouch sult ir des gewis sîn
660	daz iuwer ellenthafter muot iu gevüeget allez guot.» mit dirre rede si kâmen dâ si messe vernâmen von dem heiligen geiste:
665	des phlegent si aller meiste die ze ritterschefte sinnent und turnieren minnent. dô was bereit der imbîz. man dienete in in allen vlîz.
670	alsô der dô ergie, menneclîch ze vreuden vie dar nâch als in dûhte guot und in lêrte sîn muot. ir spil was umbe die stat
675	dâ der sparwære was ûf gesat. Nû nâmen si alle besunder war, wenne Îdêrs fil Niut dar mit sîner âmîen kæme und den sparwære næme,
680	als er ouch ê hete getân. nû sâhen si dort zuo gân Êrecken mit vrouwen Ênîten. er vuorte si an sîner sîten hin dâ er den sparwære sach.
685	ze des ritters gehœrde er sprach: «vrouwe, lœset diu bant und nemet den sparwære ûf die hant. wan daz ist wâr âne strît, hiest niemen schœner dan ir sît.»
690	dem ritter was daz ungemach. vil unwirdeclîche er sprach: «lât den sparwære stân! ez ensol iu niht sô wol ergân, ir dürftiginne.
695	war tuot ir iuwer sinne? lânt in ir der er baz gezeme und diu in von rehte neme. daz ist hie mîn vriundîn: der sol er billîchen sîn.»
700	Êrec sprach: «herre guot kneht, ir habet den sparwære âne reht genomen disiu zwei jâr. nû wizzet rehte vür wâr, es enmac niht mêre geschehen,
705	es enwellen iu die liute jehen. ez muoz under uns beiden diu ritterschaft scheiden.» er sprach: «jungelinc, ob iu wære der lîp zihte mære,
710	sô liezet ir enzît iuwern kintlîchen strît, wan ir in nû schiere wirs lât, sô ez an den lîp gât. ich sage iu vor wie iu geschiht.
715	irn erbarmet mir niht: als ich iu nû gesige an, des ich nie zwîvel gewan, alsô stât hin ziu mîn muot daz ich danne dehein guot
720	næme vür iuwern lîp. sweder man oder wîp iu dise rede gerâten hât, der minnet ob iu missegât.» Êrec sprach: «herre,
725	ich hân mich alsô verre nû der rede ûz getân: ich enwil ir niht wandel hân.» zehant schieden si sich dâ unde wâfenten sich sâ,
730	der ritter als im wol tohte, Êrec als er mohte. Îdêrs was wol worden gar: wan er hete sich gewarnet dar als man ze ritterschefte sol.
735	sîniu sper wâren geverwet wol. er was gezimieret: sîn ros was gezieret mit rîcher kovertiure (diu was Êrecke tiure).
740	sîn wâpenroc alsam was, samît grüene als ein gras, mit rîchen borten umbestalt. als uns diu âventiure zalt, sô was sîn harnasch lobelîch,
745	er selbe einem guoten ritter gelîch. Êrec ouch dort zuo reit. sîn schilt was alt swære lanc und breit, sîniu sper unbehende und grôz, halp er und daz ros blôz,
750	als imz sîn alter sweher lêch. gelücke sîn helfe im niht verzêch. under al dem liute «got gebe dir heil hiute» sprach ein gemeiner munt.
755	nû rûmte man inz zestunt zeinem wîten ringe. Êrecke dem jungelinge gezam vil wol sîn ritterschaft: sîn ellen gap im grôze kraft.
760	si ruorte beide ein grôzer zorn. diu ros si nâmen mit den sporn: dô sach man schenkel vliegen. dô begunde jenen triegen sîn hôchvertiger wân:
765	er wânde ein kint bestanden hân. zesamene liezen si strîchen. dô bevant er wærlîchen daz Êrec degenes ellen truoc. mit der tjost er im sluoc
770	den schilt an daz houbet. dâ von wart er betoubet daz er kûme gesaz. vil selten geschach im daz. diu tjost wart sô krefteclich
775	daz diu ros hinder sich an die hehsen gesâzen. der muote was erlâzen der ritter Îdêrs unz an die stunt: diu wart im sît garwe kunt.
780	die schefte vlugen in von der hant zebrochen über des schiltes rant. Dô von in gelîche vil harte lobelîche wol diu vünfte tjost ergie,
785	daz ir deweder vervâlte nie, wan daz si diu sper ûf stâchen daz si gar zebrâchen, dô hete ir Êrec niht mêre. des gesûmte er sich sêre.
790	doch hete er daz alte sper sînes swehers gehalten her unz an die jungesten vart. dar umbe hete erz dar gespart: grôz und gedigen was der schaft.
795	ouch hete er sînes lîbes kraft harte wol enthalten dar, schône unde vil gar. Als er daz sper ze hant genam (sîn schilt im wol ze halse zam),
800	er begunde ein wênic rîten ûz gegen vrouwen Ênîten dâ er si weinende sach. über des schiltes rant er sprach: «gehabet iuch wol, guot vrouwe maget.
805	ich bin noch vil unverzaget: iuwer sorge sol sich enden.» daz ros begunde er wenden daz ez in gegen dem ritter truoc. daz sper er undern arm sluoc.
810	der ritter im engegen kam wol gewarnet alsam. si liezen zesamene strîchen alsô krefteclîchen sô si meiste von ir sinnen
815	ûz den rossen mohten gewinnen. sô sêre zesamene si stâchen daz dem ritter brâchen die darmgürtel beide (dô gelebete erm nie sô leide),
820	surzengel und vürbüege. doch er guot ellen trüege, Êrec in von dem rosse schiet ze spotte aller der diet. Als Êrecke dô sô wol geschach
825	daz er den ritter nider stach, von im enthielt er hôher baz. daz tete er umbe daz daz ieman des möhte jehen daz im diu schande wære geschehen
830	daz er in ligende hete erslagen. er wolde bezzer wort bejagen: er erbeizte und hiez in ûf stân. zesamene liezen si dar gân. Dô sach man si vehten
835	gelîch zwein guoten knehten. daz viur in ûz den helmen vlouc. si vâhten als den liuten touc dies diu grimme nôt gebat: wan si hâten gesat
840	umbe den sige vil hôhez phant: ez galt ze gebenne dâ zehant minner noch mêre wan beide lîp und êre. dem tâten si vil gelîch.
845	ir vehten was manlîch. des triben si vil und genuoc, unz daz Îdêrs Êrecken sluoc ûf den helm, daz er gie von dem slage ûf diu knie.
850	Als vrouwe Ênîte daz ersach, grôz wart ir ungemach. si begunde ir gesellen klagen. si wânde er wære erslagen und er belibe des slages dâ.
855	ûf spranc er und begunde sâ den schilt ze rücke wenden und gap ze beiden henden daz swert mit grimmen muote und vaht sam er wuote.
860	er machete in des schiltes bar und hiu in im von der hant gar: des im vil lützel der vertruoc der slac engegen slage sluoc. sît daz er im entlêch sîn guot,
865	daz galt er als jener tuot der dâ mêre entnemen wil. si beide spilten ein spil daz lîhte den man beroubet, der vünfzehen ûf daz houbet.
870	ouch wurden si eteswenne gegeben beidiu dâ vür und ouch dâ eneben. mit grimme si verbunden. einer ellenlanger wunden möhte er vil wol sîn bekomen
875	derz phantreht solde hân genomen. dâ wart vil manec gebot geleit und dem ein widergelt geseit. ir ietweder enwoldez lâzen: wan dem wære verwâzen
880	beidiu sîn êre und ouch daz leben. dar nâch sô wart daz spil gegeben mit manegem viurînen slage von vruo unz hin nâch mittem tage, daz in der gebote zeran
885	sô sêre daz die zwêne man muoden begunden. si enmohten noch enkunden ir gebot mit kreften niht gelegen noch die arme alsô geregen
890	als si tâten unze dar. Nû hâten si sich alsô gar erwüetet und ervohten daz si niht mêre enmohten. ir slege wîplîchen sigen:
895	sô garwe wâren si erwigen daz dâ von niht schade geschach. Îdêrs dô zÊrecke sprach: «enthalt dich, edel ritter guot. wir velschen beide ritters muot
900	dâ mit und wir ie mitten tuon: ez ist sunder prîs und âne ruom. unser blœdez vehten enzimt niht guoten knehten. unser slege engânt niht manlîchen,
905	wir vehten lasterlîchen. obz iuwer muot niht vervât vür zageheit, sô ist mîn rât, daz wir diz blœde vehten lân und eine wîle ruowen gân.»
910	Dô was Êrec der rede vrô. ze ruowe sâzen si dô: ir houbet si enbunden. und als si des emphunden daz si geruowet hâten,
915	zesamene si dô trâten und griffen an ir altez spil, als ich iu nû sagen wil. mit guoter kunst, mit niuwer kraft und mit alsô gelîcher meisterschaft
920	si spilnde beliben. dâ siz vil lange getriben, daz witzige unde tumbe die stuonden dar umbe mit nihte erkiesen kunden
925	weder zuo den stunden eins ougen wæger hæte. diz beleip lange stæte: wederm geviele der gewin, des was zwîvel under in,
930	unz daz Êrec der unge man begunde denken dar an waz im ûf der heide ze schanden und ze leide von sînem getwerge geschach.
935	und als er dar zuo ane sach die schœnen vrouwen Ênîten, daz half im vaste strîten: wan dâ von gewan er dô sîner krefte rehte zwô.
940	ûf den helm er verbant mit vil williger hant. doch jener die besten würfe warf der kein zabelære bedarf, dô half disen daz ern nie
945	ûz den slegen komen lie, und gewan ez eine wîle sô sêre mit der île unz er doch daz spil verlôs und gelac vor im sigelôs.
950	sînen geiselstreich er rach. Als erm den helm abe brach, dô lôste erm ouch daz hüetelîn als er solde erslagen sîn, wan daz er des geruochte
955	daz er genâde suochte. «durch got erbarme dich, edel ritter, über mich. êre an mir elliu wîp unde lâz mir den lîp
960	und gedenke dar an daz ich dir, tugenthafter man, solh herzenleit niht hân getân: dû maht mich wol bî lîbe lân.» Des antwurte im Êrec dô.
965	er sprach: «wie redet ir nû sô? ir spottet mîn âne nôt. jâ woldet ir niuwan mînen tôt: sô stüende iuch ze ringe iuwer vürgedinge
970	und iuwer grôzer übermuot. jâ næmet ir dehein guot an disem strîte vür mîn leben. doch hât mir got die sælde gegeben daz sich diu rede verkêret hât:
975	sehet, nû getuon ich guoten rât daz ich deheine miete vür mînen lîp biete: swie mirn got anderswâ bewar, ich bins vor iu sicher gar.
980	hetet ir iuwer hôchvart ein lützel baz an mir bewart, sehet, daz wære iu nû guot. nû hât iuch iuwer übermuot hiute hie gevellet
985	und dem schaden gesellet.» Er sprach: «wie meinet ir daz? ich gediente nie iuwern haz, wan ich iuch nie mêre gesach.» Êrec aber dô sprach:
990	«nû schamet iuch durch mîne bete, als ich mich gester tete, dô ich von iuwern schulden die schame muoste dulden diu mînem herzen nâhen gie.
995	ouch geheize ich iu hie daz iu iuwers getwerges tuht und sîn grôziu unzuht nimmer alsô vil gevrumt sô si iu ze schaden hiute kumt.»
1000	Der ritter aber dô sprach: «geschach iu ie ungemach von mînen schulden, deist mir leit. ouch hât mich iuwer vrümekeit der selben schulde hie ze stat
1005	wol ze buoze gesat. nû geruochet mir den lîp lân. und habe ich iht des getân des ich von rehte engelten sol, daz widerdiene ich harte wol.»
1010	Êrec erbarmde sich dô. zuo dem ritter sprach er sô: «nû wil ich iuch leben lân: des enhetet ir mir niht getân.» nû gap er im des sicherheit
1015	daz er im wære bereit ze leisten swaz ern hieze, daz er in leben lieze. Als diu sicherheit was getân, dô hiez er in ûf stân.
1020	und als si zuo den stunden ir houbet beide enbunden, er sprach: «nû sult ir mich gewern, des enwil ich niht enbern, ez enmüeze mîn vrouwe diu künegîn
1025	wider ir laster gêret sîn. ir butet ir grôz ungemach, daz ir nie leider geschach: wider si sô habet ir vil getân. des sult ir ir ze buoze stân:
1030	wande siz vil sêre klaget. iuwer getwerc sluoc ir maget gester umbe dise zît: ouch sluoc ez mich alsam sît daz ich disiu mâl gewan.
1035	sehet, ich binz der selbe man. ouch hete ich iu immer nâch geriten ê ir des wæret vermiten ich enwürde an iu gerochen. daz ich bin sus zebrochen
1040	under mînen ougen (jâ enmuget irs niht gelougen) und daz iuwer getwerc ie solh unzuht begie daz ez die maget hât geslagen,
1045	daz enwil ich niht vertragen: von rehte sol ez garnen daz. unde sage iu umbe waz: jâ tete im sîn unzuht sô wol, daz man im es lônen sol.
1050	ich wil mich ûz der ahte lân, ezn soldez der maget niht hân getân. ich nim disem hunde ein gæbe phant: daz ist niuwan sîn hant, daz ez immer mêre
1055	baz vrouwen êre.» Daz enhâte doch der guote niht in sînem muote daz er alsô tuon solde, wan daz er gerne wolde
1060	daz getwerc warnen dâ mite daz ez ez dar nâch vermite, und liez ez âne grôze bete daz er im des niht entete. doch rach erz ze rehte:
1065	er hiez ez zwêne knehte ûf einen tisch strecken unde wol durchrecken mit guoten spizholzen zwein, daz ez ûf sînem rücke schein
1070	dar nâch wol zwelf wochen. sîn unzuht wart gerochen daz daz bluot abe im ran. nû begunde wîp unde man under in gemeinlîchen jehen,
1075	im wære gar rehte geschehen, sît manz in solher unzuht vant. ez was Maliclisier genant. Êrec dô ze dem ritter sprach (sîn tweln was im ungemach):
1080	«nû enweiz ich wes ir bîtet daz ir niht enrîtet ze mîner vrouwen der künegîn. ir soldet nû geriten sîn. in ir gewalt sult ir iuch ergeben
1085	und lebet swie si iuch heize leben. saget ir rehte wer ir sît und umbe unseren strît und wer iuch dar zir habe gesant. alsô bin ich genant,
1090	Êrec fil de roi Lac. ich kum morgen, ob ich mac. ich rîte ze mîner wîle: dar sint niuwan siben mîle. nû gedenket an iuwer sicherheit.»
1095	der ritter dô enwec reit, er und sîn vriundîn unde daz getwergelîn, gegen dem künege Artûse. Nû was er ze sînem hûse
1100	wider entwichen in daz lant (daz was Karadigân genant), dô der hirz was gejaget, als iu ê ist gesaget. nû was ez alsô ergangen
1105	daz den hirz hete gevangen der künec Artûs mit sîner hant. daz reht daz dâ von wart benant daz was im gevallen, daz er undern megeden allen
1110	eine küssen solde, swelhe er wolde. Dô si ze Karadigân wâren komen, dô wolde der künec hân genomen sîn reht nâch der gewonheit.
1115	dôz im ze rehte wart geseit, dô bat in diu künegîn daz ez gevristet müeste sîn unz sim gesagete mære wiez ergangen wære
1120	und waz ir geschach ze leide von dem ritter ûf der heide, und sagete im vil rehte wie ez ir des selben tages ergie. si sprach «geselle, ich wil dir klagen:
1125	sus und sô wart mîn maget geslagen und Êrec fil de roi Lac. umbe den selben geiselslac schiet er vor leide von mir ûf der heide.
1130	er sprach: «geloubet, vrouwe mîn, ich wil iu immer vremde sîn ze Britanje in dem lande, ichn gereche mîne schande. und ob ich mich errechen mac,
1135	sô kum ich über den dritten tac.» herre, der ist morgen. gedingen unde sorgen hân ich umbe den jungelinc, wie nû stên sîniu dinc.
1140	ich enmohte in nie erwenden. got welle in uns senden. geselle, nû bite ich dich durch sîne liebe und durch mich daz dû dîns rehtes niht ennemest
1145	ê daz dû danne vernemest wie im sîn dinc ergangen sî. mir wære liep, er wære ouch bî. nû bît niuwan unz morgen vruo: gelinget im, er kumt dar zuo.»
1150	Disiu bete was getân ûf dem hûs ze Karadigân. dô hete Walwân und der vriunt sîn, der truhsæze Keiîn, sich ze handen gevangen
1155	und wâren gegangen niulîch von den vrouwen vür daz kastel schouwen. beide si dô sâhen disen ritter zuo gâhen
1160	verre ûz dem walde. nû tâten siz balde der küneginne kunt. ûf stuont si zestunt: ir vrouwen si zuo ir nam,
1165	an ein venster si kam, daz si war næme wer dâ geriten kæme. dâ stuont si und diu ritterschaft bî ein ander zwîvelhaft
1170	wer der ritter möhte gesîn. dô sprach diu künegîn: «ez ist benamen der man, als ich verre kiesen kan und als mir mîn gemüete seit,
1175	dem Êrec dô nâch reit. nû sehet, ir sint drîe: daz getwerc und sîn âmîe rîtent mit im dort her. ez ist nieman wan er.
1180	jâ vert er sam er rîte ûzer einem strîte. ez mac iu dâ bî sîn erkant, im ist der schilt unz an die hant vil nâch verhouwen gar,
1185	sîn harnasch aller bluotvar. ich wil iu zewâre sagen, er hât Êrecken erslagen und ist durch ruom her komen daz er den sige hât genomen.
1190	oder er hât den ritter gesant sigelôsen in diz lant durch unsers hoves êre des selben gedinge ich sêre.» nû jâhen si alle der künegîn,
1195	der eintwederz möhte wol sîn. Ê diu rede wære getân, Îdêrs ûf Karadigân gegenwürtic über den hof reit zeinem steine, der was breit,
1200	ein wênic ûf an eine stat vor der grêde gesat. der was gemachet ûf dem hûs daz der künec Artûs dâ erbeizete und ouch ûf saz.
1205	der ritter gedâhte wâ er baz erbeizen möhte dan ouch dâ: bî dem steine erbeizete er sâ. Als man in diu ros emphie, mit dem getwerge er dô gie
1210	und mit sîner vriundîn mit zühten vür die künegîn. diu bôt im hêrlîchen gruoz. nû viel er ir an den vuoz, er sprach: «vrouwe rîche,
1215	nû emphâhet genædeclîche in iuwer gewalt einen man dem got deheiner êren gan: den ich dâ meine daz bin ich. wider iuch vergâhete ich mich:
1220	des entwanc mich dehein nôt, wan daz mirz mîn schalcheit gebôt. des sol ich iu ze buoze stân: wan ich dar an gevolget hân tumbes herzen râte
1225	nû riuwetz mich ze spâte. jâ warne ich mich ze unzît sam der hase sô er in dem netze lît: des ist mîn riuwe worden breit. ez ist et als man dâ seit,
1230	daz unrehter hôchmuot dem manne lîhte schaden tuot. des hân ich mich enstanden nâch grôzen mînen schanden und bin es an ein ende komen:
1235	wan er hât mir nâch benomen zuo den êren daz leben. ich wil mich schuldic ergeben: iu ist von mir geschehen leit. ich binz der iu widerreit
1240	gester ûf der heide. daz ist mir komen ze leide daz ich die unzuht vertruoc daz mîn getwerc die maget sluoc. der unvuore umbe den geiselslac
1245	hât mich Êrec fil de roi Lac wol ze buoze gesat, als in mîn wâriu schulde bat. er gevalte mich mit sîner hant und hât mich, vrouwe, her gesant,
1250	daz ich der selben schulde gewinne iuwer hulde und gar in iuwerm dienste stê. dannoch sage ich iu mê: ir endurfet umbe in niht sorgen:
1255	er kumt iu selbe morgen und bringet mit im eine maget daz iu nieman ensaget daz er dehein schœner habe gesehen, muoz er der wârheite jehen.»
1260	Von disen mæren wurden dô vil herzenlîche vrô Artûs und diu künegîn und lobetens unsern trehtîn, daz im alsô jungen
1265	sô schône was gelungen und im sîn êrstiu ritterschaft mit lobelîcher heiles kraft iedoch alsô gar ergie: wan er begundes vor nie.
1270	oder ez wære gar ein nîdære, sô truoc im dâ niemen haz. ez wart nie man geminnet baz von einem ingesinde,
1275	wan er hetez von kinde umbe si gedienet sô daz si des alle wâren vrô. zem ritter sprach diu künegîn: «iuwer buoze diu sol ringer sîn
1280	dan ir doch gearnet hât. ich wil daz ir hie bestât und unser ingesinde sît.» daz muoste ouch wesen âne strît. Alsô diu rede geschach,
1285	der künec zuo den rittern sprach: «nû suln wir in ze lône emphâhen vil schône. wir suln mit rehte einem man derz sô wol gedienen kan
1290	aller êren gunnen. er hât es wol begunnen daz er ze lobenne sol geschehen.» des begunden si dô alle jehen. Dô ez alsô was komen,
1295	als ir dâ vor habet vernomen, daz Êrecke sô wol gelance daz er Îdêrs betwanc ûf dem hûs ze Tulmein, der ie ein wârer degen schein,
1300	und dô vrouwe Ênîte behertet wart mit strîte, sîns gelückes wâren dô vil herzenlîche vrô arme unde rîche
1305	und jâhen alle gelîche, dâ enwære dehein zwîvel an, er enwære der tiuriste man der ie kæme in daz lant. dâ was nieman zehant
1310	dem sîn sige wære leit: si prîsten sîne manheit. ir spil begunden si mêren dô ze sînen êren. grôz buhurt huop sich dâ
1315	unde tanzen anderswâ. in entwâfente der herzoge Îmâin: in ir schôz leite in daz kint vrouwe Ênîte ze ruowe nâch dem strîte.
1320	ir gebærde was vil bliuclîch, einer megede gelîch. si enredete im niht vil mite: wan daz ist ir aller site daz si zem êrsten schamic sint
1325	unde blûc sam diu kint. dar nâch ergrîfent si den list daz si wol wizzen waz in guost ist, und daz in liep wære daz si nû dunket swære,
1330	unde daz si næmen, swâ si sîn reht bekæmen, einen süezen kus vür einen slac und guote naht vür übeln tac. Dô bat in der herzoge Îmâîn
1335	daz er die naht geruochte sîn mit im durch alle minne mit sîner vriundinne und bats ouch den geswîen. des begunde in Êrec verzîhen.
1340	sus antwurte er im dô: «herre, wie tæte ich danne sô, solde ich mînen wirt lân der mir vil guotes hât getân? er emphienc mich gester,
1345	er und iuwer swester, in grôzer unkünde wol und sô daz ich ez dienen sol: ich weiz wol, baz enmohter. er gap mir sîne tohter:
1350	durch daz sô lât ez âne zorn. ern wirt von mir sô niht verborn. solde ich nû von im wenken, sô möhte er wol gedenken er engulte sîner armuot,
1355	des er weizgot niene tuot. ich sol mit im vil gerne sîn. mîn stæter wille wirt im schîn: und suln wir leben halbez jâr, ich mache in rîche, daz ist wâr,
1360	mirn gebreste des guotes. mirn zerinnet niht des muotes, ich enbringe in ûf die vart daz er nie rîcher wart.» Dô sprach der herzoge Îmâîn:
1365	«sît ir bî mir niht wellet sîn, sô suln wir bî iu bestân, mit iu ze herbergen gân.» des genâdete im vil verre Êrec der herre,
1370	und sîn sweher tete alsô. ûf stuonden si dô. bî handen si sich viengen, ze herverge si giengen und vuorten vrouwen Ênîten
1375	dâ enzwischen an ir sîten. dô hete si wünnen genuoc, wan si ûf ir hant truoc den gewunnen sparwære: daz was wol vreudebære.
1380	sus hâte diu maget sæleclîche bejaget von lobe michel êre: doch vreute si sich mêre von schulden ir lieben man
1385	den si des tages dô gewan. Ein man den vreuden nie verdrôz, des kurzwîle was vil grôz. zen herbergen was grôzer schal. dâ muoste er geste âne zal,
1390	ritter unde vrouwen, den selben âbent schouwen: wande si ladeten gar alle die et kâmen dar zuo den hôchzîten.
1395	der vater vrouwen Ênîten enmöhtez niht erziuget hân: ez muoste an dem herzogen stân. von sînem hûse man dar truoc spîse ebene genuoc.
1400	Als im erschein der ander tac, Êrec fil de roi Lac der enwolde dâ niht langer tweln. sîn unmuoze begunde er zeln und sprach er müeste rîten
1405	und vüeren vrouwen Ênîten. dô bat in ir œheim, der herzoge von Tulmein, daz er si müeste vazzen baz: Êrec der widerredete daz.
1410	golt und silber er im bôt. er sprach des wære im unnôt: beide ros und gewant, dar zuo beslôz Êrec die hant, wan daz er ein phert nam,
1415	daz ir ze rîtenne gezam, von ir nifteln, einer maget: diu was, sô man saget, mit dem herzogen dâ unde sîn niftel nâ.
1420	vil güetlîche si in es bat, alsô lange unz ûf die stat daz er ez von ir emphie. und wizzet wol daz vordes nie in der werlde dehein man
1425	schœner phert mê gewan. Ez was ze michel noch ze kranc, sîn varwe rehte harmblanc, sîn man tief unde reit, [sîn brust starc unde breit,]
1430	mit ganzem gebeine, ze grôz noch ze kleine. sîn houbet truocz ze rehte hô. ez was senfte unde vrô, mit langen sîten
1435	(man mohtez wol gerîten) rücke und vuoz guot genuoc: hei wie rehte sanfte ez truoc! ez gienc vil drâte über velt schône sam ein schef enzelt:
1440	dar zuo und ez sanfte gie, sô gestrûchetez doch nie. der satel was alsam, daz ez dem pherde wol gezam: daz gesmîde sam ez solde
1445	von rôtem golde. waz sol des langiu mære wie daz geworht wære? des muoz ich iuch vil verdagen: wan solde ichz iu allez sagen,
1450	sô würde der rede ze vil. den lop ich iu enden wil mit vil kurzen worten: die darmgürtel wâren borten. Alz ez im gezogen wart,
1455	diu reise enwart niht mê gespart. vrouwe Ênîte urloup nam, als einem kinde wol gezam, vil heize weinende, ze rîten in ellende
1460	von ir lieben muoter. diu sprach: «rîcher got vil guoter, dû geruoche mînes kindes phlegen.» mit triuwen langer wart der segen. nû errahte daz scheiden
1465	manegen trahen in beiden unde dar zuo ir vater. unsern herren got bater daz er ir müeste walten. Êrec sagete dem alten,
1470	swenne im sîn bote kæme, swaz er von dem vernæme, daz er dar nâch tæte: wan er den willen hæte ze tuone sîner armuot buoz.
1475	dô neic er im an den vuoz und was des gedingen vrô. urloup nâmen si dô von allem dem gesinde dâ unde schieden sich sâ
1480	unde riten von dan. Êrec enwolde nieman mit im von stete rîten lân: mit heile bat er si dâ bestân. Alsô si dô beide
1485	kâmen ûf die heide, Êrec begunde schouwen sîne juncvrouwen. ouch sach si vil dicke an bliuclîchen ir man.
1490	dô wehselten si vil dicke die vriuntlîchen blicke. ir herze wart der minne vol: si gevielen beide ein ander wol und ie baz unde baz.
1495	dâ envant nît noch haz ze blîbenne dehein vaz: triuwe und stæte si besaz. Nû riten si vil drâte, wan er gelobet hâte
1500	ze komenne an dem selben tage. nâch der küneginne sage westen die guoten knehte alle vil rehte die zît wenne er solde komen:
1505	ouch hâten siz vernomen von dem ritter der dâ kam, an dem er den sige nam. diu ros wâren in bereit. dô genôz er sîner vrümekeit.
1510	mit dem künege Artûse riten von dem hûse Gâwein und Persevâus und ein herre genant alsus, der künec Iels von Gâlôes,
1515	und Estorz fil roi Ares, Lucâns der schenke schein in der schar, dar zuo diu massenîe gar, daz sin emphiengen alle mit ritterlîchem schalle,
1520	geselleclîchen unde wol, als man lieben vriunt sol der verlorner vunden ist. gegen im was zer selben vrist über den hof gegangen,
1525	daz er würde emphangen, mîn vrouwe diu künegîn. si hiez in willekomen sîn: sîner âventiure was si vrô. vrouwen Ênîten nam si dô,
1530	si sprach: «vrou maget wol getân, dirre kleider sult ir wandel hân.» nû vuorte si diu rîche in ir heimlîche. dâ was ir ein bat bereit,
1535	und wart nâch ir arbeit gebadet vaste schône. diu vrouwe mit der krône, ir lieben gast si kleite: wan dâ was bereite
1540	vil rîchez gewant. si nâte selbe mit ir hant in ein hemde daz magedîn: daz was wîz sîdîn. daz hemde si bedahte,
1545	daz manz loben mahte, mit einem rocke wol gesniten nâch kerlingischen siten, weder zenge noch ze wît: der was ein grüener samît
1550	mit spannebreiter lîste, dâ si si in brîste, mit gespunnem golde beidenthalp sô man solde, von ietweder hende
1555	an der sîten ende. ouch wart vrouwen Ênîten gegurt umbe ir sîten ein rieme von Îberne: den tragent die vrouwen gerne.
1560	vür ir brust wart geleit ein haftel wol hande breit, daz was ein gelpher rubîn: doch überwant im sînen schîn diu maget vil begarwe
1565	mit ir liehten varwe. der roc was bevangen, mit einem mantel behangen der im ze mâze mohte sîn, daz geville hermîn,
1570	daz dach ein rîcher sigelât. disiu küneclîche wât was gezobelt ûf die hant. ein borte ir hâr zesamene bant: der was ze mâze breit,
1575	kriuzwîs überz houbet geleit. sô guot was des schapels schîn, ez enmohte borte bezzer sîn. ir kleit was rîch, si selbe guot. Nû bedahte vrouwe Armuot
1580	von grôzer schame daz houbet, wan si was beroubet ir stat vil vrevenlîchen. si muoste danne entwîchen, von ir hûse sî vlôch:
1585	Rîcheit sich in ir gesæze zôch. alsô schœne schein diu maget in swachen kleidern, sô man saget, daz si in sô rîcher wât nû vil wol ze lobe stât.
1590	vil gerne ich si wolde loben als ich solde: nû enbin ich niht sô wîser man, mirn gebreste dar an. solh sin ist mir unkunt.
1595	ouch hât sich manec wîser munt in wîbes lobe gevlizzen, daz ich niht möhte wizzen welhen lop ich ir vunde, ez ensî vor dirre stunde
1600	baz gesprochen wîben. si muoz von mir belîben ungelobet nâch ir rehte, wans gebrist mir tumben knehte. doch bescheide ichz sô ich beste kan
1605	und als ichz vernomen han, sô was ûzer strîte: ez was vrouwe Ênîte diu aller schœniste maget diu ie, sô man saget,
1610	in des küneges hof kam. Diu küneginne si nam vriuntlîchen bî ir hant und gienc dâ si den künec vant sitzen nâch sînem rehte
1615	mit manegem guoten knehte dâ zuo der tavelrunde. die zer selben stunde dâ gesâzen oder sît, der hete einer âne strît
1620	an lobe den besten gewin. des jâhen si alle under in, wande er nâch sage nie deheine lôsheit begie unde tugent sô manecvalt
1625	daz man in noch zalt zeim dem tiuristen man der ie stat dâ gewan: des hete er zem sedel guot reht, Gâwein der guote kneht.
1630	dâ bî Êrec fil de roi Lac und Lanzelot von Arlac und Gornemanz von Grôharz und li bels Côharz und Lais hardîz
1635	und Meljanz von Lîz und Maldwîz li sages und der wilde Dodines und der guote Gandelus. bî dem saz Êsus,
1640	dar nâch der ritter Brîên und Îwein fil li roi Vrîên unde zallen êren snel Îwân von Lônel. ouch saz ir dâ mêre,
1645	Îwân von Lafultêre und Onam von Galiot und Gasosîn von Strangot. ouch saz dâ zehant der mit dem guldîn bogen genant,
1650	Tristram und Gârel, Blîobleherîn und Titurel, Garedeas von Brebas, Gues von Strauz und Baulas, Gaueros von Rabedic
1655	und des küneges sun von Ganedic, Lis von quinte carous, Isdex von mun dolerous, Îthêr von Gaheviez, Maunis und der kal Galez,
1660	Grangodoans und Gareles und Estorz fil Ares, Galagaundris und Gâlôes und fil Dou Giloles, Lohût fil roi Artûs,
1665	Segremors und Prauerâûs, Blerios und Garredoinechschin, Los und Troimar lo mechschin, Brîên lingo mathel und Equinot fil cont Haterel,
1670	Lernfras fil gaîn und Henec suctellois fil Gawîn, Lê und Gahillet, von Hochturasch Maneset, und Batewain fil roy Cabcaflir,
1675	.... Galopamur, daz ist wâr, fil Îsabon und Schonebâr, Lanfal und Brantrivier, Malivliôt von Katelange und Barcinier,
1680	der getriuwe Gothardelen, Gangier von Neranden unde Scos der bruoder sîn, der küene Lespîn und Machmerit Parcefâl von Glois
1685	und Seckmur von Rois, Inpripalenôt und Estravagaot, Pehpimerôt und Lamendragot, Oruogodelet und Affibla delet,
1690	Arderoch Amander und Ganatulander, Lermebion von Jarbes, fil Mur defemius a quater bardes. nû hân ich iu genennet gar
1695	die tugenthaften schar. ir was nâch der rehten zal vierzec und hundert über al. Nû vuorte si diu künegîn gegen der menigîn.
1700	der wunsch was an ir garwe. als der rôsen varwe under wîze liljen güzze, und daz zesamene vlüzze, und daz der munt begarwe
1705	wære von rôsen varwe, dem gelîchete sich ir lîp. man gesach nie ritterlîcher wîp. Alsô si dô under die von êrste zuo der tür in gie
1710	und si sitzen gesach, schame tete ir ungemach. diu rôsen varwe ir entweich, nû rôt und danne bleich wart si dô vil dicke
1715	von dem aneblicke, ze gelîcher wîse als ich iu sage: als diu sunne in liehtem tage ir schîn vil volleclîchen hât, und gâhes dâ vür gât
1720	ein wolken dünne und niht breit, sô enist ir schîn niht sô bereit als man in vor sach. sus leit kurzen ungemach diu juncvrouwe Ênîte
1725	von schame unlange zîte. Dô si zer tür in gie, ir schœnez antlütze gevie der wünneclîchen varwe mê und wart schœner dan ê:
1730	ei wie wol ez ir gezam dô ir varwe wandel nam! von grôzer schame daz geschach: wan si nie mê gesach sitzen ensamt sô manegen helt
1735	von ganzen tugenden ûz erwelt. Dô diu maget in gie, von ir schœne erschrâken die zer tavelrunde sâzen sô daz si ir selber vergâzen
1740	und kapheten die maget an. dâ enwas dehein man, ern begunde ir vür die schœnsten jehen die er hæte gesehen. der künec gegen ir gie:
1745	bî der hant er si vie, vrouwen Ênîten, und sazte si besîten unde anderhalp sîn die tugenthaften künegîn.
1750	Nû gedûhte ouch den künec zît daz er den ritterlîchen strît zehant enden wolde. ir wizzet daz er solde sîn reht hân genomen
1755	(daz habet ir ê wol vernomen), von diu daz imz sô wol ergie daz er den wîzen hirz gevie, diu mit gelîchem mære diu schœniste dâ wære,
1760	daz er die kuste an ir munt. des hâte er unz an die stunt durch die künegîn erbiten. nû enwart niht dâ wider gestriten, si enwære diu schœniste dâ
1765	und über die werlt ouch anderswâ. wan ich sage iu rehte wie ir schœne vür die andern gie: als ob an einer vinstern naht die sterne wæren unbedaht,
1770	daz man si möhte wol gesehen, sô müeste man von schulden jehen, si wæren wol genæme ob in schœners niht enkæme. und sô den mânen sîn zît
1775	in der naht her vür gît, sô hât man die wolgetânen ze nihte bî dem mânen: si dûhten lobebære, ob der mâne niene wære
1780	und ob er si niht enlaschte mit sînem liehten glaste. sus swachete ir varwe die vrouwen begarwe. ouch vuor der künec ungebeit
1785	behalten sîn gewonheit, als im si sîn vater liez (sîn vater Utpandragôn hiez), daz er den kus næme dâ und ouch niender anderswâ
1790	wan swâz die guoten knehte gesageten im ze rehte. ûf stuont der künec dâ: sîn reht nam er sâ von sînes neven vriundîn.
1795	daz mohte wol âne haz sîn, wan Êrec was sîn künne. Nû huop sich michel wünne ûf dem hûs ze Karadigân. daz was ze liebe getân
1800	im und sîner vriundîn. wâ möhte grœzer vreude sîn dan man dâ hâte zaller zît? si vlizzen sich enwiderstrît, alle die dâ wâren,
1805	vrœlîchen gebâren. Dô gedâhte der tugentrîche Êrec vil ritterlîche an sînes swehers armuot unde sande im schœnez guot
1810	bî sînem boten in sîn hûs (daz gap im der künec Artûs), zwêne soumære, der bürde was vil swære. si truogen silber unde golt
1815	(wan er was der tohter holt), daz er sich schône kleite und er sich wol bereite ze varne in sînes vater lant: daz was Destregâles genant.
1820	bî sînem boten bater den künec Lac sînen vater daz er sînen sweher alten zweier hiuser lieze walten, diu er im benande
1825	in sînem lande, und daz si wæren sîn eigen. mit namen begunder si zeigen, Montrevel und Rôadân. daz was allez getân.
1830	als er diu hiuser zim gewan, dô wart der edel man ergetzet swes im ie gewar: unnôtic wart er gar. man tete in alsô rîche
1835	daz er sich hêrlîche mit in begân mohte, als sînem adel tohte. Nû grîfe wir wider an die vart dâ von der rede begunnen wart.
1840	dô Êrec hin ze hove kam und der künec sîn reht genam, vrouwe Ênîte reizte daz, diu dort als ein engel saz mit schœne und ouch mit güete,
1845	daz Êreckes gemüete vil herzenlîche nâch ir ranc. der tage dûhte in ze lanc, daz er ze langern zîten ir minne solde bîten
1850	dan unz an die næhsten naht. ouch truoc si im bedaht einen willen dem gelîch, daz ez wære wætlîch, und hetez nieman gesehen,
1855	daz dâ wære geschehen ein vil vriuntlîchez spil. zewâre ich iu daz sagen wil, dâ was der Minnen gewin: diu Minne rîchsete under in
1860	und vuocte in grôzen ungemach. dô einz daz ander ane sach, dô enwas in beiden niht baz dan einem habeche, der im sîn maz von geschihte zougen bringet,
1865	sô in der hunger twinget: und als ez im gezeiget wirt, swaz ers dâ vür mêre enbirt, dâ von muoz im wirs geschehen dan ob ers niht enhete gesehen.
1870	alsô tete in daz bîten wê zuo der mâze und dannoch mê. ir beider gedanc stuont alsô: «jâ enwirde ich nimmer vrô, ich engelige dir noch bî
1875	zwô naht oder drî.» ez gerten ir sinne anderre minne (dar nâch si gemâzet sint) danne dâ ein sunder kint
1880	sich nâch sîner muoter sent, diu ez guotes hât gewent, sô si im ir gruoz diutet und im die hende biutet vor dem dâ von im leit geschiht.
1885	untiurre engerten si des niht des si doch gewunnen sît. Nû was ouch briutennes zît, wan ez wære in beiden liep getân. nû enwolde in des niht erlân
1890	der tugenthafte Artûs, er enbrûte in sînem hûs ze vreuden sînem lande. zehant er ûz sande, swar er mohte gereichen,
1895	brieve und wortzeichen, daz im die vürsten kæmen und alle diez vernæmen von allen landen wîten ze sînen hôchzîten.
1900	diu brûtlouft wart gesprochen in der phingestwochen. Nû nenne ich iu die grâven gar unde ouch der vürsten schar diu zuo den hôchzîten kam
1905	dâ Êrec vroun Ênîten nam. ez wâren rîche geste: grâve Brandes von Doleceste (der brâhte in sîner schar vünf hundert gesellen dar,
1910	der geziuc was lobelîch, zuo im gekleit alle gelîch) unde grâve Margôn, geboren von Glufiôn, die herren von Alte montanje
1915	(deist nâhen bî Britanje) und grâve Libers von Treverîn mit zehenzec gesellen sîn, der rîche grâve Grundregoas und der herre Maheloas,
1920	von dem glesînen werde genant. sus stuont ez umbe sîn lant daz dar über benamen nie dehein ungewiter ergie: ouch was dâ grôzer gemach,
1925	wan man dâ nie wurm gesach: dâ enwart nie kalt noch heiz, als manz von der wârheit weiz. Gresmurs Fîne Posterne (den sach man dâ gerne)
1930	und sîn bruoder Gimörs genant (der wert Avalôn hiez sîn lant): des sælde enwas niht kleine, wan er minnete ein feine, diu hiez Marguel.
1935	ouch kam Dâvît von Luntaguel: der herzoge Guelguezins kam dar mit hêrlîcher schar: der Hôhe bois sô hiez sîn gewalt. nû sint iu die herzogen gezalt
1940	und die grâven über al. Nû vernemet ouch der künege zal. ir wâren zehene, sô man zalt, vünve junc und vünve alt, alle gewaltic unde rîch.
1945	besunder hâten si sich gesellet ritterlîchen, die jungen zir gelîchen, die alten zuo den alten: diu mâze wart behalten.
1950	die jungen wâren, sô man seit, gelîch geriten und gekleit: die alten wâren rehte alsam, zer mâze als ouch in gezam. nû prüeve ich iu der jungen wât:
1955	samît unde sigelât zesamene geparrieret, enmitten gezieret mit vêhen gevillen, vil rehte nâch ir willen
1960	ze enge noch ze wît gesniten. [diu ros diu die jungen riten] garwe swarz sam ein raben, diu enkunden niht wan draben. dise riten vor in daz lant.
1965	ir iegelîch vuorte ûf der hant vier mûze einen sparwære. diu schar was lobebære: ir brâhte iegelîcher dar driu hundert gesellen in sîner schar.
1970	an ir wât was der vlîz. der êrste künec Carnîz (Schorces sîn lant hiez) und der künec von Schotten Angwisiez mit zwein sünen sîn
1975	(genant was einer Côîn und der ander Goasilröt) und künec Bêals von Gomoret. Diz was diu junge ritterschaft. nû kâmen dar mit hêrschaft
1980	vünf alte künege rîche. die wâren ouch gelîche beide geriten und gekleit. si hâten an sich geleit ir alter ein gezæme wât,
1985	als manz von in vernomen hât, den besten brûnât den man vant über allez Engellant. diu geville wâren grâ, daz nieman anderswâ
1990	dehein bezzer enmohte hân, ze Riuzen noch ze Pôlân. si was lanc unde breit, allenthalben drûf geleit dickiu blech von golde,
1995	daz gewürhte als ez solde, guot unde wæhe unde alsô spæhe daz man ez volprîsen muoz, gezobelt breit ûf den vuoz.
2000	der zobel was daz nie dehein man deheinen bezzern gewan noch tiurern envant über allez Connelant. des landes phliget der soldân,
2005	wan ez ist im undertân: ez ist lanc unde wît. Conne beslozzen lît zwischen den landen beiden, den Kriechen und den heiden.
2010	der beste zobel kumt von dan den diu werlt ie gewan. diz was der vürsten kleit. dar under hâten si geleit rîche bellize alsam
2015	als ez der obern wât gezam. ir iegelîches huot was von zobel harte guot. geriten wâren si vil wol, als ich iu sagen sol,
2020	ir phert blanc snêwîz. an in was aller der vlîz der rîchen alten wol gezam: ir gereite guot alsam, von guotem golde was sîn schîn.
2025	daz daz gesmîde solde sîn, daz was von silber durchslagen, mit liehtem golde übertragen, ir darmgürtel borten breit. Dô disiu schar reit
2030	ze Britanje in daz lant, ir iegelîchem ûf der hant ein schœner habech saz, sehs mûze oder baz. dô was guot kurzwîle
2035	des weges drî mîle. si vunden guote beize dâ: beide bach unde lâ lâgen antvogele vol. swaz ein habech vâhen sol,
2040	des vunden si dâ vil. man gesach ouch nie vederspil sô manegen schœnen vluc getuon. Den antvogel und daz huon, den reiger und den vâsân
2045	sâhen si vor in ûf stân, den kranech an dem gevilde und die gans wilde. ouch vuorten ir knappen des tages von den trappen
2050	ir satel vol behangen, wan dâ was gar gevangen swaz ir wart gestoubet. vil garwe beroubet wart daz gevilde
2055	[an vogelen und an wilde:] swâ der hase erschrecket wart, daz was sîn jungeste vart. dô si nâch der beize riten unde vriuntlîchen striten,
2060	under in was ein bescheiden haz: ir iegelîch wolde daz dâ baz sîn habech gevlogen hæte, als man ouch noch tæte. Nû reit der künec Artûs
2065	engegen in von sînem hûs mit sîner massenîe gar und emphienc die hêrlîchen schar mit vil grôzer werdekeit: ir komennes was er vil gemeit.
2070	ez wurden die guoten knehte emphangen nâch ir rehte und vil baz behalten. nû nenne ich iu die alten. daz was der künec Jernîs
2075	von Riel, biderbe unde wîs. der brâhte mit im dar eine lobelîche schar, driu hundert gesellen. der alter hœret zellen:
2080	in was daz houbet gar und der bart snêvar, nider gewahsen alsô tief daz er in ûf die gürtel swief. der aller jungest, daz ist wâr,
2085	der hete vierzic und hundert jâr. Nû vernemet waz ir mêre sî. der getwerge künec Bîlêî und sîn bruoder Brîans genant: Antipodes hiez ir lant.
2090	ez enwurden einer muoter kint, die bruoder geheizen sint, nie ungelîcher danne sî, Brîans und Bîlêî. uns saget daz wâre mære
2095	daz Brîans langer wære dan iemen bî sînen zîten in allen landen wîten anderhalbe spanne: sô saget man uns danne
2100	daz dehein getwerc enwære noch sî kurzer danne Bîlêî. swes im an wahsenne gebrast, daz hete der wênige gast vol an dem muote.
2105	ouch envant man an dem guote niht sînen ebenrîchen. er kam dar hêrlîchen. sîn geselleschaft was grôz: er brâhte dar zwêne sîne genôz,
2110	ouch herren über getwerge lant. die wâren alsô genant, Grigoras und Glecidolân. die künege ich genant hân. nû emphienc der künec Artûs
2115	ze Karadigân in sînem hûs dise rîchen geste sô er mohte beste. Nû was komen der tac daz Êrec fil de roi Lac
2120	solde nemen vrouwen Ênîten. wes möhten si langer bîten? wan si wârens beidiu vrô. zesamene gap si dô eines bischoves hant
2125	von Cantwarje ûz Engellant. dô huop sich dâ ein hôchzît daz man ir vollen lop gît. dâne erschein dehein armuot. dâ was sô manec ritter guot
2130	daz ich iu zeiner mâze wil sagen von ir vrâze: wan si ahten mêre ûf ander êre danne daz si vræzen vil.
2135	dâ von ich iu kurze wil gesagen von der wirtschaft. dâ was alles des diu kraft des liute und ros solden leben: des wart in âne mâze gegeben,
2140	wan daz man des næme als es menlîch zæme. Bûhurt, tanzen huop sich hie, sô der imbîz ergie, unde werte unz an die naht.
2145	sô wart dâ trûren bedaht. alsô si des verdrôz, sô was ir vreude sus grôz. zen vrouwen si giengen die si schône emphiengen.
2150	dâ was diu handelunge guot. dar zuo vreuwete in den muot daz vil süeze seitspil und ander kurzwîle vil, sagen unde singen
2155	und snelleclîchen springen. dâ was aller künste kraft, von allen ambeten meisterschaft. die aller besten spilman die diu werlt ie gewan
2160	und die meister wâren genant, der was dâ zehant driu tûsent unde mêre. ez geschach nie grœzer êre weder vordes noch sît
2165	dan zuo der selben hôchzît. Swaz der diete dar kam, diu guot umbe êre nam, der entete man eines niht rât. den gelimph varndez volc hât,
2170	swâ man einem vil gît und dem andern niht, des hât er nît und vluochet der hôchzît. des kam dâ niemen in den strît, wan si wurden rîche
2175	alle gelîche. man gap dâ vil starke. von golde drîzec marke die gap man dâ vil manegem man der vor nie gewan
2180	eines halben phundes wert. si wurden alle sô gewert des wætlîch nimmer mêre ergât. beide ros unde wât gap man der swachen diet
2185	die vordes nieman beriet. alsô wart daz wol behuot daz dâ nieman umbe guot dem anderen nît truoc: man gap in allen genuoc.
2190	dâ enwart nieman geschant: man gap in allen zehant. emphâhens zeran in nie unz daz diu hôchzît zegie, unz an den vierzehenden tac.
2195	sus brûte Êrec fil de roi Lac. Als diu brûtlouft nam ende, nû schiet mit rîcher hende vil vrœlîchen dan manec wol sprechender spilman.
2200	die sprâchen alle mit gelîchem schalle wol den hôchzîten: Êrecke und vrouwen Ênîten wunschten si aller sælekeit.
2205	diu was in doch nû bereit lange unde manec jâr. ir wunsch wart volleclîche wâr, wan zwei gelieber wurden nie unz ez der tôt undervie,
2210	der allez liep leidet sô er liep von liebe scheidet. ouch wolden urloup hân genomen die vürsten die dar wâren komen. nû lancte die hôchzît
2215	der wirt vierzehen naht sît. Êrecke ze liebe tete er daz, wan er in sînem herzen saz, und ouch durch vrouwen Ênîten. zen andern hôchzîten
2220	stuont ir vreude alsam ouch ê: ir enwart niht minner, ir wart mê. Nû jâhen des genuoge, ez wære âne vuoge ob ein alsô guot man
2225	solde scheiden von dan, dâ enwürde ein turnei genomen, sît si durch vreude wæren komen ze Britanje in ir lant. des antwurte Gâwein zehant,
2230	die solden ouch si vinden dâ. einen turnei nam er sâ wider dise vier gesellen, der namen hœret zellen: Entreferich und Tenebroc,
2235	Mêlîz und Meljadoc. der turnei wart gesprochen über drî wochen von dem næhsten mântage. nâch der âventiure sage
2240	sô solde der turnei sîn zwischen Tarebrôn und Prûrîn: daz was in gelîche gelegen, in beiden ze halben wegen. nû schieden dise viere man
2245	mit urloube von dan, daz si sich bereiten dar zuo, wan ez enwas in niht ze vruo. Êrec fil der roi Lac maneger gedanke phlac,
2250	wie er dar sô kæme als sînem namen gezæme, wan er vor der stunde turnierens nie begunde. vil dicke gedâhte er dar an,
2255	in swelhem werde ein junger man in den êrsten jâren stât, daz er daz immer gerne hât. er vorhte den langen itewîz. deste grœzeren vlîz
2260	gâben sîne ræte wie erz dâ wol getæte. dô enwas er niht sô rîche daz er volleclîche mohte mit dem guote
2265	volziehen sînem muote. swaz aber im des gebrast (daz meinte daz er dâ was gast: sîn lant was im verre), Artûs der herre
2270	gap im swaz er vor gesprach. doch was er im dar an gemach daz es in iht bevilte. er entweich sîner milte mit bete swâ er mohte,
2275	als sîner schame tohte. er hæte wunder getân, möhte er gehabet hân nâch sînem willen volle hant. als ez im nû was gewant,
2280	dar nâch sazte er sînen muot. sîn harnasch enwas sô guot noch solch sîn geselleschaft, als ob er hete des guotes kraft. nâch sîner maht vienc erz an.
2285	Nû pruofte der junge man drîe schilte gelîch und driu gereite alsamelîch mit einem wâfen garwe: doch schiet si diu varwe.
2290	der ein im hurtlîch genuoc was, ûze ein liehtez spiegelglas (vil verre glaste des schîn), dar ûf ein mouwe guldîn, zer mâze sô si solde,
2295	innen gar von golde. der ander von sinopel rôt: dar ûf slahen er gebôt ein mouwen von silber wîz: diu was geworht in solhen vlîz
2300	daz man si sô kurzer stunde niht baz erziugen kunde und innen dem erren gelîch: der was genuoc ritterlîche. alsô wart der dritte var,
2305	von golde ûze und innen gar, dar ûf ein mouwe zobelîn, diu niht bezzer mohte sîn, dar über ein buckel geleit: von silber schône zebreit
2310	diu rîs, ze breit noch ze smal, si beviengen daz bret über al: daz bestuont diu mouwe. inner halp ein vrouwe an dem vordern orte:
2315	der schiltrieme ein borte mit guotem gesteine: des enwas er niht eine. si wâren innen alle gelîch, die riemen alsamelîch.
2320	nû pruofte er nâch der ahte sô er behendeclîchest mahte drî banier samelîch, einem iegelîchen schilte sîn gelîch. dar zuo Êrec der junge man
2325	mit Artûses helfe gewan, des küneges von Britanje, vünf ros von Spanje, helme von Poitiers, halsberge von Schamliers,
2330	îserkolzen von Glenîs. der herre junc unde wîs ziegelîchem rosse vuorte er von Lôfanige zehen sper, von Etelburc die schefte,
2335	geverwet ze ritterschefte. sîn helm gezieret schône: ein engel ûz einer krône von golde geworht schein. wâpenroc und kovertiure al ein,
2340	beidiu genuoc kuntlîch, grüener samît phelle rîch, zesamene geparrieret, mit borten wol gezieret. vünfzehen knaben er gewan,
2345	sô behende daz dehein man deheine tiurere envant ze Britanje überz lant. iegelîches harnasch was guot, ein panzier und ein îsenhuot
2350	und ein kiule wol beslagen. sîniu sper truoc ein wagen hin dâ der turnei solde sîn, zwischen Tarebrôn und Prûrîn, ê dan Êrec würde bereit.
2355	als ich ê hân geseit, dâ was ouch turneies zil: guoter ritter kam dar vil. Als er wolde rîten und von vrouwen Ênîten
2360	dô begunde scheiden, von den gesellen beiden ein getriuwiu wandelunge ergie, unde sage iu rehte wie: der vil getriuwe man,
2365	ir herze vuorte er mit im dan, daz sîn beleip dem wîbe versigelt in ir lîbe. An der sambeztages naht kam mit aller sîner maht
2370	der künec Artûs dar. er brâhte sîn massenîe gar. nû wâren die besten dâ ze wege geherberget nâch ir phlege. die uopten ritterlîchen schal.
2375	die herberge wâren über al mit liehten bestaht deiswâr alle die naht. Êrec herbergete dort von den andern an ein ort.
2380	deheines schalles er began: er lebete als ein vol karger man ungiudeclîchen und enwolde sich niht gelîchen einem guoten knehte,
2385	und von allem rehte. giudens urloup möhte er hân derz dicke vür in hete getân: er endûhte sich niht sô vollekomen noch an manheit vernomen,
2390	daz ez im erloubet möhte sîn. swelher der gesellen sîn durch geselleschaft geruochte daz er sîn herberge suochte, der wart schône emphangen dâ
2395	mit gruoze baz dan anderswâ: an swelhen andern dingen erz niht enmohte bringen, dâ schein sîn wille alsô daz ir iegelîcher was vrô
2400	swâ er im ze lobenne geschach. in minnete allez daz in sach. er tete alsam der Sælden schol: man enspræche im anders niht sô wol. Nû lebete disiu ritterschaft
2405	mit gewonlîcher vreuden kraft, als man ze turneien phlac. morgen an dem suntac tâten si als ez in was gewant: si hiezen ir îsengewant
2410	vegen unde riemen. dâ was lützel iemen wan den turnierens wol gezam. Alsô dô vür kam vil kûme mitter tac,
2415	Êrec fil de roi Lac der wâfente sich sâ ê iemen anderswâ, daz er die êrsten tjost næme und in vür kæme,
2420	swâ er des state vunde. nû wâren ouch zer stunde vür komen ûf den selben muot gesellen zwêne, ritter guot: und als si in gesâhen,
2425	zuo im begunden si gâhen ûf vil gewissen sin. der ein tjostierte wider in: den selben er von dem rosse stach. dem andern alsam geschach.
2430	ir rosse er niene ruochte, wan daz er vürbaz suochte ritterschefte mêre. dô geviel im diu êre diu in an lobe zierte,
2435	daz er vünfstunt tjostierte alsô daz nie ritter baz. zwô genâde vuocten im daz: sælde und grôze werdekeit, die hâte got an in geleit.
2440	Dise tjost hete er genomen ê ieman wære ze velde komen, wan si was genuoc vruo. doch riten si enmitten zuo von ietwederem teile.
2445	ze grôzem sînem heile menneclîch diu ros sach dâ er die ritter abe stach, dô si dâ liefen hin und her. si sprâchen alle: «jâ, herre, wer
2450	mac disiu ros erlediget hân? ez hât benamen Êrec getân.» Vil wol wart er geprîset dâ. nû huop sich ouch sâ vil rîch diu vespereide
2455	enmitten ûf der heide. des wart vil guot diu ritterschaft, daz ietwedernthalp ir kraft wac vol gelîche. dô wart ritterlîche
2460	genuoc getjostieret und wol gepunieret und geslagen mit dem swerte. die wîle der turnei werte, Êrec fil de roi Lac
2465	grôzer unmuoze phlac. swer im gewartet solde hân, der endorfte diu ougen ruowen lân: man sach in dort unde hie. baz turnierte ritter nie.
2470	si nâmen alle sîn eines war: er was ie der êrste dar und der jungeste dan. Êrec den prîs gewan des âbendes ze beiden sîten:
2475	des jâhen si âne strîten. Er reit unz im diu naht benam. dô man ze herberge kam, ander rede dô niemen phlac wan: «Êrec fil de roi Lac
2480	der ist der vaz tuonde man den unser lant ie gewan von sînen jâren. er enmöhte baz gebâren.» des wart grœzlîche gejehen.
2485	im was des âbendes geschehen dâ von er prîs bejagete. Morgen als ez tagete, Êrec ûf machte sich. sîin êrste vart was ritterlich:
2490	zuo der kirchen er gie und ergap sich im dem noch nie voller genâden zeran: ez enwart ouch nie gar vrumer man, an im enstüende sîn rât:
2495	wan der in vor im hât an allen sînen dingen, der versehe sich gelingen. Êrec trûwete im vil sêre umb sîn ritterlîche êre,
2500	daz er der geruochte phlegen. Als sich endete der segen, schilt und ros was im bereit. nû diuhte mich diu genendekeit lobelîch unde grôz,
2505	daz er âne wâfen blôz und gesellelôs ze velde kam, wan daz er vünf knaben zuo im nam. der iegelîcher vuorte driu sper. diu selben vertete er
2510	ze rehter tjost unde bar, daz des niemen wart gewar von sînem teile. nâch disem heile stal er sich wider in,
2515	als ez niender wære umbe in. Nû hâte vrouwe Melde vruo gesant ze velde einen garzûn besehen waz Êrecke wære geschehen
2520	zêren und ze prîse. daz tete der wortwîse dem künege Artûse erkant. die er ligende noch vant, die begunde er strâfen
2525	und beruofen umbe ir slâfen. er sprach: «wes liget ir hie? wer bejagete noch ie mit slâfe dehein êre? hiute hât Êrec sêre
2530	gurbort sper unde swert. got gebe im heil swenne er sîn gert. ich wil im immer guotes jehen: ich hân an im ersehen alsô manlîch getât
2535	des er immer êre hât.» sus machete er im vriunde mê und stuont ze prîse baz dan ê. Ein kurze ruowe er dô nam. wan als schiere er wider in kam,
2540	dô wâren si alle ûz komen und hâten messe vernomen, als sis beginnen solden die turnieren wolden. ein lützel âz er unde tranc:
2545	vil enliez in der gedanc den er hin wider hâte. vil wunderlîchen drâte wâfente sich dô menlich: alsam tete er sich.
2550	daz geschach nie sô schiere sô daz si die gesellen viere, Entreferich Tenebroc Mêlîz und Meljadoc, über jenez velt sâhen
2555	mit ir baniere gâhen. si hâten grôze kraft und genendige ritterschaft, manege banier rîche, von varwe misselîche.
2560	Êrec unde Gâwein und swaz dâ ritterschefte schein, ûf machten si sich sâ. dô hôrte man dâ michel kroîeren
2565	vor den banieren. Êrec der êrste an si kam, als einem ritter gezam. wâpenroc und krône machete in ûz schône
2570	unde sô daz dâ zehant dehein ritter was sô verre erkant. Êrec der herre kam hin vür sô verre daz er tjostierens state gewan.
2575	engegen in reit ein vrum man: der hôchvertige Landô sûmte tjostierens si dô. der hetez vordes âne wân alsô dicke wol getân
2580	daz man in nande zem besten in sînem lande. Êrecke dô sô wol geschach daz er in von dem rosse stach. er urborte sich sêre,
2585	wan dannoch vertete er mêre zwelf sper enzwischen den scharn. des muoste in sîn grôz tuht bewarn daz er unbekumbert dô beleip. Alsô lange er daz treip
2590	unz man im den schilt zestach und mit slegen sô zebrach daz er im ze nihte tohte. als er gewerlîchest mohte, sô staphete er ûz von in.
2595	schilt und ros gap er hin: ûf ein anderz er gesaz und warnte sich mit schilte baz und mit niuwem baniere. dazn tete er nie sô schiere
2600	ê er die sîne zuo sach varn. nû enmohte er zwischen den scharn getjostieren mêre. nû wart dâ vil sêre geslagen und gestochen,
2605	manec sper zebrochen, dô beidenthalp diu ritterschaft mit sô williger kraft zesamene liezen strîchen. nû enmohte sich gelîchen
2610	der schal von den scheften niwan dâ von windes kreften ein walt begunde vallen. dô tete erz vor in allen, Êrec fil de roi Lac,
2615	wande er den mântac maneges ros erledegete dâ. diu liez er von der hant sâ, daz er ir deheinez nam, wan er dar niene kam
2620	ûf guotes gewin. dar an kêrte er sînen sin, ob er den prîs möhte bejagen. ich wil ouch iu zewâre sagen, sîn lîp wart lützel dâ gespart.
2625	dô der turnei stânde wart, dô sach man in sô dicke niender als in der dicke, dâ er muoste emphâhen unde geben. man sach in manlîche leben.
2630	Als er getjostierte genuoc und mit dem swerte gesluoc unz daz er muoden began, durch ruowe entweich er von in dan. als er von dem rosse gesaz,
2635	ein soldier nam daz und seite ims genâde unde danc. sîn ruowe werte unlanc. als er den helm abe gebant, sîn knaben wâren dâ zehant
2640	und lôsten im daz hüetelîn, als er erküelet solde sîn, des im doch niht state geschach, wan er die sîne sach vlühteclîche entwîchen
2645	und doch müezeclîchen: sô ruhten si ie baz und baz. nû begunde in bedunken daz, si wæren enschumphieret nâch. ze rosse wart im alsô gâch,
2650	daz er des helmes vergaz. mit blôzem houbete er ûf saz: von geschihte begreif er beide schilt unde sper. dô enwart niht langer gebiten:
2655	schône kam er in geriten mit sîner baniere. enwære er niht schiere den sînen ze helfe komen, si müesten schaden hân genomen
2660	unde enschumphieret sîn. daz was dar an wol schîn, si wâren alle entwichen dan: ze wer enthielt sich nieman von al der massenîe
2665	niuwan die drîe: her Gâwein der edel man, der doch nie lasters teil gewan unde aller tugende wielt, fil Dou Gilules bî im hielt
2670	und Segremors: dise drî enthielten vaste wider sî. si tâtenz dâ, wizzet daz, sô nie drî ritter baz, wan si mit stichen noch mit slegen
2675	von stete niemen mohte erwegen. doch müesten si sîn gevangen, und wære daz ergangen von der grôzen überkraft (diust aller dinge meisterschaft,
2680	wider si niemen niht enamc), wan daz Êrec fil de roi Lac schône in geriten kam, als vriunde an der nôt gezam, rehte sam des windes dôz.
2685	sîn manheit was alsô grôz daz er si alle drâte umbe gekêret hâte. noch muoste erz en blanden grimme den handen,
2690	esn wære anders niht geschehen. als diz die sîne heten ersehen, nû kêrten si wider dâ zehant. wider in tjostierte Boidurant. den edeln ritter entsazte er
2695	ouch mit sînem sper. guot wort bejagete er dâ. die vîende enschumphierte er sâ, er eine in kurzer wîle wol driu teil einer mîle.
2700	dar kam im sîn geselleschaft ze helfe mit ir kraft und tâten si âne widerstrît vaste unz an ir hâmît. daz dritte ros gap er hin.
2705	harte schœnen gewin hete sîn geselleschaft begân, des âne in niht enwære getân. sîn genôz des tages manec man der von im dâ vil gewan.
2710	grôz was ir bejaget. des wart im dô genâde gesaget und gezam si deste mêre ze sprechen sîn êre. dô dûhte von im vollen grôz
2715	daz er durch sîn houbet blôz von ungewarheit niht vermeit daz er schône in reit und sô genendeclîchen die vîende tet entwîchen.
2720	Gâwein tetez des tages dâ guot als ouch anderswâ und nach sîner gewonheit. diu was, sô man seit, daz nimmer dehein man gesach,
2725	swâz im ze tuone geschach daz man ritterschaft urborte, er enschine dâ ie in dem worte daz ez niemen vür in tæte: des ist sîn lop noch stæte.
2730	vil ritterlîchen stuont sîn muot: an im enschein niht wan guot, rîch und edel was er genuoc, sîn herze niemen nît entruoc. er was getriuwe
2735	und milte âne riuwe, stæte unde wol gezogen, sîniu wort unbetrogen, starc schœne und manhaft. an im was aller tugende kraft.
2740	mit schœnen zühten was er vrô. der Wunsch hete in gemeistert sô, als wirz mit wârheit haben vernomen, daz nie man sô vollekomen ans künec Artûses hof bekam.
2745	wie wol er im ze gesinde zam! ûf êre leit er arbeit. harte grôze manheit erzeigete er den tac: âne Êrecken fil de roi Lac
2750	sô bejagete dâ niemen mêre: wan er bejagete guot und êre. Zwêne ritter vienc er dâ zehant: der ein Ginses was genant, der ander Gaudîn de Montein:
2755	dise vienc Gâwein. Êrec fil de roi Lac den lâze ich vor den einen tac (vürbaz engetar ich), wan man saget, sîn gelich
2760	ze Britanje enkæme nie: kam aber er dar ie, daz mohte Êrec wol gesîn: daz was an sînen tugenden schîn. Dô dâ ir vîende wâren getân
2765	in hâmît, als ich gesaget hân, Êrec vrâgen began ob her ûz dehein man wolde tjostieren mêre durch sîner âmîen êre.
2770	dô jach ein ritter zehant, der was Roiderodes genant, daz er tjostieren wolde, obz mit vride wesen solde. des was Êrec vil vrô:
2775	vride gelobete er im dô. engegen im er ze velde reit, wan er an sîner manheit was vil unerværet: daz hâte er dicke bewæret.
2780	zuo ein ander was in ger. âne vælen zwelf sper vertete ir ietweder dâ. nû erbeizete von rosse sâ der tugenthafte Êrec
2785	unde gap daz enwec. ûf daz vünfte er dô saz: bereite was ime daz. sîn ernest des gedâhte, daz er ouch volbrâhte:
2790	er enwolde si niht mê sûmen, er bat im ez rûmen. daz sper er undern arm sluoc. guot wille si zesamene truoc. nû erriet er in daz ers emphant
2795	zen vier nageln gegen der hant. alsô sêre er in stach daz im daz vürbüege brach. darmgürtel und surzengel brast, sam ez wære ein vûlez bast.
2800	im beleip ein swachez phant, der zoum zebrochen in der hant. er viel dô im misselanc von rosse wol drîer schefte lanc. daz er in dem satel gesaz,
2805	vil sêre prîste Êrecken daz, wan er hâtes êre. dâ enwas ze tuon niemêre. Nû hete der turnei ende. âne missewende
2810	schiet diu massenîe dan. Êrec der tugenthafte man wart ze vollem lobe gesaget. den prîs hete er dâ bejaget, und den sô volleclîchen
2815	daz man begunde gelîchen sîn wîsheit Salomône, sîn schœne Absolône, an sterke Samsônes genôz. sîn milte dûhte si sô grôz,
2820	diu gemâzete in niemen ander wan dem milten Alexander. sîn schilt was zebrochen, mit spern sô zestochen, man hete viuste dâ durch geschoben.
2825	sus verdiente Êrec sîn loben. Dô daz mære ûz kam und vrouwe Ênîte vernam sô grôze tugent zellen von Êrecke ir gesellen,
2830	dô was ir sîn manheit beide liep unde leit. daz ir liebes dran geschach, daz was daz man im wol sprach. daz si leides dran gewan,
2835	daz was, si weste wol ir man in sô getânem muote, im enwolde got mit huote genædeclîchen bî gestân, sô vorhte si in unlange hân,
2840	wan er den lîp ûf êre solde wâgen sêre, und wan erz versuochte, sô ein zage enruochte man spræche im übel oder guot.
2845	ouch hâte sich vil snelle ir muot der zweier eines bewegen, daz ir ze manne wære ein degen lieber dan ein arger zage, unde lie swache klage
2850	und was sîner manheit beide stolz und gemeit. Dô der turnei was ergân, der künec reit ûf Karadigân mit sîner massenîe.
2855	ir iegelîches âmîe emphienc den ir mit vreuden dô. ouch tete alsô vrouwe Ênîte. unlange zîte
2860	beliben si ze hove dâ. urloubes gerte er sâ ze dem künege Artûse rîten heim ze hûse in sînes vater lant:
2865	daz was Destregâles genant. des mohte in dunken grôziu zît: wan er was dar niht komen sît daz er was ein kindelîn. wie möhtes baz zît sîn?
2870	Als im dô ze muote wart umbe die heimvart, dô nam er an sich sehzec gesellen, die er gelich zuo ime kleite
2875	unde wol bereite. die vuorte der tugenthafte man zuo geselleschefte dan. sînen boten er sande vor hin heim ze lande,
2880	derz sînem vater tæte kunt. ouch rante er dâ ze stunt hin gegen Karnant (sô was ir houbetstat genant) unde vant den künec dâ
2885	unde sagete im sâ waz im sîn sun enbôt. des emphienc er rîchez botenbrôt: wan ez gelebete der künec Lac nie vrœlîchern tac
2890	danne den dô er vernam daz im sîn lieber sun kam. er was rüemic unde vrô. vil drâte besande er dô beidiu mâge unde man,
2895	der er vünf hundert gewan, und reit engegen im drî tage. nâch der âventiure sage sô emphiengen si alle gelîche harte vriuntlîche
2900	Êrecken mit sînem wîbe. ez endorfte vrouwen lîbe baz erboten werden nie dan ouch ir dô man si emphie. Der alte künec Lac
2905	vil grôzer vreuden phlac, wan si gâben im beide schœne ougenweide, Êrec mit vrouwen Ênîten. ze swederer sîten
2910	er sînhalp sach, sô vreute er sich, wan ir beider lîp was wünneclich. sîn sun geviel im wol, als einem man sîn kint sol, des schœne wol gerâten hât
2915	und alsô gar ze lobe stât: doch geviel im vrouwe Ênîte baz. wol bescheinte er in daz: er vuorte si heim ze karnant unde gap sîn lant
2920	in ir beider gewalt, daz er ze künege wære gezalt und daz si wære künegîn: er hiez si beide gewaltic sîn. Êrec was biderbe unde guot,
2925	ritterlîche stuont sîn muot ê er wîp genæme und hin heim kæme: nû sô er heim komen ist, dô kêrte er allen sînen list
2930	an vrouwen Ênîten minne. sich vlizzen sîne sinne wie er alle sîne sache wante zuo gemache. sîn site er wandeln began.
2935	als er nie würde der man, alsô vertreip er den tac. des morgens er nider lac, daz er sîn wîp trûte unz daz man messe lûte.
2940	sô stuonden si ûf gelîche vil unmüezeclîche. ze handen si sich viengen, zer kappeln si giengen: dâ was ir tweln alsô lanc
2945	unz daz man messe gesanc. diz was sîn meistiu arbeit: sô was der imbîz bereit. swie schiere man die tische ûf zôch, mit sînem wîbe er dô vlôch
2950	ze bette von den liuten. dâ huop sich aber triuten. von danne enkam er aber nie unz er ze naht ze tische gie. Dô Êrec fil de roi Lac
2955	ritterschefte sich bewac, der tugende er dannoch wielt, dâ er sich schône an behielt, swie er deheinen turnei suochte, daz er doch beruochte
2960	sîne gesellen alle gelîche daz si vil volleclîche von in selben mohten varn. er hiez si alsô wol bewarn als ob er selbe mit in rite.
2965	ich lobe an im den selben site. Êrec wente sînen lîp grôzes gemaches durch sîn wîp. die minnete er sô sêre daz er aller êre
2970	durch si einen verphlac, unz daz er sich sô gar verlac, daz niemen dehein ahte ûf in gehaben mahte. des begunde mit rehte
2975	ritter unde knehte dâ ze hove betrâgen. die vor der vreude phlâgen, die verdrôz vil sêre dâ unde rûmten imz sâ:
2980	wan ez enhâte wîp noch man deheinen zwîvel dar an, er enmüeste sîn verdorben: den lop hete er erworben. ein wandelunge an im geschach:
2985	daz man im ê sô wol sprach, daz verkêrte sich ze schanden wider die die in erkanden: in schalt diu werlt gar. sîn hof wart aller vreuden bar
2990	unde stuont nâch schanden: in endorfte ûz vremden landen durch vreude niemen suochen. des begunden vluochen die in ane wunden
2995	und im guotes gunden. si sprâchen alle: «wê der stunt daz uns mîn vrouwe ie wart kunt! des verdirbet unser herre.» Disiu rede geschach sô verre
3000	daz si die vrouwen ane kam. als si den itewîz vernam, des wart vil riuwic ir muot, wan si was biderbe unde guot, und gedâhte manegen enden
3005	wie si möhte erwenden alsô gemeinen haz. ouch geruochte si erkennen daz daz ez ir schult wære. si begunde dise swære
3010	harte wîplîchen tragen. Êrecke entorste siz niht klagen: si vorhte in dâ verliesen mite. Nû kam ez alsô nâch ir site daz er umbe einen mitten tac
3015	an ir arme gelac. nû gezam des wol der sunnen schîn daz er ir dienest muoste sîn: wan er den gelieben zwein durch ein vensterglas schein
3020	und hete die kemenâten liehtes wol berâten, daz si sich mohten undersehen. daz ir von vluochen was geschehen, dâ begunde si denken an.
3025	vil gâhes ruhte si hin dan. si wânde daz er sliefe. einen sûft nam si tiefe unde sach in vaste an. si sprach: «wê dir, dû vil armer man,
3030	und mir ellendem wîbe, daz ich mînem lîbe sô manegen vluoch vernemen sol.» dô vernam Êrec die rede wol. Als si der rede hete gedaget,
3035	Êrec sprach: «vrouwe Ênîte, saget, waz sint iuwer sorgen die ir dâ klaget verborgen?» nû wolde sis gelougent hân. Êrec sprach: «lât die rede stân.
3040	des nemet iu ein zil daz ich die rede wizzen wil. ir müezet mir benamen sagen waz ich iuch dâ hôrte klagen, daz ir mich sus habet verswigen.»
3045	si vorhte daz si würde gezigen von im ander dinge und seite imz mit gedinge daz er ir daz gehieze daz erz âne zorn lieze.
3050	Als er vernam diu mære waz diu rede wære, er sprach: «der ist genuoc getân.» zehant hiez er si ûf stân, daz si sich wol kleite
3055	unde ane leite daz beste gewæte daz si iender hæte. sînen knaben er seite daz man im sîn ros bereite
3060	und ir phert vrouwen Ênîten. er jach er wolde rîten ûz kurzwîlen. des begunden si dô îlen. dô wâpente er sich verholne
3065	unde truoc verstolne under der wât sîn îsengewant. sînen helm er ûf bant überz houbet alsô blôz. sîn vlîz was ze helne grôz:
3070	er tete alsam der karge sol. er sprach: «mîn helm enist niht wol. mirst liep daz ichz hân ersehen: und wære mir sîn nôt geschehen, sô wære ich gar geirret.
3075	ich sage iu waz im wirret: man sol in baz riemen.» dô enwas aber niemen der sich des mohte verstân wie sîn gemüete was getân.
3080	abe einer wende nam er beide schilt unde sper und begunde kroîeren, als er wolde buhurdieren. ritter unde knehte
3085	wolden sament rehte mit ir herren rîten: dô hiez er si dâ bîten. gein küchen sande er zestunt daz man den köchen tæte kunt
3090	daz si des war næmen, swie schiere daz si kæmen, daz in daz ezzen wære bereit. Mit solher rede er ûz reit und gebôt sînem wîbe
3095	niuwan bî dem lîbe, der schœnen vrouwen Ênîten, daz si muoste vür rîten, und verbôt ir dâ zestunt daz ze sprechenne ir munt
3100	zer reise iht ûf kæme, swaz si vernæme oder swaz si gesæhe. dise kumberlîche spæhe muoste si geloben dô,
3105	wan si vorhte sîne drô. Nû riten si beide âne holz niuwan heide, unz daz si der tac verlie. dô diu naht ane gie,
3110	schône schein der mâne. nâch âventiure wâne reit der guote kneht Êrec. nû wîste si der wec in einen kreftigen walt:
3115	den hâten mit gewalt drîe roubære. deiswâr swer in wære zuo den zîten widerriten dem si möhten hân gestriten,
3120	sô hâten si den wec behuot daz si im umbe daz guot næmen êre unde lîp. die ersach von êrste daz wîp, wan si verre vor reit.
3125	Diz was ir êrstez herzeleit daz ir zuo der verte geschach, wan si an ir gebærden sach daz si roubære wâren. si wolde imz mit gebâren
3130	gerne kunt hân getân. dô enmohte ers niht verstân, ouch enhete ers selbe niht ersehen: des was im nâch schade geschehen. vrouwe Ênîte wart dô
3135	beide trûric und unvrô: wan si sach die vreise, daz si vorhte werden weise des aller liebisten man den ie vrouwe gewan,
3140	wan ez stuont im angestlîchen. waz möhte sich gelîchen sô nâhen gânder riuwe die si von ir triuwe durch ir mannes liebe leit?
3145	Dô si in solhem zwîvel reit, ob si imz torste gesagen oder solde gedagen, nû redete si in ir muote: «rîcher got der guote,
3150	ze dînen genâden suoche ich rât: dû weist al eine wiez mir stât. mîner sorgen der ist vil, wan mir ein unsenftez spil in einer alsô kurzen vrist
3155	ze gâhes vor geteilet ist. nû enkan ichz wægeste niht ersehen: waz sol mir armen geschehen? wan swederz ich mir kiese daz ich doch verliese.
3160	warne ich mînen lieben man, dâ genim ich schaden an, wan sô hân ich den lîp verlorn. wirt aber diu warnunge verborn, daz ist mîns gesellen tôt.
3165	jâ ist einer solhen nôt wîbes herze ze kranc.» Nû kam der muot in ir gedanc: «bezzer ist verlorn mîn lîp, ein als unklagebære wîp,
3170	dan ein alsô vorder man, wan dâ verlür maneger an. erst edel unde rîche: wir wegen ungelîche. vür in wil ich sterben
3175	ê ich in sihe verderben, ez ergê mir swie got welle. ez ensol mîn geselle daz leben sô niht enden unz ich ez mac erwenden.»
3180	Hin umbe si zuo im sach vorhtlîchen unde sprach: «sich ûf, lieber herre, ûf genâde verre wil ich dir durch triuwe sagen
3185	(dînen schaden enmac ich niht verdagen): dir sint ritter nâhen bî die dir schadent, mugen sî, unser herre ensî der dich ner.» dô sazte Êrec sich ze wer.
3190	Nû sprach ein roubære: «ich sage iu liebiu mære dâ von uns wol mac geschehen» (der hâte si von êrste ersehen): «ich sihe dort rîten einen man:
3195	als ich ez verre kiesen kan, er vüeret eine vrouwen. ir muget wol schouwen, an ir geverte sint si rîch: ir kleider sint hêrlîch.
3200	hie endet unser armuot: mich dunket, si vüerent michel guot. nû sult ir herren sîn gemant daz iu diu triuwe sî erkant, waz wir under uns gelobet hân,
3205	und sult mir die wal lân an disem roube, und daz mir erloube vor iu iuwer beider munt die êrsten tjost hie zestunt
3210	diu wider den ritter sol geschehen, wan ich si von êrste hân gesehen. ist daz ich im benim den lîp, sô wil ich niuwan daz wîp: sîner habe enger ich niht mêre.»
3215	dô gewerten si in der êre. Den schilt er dô ze halse nam. als im Êrec nâhen kam, daz ros nam er mit den sporn. er sprach: «herre, ir habet verlorn
3220	beide lîp unde guot.» Êrec durch sînen grimmen muot im dehein antwurt enbôt und stach in von dem rosse tôt. sîn geselle in wolde gerochen hân:
3225	dem wart alsam getân. in wâren bein und arme blôz, des Êrec an dem sige genôz. si wâren gewâfent slehte nâch roubære rehte:
3230	daz was Êrecke guot. ir iegelîch hete einen îsenhuot zeinem panziere: des hete er si schiere zuo ein ander geleit.
3235	Dô im von sîner vrümekeit alsô rehte wol geschach, ze vrouwen Ênîten er dô sprach: «wie nû, ir wunderlîchez wîp? jâ verbôt ich iu an den lîp
3240	daz ir iht soldet sprechen: wer hiez iuch daz brechen? daz ich von wîben hân vernomen, daz ist wâr, des bin ich komen vol an ein ende hie:
3245	swaz man in unz her noch ie alsô tiure verbôt, dar nâch wart in alsô nôt daz sis muosten bekorn. ez ist doch vil gar verlorn
3250	swaz man iuch mîden heizet, wan daz ez iuch reizet daz irz enmuget vermîden: des sult ir laster lîden. swaz ein wîp nimmer getæte,
3255	der irz nie verboten hæte, niht langer si daz verbirt wan unz ez ir verboten wirt: sô enmac sis langer niht verlân.» si sprach: «herre, enhæte ichz niht getân
3260	durch iuwers lîbes gewarheit, ich enhætez iu nie geseit. ich tetez durch mîne triuwe. welt ir nû daz ez mich riuwe, sô vergebet mirz durch iuwer êre.
3265	ez geschiht mir nimmer mêre.» er sprach: «vrouwe, daz sî getân. ich wil diz ungerochen lân. ob ez iu immer mêr geschiht, ichn vertrage ez iu niht.
3270	doch enkumt iuz niht ze heile: ich riche mich an einem teile. ich enlâze iuch niht under wegen, ir enmüezet der rôse phlegen vol unde rehte.
3275	ich enwil iuwer ze knehte ze dirre reise niht entwesen.» «herre mîn, daz sol wesen» sprach diu vil guote, wan ez si niht enmuote.
3280	vil wîplîchen si dô leit dise ungelernet arbeit und dar zuo swaz ir geschach an ir herzen ungemach. der rosse si sich underwant,
3285	die zoume nam si in ir hant und reit vor an den wec. diz gebôt Êrec. der pherde si dô phlac dar nâch als ein vrouwe mac:
3290	baz si enkunde. Sâ zuo der stunde kûme eine wîle, niuwan drî mîle riten sî beide,
3295	ê daz ir aber leide von sorgen geschach, wan si vor ir ligen sach vünf roubære. man saget daz ez wære
3300	ein geselleschaft under in und daz si teilten ir gewin mit den die Êrec hete erslagen. der eine begundez den andern sagen. dise vünve und jene drî man
3305	von den ich iu vor gesaget han, die heten den walt in ir phlege unde lâgen bî dem wege, swer die einen vermite, daz er den andern gerite.
3310	Êrec was vür die drîe komen mit êren, als ir habet vernomen. als er dô disen sô nâhen kam daz sîn der eine war genam, der verre von den andern lac
3315	und der schiltwahte phlac, sîns zuorîtens was er vrô. ze sînen gesellen sprach er dô: «gehabet iuch vrœlîche: wir werden alle rîche.
3320	ich sihe liute rîten den wir wol gestrîten. ez ist niuwan ein man, als ich ez kiesen kan. er vüeret ein ritterlîchez wîp:
3325	der ist bekumbert ir lîp. si vüeret driu ros an der hant: si ist, hân ich ez rehte erkant, dem ambet ungezæme. mich wundert wâ er næme
3330	sô seltsænen schiltkneht. man sol si im nemen, daz ist reht. als ich ez verre mac gespehen, ich enhân nie schœner wîp gesehen. ir herren, die sult ir mir lân,
3335	wan ich si von êrste ersehen hân.» dô sprâchen si alle gelîche, si würde im billîche. «vernemet», sprach sîn geselle, «waz ich des roubes welle:
3340	niuwan sîn îsengewant.» die andern teilten dâ zehant diu vünf ros under sich. daz was doch ungenædeclich, wan ez diente von rehte
3345	Êrecke dem guoten knehte: er kundes wol geniezen. ouch vluren si ir liezen. Êrecke was diu rede unkunt. nû bereite sich einer dâ zestunt
3350	engegen im dâ er in sach. vil sorclîchen ungemach vrouwe Ênîte gewan. si gedâhte: «warne ich mînen man, sô briche ich aber sîn gebot.
3355	er enlâtz durch êre noch durch got, er enneme mir den lîp. ouwê ich sældenlôsez wîp! wære ich nû niuwan tôt, daz næme ich vür dise nôt:
3360	sô wære mir verre baz geschehen. sol ich den slahen sehen der mich von grôzer armuot ze vrouwen schuof über michel guot dâ von ich schône gêret bin
3365	(ich heize ein rîchiu künegin), daz sol mich geriuwen: wan sô muoz von untriuwen mîn sêle verderben und von rehte ersterben
3370	gelîche mit dem lîbe. got rât mir armen wîbe wie ich ez ane vâhe daz ich mich niht vergâhe. ich wæne ez solde verdagen.
3375	entriuwen niht, ich sol imz sagen: ze swelher nôt ez mir ergê, ez wirt gewâget alsam ê.» vil drâte si hin umbe sach, zÊrecke si mit vorhten sprach:
3380	«herre, durch got vernim mich: bewar ez oder man sleht dich. ich sihe vünf gesellen die dich slahen wellen.» als schiere si imz seite,
3385	ze wer er sich bereite. Ir einer hete sich ûz genomen und was den andern vür komen, daz er tjostierte wider in, ûf sîn selbes ungewin,
3390	wan in stach Êrec fil de roi Lac daz er underm rosse tôt lac. dannoch wâren ir viere. der einen er schiere ouch tôten von dem rosse stach
3395	unde daz sîn sper zebrach. dô enblient erz dem swerte. der strît unlange werte: er begunde vellen die drîe zir gesellen.
3400	Alsô dô der eine man den vünven sige an gewan und er wolde rîten, er sprach ze vrouwen Ênîten: «saget, ir wîp vil ungezogen,
3405	war umbe habet ir aber gelogen? wan ichz iu von êrste vertruoc, nû endûhte iuch dar an niht genuoc, ir entætets aber mêre. und möhte dehein êre
3410	man an wîbe begân, ez ensolde iuch niht sô ringe stân, ich ennæme iu hie zehant den lîp.» «genâde, herre!» sprach daz wîp. «ir sult mich des geniezen lân
3415	daz ichz durch triuwe hân getân. noch dulde ich baz iuwern zorn dan iuwer lîp wære verlorn, swaz mir nû von iu geschiht. und hæte ich gebiten iht,
3420	herre, sô wæret ir erslagen. nû wil ich immer gerne dagen. nû vergebet mir diz durch got: zebriche ich mêr iuwer gebot, daz rechet sâ zestunt.»
3425	Êrec sprach: «vrouwe, ich tuon iu kunt, ir gewinnet an iuwerm strîte niuwan übele zîte: irn belîbet râche niht vrî. swies danne iu gedâht sî,
3430	sô muoz ez iu ergân. ich wil iuch ze knehte hân die wîle wir sîn ûf disem wege. nû nemet diu ros in iuwer phlege und bewart si alsô schône
3435	daz ich iu mit übele iht lône: und wirt ir einez verlorn, ir müezet dulden den zorn des ir gerne enbæret, ob ir wîse wæret.»
3440	Vrouwe Ênîte nam dô diu. vordes wâren ir driu: nû wurden aller ahte. si vuorte si als si mahte: si enkunde niht wol dâ mite.
3445	swie verre ez wider vrouwen site und wider ir reht wære, si leit ez âne swære mit senftem gemüete: daz lêrte si ir güete.
3450	diu vrouwe grôzen kumber leit, wan daz si ze liebe ir leit in ir herzen verkêrte, als si ir diemuot lêrte. swer ez rehte ahten wil,
3455	sô hæten dar an harte vil ze tuone vier knehte, solden si ze rehte aht ros vüeren und bewarn, dâ si eine muoste mite varn.
3460	wan daz vrou Sælde ir was bereit und daz diu gotes hövescheit ob mîner vrouwen swebete und dâ wider strebete daz ir dehein grôz ungemach
3465	von den rossen niene geschach, sô wære kumberlîch ir vart: des wart diu vrouwe wol bewart. ouch muosten durch einen solhen kneht diu ros gerne und durch reht
3470	ir ungestüemez streben lân und senfteclîchen mite gân. Dô begunden si balde gâhen von dem walde: vil schône der tac ûf gie.
3475	als si dô diu naht verlie, dô sach vür sich Êrec wâ in wîste der wec zeinem hûs niht verre, dâ des landes herre,
3480	ein rîcher grâve, ûfe saz. nû wâren si beide âne maz alle die naht geriten und hâten kumber erliten. des hûses wâren si vrô,
3485	wande si gedâhten dô dâ ze ruowen über tac in einem markete der dar under lac. si begunden hin gâhen dâ si den market sâhen.
3490	Nû bekam in ûf dem wege ein knabe, der hete in sîner phlege gesoten schultern unde brôt, gewunden, als man im gebôt, und bewart ze vlîze
3495	in eine tweheln wîze: ein kandel vuorte er an der hant mit wîne. wem diz wart gesant, des enist mir niht geseit. Dô dirre knabe zuo reit,
3500	ze vlîze begunde er schouwen die bekumberten vrouwen. ir gevertes in grôz wunder nam. als er zuo ir geriten kam, si gruozte in vil schône:
3505	dô neic er ir ze lône. vürbaz wîste in der wec. nû gap im Êrec mit gruoze guoten morgen, under helme verborgen.
3510	der knabe an im dô wol sach daz er grôzen ungemach die naht hâte erliten und gewâfent was geriten, und bewegete in ir arbeit.
3515	er sprach: «herre, enwærez iu niht leit, ich vrâgete iuch mære war iuwer wille wære. saget mirz durch iuwer diemuot: ich vrâge iuch niuwan durch guot.
3520	mich dunket ir sît gast hie: sô was ich in dem lande ie unde bin des grâven kneht. mich dunket gevüege unde reht und bite iuch des verre
3525	daz von iu mîn herre dâ mite sî gêeret daz ir ûf sîn hûs kêret und geruowet nâch iuwer arbeit: man ist iu dienstes dâ bereit.
3530	unde bite iuch mêre durch die gotes êre: mich dunket daz ir habet geriten und grôze arbeit erliten: und twinge iuch dehein hungernôt,
3535	ich vüere hie schultern unde brôt unde vil guoten wîn. nû lâtz in iuwern hulden sîn und heizet die vrouwen bîten unde wider rîten,
3540	und enbîzet hie an dirre stat.» er tete als in der knabe bat: des was der kneht vrô. hin vür zer vrouwen îlte er dô, daz er ir diu ros emphie.
3545	wider zir gesellen si dô gie. der kneht diu ros zesamene bant: dar zuo leite er sîn gewant. sînen huot nam er in die hant und gienc dâ er wazzer vant.
3550	in beiden er sô vil truoc daz man die hende getwuoc. die tweheln leite er ûf daz gras, dar ûf die spîse diu dâ was, vleisch brôt unde wîn:
3555	es enmohte nie mêre sîn. Als si dô genuoc gâzen und wider ûf gesâzen, Êrec sprach zuo dem knehte: «knabe, ir sult von rehte
3560	etelîchen lôn emphân des ir zuo uns habet getân. ir habet minne wol versolt. nû enhân ich silber noch golt dâ ich ius gelône mite:
3565	geselle, nû tuot des ich iuch bite unde nemet die wal under der rosse zal, ein daz iuz liebiste sî. unde sît gewis dâ bî,
3570	kumt uns immer der tac daz ich iuch baz gehandeln mac, des gebristet iu niht an mir: daz phert sult nemen ir durch unsere bete.»
3575	der knabe daz vil gerne tete. er hete si im elliu gegeben, wan daz der vrouwen leben dâ mite gesenftet wære: er liez ez durch ir swære.
3580	Als er dô ein ros genam des in aller beste gezam, dô genâdete er im verre. er sprach: «lieber herre, nû gewert mich des ich iuch bite:
3585	dâ handelt ir mich wol mite. diu vrouwe lîdet von arbeit mit disen rossen michel leit, daz ich si vüeren müeze: der dienest ist mir süeze.»
3590	Êrec sprach: «knabe, daz sult ir lân. jâ enist ez doch niht getân garwe âne sache. si muoz mit ungemache leben ze disen zîten.»
3595	er sprach: «sô wil ich rîten.» «got vergelte iu genâde unde guot: iuwer êre sî von im behuot, daz ir mit sælden müezet leben. knabe, nû rîtet gote ergeben.»
3600	sîner gâbe was er vrô: wider umbe rîten begunde er dô: von vreuden was im vil gâch. Êrec reit müezeclîchen nâch. Nû ersach in sîn herre
3605	und erkande in verre, wan er was vür daz bürgetor gegangen: dâ saz er vor. vil michel wunder in des nam daz er sô schiere wider kam,
3610	und vrâgete in mære wes daz ros wære daz er dâ vuorte an der hant. vil schiere tete er im erkant die rede an ein ende gar.
3615	er sprach: «herre, nû nemet war wâ si zuo iu rîtent: nû enweiz ich wes ir bîtent daz ir nû niht zer strâze engât: ir missetuot ouch, ob irz lât.
3620	jâ muget ir an der vrouwen daz schœniste wîp schouwen die wir ie gesâhen. [ir sult si schône emphâhen.]» zem wege er dô hin gie,
3625	mit schœnem gruoze er in emphie. Als er si zuo rîten sach, er gienc engegen in unde sprach: «willekomen, vrouwe und herre» und bat si vil verre
3630	daz si in dâ mite êrten und ûf sîn hûs kêrten und daz si wolden dâ bestân. «herre, des sult ir uns erlân» sprach der ritter Êrec:
3635	«uns hât der lange wec getân unhovebære: von müede sîn wir swære. iuwern genâden sî genigen und des mit hulden verzigen.
3640	ir sult uns ze disen zîten ze gemache lâzen rîten.» urloubes begunden si dô gern unz er sis muoste gewern. Einen knaben er sich dô wîsen bat
3645	zem tiuristen wirte in die stat. dâ entwâfente er sich dô. vrouwe Ênîte was vil vrô der ruowe der si dô bekam dô man ir diu ros benam.
3650	ir was als der sêle der von Michâêle wirt der hellewîze rât, diu lange dâ gebûwen hât. ein bat hiez er bereiten,
3655	wan er von arbeiten von dem gewæfen ûf der vart sweizic unde râmic wart: des belôste er den lîp. als er gebadete und sîn wîp,
3660	daz ezzen was bereite. als man in daz seite, den tisch er dô rihten hiez. vrouwen Ênîten er niht enliez ensament mit im ezzen,
3665	wan er was gesezzen besunder hie und si dort von im an der tweheln ort. Nû begunde den grâven riuwen, und gedâhte wider sînen triuwen,
3670	daz er die vrouwen verliez, daz er si im niht nemen hiez. manecvalt wart sîn gedanc, als in der vrouwen schœne twanc, wie er si möhte gewinnen.
3675	untriuwe riet sînen sinnen daz er dar sô kæme daz er si im benæme. daz was doch wider dem rehte daz er dem guoten knehte
3680	sîn wîp wolde hân genomen, dô er in sîn lant was komen, den er bevriden solde ob im iemen schaden wolde. der muot was im von minne komen,
3685	wan wir haben vernomen von dem grâven mære daz er benamen wære beide biderbe unde guot, an sînen triuwen wol behuot
3690	unz an die selben stunt. dô tete im untriuwe kunt diu kreftige minne und benam im rehte sinne. wan an der minne stricke
3695	vâhet man vil dicke einen alsô kargen man den niemen sus gewinnen kan. vil manegen man diu werlt hât der nimmer in dehein missetât
3700	sînen vuoz verstieze ob ins diu minne erlieze: und engæbe si niht sô rîchen muot, sô enwære der werlde niht sô guot noch sô rehte wæge,
3705	sô ob man ir verphlæge. nû enhât aber niemen solhe kraft, und ergrîfet in ir meisterschaft, er enmüeze ir entwîchen. swer aber ir gewislîchen
3710	ze rehte kunde gephlegen, den enlieze si niht under wegen, im enwære der lôn von ir bereit daz in sîn arbeit niht endorfte riuwen,
3715	huote er sîner triuwen baz dan der grâve tæte. der enwas dar an niht stæte, wan in vrou minne betwanc ûf einen valschen gedanc,
3720	daz er dem vil biderben man sîn wîp ze nemenne muot gewan. Vier ritter er zuo im nam. als er zen herbergen kam, ob dem tische er si vant.
3725	von im leite er sîn gewant: mit gruoze begunde er vür si stân. dô enhete Êrec deheinen wân daz er im schaden solde, als er doch gerne wolde.
3730	den grâven nam grôz wunder daz si sô besunder an dem tische sâzen und ensament niht enâzen. er sprach in sîner valscheit:
3735	«herre, enwærez iu niht leit, sô soldet ir mich wizzen lân war umbe diz sî getân. ist disiu vrouwe iuwer wîp? der ist wünneclîch ir lîp
3740	und sô wol genæme daz si baz bî iu zæme danne dort an jener stat. wes habet ir si von iu gesat?» sus antwurte im Êrec dô:
3745	«herre, mîn gemüete stât alsô.» der grâve bat in vürbaz daz erz lieze âne haz ob er zuo ir sæze die wîle daz man æze.
3750	des antwurte im Êrec dô: «geruochet irs, herre, ich bins vrô.» Er sprach als er zuo ir gesaz: «ich sage iu, vrouwe, umbe waz ich her zuo iu komen bin:
3755	ein teil durch iuwern gewin und benamen durch iuwer êre. mir erbarmte nie sô sêre weder man noch wîp als iuwer wætlîcher lîp.
3760	sît ich iuch hiute lîden sach als missezæmen ungemach der einer vrouwen nie gezam, vil nâ ez mînem herzen kam und ouch noch dicke leider tuot.
3765	iuwer grôze armuot die verwîze ich iu durch übel niht, wan daz mir leide dran geschiht. nû zæmet ir wærlîche ze vrouwen wol dem rîche.
3770	wer gap iuch armen solhem man der enmac noch enkan iuch gêren ze rehte? er hât iuch zeinem knehte. der selbe iuwer geselle
3775	(daz in got velle!), der vlîzet sich dar zuo waz er iu leides getuo. und hete mich iuwer got gewert, ir wæret bezzer êren wert.
3780	welt ir, noch geschiht iu allez guot. ich sage iu, vrouwe, mînen muot: und ist daz ir sô wîse sît, sô lât irz âne widerstrît: ich wil iu kumbers schaffen rât.
3785	ich sage iu wie mîn dinc stât. ich bin dises landes herre: nâhen noch verre envant ich noch daz wîp [nie, sô mir der lîp,]
3790	diu mir gezæme daz ich si næme. nû gevallet ir mir sô wol daz ich iuch gerne machen sol ze vrouwen disem lande:
3795	sô habet ir âne schande wol gewehselt iuwer leben.» «Ein vrouwen müeze iu got geben», sprach daz tugenthafte wîp, «diu iuwer lant und iuwern lîp
3800	baz ze rehte ziere. ez müeste iuch harte schiere von rehte geriuwen und wære wider mînen triuwen. als ez diu werlt vernæme
3805	und ez ir vür kæme, sô wærez niuwan ir spot. durch daz sô lât die rede durch got, wan iu von rehte baz geschiht. ich entouc ze grævinne niht:
3810	ich enhân geburt noch daz guot. swaz ouch mir mîn geselle tuot, daz dulde ich mit rehte. ze wîbe und ze knehte und ze swiu er mich wil hân,
3815	des bin ich im alles undertân. herre, waz mac ich sprechen mê? wan ich wolde erweln ê daz ich lebende hie zehant ze pulver würde verbrant
3820	und man den zesæte, ê ich ez immer getæte. unser ahte stât gelîche: wir ensîn beide niht rîche, wir komen wol ze mâze.
3825	got mir in leben lâze!» Als er dise antwurt vernam und ir willen alsam, er sprach: «ich sage iu mînen muot: dar nâch beweget iuch waz ir tuot.
3830	welt ir niht güetlîchen mîner bete entwîchen, sô geschiht ez under iuwern danc. iuwer wer ist mir hie ze kranc. iuwer geselle
3835	var swar er welle: ir müezet hie mit mir bestân. diu rede sol ein ende hân.» Als si sînen ernest sach und daz erz von herzen sprach,
3840	vil güetlîchen sach si in an, den vil ungetriuwen man, und lachete durch schœnen list. si sprach: «ich wæne iu ernest ist. herre, enzürnet ir niht:
3845	wan iu der rede unnôt geschiht. ez was zewâre mîn wân, ir hetet die rede durch schimph getân. wan ez ist iuwer manne site daz ir uns armiu wîp dâ mite
3850	vil gerne trieget (ich entar gesprechen: lieget), daz ir uns vil ze guote geheizet wider iuwerm muote: dâ von ich dicke hân gesehen
3855	wîben michel leit geschehen. enhæte ich niht ervorht daz, ich hæte iu gantwurtet baz, wan ich, herre, niene bin iedoch sô gar âne sin,
3860	und möhte ich mîne sache zêren und ze gemache verwandeln, daz entæte ich. wan mîn leben ist sô kumberlich, als irz selbe habet gesehen.
3865	vil rehte wil ich iu bejehen wie mich von êrste mîn man im ze wîbe gewan. ichn bin im niht genôzsam: mînem vater er mich nam,
3870	wan der ist wærlîche edel unde rîche. in des hof er dicke reit. nâch kinde gewonheit lief ich dâ hin unde her.
3875	eines tages spilte er mit uns. dô schein wol daz kint lîhte ze triegenne sint. mit liste er mich vürz tor gewan: dâ zuhte er mich und vuorte mich dan
3880	und hât mich alsô iemer sît. manege kumberlîche zît tuot er mich lîden, wan hie von muoz er mîden daz wesen in sînem lande.
3885	schaden unde schande ich armiu zallen zîten wone. swer bezzer mich dâ vone nâch êren lœsen wolde, gerne ich des volgen solde:
3890	dar zuo vergultez im got. ich wânte diu rede wære iuwer spot. ist daz ir mir bescheinet ob ir die rede meinet mit etelîcher sicherheit,
3895	sô bin ich iuwer bete bereit.» Der rede was der grâve vrô. lachende antwurte er ir sô: «ir enmuget iuch des niht erwern, wan ich wil iu stæte swern.»
3900	sîn vinger wurden ûf geleit, diu vrouwe gap im den eit: ouch gap si im dâ zestat, ze leisten des er gebat, ein ungewissez phant,
3905	ir triuwe an sîne hant. Als dô diu sicherheit geschach, mit listen vrouwe Ênîte sprach: «herre, nû râte ich iu wol, als ein vriunt dem andern sol,
3910	wan ich nû deheinem man guotes alsô iu gan, ir volget mîner lêre: ez enkumbert iuch niht sêre. sît ir mich genemen welt,
3915	dâ mite râte ich daz ir twelt unze vruo morgen: sô muget ir âne sorgen mich genemen und âne strît. sô er an sînem bette lît,
3920	sô kumet ir her: wande sô enmac er iu niht geschaden, sô werdet ir iuwers willen an mir unbekumbert gewert,
3925	wan hînaht stil ich im daz swert.» Si sprach: «ich bin iu nû holt, wan daz habet ir wol versolt, und müet mich, sult ir dulden schaden von mînen schulden:
3930	daz doch benamen muoz ergân, ir entuot als ich gesprochen hân. wande nemet ir mich zehant, ez ist umbe uns sô gewant daz er mich ungerne lât.
3935	sîn swert er bî im hât: ich weiz wol daz er schaden tuot.» er sprach: «iuwer rât der ist guot, der gevellet mir sô wol daz ich iu gerne volgen sol.»
3940	mit schœnen wîbes listen begunde si dô vristen ir êre und ir mannes lîp. vrouwe Ênîte was ein getriuwez wîp. sus überredete si den man
3945	daz er schiet mit urloube dan ûf solhe ungewisheit, als ich iu dâ hân geseit. Als si dô gezzen hâten, in eine kemenâten
3950	hiez er in betten beiden und doch diu bette scheiden: er enwolde si bî im ligen lân. slâfen begunden si dô gân. Nû lâgen si besunder.
3955	diz was iedoch ein wunder, daz er durch deheinen zorn im den muot hete erkorn daz er ein sô schœne wîp meit. von sorgen grôzen kumber leit
3960	der vrouwen gemüete durch triuwe und durch güete, wie im diu rede würde kunt: wan er verbôt daz ir munt ze sprechenne iht ûf kæme,
3965	swaz si vernæme, als ich iu ê gesaget hân. doch enhete siz niht verlân: dâ mite hete si in verlorn, sô daz er ir durch den zorn
3970	ze geselleschefte niht enphlac, wan er sunder âz und lac. Nû gedâhte diu guote alsô in ir muote: «ez ist mir ûf daz zil komen
3975	daz mir benamen wirt benomen der aller liebiste man den ie wîp mêr gewan, ez ensî daz ich in warne. ouch weiz ich daz ichz arne,
3980	zebriche ich aber sîn gebot. nû rât mir, herre, rîcher got! des enwart mir nie sô nôt. ich weiz wol, ez ist mîn tôt, wan er hât mirz nû zwir vertragen.
3985	waz aber von diu, wirde ich erslagen unde nimt er mir den lîp? dannoch lebet manec vrum wîp. ich enbin ouch niht sô klagelîch: sô ist er edel unde rîch,
3990	mîn lieber herre. ê im iht gewerre, sô wil ich kiesen den tôt.» ir triuwe ir daz gebôt daz si ze sînem bette gie
3995	und bôt sich vür in an ir knie und sagete im die rede gar. von vorhten wart si missevar. Als ez im dô wart erkant, ûf stuont er zehant
4000	und bat den wirt wachen. dô begunde er sich ûf machen: des wirtes knehten er seite daz man im diu ros bereite. daz was schiere getân.
4005	den wirt bat er zuo im gân. er sprach als er zuo im gie: «in iuwerm hûs habet ir uns hie gehandelt schône unde wol: des geltes bin ich iuwer schol.
4010	nû vernemet waz irs erholt. ich enhân hie silber noch golt dâ ich iu vergelte mite. nû tuot als ich iuch bite: diu siben ros nemet ir
4015	nû ze gelte von mir.» der wirt neic im an den vuoz. als ein man der gewinnen muoz, sô was er herzenlîche vrô. zehant truoc er im dô
4020	ze heiles gewinne sant Gêrtrûte minne. alsô reit des nahtes dan Êrec der ellende man unde rûmte zehant
4025	mit sînem wîbe daz lant. diu hete den grâven betrogen und âne sünde gelogen. Ê daz sich Êrec ûf machete ûf den wec,
4030	dô gedâhte dar an der vil ungetriuwe man, wenne er zer vrouwen solde komen, ob er si wolde hân genomen. von dem slâfe er ûf erschrac
4035	dâ er an sînem bette lac: wan er des vorhte und hete wân, er solde sich versûmet hân. vil lûte schrei er: «wâfen! wir haben uns verslâfen.
4040	wol ûf, mîne gesellen, die mir helfen wellen!» niunzehene wâren ir über al und er der zweinzegeste an der zal. Als er die zuo im genam
4045	und zuo den herbergen kam, nâch ungevüegem gruoze sô stiez er mit dem vuoze die tür daz si zebrach. daz was dem wirte ungemach
4050	und wolde wâfen hân geschrirn. «nû sihstû wol daz wirz birn» sprach der ungetriuwe man: «envürhte dir niht und sage an, waz diutent disiu lieht hie?»
4055	diz wâren diu dâ lie der tugenthafte Êrec dô er sich machete ûf den wec. Der grâve des niht enweste. «wâ slâfent dîne geste?»
4060	«herre, si sint geriten.» mit zornigen siten sprach der grâve: «si ensint.» «lüge ich, herre, ich wære ein kint.» «ez ist entriuwen dîn spot.»
4065	«nein ez, herre, sô helfe mir got.» «ez ist. nû wîse mich dar.» «nû heizetz selbe ersuochen gar.» «entriuwen, daz ich daz sol.» «nû gan ouch ich es iu wol.»
4070	«wie lange sol ich dich vrâgen?» «nû seht selbe wâ si lâgen. war umbe solde ich si iu versagen?» er sprach und wolde in hân erslagen: «dû wæne ein abeleitære bist.»
4075	«herre, si sint geriten, wizze Krist.» «daz ist von dînen schulden.» «nein ez, bî iuwern hulden.» «sô hæten si des tages erbiten.» [«herre, si sint nû geriten.»]
4080	«sage, sint si iht verre?» «nein si entriuwen, herre: si riten an dirre stunt.» «war sint si?» «deist mir unkunt.» Dô twanc in sîn untriuwe
4085	ze grôzer herzeriuwe. dem slâfe vluochte er sêre. er sprach: «mir enwas êre niht ze teile getân, daz ich sus verlorn hân
4090	daz schœniste wîp durch gemach die mîn ouge ie gesach, vremde oder kunde. vervluochet sî diu stunde daz ich hînaht entslief.»
4095	nâch den rossen er dô rief. er sprach: «swer sîne sache wendet gar ze gemache, als ich hînaht hân getân, dem sol êre abe gân
4100	unde schande sîn bereit. wer gewan ie vrumen âne arbeit? mir ist geschehen vil rehte.» nû kâmen ouch die knehte mit den rossen geriten.
4105	dô enwart niht langer gebiten. «wol ûf, ir herren» sprach er. niuwan schilt unde sper hâten si ze wer genomen: daz was von ir gæhe komen.
4110	Dô begunde ûf gân der tac, daz si den huofslac und daz spor wol sâhen. nâch im wart michel gâhen. nû was Êrec zuo der wîle
4115	geriten wol drî mîle. wan durch vorhte des wîbes, [niene sînes lîbes,] was im von dem lande gâch. er weste wol, man rite im nâch.
4120	als im vor gæhede ûf der vart sô vil ze redenne state wart, er sprach: «vrouwe Ênîte, ir habet iuch ze strîte ze vaste wider mich gesat.
4125	daz ich dâ lâzen bat und ez iu an den lîp verbôt, daz ist mir ein michel nôt daz ir des deste mêre tuot. nû sage ich iu mînen muot:
4130	ichn wilz von iu niht lîden, und enwelt ir ez niht mîden, ez gât iu benamen an den lîp.» «genâde, herre» sprach daz wîp: «ir sult mich des geniezen lân,
4135	und enhete ich des niht getân, sô hætet ir den lîp verlorn: von diu enwærez niht guot verborn. ich solz iemêre wol bewarn.» Nû hôrte si si zuo varn
4140	mit zornigem muote. swie niuwelîch diu guote warnen verlobet hæte, daz gelübede beleip unstæte, wan si zebrach ez dâ zehant,
4145	als si betwanc der triuwen bant. dannoch wâren si verre. si sprach: «lieber herre, dir rîtet michel her nâch. si wellen dir schaden: in ist sô gâch.»
4150	Nû endarf niemen sprechen daz: «von wiu kam daz diu vrouwe baz beide gehôrte und gesach?» ich sage iu von wiu daz geschach. diu vrouwe reit gewæfens bar:
4155	dâ was er gewâfent gar, als ein guot ritter sol. des gehôrte er noch gesach sô wol ûz der îsenwæte als er blôzer tæte.
4160	des was im warnunge nôt und vrumte im dicke vür den tôt. doch ez im solde wesen zorn, er hæte dicke verlorn von unbesihte den lîp,
4165	wan daz in warnte daz wîp. nû enhete si imz niht vol geseit ê dar grâve zuo reit. und als er in ane sach, vil unritterlîch er sprach
4170	mit ungezæmen grimme nâch unvriuntlîcher stimme: «sehet umbe, ir arger diep! wem solde daz wesen liep daz ir in disen landen
4175	nâch unser aller schanden vüeret ein edel süeze wîp? und wizzet wol daz ir den lîp mir alzane liezet: wan daz ir geniezet
4180	daz ir ritter sît genant, ich hieze iuch hâhen hie zehant. ir habet si under vriunde danc. jâ was ez ein vil arger wanc daz ir nahtes ritet dan.
4185	dâ mac man wol kiesen an daz ir si ir vater habet genomen. von wannen wære si iu anders komen? ez möhte an dirre vrouwen ein tôre wol schouwen
4190	daz si iu niht enist ze mâze. welt ir daz ich iu lâze, arger schalc, den lîp, sô lât belîben daz wîp. ich wil si ir vriunden wider geben.
4195	si ensol niht mê sô swache leben. nû lât si und schabet iuwern wec.» «ir enthöveschet iuch», sprach Êrec, «an mir harte sêre. von wem habet ir die lêre
4200	daz ir scheltet einen man der ie ritters namen gewan? ir sît an swachem hove erzogen. nû schamet iuch: ir habet gelogen. ich bin edeler dan ir sît.»
4205	nû huop sich der strît. dô enwart niht langer gebiten: mit zorne si zesamene riten, dâ von der ungetriuwe man sînes valsches lôn gewan,
4210	einen stich ze sîner sîten der in ze manegen zîten sît her niht verswar, wan er was underm schilte bar. dar zuo im abe der arm brach.
4215	dô er in von dem rosse stach, nû begunde er sîne getriuwen harte sêre riuwen. die vielen über ir herren, daz im iht möhte gewerren.
4220	sumelîche wâren dâ, die wolden in sâ rechen mit den swerten: vil unlange die werten. sehse er ir ze tôde sluoc:
4225	den was vehtennes genuoc. die andern wâren alle zagen: die vluhen âne nâch jagen. dô was des strîtes ende. âne missewende
4230	reit der ritter Êrec vil drâte den wec. Er sprach: «herre got der guote, habe mich in dîner huote und hilf mir âne schande
4235	von disem lande. wirt ez dem lantvolke kunt, daz ziuhet mir allez nâch zestunt [und slahent mich: des ist unlanc].» vergebene was doch der gedanc,
4240	wan ez nieman vernam ê er vol ûz dem walde kam: daz was sîn grôziu sælekeit. alsô beleip ez ungeseit: die ritter die dâ genâren
4245	und bî ir herren wâren, der enwolde deheiner von im komen, von dem man ez hete vernomen: dô engetorstenz die vliehenden zagen vor ir schande niht gesagen,
4250	ê daz Êrec der herre kæme von dem lande verre. die ritter dô verbunden dem grâven sîne wunden und vuorten in ûf bâren
4255	und die dâ tôt wâren hin heim mit herzeriuwen. sô genôz er sîner untriuwen. Als Êrec dô gereit an sîne gewarheit,
4260	dâ er den grâven niht entsaz, nû verweiz er vrouwen Ênîten daz daz si sîn gebot sô dicke brach. sîn zorn wart grôz und ungemach und unsenfter dan ê.
4265	nû gelobete si daz siz nimmer mê vürdermâl getæte: daz enliez si aber niht stæte. Swaz Êrec nôt unz her erleit, daz was ein ringiu arbeit
4270	unde gar ein kindes spil dâ wider und ich iu sagen wil daz im ze lîden noch geschach. beide nôt und ungemach was im ze teile getân:
4275	des enwart er niht erlân, er enlite vil und genuoc. der wec in zehant truoc in ein unkundez lant. des herre was im unerkant.
4280	von des selben manheit ist uns wunder geseit. er was ein vil kurzer man, mir ensî gelogen dar an, vil nâ getwerges genôz,
4285	wan daz im harte grôz wâren arme unde bein. dâ zuo den brüsten er schein kreftic unde dic genuoc. dar under er ein herze truoc
4290	volleclîche manhaft. daz gap im ouch die kraft, wan dâ stât ez allez an: und wizzet rehte, wære ein man gewahsen zwelf klâfter lanc
4295	und wære sîn herze kranc und ûf zageheit geborn, daz michel âs wære verlorn. sus enwas dem herren niht. wir müezen sîner geschiht
4300	ein michel teil verdagen. man möhte vil dâ von gesagen, wan daz der rede dâ würde ze vil: dâ von ich iu si kürzen wil. ez hâte der herre guot
4305	gelücke unde rîchen muot unde hâte unverzaget den prîs an manegem man bejaget: dar umbe man noch von im seit daz im an sîner manheit
4310	unz an den tac nie misselanc. er wære starc oder kranc der im mit übel zuo kam, der wênige ie den sige nam. dehein ritterschaft er versaz
4315	(ouch entetez niemen baz) swaz er ir bî sînen zîten ie mohte errîten. ... Dô er den strît niuwen vant, dô wart im aber ir triuwe erkant.
4320	als si in gewarnet hâte, nû sâhen si alsô drâte in dort zuo rîten. nû gruozte er vrouwen Ênîten. als er Êrecke sô nâhen kam
4325	daz er sîniu wort vernam, er sprach: «willekomen, herre, ir nâhen oder verre in disiu lant geriten sît, mich bedunket âne strît,
4330	ir muget wol ein degen sîn. daz ist an zwein dingen schîn: ir vüeret, sam mir mîn lîp, daz aller schœniste wîp der ich ie künde gewan:
4335	wer gæbe die einem bœsen man? dar zuo sît ir gewâfent wol, als ein guot ritter sol der ze deheinen stunden werlôs wil werden vunden
4340	und der âventiure suochet. ob sîn got nû ruochet, der vindet ir hie teil. und gevellet iu daz heil, ich wil iu daz zewâre sagen,
4345	ir muget hie den prîs bejagen des ir wol gelobet sît. nû wert iuch, ritter, ez ist zît.» Sus antwurte im durch sînen spot Êrec: «nû enwelle got,
4350	ritter biderbe unde guot, daz ir immer getuot sô vil wider iuwern triuwen. ez müeste iuch her nâch riuwen. jâ butet ir mir iuwern gruoz:
4355	wanne würde iu slasters buoz, bestüendet ir mich dar nâch? sô wære iu ze gâch und belibet sîn âne ruom. ir sult ez durch got tuon
4360	und mich mit gemache lân, wan ich enhabe iu niht getân. ich hân verre geriten und hân solh arbeit erliten daz aller mînes herzen rât
4365	unwilleclîchen stât.» Der herre gedâhte: «er ist verzaget, sît er sîne arbeit klaget.» er sprach: «ir wert iuch âne nôt dâ mite daz ich iu dienest bôt.
4370	daz enhân ich anders niht getân wan ûf ritterschefte wân. swaz iu nû mê von mir geschiht, dar umbe endürfet ir mir niht an mîne triuwe sprechen,
4375	die ich nimmer wil zebrechen. wert iuch durch iuwer schœnez wîp, welt ir behalten den lîp.» Als Êrec dô gesach daz im ze vehtenne geschach,
4380	sîn ros er wider kêrte, als in sîn ellen lêrte. zesamene riten zwêne man der ietweder nie gewan zageheit dehein teil.
4385	ez muoste sterke unde heil under in beiden an dem sige scheiden. diu sper si ûf stâchen daz si gar zebrâchen.
4390	diu tjost wart sô krefteclich daz diu ros hinder sich an die hehsen gesâzen. dô muosten si lâzen die zoume von den handen
4395	und anders inz enblanden. si erbeizten beide gelîche vil unmüezeclîche und ervuorten diu swert. ir ietweder wart gewert
4400	volleclîchen an der stat des er got lange bat, daz er im sande einen man dâ er sich versuochte an. Nû begunden si vehten
4405	gelîch zwein guoten knehten. diz huop sich umbe einen mitten tac. Êrec fil de roi Lac vorhte laster und den tôt. den schilt er im dar bôt
4410	und begunde sich mit listen âne slege vristen. der gedanc was jenem unerkant, unde sluoc im von der hant den schilt unz an den riemen.
4415	wande si niemen ûf der heide dô schiet, zuo der sîten ern erriet und sluoc im eine wunden. dô wânde er haben vunden
4420	einen zagen an dem gaste. ouch zwîvelte vaste diu schœne vrouwe Ênîte, dô im sîn sîte alsô sêre bluote.
4425	vil lûte schrê diu guote: «ouwê, lieber herre mîn, solde ich ez vür iuch sîn! jâ wæne ich iuch verlorn hân.» «vrouwe, iuch triuget iuwer wân»
4430	sprach der unverzagete man: «wan dâ verlür ich mêre an.» vil wol bewârte er ir daz. ein wênic trat er vürbaz: niht langer er im vertruoc,
4435	ûf den helm er in sluoc daz der wênige man dâ durch ein wunden gewan und daz er vor im gelac. Êrec fil de roi Lac
4440	hâte nâch missetân, wan er wolde in erslagen hân. «nein», sprach er, «ritter guot, durch dînen tugenthaften muot unde durch dîn schœne wîp
4445	sô lâ mir den lîp und êre got an mir. vil gerne sicher ich dir. nû emphâch mich ze man, und wizzest daz ich nie gewan
4450	deheinen herren mêre. wan daz dir diu êre geschiht von dîner manheit, ich wære des tôdes ê bereit êz immer ergienge:
4455	dehein edel dich vervienge. sus ist ez mir unmære: swer dîn vater wære, sô edelet dich dîn tugent sô daz ich dîn bin ze herren vrô.»
4460	Nû hete gewert dirre strît unz an die nônezît, den sumertac alsô lanc. dô Êrecke alsô gelanc, die genâde er an im begie
4465	daz er in leben lie. ûf zuhte er in bî der hant: den helm er im abe bant. er sprach: «ich enmuote mêre von iu deheiner êre,
4470	wan daz ir mir âne schamen rehte nennet iuwern namen. ich enmuote ze dirre zît wan daz ich wizze wer ir sît.» er sprach: «herre, daz sî getân.
4475	ich wil iuch wizzen lân, ich bin künec über Îrlant, Guivreiz le pitîz genant.» Êrec gevienc sîn niht ze man. ir ietweder klagen began
4480	des anderen ungemach. Êrec eine binden brach abe sînem wâpenrocke sâ. nû wâ möhte er anderswâ ein vriuntlîcher binden
4485	zuo den zîten vinden? Guivreiz le pitîz eine alsam von sînem wâpenrocke nam. ein ander si verbunden ir ietweder die wunden
4490	die er mit sîner hant sluoc. diz was vriuntlîch genuoc. hie was vrouwe Ênîte mite vil güetlîchen nâch ir site. ze handen viengen si sich dô,
4495	ir ietweder was des andern vrô, und sâzen ensamet ûf daz gras, wan in ruowe nôt was. in hete der strît getân vil heiz: beide bluot unde sweiz
4500	hâte si berunnen gar. vrouwe Ênîte gienc ouch dar. diu hâte liep bî leide, als ich iu bescheide. nû was si ir mannes siges vrô:
4505	sîn wunden weinde si aber dô. Nû ervurpte si diu guote von sweize und von bluote mit ir stûchen orte. nâch vriuntlîchem worte
4510	sâzen an der heide dise herren beide und kuolten sich durch gemach. der künec zuo dem gaste sprach: «vernemetz, herre, vür ein spil
4515	daz ich nû reden wil und enlât ez iu niht wesen leit. mich betwanc iuwer manheit daz ich wolde werden iuwer man: dâ ist iu wol gelungen an.
4520	nû ist diu vrümekeit an iu schîn daz ichz noch gerner wolde sîn, ob ich wizzen mehte ob irz an dem geslehte alsô wol hætet,
4525	und mir daz kunt tætet: sô wære mîner êre sô vil deste mêre. daz mir von iu geschehen ist, des ich unz an dise vrist
4530	niene wart betwungen, noch ist mir wol gelungen und wil ez âne klage lân, hâtz ein edel man getân, und wil es immer wesen vrô.»
4535	Êrec antwurte im alsô: «mîn künne ich iu nennen sol. ich wæne ez vil wol von gebürte wesen mac. mîn vater ist der künec Lac,
4540	Êrec heize ich.» dô vreute der künec sich. als schiere und er diu mære vernam wer er wære, sîn sitzen wart vil unlanc:
4545	von vreuden er ûf spranc und bôt sich an sînen vuoz. er sprach: «wie gerne ich wesen muoz iu immer stæte als iuwer man, mit swiu ich iu gedienen kan.
4550	iuwer vater ist mir wol erkant. beide lîp unde lant sol iu wesen undertân. ouch sult ir mich geniezen lân daz ich iu stæte triuwe
4555	leiste âne riuwe al die wîle daz ich lebe. und gewert mich einer gebe: des man ich iuch sô verre. wâ wart ie triuwe merre
4560	dan vriunt sînem vriunde sol, die beide ein ander trûwent wol? bî der man ich iuch daz ir durch mîne liebe ensamet mir ûf mîn hûs rîtet
4565	und dâ sô lange bîtet unz daz ir geruowet sît. diz lât wesen âne strît: dâ handelt ir mich wol an, daz ichz immer dienen kan.»
4570	Êrec sprach: «ich wils iuch wern: doch ensult irs niht sô lange gern. ir müezetz âne zorn lân: ich enmac niht langer hie bestân niuwan unze morgen vruo
4575	und sage iu war umbe ich daz tuo. ich envar nâch gemache niht: swaz ouch mir des nû geschiht, dar ûf enahte ich niht vil, wan ich dar nâch niht werben wil.»
4580	Der künec was des gastes vrô. zuo den rossen gienc er dô. er sprach: «wir suln rîten.» nû half er vrouwen Ênîten daz si ûf ir phert gesaz:
4585	mit schœnen zühten tete er daz. er vuorte si vür an den wec. dar nâch reit Êrec. und als si vür daz hûs riten, niht langer daz vermiten
4590	sîne juncherren, si enliefen engegen ir herren ûz vür daz bürgetor: dâ emphiengen si in vor mit vrœlîchem schalle,
4595	wan sî wâren alle von einem wâne gemeit, daz er nâch gewonheit den ritter hete gevangen. er sprach: «ezn ist niht ergangen
4600	als ir wænet daz ez sî» unde sagete in dâ bî vil rehte diu mære wiez ergangen wære. er sprach: «swem ich nû liep bin,
4605	der kêre dar an sînen sin daz er emphâhe schône, daz ich ius immer lône, den aller tiuristen man des ich ie künde gewan.»
4610	ouch tâten si gerne daz. Êrec enwart nie baz gehandelet anderswâ dan ouch des selben nahtes dâ. Des âbendes dô si gâzen
4615	und dar nâch gesâzen, der wirt sprach: «herre, ez ist mîn rât daz ir uns einen arzât lât gewinnen zunsern wunden. ist daz ir ze disen stunden
4620	ungeheilet scheidet hin, daz dunket mich ungewin. ir sît leider sêre wunt: dar zuo ist iu daz lant unkunt, und mac iu vil wol missegân.»
4625	Êrec sprach: «nû lât die rede stân, wan ich belîben niene mac niuwan unz an den tac.» Nû was im die naht bereit
4629	von êren elliu werdekeit,
4629{1}	wan Guivreiz le pitîz
4629{2}	kêrte allen sînen vlîz
4629{3}	dar an daz er sîn schône phlac
4629{4}	unz an den anderen tac.
4629{5}	Als er smorgens [schiet von dan] .....
4629{6}	[als uns der âventiure] sage
4629{7}	von dem tugentrîchen zalt,
4629{8}	kam er in einen schœnen walt,
4629{9}	dar in der künec Artûs
4629{10}	von Tintajôl sînem hûs
4629{11}	was geriten durch jaget,
4629{12}	alse uns Crestiens saget,
4629{13}	mit schœner massenîe.
4629{14}	er und sîn kumpânîe
4629{15}	lâgen bî der strâze
4629{16}	alsô ze mâze
4629{17}	ein vierteil einer mîle.
4629{18}	in der selben wîle
4629{19}	kam her Walwân geriten
4629{20}	und hete sîn ors Wintwaliten
4629{21}	zer poulûne gebunden.
4629{22}	dâ hetez Keiîn vunden.
4629{23}	durch baneken er dar ûf saz,
4629{24}	her Walwân erloubete daz.
4629{25}	beide sîn schilt unde sper
4629{26}	lente dâ bî, daz nam er
4629{27}	und reit eine ûf den wec.
4629{28}	der herre Êrec
4629{29}	engegen im geriten kam.
4629{30}	von verre er sîn war nam.
4629{31}	als er in rehte gesach,
4629{32}	dô kôs er daz er ungemach
4629{33}	ûf dem wege hete erliten
4629{34}	unde verre hete geriten
4629{35}	und berunnen was mit bluote.
4629{36}	dô wart im des ze muote
4629{37}	daz er engegen ime reit
4629{38}	und sprach in sîner valscheit:
4629{39}	«willekomen, herre, in diz lant.»
4629{40}	an den zoum leite er sîn hant.
4629{41}	er entorste in anders niht bestân:
4629{42}	sus wolde er in gewunnen hân
4629{43}	und vrâgete [wer er wære.] .....
4629{44}	«ir erbelget âne sache.
4629{45}	ich wolde daz ir ze gemache
4629{46}	mit mir ritet an dirre stunt.
4629{47}	ich sihe wol, ir sît sêre wunt.
4629{48}	der künec Artûs mîn herre
4629{49}	enliget hie niht verre.
4629{50}	von im und von der künegîn
4629{51}	sult ir gebeten sîn
4629{52}	daz ir nû mit mir hin
4629{53}	rîtet unde dâ bî in
4629{54}	geruowet nâch iuwerm leide.
4629{55}	si sehent iuch gerne beide.»
4629{56}	Alsus was im gedâht:
4629{57}	hete er in ze hove brâht,
4630	daz er danne wolde sagen, er hete im die wunden geslagen und er solde gevangen sîn. dar an wart volleclîche schîn daz diu werlt nie gewan
4635	deheinen seltsænern man. sîn herze was gevieret: eteswenne gezieret mit vil grôzen triuwen und daz in begunde riuwen
4640	allez daz er unz her ie zunrehte begie, alsô daz er vor valsche was lûter sam ein spiegelglas und daz er sich huote
4645	mit werken und mit muote daz er immer missetæte. des was er unstæte, wan dar nâch kam im der tac daz er deheiner triuwen phlac.
4650	sô enwolde in niht genüegen, swaz er valsches gevüegen mit allem vlîze kunde mit werken und mit munde: daz riet elliu sîn ger.
4655	dar zuo sô was er küene an etelîchem tage, dar nâch ein werltzage. diz wâren zwêne twerhe site: dâ swachete er sich mite,
4660	daz er den liuten allen muoste missevallen und niemen was ze guote erkant. von sînem valsche er was genant Keiîn der quâtspreche.
4665	Nû verstuont sich vil gereche Êrec waz er meinte, als er im ouch bescheinte. er sprach: «herre, ich hân ze varne verre
4670	und enmac ze disen zîten ûz dem wege niht gerîten. wærez an mîner muoze, nâch des küneges gruoze vüere ich tûsent mîle.
4675	ir sult mich ze dirre wîle mîne strâze lâzen varn. got müeze iuch, herre, bewarn.» dô sprach der valsche Keiîn: «herre, lât die rede sîn.
4680	ir ensult sus hin niht scheiden: ez missezæme uns beiden. ich bringe iuch ze hûse dem künege Artûse zewâre oder ich enmac.»
4685	Êrec fil de roi Lac wart ein teil dâ von beweget. er sprach: «ich wæne ir enmeget. dâ von ist iu alsô guot, ir habet dar umbe ringen muot:
4690	wan welt ir mich dar bringen, ir müezet mich es twingen. doch sît ir vrum, ir bringet mich hin, wan ich iu wol gewunnen bin.» «ich weiz wol», sprach Keiin,
4695	«daz ich harte vrum bin. ê ir michs überstrîtet daz ir sus hinnen rîtet, irn gesehet mînen herren, wandez iu enmac gewerren,
4700	ich twinge iuchs güetlîchen. dâ von sult ir entwîchen und mînen herren gesehen. daz muoz benamen geschehen.» Daz wart Êrecke alrêst zorn.
4705	daz ros ruorte er mit den sporn. «ziehet zuo iu die hant!» ûf warf er daz gewant und ervuorte daz swert. wan ers wol wære wert,
4710	sô wolde er dem argen zagen abe die hant hân geslagen. dô zuhte er si enzît unde vlôch âne strît. swie er ûf Wintwaliten
4715	dem besten rosse wære geriten daz ie ritter gewan, alsô seine kêrte er dan rehte an die widervart: von Êrecke er ervolget wart.
4720	und als er rehte daz gesach (als ez im ze heile geschach), daz er was gewæfens blôz, wie wol her Keiîn genôz der tugent die Êrec hâte.
4725	vil wunderlîchen drâte daz sper er umbe kêrte daz er in niht versêrte. er wante gegen im den schaft und stach in mit solher kraft
4730	daz Keiîn rehte sam ein sac under dem rosse gelac, nâch sînem rehte ungelîch einem guoten knehte. daz ros vuorte Êrec dan.
4735	Keiîn, der schalchafte man, ime vaste nâch lief: lûte er in ane rief: «nein, ritter vil guot! durch dînen tugenthaften muot
4740	daz mir daz ros hie bestê! oder ich muoz es immer mê geswachet und gehœnet sîn. jâ enist ez weizgot niht mîn.» dô kêrte der guote
4745	mit lachendem muote und vernam sîne klage. er sprach: «ritter, nû sage, wie bistû genant? unde tuo mir erkant
4750	dises rosses herren. ez enmac dir niht gewerren: ich wil wizzen dînen namen. dû endarft dich niht sô sêre schamen. ez ist geschehen manegem man
4755	der doch nie zagen muot gewan.» Keiîn sprach: «nein, herre! ich bites iuch vil verre: ist daz ir mir genâde tuot, sô sît mir volleclîche guot,
4760	alsô daz ir mich des erlât des ir mich gevrâget hât, daz ich mich iu nande. mich hât ûf solhe schande hie brâht mîn zageheit
4765	daz doch mir ein herzeleit von den dingen muoz geschehen, sol ich iu mînes namen jehen, wan ich hân wol garnet iuwern spot. nû enbert es durch got.»
4770	Êrec sprach: «ritter, saget an: jâ enist hie nieman niuwan iuwer unde mîn: es enmac dehein rât sîn, oder ir hât daz ros verlorn.»
4775	daz sîne mante er mit den sporn, als er dan wold rîten. Keiîn bat in bîten. er sprach: «ich wil ez gote klagen daz ich muoz mîn laster sagen.
4780	nû sage ich iu wer ich bin. mîn name lûtet Keiin. ouch geruochet mîn der künec Artûs ze truhsæzen in sînem hûs. sîner swestersüne ein,
4785	der edel ritter Gâwein, diz ros er mir lêch: mirst leit daz er mirs niht verzêch, wan sô wære mir schande buoz die ich nû dulden muoz.
4790	dô mîn herre hiute enbeiz (den tiuvel ich mir selben weiz daz ich mir niht sanfte kunde leben: nâch laster begunde ich streben: des hân ich gewunnen teil),
4795	dô riet mir mîn unheil daz ich mir sîn ros lîhen bat. dô lêch er mir ez an der stat. enhete er dô des niht getân, sô wære ich schanden erlân
4800	diu mir sus ist widervarn. nû enmac doch daz nieman bewarn daz im geschehen sol. edel ritter, nû tuot sô wol und gebet mirz wider durch got,
4805	oder ich bin aller der spot die mich wider in sehent gân. Êrec sprach: «daz sî getân. ich gibe iuz mit gedingen: ir sult ez wider bringen
4810	dem herren Walwân von mir. mit iuwern triuwen müezet ir daz geloben wider mich.» Keiîn sprach: «daz tuon ich» unde tete ouch alsô,
4815	wan er was der rede vrô. Als er daz ros zuo im gewan, er sprach: «ich bite iuch, tugenthafter man, sît ir mir sît gewesen guot, daz ir nû volle wol tuot,
4820	daz ich iuch müeze erkennen: geruochet iuch mir nennen. ez enschadet iu niht und hilfet mich. iuwern namen den wolde ich wizzen durch iuwer vrümekeit.
4825	ez ist mir immer ein leit, muoz ich alsus scheiden hin daz ich iuwers namen unwîse bin und enweiz wie ich iuch nennen sol, sô ich iuwer gedæhte gerne wol.
4830	durch got saget mir wer ir sît.» er sprach: «nein ich ze dirre zît: ez wirt iu lîhte her nâch kunt.» Nû schieden si sich zestunt. ir ietweder reit sînen wec,
4835	Keiîn und Êrec. Keiîn hin ze hove reit, und twanc in des sîn wârheit daz ers doch niht verdagete, wan daz er rehte sagete
4840	sîn schemelîchez mære, wiez im ergangen wære, und gap dem schaden solhen gelimph daz man gar vür einen schimph sîne schande vervie
4845	und man sîn ungespottet lie. Als in dô solh manheit von dem ritter wart geseit, dô nam si besunder alle michel wunder
4850	wer der ritter möhte sîn. dô sprach Keiîn: «ich enmohte sîn niht erkennen: er enwolde sich niht nennen. sîne stimme hôrte ich,
4855	wan er jach vil wider mich: als ichz dar an kiesen mac, sôst ez Êrec fil de roi Lac.» dô rieten si alle gelîche er wærez wærlîche.
4860	Der künec Artûs sprach dô: «nû wære ich es harte vrô und lônte ims mit minnen, swer mir in möhte gewinnen. Gâwein, daz tuon ich
4865	an Keiîn und an dich. ir habet mich unz an disen tac sô gêret daz ich niene mac iu gesprechen niuwan guot. ist daz ir diz nû tuot,
4870	daz wil ich vor im allen hân swaz ir mir liebes habet getân. Gâwein, nû wis gemant wiez under uns ist gewant, daz dû mîn næhster vriunt bist,
4875	und ensûme dich deheine vrist mêre durch die liebe mîn. sô hilf mir und der künegîn daz wir Êrecken gesehen: sô enmac mir liebers niht geschehen.»
4880	Gâwein sprach: «herre, enmanet mich niht sô verre, wan ich der verte willic bin. jâ enlebet er niht den ich vür in iezuo wolde sehen.
4885	und lât mir got sô wol geschehen daz ich im immer kume zuo, ich sage iu, herre, waz ich tuo: ich bringe in, mac ich ins erbiten.» Sâ zehant si dô riten.
4890	Gâweinen brâhte Keiin rehte des endes hin dâ er in lâzen hâte. vil wunderlîchen drâte îlten si im beide nâ,
4895	allez ûf sîner slâ. und alsô schiere er ûf der vart von in ervolget wart, Gâwein der tugentrîche gruozte in minneclîche
4900	nâch vriuntlîcher stimme unde niht mit grimme. dar an er im bescheinte daz erz in guot meinte. er gap im einen guoten tac.
4905	als im Êrec fil de roi Lac dô genâden began, dâ marhte er sînen namen an, und als er in erkande, zehant er in nande.
4910	vaste er in zuo im gevie, als ins diu vreude niht erlie, von liebe diu im geschach, wan er in starc und guot sach. er hiez in willekomen sîn
4915	unde sîne vriundîn. er genâdete im vil sêre sô vriuntlîcher êre die er im an sînem rosse bôt: von triuwen gie im nôt
4920	daz er imz wider sande. als schiere er in nande, er sprach zuo dem gaste: «wir haben iu vil vaste durch den walt geriten nâch.
4925	vrâget ir von wiu sô gâch uns sî oder waz ich welle, herre, wîlent geselle, daz sol iuch unverswigen sîn. ich bite iuch, nû lât werden schîn
4930	ob iu mîn herre liep sî, unde sage iu wâ bî. dô unser vriunt Keiîn hin ze hove daz ros mîn mir wider brâhte
4935	und er iuwer gedâhte ze alsô grôzer manheit, als er diu mære hete geseit, dô nam uns wunder alle besunder
4940	wer ez möhte hân getân: doch rieten wir ûf einen wân iuwern namen mit gelîchem munde. nû hât uns dâ ze stunde gemanôt sô verre
4945	diu künegîn und mîn herre daz wir iu îlten hin nâch (dâ von ist uns gewesen gâch) und iuch im bræhten ze hûs. würde iu der künec Artûs
4950	ie liep oder wert, sô sehet daz er iht werde entwert und geruochet in gesehen. mac daz nû geschehen, sô gewan nie dehein man
4955	grœzer liep dan er dar an. diz leistet âne widerstrît, ob ir dienstes willic sît: dar zuo sîn wirs alle vrô.» Êrec antwurte im alsô:
4960	«noch hât der künec verschuldet wol daz ich im immer wesen sol mînes muotes undertân, und swâ ich im des abe gân, daz sîn gebot niene geschiht,
4965	dâ enwendet michs der wille niht, ich entuo swes er niht wil enbern. disse muoz ich in entwern. mînen willen ich im wol schîn tuo, kumt ez immer dar zuo,
4970	als ez doch vil lîhte getuot, daz mir lîp unde guot durch in ze wâgenne geschiht: daz entriuget danne niht, ich enzeige im wol wie er mir ist.
4975	er sol mich ze dirre vrist mit hulden lâzen rîten. ich hân ze disen zîten gemaches mich bewegen gar. geruochet, swâ ich hin var,
4980	daz ich iuwer dienest müeze sîn. mînem herren und der künegîn sult ir mînen dienest sagen und mich zornes übertragen.» Als daz her Gâwein ersach
4985	daz er sô gar dâ wider sprach, des wart er ein teil unvrô. sînem gesellen wincte er dô unde rûnte im zuo. er sprach: «edel ritter, nû tuo
4990	tugentlîchen unde wol, als ichz verschulden sol und ouch mîn herre umbe dich: daz selbe râte ich. rît drâte dînen wec
4995	unde sage daz Êrec niht erwinden welle. sus hân ich an im, geselle, uns erdâht einen list der doch nû der wægest ist.
5000	sage im, welle er in gesehen, daz müeze alsô geschehen als ich dir wol gesagen kan. heiz inz rûmen von dan dâ er lît in dem walde,
5005	und daz er sich balde vür mache ûf den wec dâ der ritter Êrec jenhalp ûz rîten sol. die wîle kan ich in wol
5010	ûf dem wege mit listen gesûmen und gevristen daz er niht vür enkumt.» «und ist daz ez uns vrumt», sprach der ritter Keiîn,
5015	«daz sol mit guotem willen sîn.» zehant reit er unde tete allez nâch sîner bete. Als diz der künec Artûs vernam, die tavel man abe nam,
5020	und îlte vür vil drâte nâch sînes neven râte und leite sich rehte umbe den wec, daz der ritter Êrec iender kæme dâ bî,
5025	er enrite rehte vür sî. Gâwein, der tugenthafte man, Êrecken sûmen began mit listen swâ er kunde, unz daz er im die stunde
5030	mit kurzewîle abe genam, unz daz der künec wol vür kam. swie ofte er in wider rîten bat, sô sprach er: «iezuo an der stat,» unz er mit schœner trügeheit
5035	den walt mit im ûz reit dâ der künec umbe den wec lac. Und als Êrec fil de roi Lac die poulûne alle ersach, niht liebes im dar an geschach,
5040	wan daz velt was sô vol. ouch erkande er si wol, wan er si dicke hete gesehen. [er sprach: «wie ist mir geschehen?] ich wæne mich verriten hân.
5045	ir enhabet niht wol an mir getân, her Gâwein, diz ist iuwer rât. nû hân ich iuwer missetât selten alsô vil vernomen. daz ich dâ her bin komen,
5050	des was mir vil ungedâht. ir habet mich übele her brâht. swer hin ze hove kumt daz ez im sô lützel vrumt als ez mir nû hie tuot,
5055	dem wære dâ heime alsô guot. swer ze hove wesen sol, dem gezimet vreude wol und daz er im sîn reht tuo: dâ enkan ich nû niht zuo
5060	und muoz mich sûmen dar an als ein unvarnder man. ir sehet wol deich ze dirre stunt bin müede unde wunt und sô unhovebære
5065	daz ich wol hoves enbære, hetet ir es mich erlân. ir enhabet niht wol an mir getân.» Gâwein den zorn mit güete rach. er/hIels in zuo im unde sprach:
5070	«herre, senftet iuwern zorn. jâ ist ein vriunt baz verlorn bescheidenlîchen unde wol dan behalten anders dan er sol. wirt im ein teil ze zorne gâch,
5075	er verstât sich rehtes dar nâch und hât in lieber dan ê. waz mac ich nû gesprechen mê? wan sol ich iuch beswæret hân, daz hân ich doch durch guot getân.
5080	ouch rihtet selbe über mich.» Alsô versuonte er sich mit im vil tugentlîchen, daz im begunde entwîchen ungemüete unde leit:
5085	ez enwart ouch grœzer werdekeit noch volleclîcher êre nie manne erboten mêre dan im dâ ze hove geschach. daz man in dâ gerne sach
5090	daz tâten vil wol schîn Artûs und diu künegîn mit der massenîe gar. si wâren willekomen dar: man emphienc si wirdeclîche
5095	beidiu gelîche, Êrecken und Ênîten, die ze manegen zîten unruowe hâten gephlegen ûf unkunden wegen.
5100	Ginovêr diu künegîn tete süezen willen schîn, dô ir vrouwe Ênîte kam. in ir phlege si si nam und vuorte si von danne
5105	besunder von ir manne in ir heimlîche dâ wart vil wîplîche von in beiden geklaget, vil gevrâget und gesaget
5110	von ungewonter arbeit die vrouwe Ênîte erleit. sô kumberlîcher sache ergazte si mit gemache diu vil edel künegîn
5115	die wîle und daz mohte sîn. ouch wart her Êrec von den rittern enwec gevüeret besunder dâ er alsô wunder
5120	sîner müede ruowe emphie. diu ritterschaft zuo im gie und entwâfenten in sâ. er gewan vil rîcher knaben dâ, der deheiner dâ ze stunde
5125	dem andern niht engunde daz er wære vür in guot. sich vleiz von in ein gelîcher muot swaz im dienest mohte sîn. Vil schiere kam diu künegîn
5130	in klagen unde schouwen mit allen ir vrouwen. ein phlaster wart mit ir getragen. dâ von wil ich iu sagen wie guot ez ze wunden was:
5135	manec verchwunder sîn genas. swem ez wart gebunden über sîne wunden, den geswar si nie mêre, und enheilte niht ze sêre,
5140	wan ze rehter mâze genuoc. dehein übel nie dar zuo gesluoc. allez argez ez vertreip: swaz ez guotes vant, daz beleip, und die dâ von genâsen,
5145	die überhuop ez mâsen, daz man die lîch ebene sach als dâ nie wunde geschach. mit disem phlaster verbant der küneginne hant
5150	des ritteres sîten. diu werlt ze deheinen zîten bezzer phlaster nie gewan. Wundert nû deheinen man, derz gerne vernæme
5155	von wanne diz phlaster kæme, daz hâte Fâmurgân, des küneges swester, dâ verlân lange vor, dô si erstarp. waz starker liste an ir verdarp
5160	unde vremder sinne! si was ein gotinne. man enmac diu wunder niht gesagen von ir, man muoz ir mê verdagen, der diu selbe vrouwe phlac.
5165	doch sô ich meiste mac, sô sage ich waz si kunde. swenne si begunde ougen ir zouberlist, sô hâte si in kurzer vrist
5170	die werlt umbevarn dâ unde kam wider sâ. ich enweiz wer siz lêrte. ê ich die hant umbe kêrte oder zuo geslüege die brâ,
5175	sô vuor si hin und schein doch sâ. si lebete ir vil werde: in lufte als ûf der erde mohte si ze ruowe sweben, ûf dem wâge und drunder leben.
5180	ouch was ir daz untiure, si wonte in dem viure als sanfte als ûf dem touwe. diz kunde diu vrouwe. und sô si des gern began,
5185	sô machete si den man ze vogele oder ze tiere. dar nâch gap si im schiere wider sîne geschaft: si kunde et zoubers die kraft.
5190	si lebete vaste wider gote, wan ez warte ir gebote daz gevügel zuo dem wilde an walde und an gevilde, und daz mich daz meiste
5195	dunket, die übelen geiste, die dâ tiuvel sint genant, die wâren alle under ir hant. si mohte wunder machen, wan ir muosten die trachen
5200	von den lüften bringen stiure zuo ir dingen, die vische von dem wâge. ouch hâte si mâge tiefe in der helle:
5205	der tiuvel was ir geselle. der sande ir ze stiure ouch ûz dem viure swie vil si des wolde. und swaz si haben solde
5210	von dem ertrîche, des nam si unangestlîche allles selbe genuoc. diu erde deheine wurz entruoc, ir enwære ir kraft erkant
5215	alse mir mîn selbes hant. sît daz Sibillâ erstarp und Erictô verdarp, von der uns Lûcânus zalt daz ir zouberlîch gewalt
5220	swem si wolde gebôt, der dâ vor was lange tôt, daz er erstuont wol gesunt. von der ich iu hie zestunt nû niht mêre sagen wil,
5225	wan es würde ze vil: sô gewan daz ertrîche (daz wizzet wærlîche) von zouberlîchem sinne nie bezzer meisterinne
5230	danne Fâmurgân, von der ich iu gesaget hân. von diu enwære er niht wîser man swer im wolde dar an nemen grôz laster,
5235	ob ouch si ein phlaster vür in geprüeven kunde. jâ wæne man iender vunde, swie sêre man wolde ersuochen die kraft ûz arzâtbuochen,
5240	sô krefteclîche liste die si wider Kriste uopte sô des gerte ir muot. Daz selbe phlaster machete si guot von allem ir sinne,
5245	dâ mite diu küneginne Êrecke die wunden bant. des phlasters güete er wol emphant: wan als er verbunden wart, dô hügete er wider ûf die vart.
5250	in dûhte er wære gar genesen und enwolde dâ niht langer wesen, swie vil si in gebâten und rede dar umbe hâten, ritter unde vrouwen
5255	die kâmen in schouwen. doch handelten si die naht volleclîche nâch ir maht die werden geste und sô si kunden beste,
5260	und heten des gerne vil getân, wolde ins Êrec gehenget hân: des er doch niht entete. des künec Artûses bete unde der künegîn
5265	enmohte niht vrum gesîn, daz si in mit deheinen listen langer mohte gevristen dan unz morgen vil vruo: dâ enstuont doch dehein bete zuo.
5270	Alsô ez dô morgen wart und er ouch sîner vart durch niemen wolde abe stân, diz dûhte si alle missetân. nû enbeiz der künec durch in vruo:
5275	dar nâch zôch man diu ros zuo. Êrec urloup dô nam, als sînen zühten wol gezam, von rittern und von vrouwen. dô mohte man êrste schouwen
5280	an ir aller gebâren daz si in dâ liep wâren, wan dô weinde wîp und man vor leide dô si schieden dan. den künec muote sêre,
5285	daz er niht enwolde mêre in dem walde bestân: er vuor gegen Karadigân. Nû reit der ritter Êrec als in bewîste der wec,
5290	er enweste selbe war: sîn muot stuont niuwan dar dâ er âventiure vunde. nû reit er dâ ze stunde ein wênige wîle,
5295	kûme eine mîle: dô hôrte er eine stimme jæmerlîchen grimme von dem wege wüefen, nâch helfe rüefen
5300	erbarmeclîchen ein wîp, der was bekumbert ir lîp. als er daz rüefen vernam, michel wunder in des nam waz diu rede möhte sîn.
5305	dô was doch sîn manheit schîn. er hiez vrouwen Ênîten sîn dâ ze stete bîten und tete si erbeizen ze wege. ir sorge ergap si in gotes phlege,
5310	als si der wille lêrte, dô er von ir kêrte. Des endes huop sich Êrec durch rûhen walt âne wec unerbûwen strâze,
5315	wan daz er die mâze bî des wîbes stimme nam, unz daz er rehte dar kam dâ si von klage michel leit in dem wilden walde erleit.
5320	ir riuwigen hende hâten daz gebende unschône abe gestroufet: zekratzet und zeroufet hete sich daz lîplôse wîp,
5325	daz ir diu wât und der lîp mit bluote was berunnen. si hâte ouch gewunnen von jâmer solhe swære daz doch niemen wære
5330	alsô vestes herzen, hæte er ir smerzen zuo den zîten gesehen, sît ich der wârheit sol jehen, si enmüeste im erbarmen.
5335	Als er dô die armen in solher ungehabe sach, vil nâch weinende sprach Êrec der tugenthafte man: «vrouwe, durch got saget an,
5340	waz ist daz ir weinet? wie sît ir sus vereinet in disem walde? durch got saget balde ob ich iu ze staten müge komen.»
5345	nû hâte ir benomen diu bitter leides grimme vil nâch gar die stimme: ir herzen sûft daz wort zebrach daz si vil kûme gesprach:
5350	«weinens gât mir michel nôt. herre, mir belîbet tôt der aller liebiste man den ie wîp gewan.» Êrec sprach: «vrouwe, wiest daz komen?»
5355	«herre, dâ hânt mir in benomen zwêne risen, die vuorten in des gevertes vor mir hin. herre, si enlânt in niht genesen, wan si sint im gewesen
5360	vîent nû vil manegen tac. ouwê wie wol ich weinen mac!» «vrouwe, sint si iht verre?» «nein si, lieber herre.» «nû wîset mich nâch in.»
5365	«herre, hie riten si hin.» mit dem vinger wîste si in die vart dâ er hin gevüeret wart. Êrec sprach: «vrouwe, nû gehabet iuch wol, wan ich benamen sol
5370	bî im belîben tôt, oder ich hilfe im ûz der nôt.» nû bevalh in diu guote mit worten und mit muote in unsers herren gewalt.
5375	ir gebet wart vil manecvalt und getriuwelîch der segen den si tete über den degen. Nû was er komen ûf ir slâ und îlte in vil sêre nâ
5380	unz er si begunde sehen an. nû heten die zwêne grôzen man weder schilt noch sper noch swert alsô er: des er von rehte genôz.
5385	wâfens wâren si blôz. waz ir wer wære? zwêne kolben swære, grôze unde lange: den wâren die stange
5390	mit îsen beslagen. ez möhte doch einen zagen immer mêre vergân daz er getorste si bestân. ouch vuorten die unguoten
5395	zwô geiselruoten mit vingergrôzen strangen: den si dâ heten gevangen, den triben si dâ mite nâch vreislîchem site.
5400	er reit âne gewant unde blôz sam ein hant. geleit wâren im die hende ze rücke mit gebende und die vüeze unden
5405	zesamene gebunden. vil manegen geiselslac er leit dâ er vor in hin reit. si sluogen in âne barmen, sô sêre daz dem armen
5410	diu hût hin abe hie von dem houbete an diu knie. si brâchen vaste ritters reht und handelten den guoten kneht, und wære er begangen,
5415	an diebes stat gevangen, solher zuht wære ze vil. er was geslagen unz ûf daz zil daz er des bluotes was ersigen unde nû sô gar geswigen
5420	daz in schrîens verdrôz. daz bluot regens wîs vlôz des rosses sîten hin ze tal: ez was bluotic über al. der ritter grôze quâle leit,
5425	sô unvernomen arbeit, daz nimmer man âne tôt möhte erlîden grœzer nôt danne im dô geschach. Als diz Êrec ersach,
5430	nû bewegete sritters smerze sô sêre sîn herze daz er bî im ê wære erslagen ê er inz hæte vertragen und daz ez an sîner varwe schein.
5435	er sprach zuo den zwein: «ir herren beide, ichn vrâge iu niht ze leide: durch got muget irz mich wizzen lân, waz hât iu der man getân
5440	den ir dâ habet gevangen? saget, waz hât er begangen? ez enschadet iu niht und ist mir liep. weder ist er mordære oder diep? oder wie hât erz umbe iuch verholt,
5445	sô swære zuht die er dolt?» Des antwurte im der eine (der ahte sîn vrâge kleine): «nû waz hâstû tumbe ze vrâgen dar umbe
5450	waz er uns habe getân? des enwellen wir dich niht wizzen lân. rehter affe, nû sich dû unwirdest dich daz dû vrâgest alsô vil
5455	daz dir niemen sagen wil. nû war umbe jagestû mich?» Êrec sprach: «herre, nein ich.» dannoch redete er mit listen und wânde in sô gevristen:
5460	«ich hôrte in rüefen verre. geloubet ir mir, herre, ich enhân ez niht durch übel getân daz ich iu her gevolget hân. mich wundert waz ez wære.
5465	daz ensî iu niht swære. doch wil ich iu zewâre sagen (daz enmöhte ich niht verdagen), hât dirre man ritters namen, sô möhtet ir iuch immer schamen
5470	daz er des niht geniuzet und iuch niht bedriuzet der grôzen unvuoge. jâ hât er zuht genuoge emphangen, swaz er hât getân:
5475	muget ir in durch got lân?» der michel man sus wider sprach: «dîn klaffen ist mir ungemach: erlâ mich dîner vrâge. dû setzest enwâge
5480	dînen lîp vil sêre. möhte ich an dir dehein êre begân oder deheinen ruom, ich zebræche dich als ein huon. waz vrumet im dîn vrâge?
5485	nû nim dir in ze mâge und hilf im: dest im nôt genuoc.» im ze sehenne er in sluoc und hiez in strîchen sînen wec. dannoch wolde in Êrec
5490	mit güete überwunden hân daz er den ritter hæte lân. diu bete was vil gar verlorn, wan daz er reizete srisen zorn. dem ritter tâten si dô wê
5495	durch sînen haz wirs dan ê, wan si enhâten vorhte noch wân daz er si getorste bestân. Und als Êrec der degen balt ersach daz er sîn engalt,
5500	daz muote in harte sêre. nû entwelte er niht mêre, wan undern arm sluoc er mit guotem willen daz sper. daz ros nam er mit den sporn:
5505	an si truoc in der zorn. daz huop si dannoch kleine, wan daz der eine von unwirde versûmte sich unz daz im ein sperstich
5510	engegen in sîn houbet kam, der im ein ouge benam. der stich ergie mit solher kraft daz im wol ellenlanc der schaft ûz hienc vor dem ougen.
5515	swie kleine erz wolde erougen, er stach in zuo der erde tôt, als ez der hövesche got gebôt. Als sîn geselle daz grôze gevelle
5520	gesach von dem micheln man, mit zorne kêrte er wider dan und begunde den kolben wenden und gap in ze beiden henden. Êrec erbeizete dô:
5525	des was der rise vrô und wânde in sâ gewunnen hân. in trouc ob got wil sîn wân. er sluoc sam er wuote: wan daz sich Êrec huote
5530	unde sich mit listen wol kunde gevristen, er wære zem êrsten erslagen. sîn snelheit kunde in ûz getragen. den schilt er im dar bôt:
5535	über den gienc doch diu nôt. swâ er den schilt erreichte, daz herte bret erweichte daz ez sich wol endriu zekloup unde hôhe ûf stoup
5540	swaz dar gehaft wære. der kolbe was sô swære, alsô dicke und er sluoc, daz er sô sêre nider truoc daz er in sô kurzer stunde
5545	[in niht erziehen kunde:] ê er in ze slage vol erreit, Êrecken hete sîn snelheit an in und wider von im getragen. alsô hete er in geslagen
5550	wol vierstunt zuo dem beine: ez enhuop in nie sô kleine, er enslüegez im ze jungest abe. dô der ungevüege knabe begunde sîgen ûf diu knie,
5555	Êrec im vaste zuo gie. dannoch vaht der vâlant mit unverzageter hant. er sluoc sô manegen grimmen slac daz uns wol wundern mac
5560	daz Êrec vor im genas, wan daz der mit im was der Dâvîde gap die kraft daz er wart sigehaft an dem risen Gôlîâ:
5565	der half ouch im des siges dâ daz er in mit gewalte volle gevalte und im daz houbet abe sluoc. dô was dâ vehtens genuoc.
5570	Als Êrec den sige gewan, dô hâte den gevangen man daz ros in den walt getragen, daz ez niemen kunde gesagen wâ er im ze vindenne wart.
5575	doch brâhte in daz ûf die vart: swâ er hin geriten was, dâ wâren boume unde gras von sînem lîbe gar worden harte bluotvar,
5580	swâ er ane ruorte dâ in daz ros hin vuorte, wan er was gebunden daz er ze deheinen stunden den boumen mohte entwîchen,
5585	er enmüeste sich dran strîchen. dô spürte in der guote allez an dem bluote verre unz daz er in vant. dô lôste er im diu bant
5590	von vüezen und von henden und brâhte den ellenden wider ze sînem wîbe mit unganzem lîbe und doch anders gesunden,
5595	als er in hete vunden, mit geiseln zeslagen. doch endorfte er nimmer geklagen, sît im daz leben beliben was, wan er dises smerzen wol genas.
5600	Als si in ane sach, beide liebe und ungemach vuoren in ir herzen schrîn, doch si niht wol ensament sîn. als in diu guote
5605	berunnen sach mit bluote, dâ erlasch ir herze von, wan si was vil ungewon an im der herzesêre. si hâte in nie mêre
5610	in solhen zühten gesehen. dâ bî was ir ein liep geschehen, daz ez den sige an leide nam: diz was daz er hin wider kam mit lebendigem lîbe.
5615	hie verkêrte sich dem wîbe ir herzen trüebe als ein glas, derz wol schüebe, daz von swarzer varwe bestrichen wære begarwe:
5620	sô diu varwe abe kæme, sô würdez genæme und lieht daz ê vinster was. sus wart ir herze ein lûter glas, der erren sorgen beschaben
5625	unde wol ze liehte erhaben mit unvalscher wünne, sam si nie leit gewünne. Diu zwei gelieben wâren vrô. Êrecke sageten si dô
5630	genâde sô manecvalt. si sprâchen: «herre, in iuwer gewalt suln wir uns vür eigen geben: von iu sô haben wir daz leben.» Êrec antwurte dem ritter dô:
5635	«herre, des wære ich immer vrô, hete ich iu vrumes gedienet iht, daz, ob got wil, noch geschiht, swâ ich es niht enhân getân, wan ich es guoten willen hân.
5640	ich enbite iuch mêre deheiner slahte êre ze widergelte an dirre zît, wan saget mir wer ir sît.» Cadoc er sich nande
5645	von Tafrîol dem lande und jach im wie daz wære ergangen daz in hæten gevangen die zwêne vâlande: er wolde varn von lande
5650	ze Britanje in daz lant, daz er dâ würde erkant, er und sîn âmîe von des küneges massenîe. nû was sîn rihte durch den walt:
5655	daz was den risen vor gezalt. die wâren im lange vîent genuoc: welh schulde si hin zuo im truoc, des enist mir niht kunt, wan si heten im zuo der stunt
5660	lâge al umbe den wec geleit und viengen in dâ er zuo reit. Als Êrec hâte vernomen wie im sîn dinc was komen, durch schœnen list er sprach,
5665	im ze benemen sîn ungemach: «herre, missehabet iuch niht umbe dise geschiht, daz iu die risen hânt getân. jâ enwirt es nieman erlân
5670	swer sô manheit üeben wil, in enbringe geschiht ûf daz zil daz er sich schamen lîhte muoz: dar nâch wirt im es buoz. wie dicke ich wirs gehandelt bin!»
5675	mit dirre rede trôste er in. er sprach: «diz ist mîn rât, daz ir durch nieman enlât ir enleistet iuwer vart, als si ûf geleget wart,
5680	ze Britanje in daz lant. dâ ist ez alsô gewant, daz ich iu wil zewâre sagen, ez enmac ein ritter niht bejagen in deheinem lande anderswâ
5685	bezzer lop dan ouch dâ. swer ez dâ gevürdern kan, der wirt schiere ein sælic man. nû muote ich einer êre von iu und ouch niht mêre:
5690	swenne ir komet in daz lant, sô nemet iuwer vriundîn an die hant und gât vür die künegîn und saget ir den dienest mîn. kündet ir iuwer sache gar,
5695	unde daz ich iuch ir dar zingesinde habe gesant. Êrec bin ich genant: vil wol erkennet si mich.» diz lobete er, unde schieden sich.
5700	Cadoc vuor hin ze hove und tete al nâch Êreckes bete. er bôt der künegîn êre rehte nâch der lêre, als er im hâte vor gezalt:
5705	er ergap sich in ir gewalt. Êrecke wunschte ze lône diu vrouwe mit der krône, diu vil edel künegîn, daz er sælic müeste sîn.
5710	Ouch schiet harte balde wider ûz dem walde der tugentrîche Êrec unde suochte den wec dâ er vrouwen Ênîten
5715	sîn gehiez bîten nû hâte er sich ervohten daz im niene mohten die wunden ganz bestân: die wâren wider ûf gegân.
5720	des bluotes was er gar ersigen, die slege heten in erwigen daz im diu varwe gar erbleich und im diu kraft sô nâch entweich daz er mit grôzer arbeit
5725	hin widere gereit dâ sîn diu vrouwe hâte erbiten: solde er iht vürbaz sîn geriten, sô müeste er beliben sîn. daz wart hier an wol schîn.
5730	Als sich der halptôte man zuo neigen began, als er erbeizen wolde, wan er ruowen solde, dô was er sô betoubet
5735	daz im daz houbet vor den vüezen nider kam. einen solhen val er nam daz er lac vür tôt. nû huop sich ein bitter nôt
5740	und alles leides galle von disem valle in vrouwen Ênîten muote. von jâmer huop diu guote ein klage vil barmeclîche,
5745	herzeriuweclîche. ir wuof gap alsolhen schal daz ir der walt widerhal. nû enhalf ir niemen mêre klagen ir herzesêre
5750	niuwan der widergelt den ir der walt ûz an daz velt mit gelîchem galme bôt. der half ir klagen ir nôt, wan ir enwas niemen mêre bî.
5755	diu guote, nû viel sî über in unde kusten. dar nâch sluoc si sich zen brusten und kuste in aber unde schrê. ir ander wort was «wê ouwê.»
5760	daz hâr si vaste ûz brach, an ir lîbe si sich rach nâch wîplîchem site, wan hie rechent si sich mite. swaz in ze leide geschiht,
5765	dâ wider entuont die guoten niht, wan daz siz phlegent enblanden ougen unde handen mit trehenen und mit hantslegen, wan si anders niht enmegen.
5770	dâ von müeze er unsælic sîn (des wünschet im der wille mîn) swer den wîben leide tuot, wan ez enist manlîch noch guot. Frouwe Ênîte zurnte vaste an got.
5775	si sprach: «herre, ist diz dîn gebot daz ein ritter alsô guot durch sînen reinen muot sînen lîp hât verlorn, sô hât ein wunderlîcher zorn
5780	dîner genâden barmunge genomen. daz ich hân von dir vernomen daz dû barmherzic sîst, wie swachez bilde dû des gîst an mir vil armen!
5785	mahtû dich nû erbarmen über mich, sich, des ist zît. nû warte wâ mîn man lît gar oder halp tôt. nû erbarme dich, des ist nôt,
5790	wan ich ein tôtez herze hân. nû sich wie trûric ich stân. erbarme dich, herre, über mich, wan ez ist erbarmeclich daz ich verweisetez wîp
5795	langer habe mînen lîp in solhem ellende. wan daz âne missewende allez dîn werc stât, herre, ich zige dich missetât
5800	daz dû mich langer leben lâst, sît dû mir den benomen hâst dem ich eine solde leben. mahtû des, herre, bilde geben daz dir aller herzen grunt
5805	ist gesihteclîchen kunt (wan dir enmac niht verborgen sîn), daz tuo durch dîne bermde schîn. unde habe ich mînen man, sît ich in von êrste gewan,
5810	verworht an ihtes ihte mit muote oder von geschihte alsô daz ez niht wol gezimt, ob mir in dîn gewalt danne nimt, daz selbe reht vinde ich mir,
5815	wan ichs von rehte danne enbir. enhân aber ich des niht getân, des soltû mich geniezen lân: herre, sô erbarme dich durch dîne güete über mich
5820	unde heiz mir in leben. wil aber dû mirs niht wider geben, sô wis, herre got, gemant daz aller werlde ist erkant ein wort daz dû gesprochen hâst,
5825	und bite dich daz dûz stæte lâst, daz ein man und sîn wîp suln wesen ein lîp, und ensunder uns niht, wan mir anders geschiht
5830	von dir ein unreht gewalt. sî dîn erbermde manecvalt, sô hilf ouch mir des tôdes hier. wâ nû hungerigiu tier, beide wolf unde ber,
5835	lewe, iuwer einez kom her und ezze uns beide, daz sich sô iht scheide unser lîp mit zwein wegen! und ruoche got unser sêlen phlegen,
5840	die enscheident sich benamen niht, swaz dem lîbe geschiht.» Der si deheinez komen sach, si rief in aber unde sprach: «ir tier vil ungewizzen,
5845	nû habet ir erbizzen manec schâf unde swîn, armer liute vihelîn, die ius niht engunden noch überwinden kunden.
5850	wæret ir nû wîse, ir holtet iuwer spîse hie mit vollem munde, wan ich iu mîn wol gunde: dâ von müeste ich iu wol gezemen.
5855	nû kumt, ir muget mich gerne nemen. wâ sît ir nû? jâ bin ich hie.» Daz laden si niht vervie daz dehein tier ez vernæme oder dar kæme.
5860	ob aber deheinez kæme und ob ez rehte vernæme ir trûrige gebâre, sô weiz ich wol zewâre, swie hungeric ez wære,
5865	ez müeste ir die swære ze jungest helfen weinen und daz wol bescheinen daz si zerbarmenne was. über ir willen si genas.
5870	Alsô si rehte ersach daz ir ze sterben niene geschach, dô begunde si von êrste klagen und hete sich selben nâch erslagen. man sach nie jâmer merre.
5875	si sprach: «lieber herre, sît ich dich muoz verliesen, sô wil ich hie verkiesen alle man immer mêre wan einen den ich sêre
5880	in mînem herzen minne von allem mînem sinne. dem bin ich gâhes worden holt. hæte ich umbe den versolt daz im geviele mîn lîp,
5885	dem wolde ich sîn ein stætez wîp. vil lieber Tôt, nû meine ich dich. von dîner liebe kumt daz ich alsô verkêre den site daz ich wîp mannes bite.
5890	nâch dîner minne ist mir sô nôt. nû geruoche mîn, vil reiner Tôt. ouwê wie wol ich arme gezim an dînem arme! dû bist vil wol ze mir gehît.
5895	wan nimestû mich enzît? sît daz dû mich doch nemen muost, sô râte ich daz dûz iezuo tuost. ich gezim dir wol ze wîbe: ich hânz noch an dem lîbe,
5900	beide schœne unde jugent, ich bin an der besten tugent. dirn mac mit mir niht wesen ze gâch. nû waz touc ich dir her nâch, sô beide alter unde leit
5905	mir schœne unde jugent verseit? nû waz sol ich dir danne? noch zæme ich guotem manne.» Dô si der rede vil getete und si den Tôt mit ir bete
5910	niht mohte überwinden noch ir willen vinden daz er si næme in sînen gewalt, vil wîplîchen si in dô schalt als ir der wille gebôt.
5915	si sprach: «wê dir, vil übeler Tôt! daz dû vervluochet sîst! wie manec bilde dû gîst dîner unbescheidenheit! diu werlt doch wâr von dir seit,
5920	dû sîst mit valsche beladen. dû vlîzest dich ûf maneges schaden dem nimmer solde leit geschehen. des hân ich vil von dir gesehen. dû hâst vil bœser râtgeben,
5925	wan dû gâhes nimst daz leben einem sô gewanten man den diu werlt niht überwinden kan, und gebiutest einem an sîne stat dem ie diu werlt des tôdes bat
5930	unde lâst den werden alt. dû zeigest dînen gewalt unbescheidenlîchen. einen tugentrîchen hâstû hie gevellet
5935	unde mich gesellet anders dan dû soldest, ob dû gedienen woldest daz ich dir immer spræche wol. nû enweiz ich war ich armiu sol.
5940	unheiles wart ich geborn, wande nû hân ich verlorn beide sêle unde lîp, als von rehte tuot ein wîp von sô grôzer missetât,
5945	diu ir man verrâten hât als ich mînen herren hân. des tôdes wære er hie erlân, ob ich in drûf niht hæte brâht. jâ enhæte er im nie gedâht
5950	dirre leidigen vart, hæte ich den klagenden sûft bewart den ich nam sô tiefe dô ich wânde er sliefe, des tages dô ich bî im lac.
5955	daz vervluochet sî der tac, dô ich die rede ruorte! wan ich mîn heil zevuorte, vil grôze êre und gemach. ouwê wie übele mir geschach!
5960	nû waz wolde ich tumbe ze redenne dar umbe? swie mîn herze wolde leben, jâ hâte mir got gegeben daz mîn dinc ze wunsche stuont.
5965	ich tete als die tôren tuont, unwîses muotes, die êren unde guotes in selben erbunnen und niht vertragen kunnen
5970	sô ir dinc vil schône stât, und leistent durch des tiuvels rât dâ von ir heil zestœret wirt, wan er ir êren gerne enbirt. Ouwê liebiu muoter
5975	unde vater guoter! nû ist iu ze dirre stunt mîn grôzer kumber vil unkunt. ez was iuwer beider wân mîn dinc vil wol gebezzert hân:
5980	ouch was ez vil wænlîch, dô ir mich einem künege rîch gâbet ze wîbe. der wân ist mînem lîbe verkêret zungewinne.
5985	in triegent sîne sinne, swem daz ze wendenne ist gedâht, ez enwerde vollebrâht swaz von gote geschaffen ist: dâ vür enhœret dehein list,
5990	man enmüeze im sînen willen lân. der muoz ouch an mir ergân: ich muoz et unsælic sîn. daz ist mir wol worden schîn an grimmeclîcher arbeit,
5995	der ich vil unz her erleit. er hât mir armen wîbe verteilet an dem lîbe: des bin ich wol innen brâht. wes im zer sêle sî gedâht,
6000	des enmac ich wizzen niht. swaz dem lîbe nû geschiht, ze ringer klage mir daz stât, wirt iedoch der sêle rât. daz ich dicke hân vernomen,
6005	des bin ich an ein ende komen: swaz man dem unsæligen tuot, sîn gelücke enwirt doch nimmer guot. Swer die linden von dem wege næme ûz unwerder phlege
6010	und si in sînen garten sazte und si mit bûwe ergazte daz si in dürrer erde stüende unz dar unwerde, und daz dar ûf tæte
6015	daz er gedâht hæte daz er ir wolde warten in sînem boumgarten ze guotem obezboume, dern möhte von einem troume
6020	niht sêrer sîn betrogen, wan dâ enwürde niht an erzogen, swie vlîzic man ir wære, daz si bezzer obez bære dan ouch ê nâch ir art,
6025	ê daz si ûz gegraben wart ûz bœser erde von dem wege, dâ si schein in swacher phlege. swie schœne und edel ein boum si ist, michel graben unde mist
6030	mac man dar an verliesen. des sol man bilde kiesen an mir vil gotes armen, und möhte die werlt erbarmen mîn vil grôzer ungeval:
6035	und krônte mich diu werlt al ze vrouwen über elliu wîp, sô hât doch got den mînen lîp sô unsælic getân daz ich kumber muoz hân
6040	al die wîle und ich lebe, got ensî der mirs ein ende gebe. Sît mir mîn dinc alsô ist komen daz mir got hât benomen den aller liebisten man
6045	den ie vrouwe gewan und mîn der Tôt niene wil, des selben neme er im ein zil. diu stæte under uns beiden ensol sich sô niht scheiden:
6050	den list ich vil wol vinde daz er mich zingesinde sunder danc nemen muoz. war umbe solde ich sînen vuoz sô vlîzeclîche suochen
6055	sît er mîn niht wil ruochen? dar umbe ich in sô sêre bat, des mac ich mich an dirre stat selbe vil wol gewern. ich enwils ouch langer niht enbern,
6060	ez enwerde vollebrâht. entriuwen, ich hân nû wol gedâht.» Diu hant ir gegen der erde sleif, ir mannes swert si begreif und zôch ez ûz der scheide,
6065	als si sich vor leide mit im wolde erstechen und kintlîche errechen über sich ir mannes tôt, wan daz irz got verbôt
6070	und ir leben gevriste mit genædeclîchem liste dar an daz si begunde dem swerte dâ ze stunde vluochen dô siz gesach.
6075	daz ir herze niht zebrach von leide, daz was wunder. sich teilte dô besunder von des jâmers grimme rehte enzwei ir stimme,
6080	hôhe unde nidere. der walt gap hin widere vorhteclîch swaz si geschrî. dô lûte dicke: «ouwê ouwê!» vil lûte schrîende sî sprach,
6085	dô si daz swert ane sach, mit klegelîchem munde: «ouwê, vervluochet sî diu stunde daz man dich ie smiden began! dû hâst getœtet mînen man.
6090	daz im der lîp ist benomen daz ist von dînen schulden komen. jâ enhæte er anderswâ noch hie dehein eislîch dinc bestanden nie, wan daz erz tete ûf dînen trôst.
6095	sus hâstû mich sîn belôst. er reit vil manege reise sîns lîbes envreise, die er hæte verlân, enwære si dar ûf niht getân
6100	daz mîn lieber herre dir getriute verre. vil dicke er jach dû wærest guot: nû hâstû dich an im missehuot: ich enweiz ob ez dich riuwe.
6105	dû hâst dîne triuwe gar an im zebrochen. daz wirt an dir gerochen. ez ensol dich niht sô ringe stân: dû muost noch mordes mê begân.»
6110	Vil wol bewârte si daz wort unde kêrte daz ort engegen ir brüsten, nâch tôdes gelüsten, als si sich wolde ervallen dran.
6115	nû kam geriten ein man der si es erwande, den got dar gesande. diz was ein edel herre, ein grâve: vil unverre
6120	sô stuont sîn wesen von dan. Oringles hiez der rîche man, von Lîmors geborn. den hâte got dar zuo erkorn daz er si solde bewarn.
6125	[er kam von sînem hûs gevarn,] ir ze heile reit er durch den walt: nâch wiu, des enist mir niht gezalt, wan daz ich betrahte in mînes herzen ahte,
6130	ez kam von ir sælikeit daz er des tages ie ûz gereit. er vuorte mit im ritter genuoc. von geschihte in truoc in den walt der selbe wec
6135	dâ der ritter Êrec in sô grôzem kumber lac und sîn vrouwe Ênîte phlac. Dannoch dô der herre von in was vil verre,
6140	dô gehôrte er daz wîp mit wuofe quellen ir lîp. und als er ir stimme vernam, von wunder er dar kam, ze diu daz er gesæhe
6145	waz wunders dâ geschæhe, iemitten unde si daz swert gegen ir brüsten wert sich ze tœten hete gesat. nû kam er rîtende an die stat,
6150	und als er ir gebærde ersach, daz si gegen dem lîbe stach, dô wart im von dem rosse gâch, wan er mohte sich vil nâch an der rede versûmet hân
6155	daz der stich wære getân. er vienc si gâhes an sich und erwante den stich. ûz der hant er irz brach, er warf ez von im unde sprach:
6160	«saget, wunderlîchez wîp, war umbe woldet ir den lîp selbe hân ersterbet und an iu hân verderbet daz schœniste bilde
6165	daz zam oder wilde ie mannes ouge gesach?» vrouwe Ênîte kûme sprach: «nû sehet ir, lieber herre, selbe waz mir gewerre.»
6170	«woldet ir iu selbe tuon den tôt?» «herre, des gienc mir doch nôt.» «was er iuwer âmîs oder iuwer man?» «beide, herre.» «nû saget an, wer hât in iu erslagen?»
6175	nû begunde vrouwe Ênîte sagen vil rehte diu mære wiez im komen wære. Nû begunde der grâve ahten und bî im betrahten
6180	daz er bî sînen zîten nâhen noch wîten nie schœner wîp hete gesehen: ouch begunden ims die ritter jehen. die vrouwen er von im lie.
6185	zeiner kurzen sprâche er gie. er sprach ze den gesellen sîn: «ein dinc ist wol schîn, daz muget ir wol schouwen an dirre vrouwen.
6190	swâ si der ritter habe genomen oder swie si her sî komen, si ist benamen ein edel wîp: daz erziuget ir wünneclîcher lîp. nû sprechet, waz ist iuwer rât?
6195	ir wizzet wol wiez mir stât, daz ich âne wîp bin. nû rætet vaste mir mîn sin daz ich si ze wîbe neme. mich dunket daz si wol gezeme
6200	ze vrouwen über mîn lant. ich hân kurze an ir erkant, si ist mir genuoc wol geborn. ouch hât si mir erkorn mînes herzen rât ze wîbe.
6205	nû bite ich daz ez belîbe in iuwerm râte âne haz (vil gerne wil ich immer daz umbe iuch verschulden unz ich lebe), daz ez iu âne widerstrebe
6210	gelîche allen wol gevalle.» nû rieten si imz alle. Des râtes was der grâve vrô. vrouwen Ênîten trôste er dô vlîzeclîche unde wol,
6215	sô man den vriunt nâch leide sol. er sprach: «wünneclîchez wîp, war umbe quellet ir den lîp sô grimmeclîchen sêre? vrouwe, durch gotes êre
6220	und ouch durch mich sô tuot daz und gehabet iuch ein lützel baz dan iu doch sî geschehen. ich muoz iu des von schulden jehen daz ir wîplîchen tuot,
6225	und dunket mich von herzen guot daz ir klaget iuwern man, wan dâ schînet iuwer triuwe an. doch habet irs nû genuoc getân, wan ez enmac iuch niht vervân.
6230	diz ist der schœniste list der vür schaden wæne ich vrum ist, daz man sichs getrœste enzît, wan langiu riuwe niht engît wan einen bekumberten lîp.
6235	dar an gedenket, schœnez wîp. und möhtet ir im daz leben mit weinenne wider geben, sô hulfen wir iu alle klagen und iuwer swære gelîche tragen:
6240	des enmac doch leider niht geschehen. als ouch ichz hân ersehen, ob ich ez rehte erkiesen kan, sô enwas iuwer man weder sô edel noch sô rîch,
6245	sô starc noch sô wætlîch noch sô ahtebære, ir enmüget iuwer swære vol wreden ergetzet: er wirt iu wol ersetzet,
6250	ob ir mir gevolgic sît. mich wæne in sæliger zît ze iu got her gesendet hât. iuwer wirt vil guot rât. dâ dicke ein man
6255	grôzen schaden nimet an, daz verkêret sich vil ringe ze lieberme dinge, als sich, vrouwe, iuwer wân hiute hie hât getân:
6260	der muoz sich verkêren ze michelen êren. sich wandelt iuwer armuot benamen hie in michel guot. ich bin ein grâve genant,
6265	joch herre über ein rîchez lant: dar über sult ir vrouwe sîn. sehet, nû wirt iu wol schîn daz iu iuwers mannes tôt vrumt und iu zallem heile kumt,
6270	wan iu nû êrste wol geschiht. ich enhân wîbes niht: ze wîbe wil ich iuch genemen. des lebennes mac iuch baz gezemen dan ir mit einem manne vart
6275	über lant unbewart, nâch deheinem iuwerm rehte. ritter unde knehte, vrouwen, rîche dienestman, sô ir nie grâve mê gewan,
6280	die mache ich iu undertân, muget ir noch iuwer weinen lân.» Nû enmohte im diu guote vor grôzem unmuote und vor herzensêre
6285	gantwurten mêre. si sprach sô si daz herze twanc: «lât, herre, die rede lanc: herre, lât iuwern spot mit mir armen durch got.
6290	und sît ir rîche, deist iu guot. erkennet, herre, mînen muot. des wil ich iu kurze bejehen: ez enmac nimmer geschehen deich iuwer wîp werde
6295	oder iemens ûf der erde über kurz oder über lanc: ez geschæhe sunder mînen danc, mir engebe got wider mînen man. den êrsten den ich ie gewan,
6300	der müeze mir ouch der jungest sîn. geloubetz, herre, ez wirt wol schîn.» Der grâve sprach zen rittern dô: «diu wîp suln reden alsô. dâ von man irz niht wîzen sol:
6305	si bekêret sich wol von ir unmuote. ich bringez wol ze guote.» der vrouwen was er vil vrô. die knehte hiez er houwen dô,
6310	alle die dâ wâren, eine rosbâren. diu wart vil schiere bereit. dar ûf wart dô geleit Êrec vür einen tôten man.
6315	ûf Lîmors vuorten si in dan, und gewan im ze wahte alle die er mahte und hiez im lieht gewinnen diu ob im solden brinnen
6320	unz daz man in begrüebe. bitterlîcher trüebe gienc vrouwen Ênîten nôt, wan si hâte in vür tôt. Dem wirte dô von ir geschach,
6325	dô er ir schœne rehte ersach, daz er sô lange stunde erbeiten niene kunde unz ir man würde begraben, si enwürde der naht erhaben
6330	ze vrouwen sînem lande. swiez doch dûhte schande alle sîne dienestman, sîne boten sande er dan allenthalben in daz lant,
6335	daz im kæmen zehant die herren die des ambetes phlegent daz si die gotes ê gewegent, daz si im würde gegeben, wan er entriute nie mê geleben.
6340	sô grôz ist der minne maht: er wolde et briuten der naht. Bischove und ebbete kâmen dar und diu phafheit vil gar, swaz man der mohte berîten
6345	in des tages zîten. swiez der vrouwen wære widermüete und swære, si wart im sunder danc gegeben. ez enhalf ouch niht ir widerstreben:
6350	er wolde si ze wîbe hân. got hete den gewalt und er den wân. Nû was ouch ezzennes zît. daz liez der wirt âne strît, wan er die naht gerne sach.
6355	er gedâhte, des lîhte niht geschach, mit ir vil guote naht hân. ichn ruoche, trüge in sîn wân. der wirt gienc ezzen, und als er was gesezzen,
6360	zwêne kappelâne sande er dan und drîe sîner dienestman nâch der vrouwen dâ si phlac ir mannes dâ er ûf der bâre lac, daz si ze tische gienge.
6365	doch wæne ichz iht vervienge, wan si si niht ane sach, dô der eine zuo ir sprach. daz tâten si dem wirte kunt. nû sande er nâch ir anderstunt
6370	der herren michel mêre. daz tete er durch ir êre, daz si deste gerner kæme swenne si vernæme daz tischgerihte mære.
6375	von ir herzen swære nam si der boten deheine war. der wirt sprach: «ich muoz selbe dar.» Alsô er dô zuo ir kam, bî der hant er si nam
6380	und hiez si mit im ezzen gân. des bat diu vrouwe sich erlân. si sprach: «ob ich nû æze und sô schiere vergæze des aller liebisten man
6385	den ie wîp mê gewan, daz wære ein unwîplîch maz: ouwê wie zæme mir daz?» er sprach: «waz ist daz ir saget? âne nôt ir iuch sô sêre klaget.
6390	ir habet verlorn einen man den ich iu, ob mirs got gan, harte wol ersetze: vil gerne ich iuchs ergetze mit lîbe und mit guote.
6395	des wære mir ze muote, wan daz ir mich dâ von nement mit gebærden die iu missezement, daz iuch disen langen tac nieman getrœsten mac.
6400	ez ist ein unbiderber strît, dâ ir doch ane sô stæte sît. iuwer schade enist niht sô grôz: ich bin vil wol sîn übergenôz oder doch wol als vrum als er.
6405	vrouwe mîn, nû tuot her. ich wil geben in iuwer hant mich unde mîn lant und sô kreftigez guot daz ir iuwer armuot
6410	und leides müget vergezzen. noch gât dan mit mir ezzen.» si sprach: «daz ensol got wellen, daz ich mînen gesellen alsô muoz hân verlorn».
6415	des wart vil tiure dô gesworn: «ê erwel ich daz ich der erde mit im bevolhen werde. ich hân immer manne rât sît mir in got benomen hât.»
6420	er sprach: «nû lât die rede sîn immer durch die liebe mîn und gât dan ezzen mit mir, wan ichs benamen niht enbir.» Swie vil er doch si gebat,
6425	sô enwolde si niht von der stat, unz er si alsô betwanc: er zôch si hin sunder danc, wan si enmohte im niht gestrîten. er ensazte si niht besîten:
6430	ir wart ein valtstuol vor gesat ze tische engegen, als er bat, daz er die vrouwen deste baz möhte schouwen. er bat si dicke ezzen.
6435	nû enmohte si aber niht vergezzen ir lieben gesellen. trehene begunde si vellen: der tisch wart von ir ougen naz al des endes dâ si saz.
6440	von jâmer want si ir hende, diu vil ellende, ir klage was vil stæte. swie vil der wirt gebæte daz si sichs wolde mâzen,
6445	nû enmohte sis niht gelâzen. nû sprach er aber zir: «vrouwe, ir machet iu und mir den jâmer al ze vesten und mînen lieben gesten
6450	die her durch vreuwen komen sint. und enwæret ir niht ein kint, ir möhtet iuwer klage lân, und kundet ir iuch rehte entstân, wie rehte schône in kurzer vrist
6455	iuwer dinc gehœhet ist, doch iuch lützel noch bedrôz. ich gesach nie wunder sô grôz daz ir niht enkunnet gedagen und niht enmuget wol vertragen
6460	daz iuwer dinc nû vil wol stât unde sich verkêret hât ze guoter handelunge. swem alsô gelunge als iu hie muoz gelingen,
6465	er möhte baz gesingen danne weinen unde klagen. ich muoz doch die rihte sagen, iuwer jâmer ist alze vester. hiute wider gester
6470	sô stât iuwer dinc doch ungelîch. ê wâret ir arm, nû sît ir rîch: vor wâret ir niemen wert, nû hât iuch got êren gewert: ê wâret ir vil unerkant,
6475	nû sît ir gewaltic über ein lant: ê in swacher schouwe, nû ein rîchiu vrouwe: vor muostet ir ûz der ahte sîn, nû sît ir ein mehtic grævîn:
6480	ê vuoret ir wîselôs, unz iuwer sælde mich erkôs: vor wâret ir aller genâden bar, nû habet ir die êre gar: ê litet ir michel arbeit,
6485	dâ von hât iuch got geleit: vor hetet ir ein swachez leben, nû hât iu got den wunsch gegeben: vor muoste iu vil gewerren, nû lobet unsern herren
6490	daz er iuchs hât übertragen und lât iuwer tumbez klagen: ê lebetet ir âne êre, der habet ir nû mêre dan dehein iuwer lantwîp.
6495	ir kestiget den lîp, welt ir wizzen, âne nôt. iu ist ein arm man tôt: des sît ir ergetzet mit mir. den selben wehsel möhtet ir
6500	immer gerne trîben. ich rietez allen wîben, wanz enmöhte in niht gewerren daz si einen rîchen herren næmen vür einen solhen man.
6505	iuwer tumpheit ich iu verban. nû ezzet durch den willen mîn.» Dô sprach diu edel künegîn: «herre, ir habet mir genuoc gesaget, daz wære doch als guot verdaget.
6510	vil kurze ich iu antwürten wil. ir muget wol rede verliesen vil. bî dem eide geloubet daz, in mînen munt kumt nimmer maz, mîn tôter man enezze ê.»
6515	nû enmohte der grâve mê im selben meister gesîn, er entæte sîn untugent schîn: sîn zorn in verleite ze grôzer tôrheite
6520	[und ûf grôzen ungevuoc,] daz er si mit der hant sluoc alsô daz diu guote harte sêre bluote. er sprach: «ir ezzet, übel hût!»
6525	beide stille und überlût sô dûhtez si alle gelîche, arme unde rîche, ein michel ungevuoge. ouch wizzenz im genuoge
6530	under sîniu ougen: die andern redetenz tougen, ez wære tœrlîch getân und er möhtez gerne lâzen hân. er wart dar umbe gestrâfet vil:
6535	si wizzen imz unz ûf daz zil daz der schalchafte man vil sêre zürnen began. ir strâfen was im ungemach. vil unsenfteclîche er sprach:
6540	«ir herren, ir sît wunderlich, daz ir dar umbe strâfet mich swaz ich mînem wîbe tuo. dâ bestât doch niemen zuo ze redenne übel noch guot,
6545	swaz ein man sînem wîbe tuot. si ist mîn und bin ich ir: wie welt ir daz erwern mir, ich entuo ir swaz mir gevalle?» dâ mite gesweicte er si alle.
6550	Dô diu vrouwe wart geslagen, ir gebærde ensuln wir iuch verdagen: von dem slage wart si vrô und ouch des tages nie mê wan dô. wâ si die vreude möhte nemen?
6555	daz muget ir gerne vernemen, wan slege tuont selten iemen vrô. ir vreude schuof sich alsô: si wære gerner tôt gewesen tûsentstunt dan genesen:
6560	und als si den slac emphie (wan er von mannes krefte gie), dô hete si gedingen unde trôst si würde des lîbes belôst, und swaz si mêre gespræche
6565	daz erz mit slegen ræche unz er si gar erslüege. des wart vil ungevüege ir klage, und schrê wider dem site, und wânde den tôt gedienen mite.
6570	si stuont von im vil verre und sprach: «geloubet, herre, ich enahte ûf iuwer slege niht und swaz mir von iu geschiht, unde nemet ir mir den lîp,
6575	ichn wirde doch nimmer iuwer wîp. des nemet iu ein zil.» der rede treip si sô vil unz er si anderstunt sêre sluoc an den munt.
6580	sînen slac si niht envlôch: vil sêre si sich drunder zôch, daz si ir mêre emphienge. si wânde ir wille ergienge. si sprach: «wê mir vil armen wîbe!
6585	wære mîn geselle bî lîbe, diz bliuwen wære vil unvertragen.» Dô si sô lûte begunde klagen, Êrec fil de roi Lac [dannoch unversunnen lac]
6590	in des tôdes wâne, und doch des tôdes âne. geruowet was er etewaz unde doch niht vil baz. er lac in einem twalme
6595	und erschrihte von ir galme als der dâ wirt erwecket, von swærem troume erschrecket. er vuor ûf von der bâre in vremder gebâre
6600	und begunde mit den ougen sehen. in wunderte waz im wære geschehen, und enweste wie er dar kam. anderstunt er si vernam, wande si vil dicke schrê:
6605	«ouwê, lieber herre, ouwê! dîner helfe ger ich âne nôt, wan dû bist et aber leider tôt.» als si in dô nande, zehant er si erkande
6610	und vernam wol daz si wære in etelîcher swære, er enweste wie oder wâ. er enlac niht langer dâ: als er erkande ir stimme,
6615	ûf spranc er mit grimme und rûschte vaste under si. nû hiengen dâ nâhen bî swerte vil an einer want: der kam im einez in die hant.
6620	er hâte zornes genuoc. des êrsten rûsches er sluoc den wirt selbe dritten (under den saz er enmitten): die andern gâben die vluht.
6625	dâ warte niemen deheiner zuht: man sach dâ niemen hôher stân: «herre, welt ir vür gân,» wande swem der wec wart, der huop sich an die vart
6630	(ez was in sô geschaffen), die leien vür die phaffen: swie hôhe er wære beschorn, er wart dô lützel ûz erkorn, ez wære abbet oder bischof.
6635	hie vlôch aller der hof. zen türn wart vil enge von grôzem gedrenge: der kneht vür sînen herren dranc. der wec dûhte si vil lanc
6640	der zen türn ûz gie. ich enkam ze solher brûtlouft nie: ein schrit was in ein raste. si begunden vaste vliehen unde wenken.
6645	ez lâgen under benken vil guoter knehte wider ritter rehte. eines dinges vil geschiht, des enwundert mich niht,
6650	swer sînem lîbe vorhte treit, daz er durch sîne gewarheit dicke vliuhet grôzen schal ûf die burc ûz dem tal. sô vluhen dise ûz dem hûs
6655	und sluffen ze loche sam diu mûs. in wart daz wîte bürgetor beidiu dar inne und ouch dâ vor ze wênic und ze enge, sô daz si mit gedrenge
6660	vielen über mûre gelîch einem schûre, wan si diu grimme vorhte treip. Lîmors liutlôs beleip. vliehens gienc in michel nôt,
6665	wan si vorhten den tôt. ir vluht was âne schande. swer inz ze laster wande, der überspræche sich dar an. nû sprechet, swâ ein tôter man,
6670	mit bluotigen wunden, gerêwet, in gewunden houbet unde hende, vüeze an einem gebende, mit einem swerte alsô bar
6675	ûf ein ungewarnte schar in aller gæhe liefe und wâfen über si riefe, er vlühe swem et wære der lîp ze ihte mære:
6680	und wære ich gewesen bî, ich hete gevlohen, swie küene ich sî. sîn torste dâ niemen bîten âne vrouwen Ênîten. den tôten si vil gerne sach:
6685	ze liebe wart ir ungemach allez verkêret und ir vreude gemêret. Bî der hant er si vienc: vil genôte er suochende gienc,
6690	unz daz er sîn îsengewant joch schilt unde sper vant, und wâfente sich als ê, sam im nie würde wê. sîner rosse envant er niht:
6695	«ouwê dirre geschiht! suln wir nû ze vuoze gân? daz haben wir selten ê getân.» nû müeze got gesenden disen ellenden,
6700	Êrecke und Ênîten, ros dâ si ûfe rîten. Als er der rosse niene vant, nû tete er als im was gewant. sînen schilt nam er
6705	und in die winstern hant daz sper, an sîner zesewen sîten vuorte er vrouwen Ênîten und gâhte vür daz bürgetor. dâ wart ime vor
6710	sîn ros engegen brâht, des im doch niender was gedâht noch jenem der ez reit, alse doch sîn sælikeit volleclîche dar an schein.
6715	ez hete des wirtes garzûn ein gevüeret ze wazzer. dar ûf sazer. sîne rotruange er sanc, vil ebene stuont sîn gedanc,
6720	wande er enweste niht umbe dise geschiht. nû reit er ûf den burcwec. daz ros erkande Êrec dô erz aller verrest sach.
6725	vil liebe im dar an geschach. ez vuocte et gotes wille. nû stuont er vil stille unz im daz ros sô nâhen kam daz erz bî dem britel nam
6730	wider in sîne phlege, unde huop sich after wege. vür sich sazte er die künegîn (ez enmohte dô niht bezzer sîn), vrouwen Ênîten,
6735	und gedâhte rîten allez vür sich durch daz lant. nû was der wec im unerkant: ouch irte daz sîne vart daz diu naht vinster wart:
6740	ouch vorhte er in dem lande schaden unde schande von dem lantvolke gewinnen, swenne si würden innen waz er getân hâte.
6745	nâch vrouwen enîten râte (wan si in den wec lêrte) ûf die strâze er kêrte die er gebâret dar reit: daz geschach durch gewarheit.
6750	Ez wâren disiu driu lant an ein ander gewant unde nâhen genuoc, daz dâ er den grâven sluoc, und aber des wênigen man
6755	von dem er die wunden gewan, und des künec Artûses gewalt. disiu driu enschiet niuwan der walt dâ er enmitten inne reit nâch dirre arbeit.
6760	Und als si kâmen in den walt ûz der sorgen gewalt wider ûf ir kunden wec, nû vrâcte der künec Êrec vrouwen Ênîten mære
6765	wie er komen wære in des grâven gewalt den ich iu geslagen hân gezalt. nû tete si im die sache ir ougen zungemache
6770	allez weinende kunt. dô endete sich zestunt diu swære spæhe und diu vremde wæhe der er unz an den tac
6775	mit ir âne sache phlac, daz er si mit gruoze meit sît er mit ir von hûse reit. durch daz diu spæhe wart genomen, des ist er an ein ende komen
6780	und westez rehte âne wân. ez was durch versuochen getân ob si im wære ein rehtez wîp. nû hâte er ir lîp ersichert genzlîchen wol,
6785	als man daz golt sol liutern in der esse, daz er nû rehte wesse daz er an ir hæte triuwe unde stæte
6790	unde daz si wære ein wîp unwandelbære. er druhte si an sîn bruste, vil dicke er si kuste vol minneclîchen
6795	und bat die tugentrîchen daz si wolde vergeben als ungeselleclîchez leben unde manege arbeit die si ûf der verte leit.
6800	bezzerunge er ir gehiez, die er benamen wâr liez. nû vergap si imz an der stat, wan er sis vriuntlîchen bat. si sprach: «lieber herre,
6805	jâ enmuote mich sô verre dehein ander ungemach, der vil âne zal geschach. ez huop mich allez ringe wider deme dinge
6810	daz ich iuch muoste mîden: solde ich daz langer lîden, dar umbe müeste ich doch mîn leben alsô schiere hân gegeben.» Dô diz wunder ergie
6815	ûf Lîmors, nû sehet hie wâ ein garzûn entran. der lief durch den walt dan, dar umbe daz erz zuo der stunt dem wênigen künege tæte kunt
6820	der dâ was sô unverzaget. ich hân iu ê von im gesaget: er was Guivreiz genant, der selbe der mit sîner hant Êrecke sîne wunden sluoc.
6825	dem was der wec wol kunt genuoc, er begunde sêre gâhen. ouch was ez im vil nâhen: ir zweier gewalt enschiet niuwan der walt.
6830	er bôzete an daz bürgetor. dâ twelte er unlange vor, er wart vil drâte in gelân. nû gienc er vür den künec stân und begunde im sagen
6835	wie der grâve Oringles wære erslagen, und daz hæte ein tôter man getân. nû begunde sich Guivreiz verstân ze jungest an dem mære daz ez Êrec wære.
6840	nochdan was er niht entslâfen. vil lûte schrê er: «wâfen! welh ein schade muoz ergân, und sol den lîp verlorn hân der beste ritter der darf leben!
6845	im enwelle got genâde geben, wirt ez dem lantvolke kunt, si ermürdent in zestunt. ouwê, möhte ich im vor gesîn, daz würde mînem vriunde schîn.
6850	doch wirt ez versuochet, ob es got geruochet.» Nû wâfente er sich drâte und swaz er ritter hâte. nû wart ir wol in der zal
6855	drîzec ritter über al. diu ros brâhte man in dô. zwîvelhaft und unvrô sô kêrte der künec balde engegen deme walde,
6860	daz er dem ellenden man ûz dem lande hulfe dan. Nû gerieten si beide einen wec, an dirre sîten Êrec unde jenenthalp er,
6865	der eine hin, der ander her, daz si enmohten bewarn si enmüesten ein ander widervarn: alsô vuoctez diu geschiht. nû enweste ir deweder niht
6870	umbe des andern reise: des kam Êrec in vreise. dô si noch wâren verre, der ellende herre wart vil wol gewar
6875	der gewâfenten schar, wan der schal und der dôz was von den schilten grôz. er sprach ze vrouwen Ênîten: «vrouwe, ich hœre rîten
6880	engegen uns ein michel her. nû enwil ich âne wer alsô zagelîchen ûzem wege niht entwîchen. harte ringe ist mîn kraft:
6885	doch gibe ich in ritterschaft zeteslîcher mâze. nû erbeizet zuo der strâze unz ir gesehet wiez ergê.» ich wæne der vrouwen ê
6890	lützel leider geschach, wan si sîn unkraft gesach. In den wec hielt er. enmitten riten si dort her. der mâne bôt in schœne naht
6895	der dô der wolken was endaht. nû wart sîn der künec gewar, wan er was der vorderst an der schar. er sach in halten in den wec. nû bereite sich Êrec
6900	ie mitten ze wer. nû sî got der in ner! waz welt ir daz der künec tuo? wan er bereite sich ouch dar zuo, als er tjostieren solde,
6905	ob er niht verzagen wolde, des ich in vil sicher sage: er enwas doch niht ein zage. daz bescheinte er wol dâ und ouch dicke anderswâ.
6910	Diu sper begunden si neigen und ir kraft erzeigen. zesamene liezen si gân: dô wart ein rîchiu tjost getân. die vil guoten knehte.
6915	nû trâfen si vil rehte beide nâch ir gemerke. nû half niuwan sîn sterke den baz geruoweten man daz er den prîs dâ gewan
6920	und im alsô wol geschach. Êrecken er dâ nider stach hinderz ors an daz gras als lanc sô der schaft was. über in erbeizete er dô:
6925	des wart vrouwe Ênîte unvrô. Diz was Êrecke nie geschehen: ez enmöhte ouch nieman gejehen, er enwelle in liegen an, daz in ie dehein man
6930	gestæche zuo der erde: ouch wæres der werde vil wol über worden dâ zestunt, unde wære er gesunt. sus was entwichen im diu kraft,
6935	daz er muoste meisterschaft dulden von des küneges hant. den helm er im abe bant und wolde in vol hân erslagen. daz enmohte diu vrouwe niht vertragen.
6940	dâ si dort stuont verborgen in grôzen sorgen, si entwelte deheine wîle, si spranc ûz dem zîle und begunde sich vellen
6945	über ir gesellen. si sprach: «nein, ritter guot, gewünne dû ie ritters muot, niht erslach mir mînen man! und gedenke dar an:
6950	er ist wunt sêre, dû bist sus gar âne êre, swaz dû im nû mê getuost, wan dû es sünde haben muost. in hât der künec Guivreiz,
6955	ob ich sînen namen weiz, verwundet in die sîten.» Guivreiz vrouwen Ênîten bî der stimme erkande, ouch half ez daz si in nande.
6960	vil gâhes stuont er hôher dan. er sprach: «vrouwe, saget an wer dirre ritter sî, unde saget mir dâ bî wâ von ir mich erkennet:
6965	ich binz den ir dâ nennet. ich wæne mir übele sî geschehen. vrouwe, ir sult mir verjehen wiez umbe iuch sî gewant: ist dirre herre Êrec genant
6970	und ir vrouwe Ênîte? daz ich iht ze lange bîte: wan ich bin durch in ûz komen, und sage iu wie ich hân vernomen von im mir leidiu mære,
6975	daz er bekumbert wære ûf Lîmors hie nâhen bî. ich vürhte er iu erslagen sî, ich enschine ie mitten ûf der vart, als ez mir gesaget wart,
6980	ich und mîne gesellen, daz wir im helfen wellen. ich sûme mi1ch in dem walde: ich solde im komen balde: ez ist schade, wirt er erslagen.»
6985	nû begunde si imz aber sagen unde wortzeichen geben: des beleip im daz leben. daz hüetelîn si im abe bant: dô wart er im rehte erkant.
6990	vil gerne er in ane sach: mit guotem willen er sprach: «sît willekomen, herre, und saget ob iu iht werre oder waz wære diu geschiht.»
6995	Êrec sprach: «mir enwirret niht: ich bin anders wol gesunt, wan dâ ich von iu wart wunt.» des wart Guivreiz vil vrô. sîn houbet entwâfente er dô.
7000	von vreuden dise zwêne man liefen ein ander an und kusten sich mit triuwen. Guivreiz stuont mit riuwen umbe Êreckes ungemach,
7005	der im von sîner tjost geschach. als er daz begunde klagen, Êrec sprach: «des sult ir gedagen und ûz iuwer ahte lân. ir enhabet an mir niht missetân.
7010	swelh man tœrlîche tuot, wirts im gelônet, daz ist guot. sît daz ich tumber man ie von tumpheit muot gewan sô grôzer unmâze
7015	daz ich vremder strâze eine wolde walten unde vor behalten sô manegem guoten knehte, dô tâtet ir mir rehte.
7020	mîn buoze wart ze kleine, dô ich alters eine iuwer aller êre wolde hân: ich solde baz ze buoze stân.» dô man der rede gar gesweic,
7025	Guivreiz vrouwen Ênîten neic und hiez si willekomen sîn. des genâdete im diu künegîn. nû si wurden wol gewar daz im niht tœtlîches war,
7030	des wâren si gemeine vrô. Ûf sâzen si dô und riten doch unverre. Guivreiz der herre vuorte si ûz dem wege
7035	in gemelîcher phlege an einen wisevlecken. durch den herren Êrecken beliben si dâ die naht ze ruowe nâch sîner unmaht.
7040	si wurden dâ berâten, als si des state hâten, mit vil guotem viure. daz enwas in dâ bortiure: dâ was waldes genuoc,
7045	der in niuwan an daz viur truoc. Dô si dâ bî gesâzen und ein teil vergâzen kumberlîcher arbeit und Êrec hâte geseit
7050	waz kumbers er hete erliten sît daz er was von im geriten, dô si beide zeiner stunt von ein ander wurden wunt (daz selbe enhân ich niht verdaget,
7055	ich enhabe ius gesaget sô vil als ichs weste), dise lieben geste begunden si vil verre klagen und gote grôze genâde sagen
7060	daz Êrec dannoch lebete, wan im vil dicke swebete sîn lîp in solher wâge, als ûf des meres wâge ein schefbrüchiger man
7065	ûf einem brete kæme dan ûz an daz stat gerunnen. ofte hete er gewunnen ein leben zwîvelîchez und disem wol gelîchez:
7070	nû hete in an der genâden sant ûz kumbers ünden gesant got und sîn vrümekeit, daz er nû allez sîn leit hâte überwunden,
7075	daz er ze disen stunden vol vrœlîchen saz. got helfe im nû vürbaz: im ist noch gelungen âne strît. Nû was ouch slâfennes zît.
7080	dô giengen die knehte spehen sament rehte welh stat in dâ töhte dâ man in betten möhte. als si dô giengen suochen,
7085	nû sâhen si drî buochen enhalp bî dem viure stân, breit unde wol getân, gelîche lanc gewahsen, mit rîchen loupvahsen,
7090	mit wol zebreiten esten. den vil lieben gesten betten si dar under, under eine besunder Êrecke und vrouwen Ênîten,
7095	die ze manegen zîten bî ein ander niht enlâgen noch geselleschefte phlâgen mit slâfe und mit mazze. dem unbescheiden hazze
7100	wart ein ende gegeben und kurn in ein bezzer leben. dem wirte betten sî under die næhsten dâ bî (diu selbe stuont enmitten),
7105	den rittern under die dritten. «nû sage waz wære ir bettewât?» entriuwen, als ez der walt hât, schœnez loup und reinez gras, sôz in dem walde beste was.
7110	waz touc daz lange vrâgen, wan daz si doch lâgen? Diu naht ein süezez ende nam. als in dô der tac kam, nû riten si von dan.
7115	der vil wênige man, Guivreiz ir wirt, vuorte sî ze bezzerm gemache dâ bî, ûf eine sîne veste dâ er si bewart weste
7120	ze vollem gemache. von aller guoten sache sô was daz selbe hûs vol, rehte als ich iu sagen sol. Ez stuont enmitten in einem sê:
7125	der gap im genuoc und dannoch mê der aller besten vische die ie ze küneges tische dehein man gebrâhte, swelher hande man gedâhte.
7130	dar zuo was dâ daz beste jaget dâ von uns ie wart gesaget. ez hete der künec umbe den sê wol zwô mîle oder mê des waldes in gevangen
7135	und mit mûre umbegangen: dar in engienc dehein tor mê niuwan ûz gegen dem sê. mit mûre was der selbe kreiz, als ich iu ze sagen weiz,
7140	gelîche endriu gescheiden. daz ein teil von den beiden hâte rôtwildes genuoc: swarzwilt daz ander teil truoc. in dem dritten teile dâ bî,
7145	vrâget ir waz dar inne sî? dâ wâren inne besunder niuwan kleiniu kunder, vühse hasen und diu gelîche. ez was et vil volleclîche
7150	erziuget dirre wiltban und alsô daz dehein man der doch gerne wolde jagen nimmer dörfte geklagen daz er wildes niht envunde.
7155	ouch hete der wirt der hunde die smannes willen tâten diz jagehûs wol berâten. swenne er dar ûz sach maneges site daz er rande dâ mite,
7160	swâ er bî den zinnen saz, sô ensâhenz jene niht vil baz die dâ mite randen. wer solde im aber daz enblanden swenne er möhte mit den vrouwen
7165	abe dem hûse schouwen loufen die hunde? wan ze swelher stunde daz rôtwilt ersprenget wart, sô was sîn jungeste vart
7170	ie ze wazzer in den sê, unde wart ouch nimmer mê erloufen niender anderswâ wan under dem hûse dâ. und swes muot begunde gern
7175	jagen swîn oder bern, der vant ze dem genieze vil starke breite spieze, und wolde er den hasen jagen, als ir ê hôrtet sagen,
7180	der mohte vinden den wunsch von hasenwinden. nû jage selbe swaz dû wilt. hie sint hunde unde wilt und swaz ze jagenne ist nütze,
7185	netze und guot geschütze, und swes vürbaz gert dîn muot. hie was diu kurzwîle guot. Penefrec was diz hûs genant, dâ man dehein gebresten vant
7190	unde volleclîchen rât, vische unde wiltbrât, beide semeln unde wîn. swaz dâ mêre solde sîn, vil lützel des dâ gebrast.
7195	dar umbe hete den werden gast der wirt ze ruowe dar brâht, wan im was des wol gedâht daz er dâ mit sînem wîbe wider kæme ze lîbe.
7200	ouch was dâ guot geræte von rîcher bettewæte. sîner vrümekeit ze lône sô wart er dâ vil schône gewirdet und gehalten:
7205	vil schône wart gewalten sîn und der künegîn. wer sol nû sîn arzât sîn, der heile sîne wunden? dar zuo hete er dâ vunden
7210	vrouwen vil rîche, edele, wætlîche, des küneges swester zwô. die wâren doch des vil vrô und in ir herzen gemeit
7215	daz er in alsô gereit daz er ir dienest muoste nemen. der arzâte mohte in wol gezemen. si heilten sîne wunden, wan siz wol kunden.
7220	ouch phlac sîn diu guote mit vil getriuwer huote, vrouwe Ênîte. dâ von wart sîn sîte schône unde vol heil.
7225	si heten des phlasters ein teil dâ von ich ê gesaget hân, daz dâ Fâmurgân hâte gemachet mit ir hant. des hâte in ze gebe gesant
7230	vrouwe Ginovêr ein teil. daz was ouch dises mannes heil. Ûf dem hûs ze Penefrec dâ entwelte der künec Êrec, unz er vol geheilet was
7235	und sîner wunden genas, rehte vierzehen naht. als im dô sînes lîbes maht volleclîche wider wart, dô hügete er wider ûf die vart.
7240	swie guot gemach dâ wære, im was dâ vil swære. der tugenthafte man zewâre er gedâhte von dan wol alsô balde
7245	als er in einem walde wære âne obedach, eine âne allen gemach, dâ den unvalschen degen beide wint unde regen
7250	harte sêre muote. daz kam von dem muote daz im dehein werltsache was vor dem gemache dâ er ritterschaft vant
7255	und dâ er mit sîner hant die sêre muoste urborn. diz leben hâte er erkorn. im was dâ mitelîhte baz: ez was sîn slâf und sîn maz.
7260	die vierzehen naht, daz ist wâr, dûhten in als manec jâr. er enwolde dâ niht tweln mê und wære geriten, möhte er, ê. Ouwê vrouwen Ênîten!
7265	waz sol doch si nû rîten, diu schœne guote wol geborn? wan si hâte ir phert verlorn, als ir ê wol hôrtet sagen, dô der grâve Oringles wart erslagen
7270	ûf Lîmors und dô von dan Êrec mit ir sô kûme entran. daz siz nû verlorn hât, des solde doch werden rât. si wirt es wol ergetzet,
7275	wan man irz ersetzet, daz si diz nimmer darf geklagen. mit einem, als ich iu wil sagen, daz doch nie dehein man dehein schœnerz gewan
7280	noch solde beschouwen. diz gâben ir die vrouwen, des küneges swester zwô, unde wâren des vil vrô daz siz geruochte von in nemen.
7285	ouch mohte sis vil wol gezemen. Vrâget iemen mære ob ez schœner wære dan daz si unz her geriten hât? ir ahte vil ungelîche stât.
7290	alsô was ez gezieret: rehte geparrieret, schilthalben garwe mit volblanker varwe, daz niht wîzers mohte sîn,
7295	und alsô schœne daz der schîn den ougen widerglaste. ez enmohte niemen vaste deheine wîle ane gesehen: des hôrte ich im den meister jehen.
7300	nû hete diu ander sîte dirre ze widerstrîte gekêret allen ir vlîz. alzan genzlîchen wîz sô disiu schilthalben was
7305	von der ich iu nû dâ las, alse swarz was disiu hie dâ diu wîze abe gie. ez was et swarz unde wîz. dirre mislîche vlîz
7310	was schône underscheiden: zwischen den varwen beiden was ein strich über geleit wol eins halben vingers breit. der strich grüene was
7315	unde lieht sam ein gras. an dem mûle er ane vie, als ein penselstrich er gie zwischen den ôren dane, vil ebene über die mane,
7320	engegen den goffen über den grât, unz dâ daz phert ende hât, zwischen den brüsten nider alsam, als ez doch wol gezam. diz wâren seltsæniu dinc.
7325	umbe ietweder ouge gienc ein rinc der selben varwe, daz ist wâr. weich und reit was im daz hâr, nâch dem teile gevangen dâz hin was gehangen,
7330	ze rehte dic und niht tief: niht vol ez an diu knie enswief. der zoph was vür daz houbet lanc, halp swarz, halp blanc, als in diu grüene varwe schiet.
7335	der zagel alsam geriet. Sît ich nû gesaget hân wie daz phert wære getân, wiez anders wære gestalt daz sol iu werden gezalt.
7340	ez was erwünschet alsô: weder ze nider noch ze hô, weder ze kurz noch ze lanc, weder ze grôz noch ze kranc. sîn dürre houbet ez truoc
7345	nâch sînem rehte hôch genuoc, mit ragenden ôren niht lanc, daz eine swarz, daz ander blanc: daz swarze ein wizzer rinc bevie, ein swarzer umbe daz wîze gie:
7350	sîn kel dic und ûf gezogen, ze rehter mâze gebogen, kleine dâ si anz houbet gie: geschaffen dort unde hie daz es iuch wol möhte lüsten:
7355	starc und wît zen brüsten: mit dürrem gebeine, ze grôz noch ze kleine: diu wâren vlach unde sleht, als einem tiere ûfreht.
7360	ez hâte, sît ichz loben muoz, kurzen vezzel, hôhen vuoz: die wâren ouch ze rehte gar, alle swarz gelîche var. und enwischetez nimmer kneht,
7365	sô wærez doch schœne und sleht. Alsô was sîn geschaft daz von sîner meisterschaft ein werltwîser man der aller dinge ahte kan
7370	niht bezzers betrahte, ob er in sîner ahte aht ganzer jâre saêze unde niht vergæze wan daz erpruofte sîn muot
7375	ein phert schœne und volle guot: alsô was ez gestalt. und ob er danne den gewalt von dem wunsche hæte, daz ez belibe stæte
7380	swes er dar zuo gedæhte, und swenne erz vollebræhte, daz erz vür sich stalte und er von sînem gewalte dar abe næme
7385	swaz dar an im missezæme, alsô was ez vollekomen daz er dar abe niht hete genomen alse grôz als umbe ein hâr. giht ieman: «er enhât niht wâr»,
7390	dem bescheide ich die rede baz, daz er rehte erkenne daz diu rede wese ungelogen. ez was dâ heime niht erzogen. Ich sage iu wie ez dar was komen.
7395	ez hete der wirt selbe genomen einem wilden getwerge vor einem holen berge, dô er nâch sîner gewonheit ze walde nâch âventiure reit.
7400	ez hâte ez vil vaste gebunden zeinem aste: dô was ez gegangen dan. alsô vant ez dirre man: abe dem aste er ez nam.
7405	als daz getwerc wider kam und ez daz phert niene vant an dem boume darz ez bant, grôz was sîn ungemach. und als ez daz phert ersach
7410	in vremder gewalt, dô wart vil manecvalt sîn schrîen und sîn weinen, und begunde wol bescheinen des pherdes güete:
7415	mit grôzem ungemüete wan ez vil starke. driu tûsent marke bôt ez im von golde daz er imz lâzen solde.
7420	nû versprach er swaz ez im bôt. sîner habe was im unnôt: alsô vuorte erz von dan. nû huop der wênige man von jâmer alsô grôzen schal
7425	daz im der berc engegen hal. Daz satellîn daz dar ûf lac, swer daz mit golde widerwac, nâch sînem rehte erz niht engalt. dâ von enwirt iu niht mê gezalt,
7430	daz ich die rede iht lenge, wan ez was doch zenge einem gewahsen man. und als erz ûz dem walde dan ze Penefrec brâhte,
7435	er gapz den ers gedâhte, sînen swesteren zwein: dar an ez vil wol schein daz er si liep hâte, wan ez truoc sanfte und drâte
7440	unde sage iu rehte wie. swennez den vuoz zer erde lie, sô trat ez alsô lîse daz niemen wære sô wîse der ze deheiner stunde
7445	den trit gehœren kunde. swer dar ûfe gesaz, zewâre sage ich iu daz, daz er dar ûfe lebete rehte sam er swebete.
7450	wan daz ez niht rehte kæme und ein teil missezæme von einem pherde alsô vil ze sprechen (des ichz lâzen wil), sô möhte ich wunder von im sagen:
7455	sus wil ich lobes mê gedagen. wan sagen swaz si wellen, si mugen vil gezellen unde sprechen ir muot, ez enkam doch phert nie sô guot
7460	in deheines mannes gewalt: waz sol iu mê dâ von gezalt? Als uns der meister seite, ein vrouwen gereite wart ûf daz phert geleit,
7465	dâ meisterlîcher arbeit vil werkes ane lac. ez hete geworht vil manegen tac der wercwîseste man der satelwerkes ie began,
7470	ein meister, hiez Umbrîz. der doch allen sînen vlîz dar leite vür wâr wol vierdehalbez jâr, unz er in vollebrâhte
7475	dar nâch als er gedâhte. daz ich iu rehte seite von diseme gereite, wie daz erziuget wære, daz würde ze swære
7480	einem alsô tumben knehte: und ob ichz aber rehte iu nû gesagen kunde, sô wærez mit einem munde iu ze sagenne al ze lanc.
7485	ouch tuot daz mînem sinne kranc, daz ich den satel nie gesach: wan als mir dâ von bejach von dem ich die rede hân, sô wil ich iuch wizzen lân
7490	ein teil wie er geprüevet was, als ich an sînem buoche las, sô ich kurzlîchest kan. «Nû swîc, lieber Hartman: ob ich ez errâte?»
7495	ich tuon: nû sprechet drâte. «ich muoz gedenken ê dar nâch.» nû vil drâte: mir ist gâch. «dunke ich dich danne ein wîser man?» jâ ir. durch got, nû saget an.
7500	«ich wil dir diz mære sagen.» daz ander lâze ich iuch verdagen. «er was guot hagenbüechîn.» jâ. wâ von möhte er mêre sîn? «mit liehtem golde übertragen.»
7505	wer mohte iuz doch rehte sagen? «vil starke gebunden.» ir habet ez rehte ervunden. «dar ûf ein schArlachen.» des mac ich wol gelachen.
7510	«sehet daz ichz rehte errâten kan.» jâ, ir sît ein weterwîser man. «dû redest sam ez sî dîn spot.» wê, nein ez, durch got. «jâ stât dir spotlîch der munt.»
7515	ich lache gerne zaller stunt. «sô hân ichz doch errâten?» jâ, dâ si dâ trâten. «ich hân lîhte etewaz verdaget?» jâ enwizzet ir hiute waz ir saget.
7520	«enhân ich danne niht wâr?» niht als grôz als umbe ein hâr. «hân ich danne gar gelogen?» niht, iuch hât sus betrogen iuwer kintlîcher wân.
7525	ir sult michz iu sagen lân. Sehet wie grôz ein grûz sî: sô vil enwas dâ niht holzes bî. er was von helfenbeine und von edelem gesteine
7530	joch von dem besten golde daz ie werden solde geliutert in dem viure: valsch was im tiure. von disen mâterjen drin
7535	sô hâte des meisters sin geprüevet diz gereite mit grôzer wîsheite. er gap dem helfenbeine und dâ bî dem gesteine
7540	sîn gevellige stat, als in diu gevuoge bat. er muosete dar under danne golt besunder, daz muostez werc zesamene haben.
7545	an disem gereite was ergraben daz lange liet von Troiâ. zaller vorderst stuont dâ wie des wart begunnen daz si was gewunnen
7550	unz daz si wart zestœret: dâ mite was dâ gehœret. dâ engegen ergraben was wie der herre Ênêas, der vil listige man,
7555	über sê vuor von dan, und wie er ze Kartâgô kam, und wie in in ir genâde nam diu rîche vrouwe Dîdô, unde wie er si dô
7560	vil ungeselleclîchen liez und enleiste ir niht des er gehiez: sus wart diu vrouwe betrogen. an dem hindern satelbogen sô was einhalp ergraben
7565	ir vil starkez missehaben und wie si im boten sande, swie lützel si ins erwande. bescheidenlîche stuont hie swaz er dinges begie
7570	daz sagebære wesen mac von der zît unz an den tac daz er Laurente betwanc. daz wære ze sagenne ze lanc wie er si in sînen gewalt gewan.
7575	jenhalp stuont dar an wie er vrouwen Lavîniam zêlîchem wîbe nam, und wie dâ ze lande was gewaltic herre Ênêas
7580	âne alle missewende unz an sîns lîbes ende. Dâ mite der satel was bedaht, daz was ein phelle wol geslaht, sô er beste wesen solde
7585	von sîden und von golde. der phelle was ze rehte tief: vil nâch er zuo der erde swief. dâ stuonden an besunder al der werlde wunder
7590	und swaz der himel besliuzet. ob iuchs niht verdriuzet, sô wil ich iu ir ein teil sagen und doch michels mê verdagen. diu vier elementâ
7595	stuonden schînbære dâ in ir sundervarwe, und in iegelîchem garwe swaz dem undertænic ist: diz meisterte ouch starker list.
7600	diu erde von den vieren stuont mit ir tieren, swaz der dehein man in sînem muote erkennen kan an walde oder an gevilde,
7605	zam oder wilde: dâ stuont diu menschlîch geschaft, geworht von solher meisterschaft sam ez wolde sprechen und bildes reht brechen.
7610	dâ bî daz mer swebete: dar inne sam er lebete der visch, bî dem besunder elliu merwunder und swaz dâ bûwet smeres grunt.
7615	der tæte mir der namen kunt, ich wolde si gerne erkennen und kunnen genennen. dar zuo suochet iu einen man der iu si wol genennen kan:
7620	envindet ir des danne niht (daz ouch vil lîhte geschiht), sô volget mînem râte und machet iuch ûf drâte, vart selbe zuo dem mer:
7625	dâ vindet ir inne des ein her. gât an daz stat stân unde bitet si gân ûz ziu an den sant: dâ werdent si iu erkant.
7630	enhilfet danne daz niht (daz aber lîhte geschiht), sô suochet selbe den grunt: dâ werdent si iu danne kunt mit grôzem schaden, mit lützelm vrumen.
7635	nû râte ich mînen vriunden sumen daz si die niugerne lân und hie heime bestân. swes ein man wol al den tac sô rehte lîhte engelten mac
7640	und nimmer mêr geniezen, des lât iuch, vriunt, erdriezen. Dâ stuont ouch daz dritte bî. vrâget ir waz daz sî? der luft in sîner ahte.
7645	die vogele maneger slahte swebeten dar inne, geweben mit solhem sinne, rehte sam si lebeten und ûf zen lüften strebeten.
7650	daz viur mit sînen trachen und mit andern sachen die des viures müezen leben, die sach man ouch dar inne sweben. diu ende ein lîste bevie
7655	diu nider zuo der erde gie: diu was einer hende breit, mit edelem gesteine beleit. daz lachen was doch rîch genuoc daz Jûpiter ze decke truoc
7660	und diu gotinne Jûnô, dô si in ir rîche hô in dem brûtstuole sâzen: daz möhte sich gemâzen disem sateltuoche als vil,
7665	daz ich iu sagen wil, sam der mâne der sunnen. ir sult mir des wol gunnen daz ich iu sage die wârheit. beide guot und gemeit
7670	wâren die stegereife, breite goltreife, gebildet nâch zwein trachen. si kunde wol gemachen des goltsmides hant
7675	der sichs ze vlîze underwant. die zagele si ze munde bugen, ir vedern stuonden sam si vlugen, ir ougen wâren steine, vier jâchande kleine.
7680	Wes was dirre deweder, darmgürtel joch stîcleder? ir müestetz werc wol besehen ê ir westet wes ir soldet jehen, ob ez von golde wære durchslagen
7685	oder mit sîden undertragen. daz ez borten solden sîn, daz enwürde iu an den bilden schîn oder irn begriffetz mit der hant, ez wære iu immer unerkant.
7690	die rinken wâren silberîn, dar umbe daz man wîzen schîn vor dem golde sæhe, veste unde spæhe. harte guot was daz panel,
7695	niht eines kalbes vel, der ich doch manegez hân gesehen: dâ enkunde niemen an erspehen leder eines nagels breit: ez was guot und gemeit,
7700	als ez dem satele gezam und im wol ze mâze kam, gevüllet prîslîchen wol, linde sam ein boumwol, daz ez daz phert niht zebrach.
7705	swaz man sîn vor dem satel sach, daz was gesteppet dicke. ze guotem aneblicke was dar an entworfen sus wie Tispê und Pîramus,
7710	betwungen von der minne, behert rehter sinne, ein riuwic ende nâmen dô si zem brunnen kâmen. daz die vasen solden sîn,
7715	daz was ein netze guldîn, gebriten von goltdræten vesten unde stæten, über die goffen zebreit. dar umbe wâren geleit
7720	edel steine genuoge, ziegelîcher vuoge, dâ sich die maschen strihten, kriuzewîs sich schihten. an iegelîches knophes stat
7725	was ein rubîn ûf gesat in lâsûrvarwe kasten. die steine dar ûz glasten einer hande garwe, vol liehter varwe.
7730	Guot und gevüege was daz vürbüege, starc unde vil gemeit, ein borte zweier vinger breit, nâch dem zoume vollekomen
7735	dar an daz phert was genomen. ez wâren verworht dar inne mit schœnem sinne die einlif edelen steine: der zwelfte der was eine
7740	vor in den zoum geleit in ein schîben, diu was breit, diu nider vür den zoph gie und vor dem houbete hie. der liehte carbunculus,
7745	dâ behielt er sîn ambet sus, wan im daz lieht ist geslaht, ob im ie ze vinsterre naht ze rîtenne geschæhe, daz man dâ von gesæhe.
7750	die einlif wâren hie in geleit, an daz vürbüege zebreit, zwischen den gehangen guote goltklangen: die hôrte man verre klingen.
7755	von sus getânen dingen was der satel vollebrâht und baz dan ichs hân gedâht. deiswâr ouch bedunket mich reht unde billich
7760	daz er mit vollem mære harte schœner wære dan dehein ander gereite, wan er mit wârheite dem schœnisten wîbe wart gegeben
7765	diu in den jâren mohte leben, der edeln vrouwen Ênîten. Nûst zît daz si rîten, wan in sint diu ros komen. hânt si dâne urloup genomen
7770	von dem ingesinde? jâ, von kinde ze kinde und von des küneges swestern. man ensolde willen vestern vor noch sît beschouwen
7775	an deheinen andern vrouwen zaller slahte guote. zuht was in ir huote. die vrouwen hânt ez alsô brâht daz ir von rehte wirt gedâht
7780	in der vorderisten zal swâ guoter wîbe wirdet wal. swâ mite ein wîp gedienen sol daz si gote und der werlde wol von schulden muoz gevallen,
7785	des phlâgen si âne gallen, mîn vrouwe Filledâmûr und ir swester Genteflûr. Nû riten si von dan, Ênîte und dise zwêne man,
7790	der wirt selbe und Êrec. daz phert truoc dô den wec sô sanfte vrouwen Ênîten daz ze deheinen zîten eins hâres sanfter niht enlebet
7795	der ûf dem ebenwâge swebet, sô er den wint ze wunsche hât und im sîn schef âne angest gât. si gedâhten rîten dâ zehant ze Britanje in daz lant
7800	zem künege Artûse. ûf welhem sînem hûse si in benamen vunden, daz enwesten si zuo den stunden. der künec Guivreiz dô sprach
7805	dô in ze rîtenne geschach: «wir vinden in ze Karidôl oder benamen ze Tintajôl.» Sus riten si nâch wâne, und doch der gewisheit âne,
7810	unz hin umbe mitten tac. nû truoc si der huofslac ûf einer schœnen heide an eine wegescheide: welh ze Britanje in daz lant
7815	gienge, daz was in unerkant. die rehten strâze si vermiten: die baz gebûwen si riten. und dô si nâch der wîle geriten wol vünf mîle,
7820	ein burc si sâhen vor in stân, michel unde wol getân. und als si Guivreiz ersach, daz wart im vil ungemach und begunde in vaste beswæren
7825	daz si dar komen wæren. «nû sage, von wiu?» daz weiz ich wol und sagez sô ichz sagen sol. des enist noch niht zît. wie gebitelôs ir sît!
7830	wer solde sîn mære vür sagen? ich enwil iuch niht verdagen wie diu burc geschaffen wære: daz vernemet an dem mære. Vil guot was daz burcstal:
7835	als uns der âventiure zal urkünde dâ von gît, sô was ez zwelf huoben wît. ez was ein sineweller stein dâ niender bühel ane schein,
7840	ebene sam er wære gedrân, und ouch rehte getân nâch des wunsches werde, ûf von der erde entwahsen wol den mangen.
7845	den berc hete in gevangen ein burcmûre hôch und dic. ein ritterlîcher aneblic ziertez hûs innen. ez rageten vür die zinnen
7850	türne von quâdern grôz, der vuoge niht zesamene slôz dehein sandic phlaster: si wâren gebunden vaster, mit îsen und mit blîe,
7855	ie drîe unde drîe nâhen zesamene gesat. dâ enzwischen was diu stat gezimbers niht lære. dâ sâzen die burgære
7860	nâch grôzer ir werdekeit. alsô was daz hûs zebreit mit den türnen. nâch ir zal sô was ir drîzec über al. sus was daz hûs gevieret:
7865	die türne gezieret obene mit goldes knophen rôt, der iegelîcher verre bôt in daz lant sînen glast. daz bewîste den gast
7870	dem dar ze varne geschach, daz er den schîn verre sach und er des hûses ûf der vart des tages niht verirret wart. ein wazzer drunder hin vlôz,
7875	des val gap michelen dôz, wan ez durch ein gevelle lief. daz selbe tal was alsô tief, swer ûf die zinnen sitzen gie und er ze tal diu ougen lie,
7880	den dûhte daz gevelle sam er sæhe in die helle: der swindel in ze tal zôch, sô daz er wider in vlôch. an der anderen sîten
7885	dâ man zuo mohte rîten, dâ stuont ein stat vil rîche, bezimbert rîchlîche, diu einhalp anz wazzer gie. anderhalp daz undervie
7890	ein boumgarte schœne und wît, daz weder vor noch sît dehein schœner wart gesehen: des hôrte ich im den meister jehen. Als Êrec daz hûs ersach,
7895	ze sînem gesellen er sprach, ob er die burc erkande, und bat in daz er si nande. sus antwurte im der herre: «ich erkenne si: wir sîn verre
7900	geriten von unser strâze. daz ez got verwâze! iedoch sô manege zîte sô ich disen wec rîte, sô ist mir bœslîch geschehen:
7905	ich hân mich übele übersehen, gezeiget zuo der winstern hant.» er sprach: «Britanje daz lant des endes verre hin lît. kêre wir wider enzît:
7910	ich bringe iuch wider ûf den wec.» dô sprach der künec Êrec: «wie zæme uns daz, vil edel man, daz wir sus riten dan? sît wir sô nâhen komen sîn,
7915	sô volget durch den willen mîn, daz ich die burc müeze sehen. daz sol benamen geschehen. diz hûs ist sô wünneclich und alsô schœne daz ich
7920	ûzen dar an kiuse wol, ist ez etewes innen vol daz man sol gerne schouwen, ez enist niht âne vrouwen. ich wil daz hûs erkunnen:
7925	des sult ir mir wol gunnen.» «Mirst leit daz ich ius gunnen sol. wê dan sô irz bevindet wol!» «waz meinet ir, künec Guivreiz?» «ich enmeine niht wan daz ich weiz.»
7930	«durch got, nû saget waz?» «nû kêret wider. daz kumt uns baz.» «mich wundert waz ir meinet.» «ez wirt iu wol bescheinet, und welt ir niht erwinden.»
7935	«ich muoz ez benamen ervinden. ez enist niht wirsers dan der tôt.» «sô kumt ir lîhte in die nôt die iuwer vriunt enmugen verklagen.» «muget ir mirz durch got nû sagen?
7940	mich wundert waz ez müge sîn.» «dâ erwindet durch die liebe mîn. ich dienez immer als ich sol.» «daz enzæme mir niht wol: wan sô möhtet ir haben wân
7945	daz ich durch vorhte hæte lân dise selben reise. ouch enist dehein freise ir enmöhtent si mich wizzen lân: und wære si danne sô getân
7950	dar umbe ich solde erwinden, daz lieze ich an mir vinden.» «Her künec», sprach Guivreiz, «ich sagez rehte als ichz weiz: diu vreise enist niht ze ringe,
7955	und ûf daz gedinge als iuwer munt gesprochen hât, daz ir dise reise lât, sô wil ich iuchz wizzen lân. diz hûs heizet Brandigân,
7960	und ist vil manec ritter guot durch sînen genendigen muot ûf âventiure her komen, die alle dar an hânt genomen schaden zuo den schanden,
7965	die besten von allen landen. des ist nû gewesen lanc daz ir deheinem nie gelanc, wan allen gelîche, sô daz sî klegelîche
7970	alle hie sint erslagen. waz mac ich iu mêre sagen? wan ich wil unde muoz mich bieten an iuwern vuoz, daz ir erwindet durch mînen rât.
7975	ein âventiure hie stât ze solhem gewinne daz ich in mînem sinne des vil grôze angest hân, ez müeze iu alsam ergân
7980	als ez allen den ergie die noch her kâmen ie.» Êrec sus antwürten began: «sô wære ich ein verzaget man und hete des missewende,
7985	ich enweste der rede ein ende, solde ich sus erwinden. muget ir mich lân bevinden, waz ist ez oder wie hât ez namen? ich müeste mich wol immer schamen,
7990	solde ich vürhten ichn weiz waz. nû war umbe tuot ir daz daz ir sô lange mich verdaget daz ir mirs niht ein ende saget? wan swaz doch mir dâ von geschiht,
7995	benamen ichn erwinde niht unz ich die rede baz enweiz.» Dô sprach der künec Guivreiz: «nû wil ich iuch wizzen lân wie diu âventiure ist getân,
8000	und rehte wiez dar umbe stât, sît irs enwellet haben rât. sist Joie de la curt genant.» daz selbe wort ist unerkant under tiutschen liuten:
8005	durch daz wil ichz diuten: des hoves vreude sprichet daz. ouch sagete er im vürbaz. er sprach: «muget ir warten? seht ir den boumgarten
8010	der under dem hûse lît? dâ hât sich nû vil manege zît ein ritter gehalten inne. si stât ze solhem gewinne als ich iu rehte wil sagen.
8015	swer si hie sol bejagen, daz hât er im ze rehte daz er si an im ervehte. der wirt ist sîn œheim. als noch ie an im schein,
8020	sô enlebet sîn gelîche niender in dem rîche von sterke und ouch von manheit. swaz im noch ritter widerreit, die si wolden bejagen,
8025	die hât er alle erslagen: im enmohte niht wider sîn. noch erwindet durch die liebe mîn.» Dô sprancte der künec Êrec vil sêre lachende ûf den wec.
8030	er sprach: «edel ritter, nû wol dan! und ist ez niuwan ein man an dem si ze gewinne stât, des möhte werden guot rât. wâ mite machet irz sô grôz?
8035	weder ist er berc oder berges genôz, daz man in alsô vürhten sol? ich wânde daz hûs wære vol gewürmes und wilder tiere diu uns alsô schiere
8040	âne wer den lîp næmen, sô wir dar kæmen. noch hân ich ze lebene wân. er enwirt doch des niht erlân, ob es got geruochet,
8045	ez enwerde an im versuochet. sleht er mich, sô bin ich tôt: daz ist der werlde ein ringiu nôt.» Guivreiz der künec guot erkande in wol alsô gemuot
8050	daz er benamen vollerite und daz durch niemen enmite. dâ von geschach im ungemach. dô erz hûs von êrste ane sach, ez enhalf dehein widerstrîten,
8055	er enwolde vollerîten. Nû huoben si sich ûf den wec. und als der künec Êrec mit sînem schœnen wîbe, ze vreise sînem lîbe,
8060	nû reit gegen Brandigân, die stat die er drunder sach stân, dâ was inne vreuden vil, tanz und aller slahte spil daz jungen liuten wol gezam.
8065	und als er zuo geriten kam und si die schœnen Ênîten dâ vür sâhen rîten und nâch ir die zwêne man, nû sâhen si die vrouwen an
8070	und begunde menlîch des jehen daz er unz dar nie gesehen deheine vrouwen hæte von lîbe und ouch von wæte, von pherde und von gereite,
8075	sô schœne und sô gemeite. sâ zuo den stunden si alle begunden, wîp und man beide, von nâhe gândem leide
8080	ir vreuden entwîchen und vil jæmerlîchen klagen daz wünneclîche wîp, und daz verliesen sînen lîp solde ein alsô vrumer man,
8085	wan dâ enzwîvelten si niht an. Si sprâchen: «herre, rîcher got, war umbe geschuof dîn gebot einen sô vollekomen man? dâ wære vol dîn genâde an
8090	daz dû in hætest bewart vor dirre leidigen vart, daz er iht wære komen, wan hie wirt im der lîp benomen. ouwê dû vil armez wîp!
8095	wie dû queltest dînen lîp, ob dû möhtest wizzen wol waz dir hie geschehen sol! wie dîniu liehtiu ougen mit trüebe suln verlougen
8100	daz si sô spillîchen stânt unde kumbers niht enhânt, unde dîn vil rôter munt, der die liute hie zestunt dir engegen lachen tuot!
8105	und wie dû dînen gelphen muot mit leide verkiusest, sô dû dînen man verliusest!» si klageten et alle. diz geschach niht mit schalle:
8110	ez wart mit murmel getân, daz er sichs iht solde entstân. Der rede tâten si genuoc. manec wîp sich zen brüsten sluoc, die andern sêre weinten.
8115	waz si dâ mite meinten, daz weste der tugentrîche und entete dem niht gelîche als er dar umbe iht weste. Êrec der muotveste
8120	bedâhte sich vrœlîch und wol, alsam der unverzagete sol den man niht lîhte entsprechen mac. deheines swachen gelouben er phalc. er enwolde der wîbe liezen
8125	engelten noch geniezen. swaz im getroumen mahte, dar ûf enhete er dehein ahte. ern was dehein wetersorgære: er sach im als mære
8130	des morgens über den wec varn die iuweln sam den mûsarn: ouch hiez er selten machen dehein viur ûz der spachen, daz man im dar an sæhe.
8135	er enphlac deheiner spæhe: ez was umbe in sô gewant, im was der tisch in der hant als mære enge sô wît, und swaz ungelouben gît
8140	dâ enkêrte er sich niht an. er was ein alsô vester man, swie in daz volc untrôste, daz in daz niht belôste sîner manlîchen stætekeit
8145	gegen einem hâre breit, und emphienc ez allez vür spot. er gedâhte: «die wîle und mich got wil in sîner huote hân, sô enmac mir niht missegân:
8150	und enwil er mirs niht bîten, sô mac ich ze disen zîten alsô mære sterben, sô der lîp doch muoz verderben.» Er was eht herzen sorgen vrî.
8155	nû reit er zuo und gruozte sî mit lachendem munde. nû huop er dâ ze stunde ein vil vrœlîchez liet. nû murmelte aber diu diet:
8160	«nû schînet du enwizzest wol waz dir hie geschehen sol. nû enist doch leider dar niht lanc daz dîn vrœlîchez sanc ein vil riuwic ende gît:
8165	daz geschiht ê morgen ze dirre zît. möhtestû wizzen und dîn wîp daz dû dînen gelphen lîp solt als unlange hân, sô liezestû dîn singen stân.»
8170	Alsô reit von ie dan der vil unverzagete man ûf daz hûs ze Brandigân. dâ wart im sîn reht getân, sô daz man in vil schône emphie.
8175	der wirt engegen im gie verre vür daz bürgetor: dâ saluierte er in vor, mit im die burgære. liep unde swære
8180	was er im ze gaste. er vorhte et des vil vaste, im würde der lîp dâ benomen: anders was er im willekomen. daz tete der herre wol schîn
8185	den zwein und der künegîn, wan man ir ze rehte phlac. dannoch was ez hôher tac. Als dise werden geste gesâzen ûf der veste,
8190	nû kurzte in die stunde der wirt sô er beste kunde und sîne burgære mit sô manegem mære daz si niht enmohte betrâgen.
8195	bî einer wîle begunde er vrâgen ob si zen vrouwen wolden gân. diu vrâge was in liep getân. alsô vuorte er si dan, die vrouwen und die zwêne man,
8200	ûf eine stiege, der meister enliege, in ein sô schœne palas, dô diu gotinne Pallas rîchsete hie en erde,
8205	des genuocte si zir werde ob si wære berâten mit solher kemenâten. Ez was vil wol gezieret, sinewel, niht gevieret,
8210	guot unde reine, von edelem steine, der ie mê von marmel kam, als ez ir ougen wol gezam und als ez der wunsch gebôt,
8215	gel grüene brûn rôt swarz wîz weitîn, dirre mislîche schîn sô gebent und sô geliutert was daz er glaste sam ein glas
8220	geworht mit schœnen witzen. Hie sâhen si inne sitzen den wunsch von den wîben. wer möhte iu die geschrîben und geloben ze rehte gar?
8225	man enmohte sô wünneclîcher schar nie gelîches iht beschouwen. ez wâren ahzec vrouwen, alle gelîche gekleit. si hâten an sich geleit
8230	eine wât rîche, und doch unvrœlîche, nâch vil kostlîchem site. hie erzeigeten si vil lîhte mite daz in daz herze wære
8235	in etelîcher swære, wan man si ouch selten lachen sach. ez wâren ir röcke und ir dach von swarzem samîte. dehein ermel noch ir sîte
8240	enwas in gebrîset: als ichs bin bewîset, sô was in zuo den zîten leit hôchvart unde stolzheit. ir houbet wâren gebunden
8245	sô si beste kunden, mit wimpeln, die wâren wîz. dâ enschein ane dehein ander vlîz wan sleht und unwæhe, âne goldes spæhe.
8250	Dô die geste in giengen, dise vrouwen si emphiengen baz dan si wâren gemuot, als dicke der bescheiden tuot der sînes leides nieman
8255	engaltet swâ erz bewarn kan. der wirt zuo in sitzen gie: dô sâzen die geste hie, Êrec mit vrouwen Ênîten und Guivreiz dâ besîten.
8260	diu ougen liez er über gân. nû dûhte in einiu wol getân, diu ander schœner dâ bî: diu dritte swachete aber sî: vor ir was diu vierde
8265	in lîbes gezierde: der vünften er des prîses jach, unz er die sehsten ersach: diu sibende erlaschte dise gar, unz er der ahten tete war:
8270	diu niunde in dûhte gekrœnet, diu zehende baz geschœnet mit dem gotes vlîze: der selben zitewîze sô was diu einlifte getân,
8275	hæte si diu zwelfte lân: diu drîzehende wære vollekomen, enhete irz diu vierzehende niht benomen: diu vünfzehende was ein wunschkint: doch was ir aller schœne ein wint
8280	wider die sehzehenden vrouwen: noch mohte er gerner schouwen die sibenzehenden diu dâ saz: doch geviel im diu ahzehende baz dan diser vrouwen dehein,
8285	unz im diu niunzehende erschein: dô muoste im wol gevallen diu zweinzegest vor in allen. wer möhte si gar geschrîben? diu swachest under den wîben
8290	diu zierte wol ein rîche mit ir wætlîche. Als er der wünneclîchen schar rehte getete war, nû gedâhte er in sînem muote:
8295	«rîcher got der guote, hier an ist mir erkant daz dû von schulden bist genant der vil wunderlîche got, daz dîn gewalt und dîn gebot
8300	an ein alsô enge stat sô manec wîp hât gesat dâ mite vil manec wît lant, als dir selbem ist erkant, vil schône gezieret wære:
8305	daz lâstû vreuden lære.» ze dem gedanke er stille dagete. der wirt ie mitten sagete den vrouwen niuwiu mære war umbe der gast wære
8310	mit sînem wîbe dar komen. als diz die vrouwen heten vernomen, hie mite wâren si zehant ir herzeleides gemant des in allen was geschehen.
8315	daz man si ê hete gesehen wünneclîche vreudenvar, des verlougenten si gar. daz bluot ir hiufeln entweich: dô wurden nase und wengel bleich.
8320	daz machete in der ougen regen. Nû enweste Êrec der degen wiez hier umbe was gewant, unz imz Guivreiz tete erkant. er sprach: «muget ir schouwen
8325	wie dise edeln vrouwen mit jâmer quellent den lîp? si wâren der ritter wîp die dâ hie sint erslagen. wan kunde doch ich iu gesagen,
8330	daz ir dise reise hætet lân? alsô muoz hie bestân diu schœne vrouwe Ênîte, missegât iu an dem strîte.» Nû bewegete der vrouwen smerze
8335	Êrecke sô gar sîn herze, sît in der lîp was gestalt sô gar in vreuden gewalt, daz ir jugent und ir leben sô gar den sorgen was ergeben,
8340	wan in durch ir triuwe der jâmer was als niuwe als dô si sîn begunden. ie under stunden sâhen si den ellenden man
8345	mit jâmervarwen ougen an und klageten sînen genæmen lîp und erbarmte in daz sîn wîp solde bî in dâ bestân, wan des wâren si gewis âne wân.
8350	Sus gedâhte der ellende: «got sî der daz wende daz ich sô iht gevar daz ich dise vreudenlôse schar iht mêre mit mînem wîbe
8355	sô daz ich iht belîbe.» hie heten die geste beide vil swære ougenweide, wan in tete der vrouwen swære wê. Nû ist zît daz man gê.
8360	der wirt vuorte si ezzen. nû enwart dâ niht vergezzen si enheten alles des die kraft daz man dâ heizet wirtschaft. nû hânt si vol gezzen
8365	und sint dar nâch gesezzen und redeten aller hande. der künec von dem lande vrâgte si ob iht mære ûf ir wege wære.
8370	dô sageten im die geste swaz ietweder weste daz doch sagebære geschach. Êrec ouch zem wirte sprach: «wirt und lieber herre,
8375	nâhen unde verre hânt mir die liute vor gezalt wunder vil manecvalt von dises hûses êre. desn vrâge ich nû niht mêre,
8380	wan ichz selbe hân ersehen und muoz von schulden mite jehen: si hânt benamen die wârheit. ouch ist mir mære geseit daz hie ein âventiure bî
8385	mit starkem gewinne sî von einem guoten knehte. nû weste ich gerne rehte wiez hier umbe wære gewant: daz tuot mir, herre wirt, erkant.»
8390	Der künec ein wîle des gesweic: daz houbet im ze tal seic, und saz ein teil in riuwen. daz kam von sînen triuwen, und benamen bî sîner vrümekeit
8395	was im des gastes vrâge leit, wan er hete ouch ê vernomen daz er dar wære komen ûf der âventiure gewin. daz beswârte sînen sin,
8400	und gedâhte manegen enden wie er daz möhte erwenden und wie er im den rât erkür daz er den lîp iht verlür und im den muot benæme,
8405	als in beiden zæme. ze jungest er in ane sach, belangen er zuo ime sprach: «herre, ich wil iu râten wol, als ich mînem gaste sol,
8410	dem liebisten den ich ie gewan, dar nâch und ich iu guotes gan, daz ir der vrâge habet rât und si gar ûz der ahte lât umbe dise âventiure.
8415	ez ist vert und hiure unde nû wol zwelf jâr, als ich iu sage vür wâr, michel schade dâ von geschehen: ouch habe wir beide gesehen
8420	sô vil ander dinge diu uns sus genuoc ringe die zît mugen gemachen: nû reden von andern sachen.» Êrec im antwürten began
8425	als ein unverzageter man, des herze doch vil stæte was und vester dan der adamas, von dem man solhe kraft seit: unde würde der geleit
8430	zwischen zwein bergen stehelîn (wie möhtez wunder grœzer sin?), die zemüele er kleine ê man ez dem steine iender möhte erkiesen an.
8435	dannoch hâte dirre man ze quecheit stæteren muot dâ von daz einer slahte bluot disen stein geweichen mac: sô enkunde ouch âne stôdes slac
8440	niht sînen muot betwingen noch ûf zageheit bringen. der rede begunde er lachen. er sprach: «von swelhen sachen ich niht gevrâgen entar,
8445	die sint ouch ze griulîch gar. daz ich dar nâch gevrâget hân, daz enhân ich niht dar ûf getân daz ich des iht gesinne daz ich dar an gewinne
8450	sunderprîs vür alle die die noch her kâmen ie, wan daz mich des betrâget, swenne man mich dâ von vrâget, beide wîp unde man,
8455	daz ich ins niht gesagen kan, und ich doch hie gewesen bin: dar an velschent si mînen sin.» Nû wânte der wirt er meintez sô. dâ von begunde er in dô
8460	dise rede wizzen lân, als ich iu ê gesaget hân, rehte zuo der mâze als im ûf der strâze sîn geselle sagete,
8465	und ob der iht verdagete, ze vollen sagete er im daz und beschiet in des baz. er sagete, der boumgarte der wære gevestent harte,
8470	und swie er wære unumbegeben, dar in endorfte niemen streben dem ze ihte mære lîp und êre wære. er sprach: «dâ wonet inne
8475	mit sîner vriundinne ein ritter sô manhaft daz doch er mit sîner kraft alle die erslagen hât die des enwolden haben rât
8480	von tumbes herzen stiure, si ensuochten âventiure. ich sage iu, swelh ritter guot her kumt ûf den selben muot, der suoche wan die porte:
8485	bî dem êrsten worte sô vindet er si offen stân. er mac drin rîten oder gân: die andern belîbent hie vor. sô besliuzet sich daz tor:
8490	diu rede muoz sich scheiden danne under in beiden, wan swaz ir dewederm geschiht, si enhânt et scheidæres niht. ich enweiz wiez nû ergê:
8495	wol ein halp jâr oder mê ist des daz im niemen enkam, sît daz er den lîp benam rittern die ich genennen kan. er sluoc benamen hie drî man
8500	sô man si beste erkande in deheinem lande. der eine Venegus hiez, der et niht des enliez daz ze manheit gezôch,
8505	Opinâus der nie gevlôch, Libaut der dritte man, der vordes manegen prîs gewan: der was von Winden geborn. und hânt die den lîp verlorn,
8510	sô endurfet irs niht versuochen. und welt ir es geruochen, sô gibe ich iu den besten rât, deist daz ir vehtens abe stât. sô gemuot ist der starke man,
8515	swem er noch gesigete an, dem sluoc er abe daz houbet. ob ir des niht geloubet, und welt irz danne selbe ersehen, sô muoz iu alsam geschehen.»
8520	Dô sprach der künec Êrec: «ich weste wol, der Sælden wec gienge in der werlde eteswâ, rehte enweste ich aber wâ, wan daz ich in suochende reit
8525	in grôzer ungewisheit, unz daz ich in nû vunden hân. got hât wol ze mir getân daz er mich hât gewîset her dâ ich nâch mînes herzen ger
8530	vinde gar ein wunschspil dâ ich lützel wider vil mit einem wurfe wâgen mac. ich suochtez unz an disen tac: gote lop, nû hân ichz vunden
8535	dâ ich wider tûsent phunden wâge einen phenninc. diz sint genædeclîchiu dinc, daz ich hie vinde solh spil. die rede ich iu baz bescheiden wil.
8540	ich hân von iu ê vernomen daz dirre herre ist vollekomen an degenlîcher manheit. des ist sîn êre vil breit und ze ganzem lobe erkant
8545	über elliu disiu lant, wan er hât wunder getân. dâ wider ich leider niht enhân begangen solher dinge, mîn êre enwege ringe.
8550	dâ von ein ritter wirt erkant, des hât mir noch mîn hant vil lützel erworben: an lobe ich bin verdorben unz an disen tac.
8555	dâ von ich gerne wâgen mac mîne kranken êre, daz sich diu hie mêre daz ich vol ze lobe stê oder daz si gar zegê.
8560	ob mir got der êren gan daz ich gesige an disem man, sô wirde ich êren rîche. und merket wie ungelîche uns giltet daz selbe spil.
8565	ez giltet im unnâch sô vil zem zwelften teile als ez mir tuot. er setzet wider valsche guot, sîn golt wider êre. ez enprîset in borsêre,
8570	wirt im des siges an mir verjehen, wan sôst im dicke baz geschehen. ouch bin ich schiere verklaget. vür wâr sî iu daz gesaget, er enwirt des niht erlân,
8575	ich enwelle in bestân.» Der wirt sprach: «saget, herre mîn, wes soldet ir mir nû lieber sîn danne ir iu selben sît? nû gân wir slâfen, des ist zît.
8580	geleben wir morgen den tac, ich bringe iuch an in, ob ich mac. doch râte ich iu mit triuwen daz daz ir iuch noch bedenket baz: daz selbe dunket mich ein sin,
8585	wan unde komet ir dar in, sô riuwet ir mich sêre, wan sô gesehet ir uns nie mêre. des selben nemet iu ein zil.» «herre, alsô got wil»
8590	sprach der ritter Êrec. Dâ mite giengen si enwec slâfen ze kemenâten. diu was wol berâten mit rîcher bettewæte
8595	und mit anderem geræte. si was vol behangen mit guoten umbegangen: der gemæle was von golde rîch. dar zuo was der esterîch
8600	mit guoten teppechen gespreit, als ez des wirtes rîcheit wol vür bringen mohte und sînen êren tohte, wan er was herre über daz lant,
8605	der künec Îvreins genant. er gebôt den kameræren daz si ir vlîzic wæren, als man rîcher künege sol. des wurden schône unde wol
8610	gêret dise geste drî. Guivreiz der künec dâ bî in einer kemenâten lac dâ man sîn wol ze rehte phlac. Êrec und vrouwe Ênîte
8615	hâten guote zîte dâ si ensamet lâgen und guoter minne phlâgen unz in erschein der morgen. manlîcher sorgen
8620	enwas sîn herze niht gar vrî, wan man wil daz er niht ensî gar ein vollekomen man der im niht vürhten enkan, und ist zen tôren gezalt.
8625	ez enwart nie herze alsô balt, im enzæme rehtiu vorhte wol. swie gerne ein man daz vürhten sol dâ von sîn lîp en wâge stât, habe doch solher vorhte rât
8630	diu zagelîch sî. der vorhte was sîn herze vrî. Sît im der tac ze kamphe stuont, er tete als die wîsen tuont, wan hie gehôrte vorhte zuo.
8635	ûf stuont er vil vruo. mit vrouwen Ênîten er kam dâ er messe vernam in des heilegen geistes êre, und vlêhete got vil sêre
8640	daz er im behielte den lîp. des selben bat ouch sîn wîp. ze vlîze begunde er sich bewarn, alsam ein ritter der sol varn kemphen einen vrumen man.
8645	nâch der messe schiet er dan. dô was der imbîz bereit, grôz wirtschaft die er alle meit. deheines vrâzes er sich vleiz: abe einem huone er gebeiz
8650	drîstunt, des dûhte in genuoc. ein trunc man im dar truoc und tranc sant Jôhannes segen. zehant wâfente sich der degen und bereite sich als er solde,
8655	sam er enmitten wolde in den boumgarten rîten. nû enwart vrouwen Ênîten sorge nie mê sô grôz: der regen ir von den ougen vlôz.
8660	Nû was diu stat des mæres vol: die liute westen alle wol, als ir ê habet vernomen, daz ein ritter dar was komen der sich des ûz hete getân
8665	daz er wolde bestân den in dem boumgarten. des muoste gewarten der künec Îvreins von Brandigân. ouch enwolden hinder im bestân
8670	sîne burgære: diu burc beleip liute lære âne die trûrigen schar, diu beleip dar ûfe gar, wan den was sô leide geschehen
8675	daz si des niht enwolden sehen daz si beswârte mêre. von al ir herzesêre was doch diz ir meistiu nôt daz ir enruochte der tôt.
8680	Nû wâren die gazzen in der stat und diu dach gar besat von den liuten die des biten wenne er kæme geriten. enmitten reit Êrec
8685	nider jenen burcwec der in zem boumgarten truoc. nû hôrte er untrôstes genuoc und ir stille liezen. die liute im niht gehiezen
8690	baz oder dehein senfter nôt, wan daz im gewis wære der tôt. des begunden si sô vil gesagen, und wolde er immer verzagen von bœsen geheizen, von starker drô,
8695	sô wære er verzaget dô. diz vernam er vür ein spil und enahtez lützel noch vil. Ob uns daz buoch niht liuget, sô was alsô erziuget
8700	der selbe boumgarte, daz es uns mac wundern harte, witzige unde tumbe. ich sage iu daz dar umbe weder mûre noch grabe engie
8705	noch in dehein zûn umbevie, weder wazzer noch hac, noch iht daz man begrîfen mac. dâ gienc alumbe ein eben ban und enkunde doch dehein man
8710	dar in gân noch gerîten, niuwan zeiner sîten, an einer vil verholnen stat. dâ gienc ein engez phat: daz enweste der liute niht vil.
8715	swer ouch zuo dem selben zil von geschihte in kam, der vant dâ swes in gezam von wünneclîcher ahte, boume maneger slahte,
8720	die einhalp obez bâren und andersît wâren mit wünneclîcher blüete: ouch vreute im daz gemüete der vogele süezer dôz.
8725	ouch enstuont dâ diu erde blôz gegen einer hande breit, diu enwære mit bluomen bespreit, die missevar wâren und süezen smac bâren.
8730	Nû was der wâz alsô guot von dem obeze und von der bluot und der vogele widerstrît den si uopten zaller zît und solh diu ougenweide,
8735	swer mit herzeleide wære bevangen, kæme er dar in gegangen, er müeste ir dâ vergezzen. des obezes mohte man ezzen
8740	swie vil oder swâ er wolde: er muoste unde solde daz ander dâ belîben lân. ez was dar umbe alsô getân, ez enmohte niemen ûz getragen.
8745	hœret ir iht gerne sagen wâ mite der boumgarte beslozzen wære sô harte? ich weiz wol daz unmanec man den list ze disen zîten kan
8750	dâ mite diz was getân. man sach ein wolken drumbe gân dâ niemen durch enmohte komen, wan als ir habet dâ vernomen. Nû reit der wirt selbe vor in
8755	gegen dem boumgarten hin, daz er in wîste an die stat zuo dem ritter als Êrec bat, ze dem verholnen bürgetor. hie beleip daz volc allez vor
8760	âne vrouwen Ênîten. ouch muoste mite rîten Guivreiz der herre: ir menige enwart niht merre niuwan dise viere.
8765	nû kâmen si vil schiere daz si daz begunden ane sehen des si von schulden muosten jehen ez wære ein seltsæne dinc. hie was gestalt ein wîter rinc
8770	von eichînen stecken. des wunderte Êrecken. ir iegelîch was sus bedaht, ein mannes houbet drûf gestaht, wan einer der was lære.
8775	wâ von daz wære? dâ hienc ein grôz horn an. Êrec dô vrâgen began wiez hier umbe wære getân. «dâ wærez iu bezzer verlân»,
8780	sprach der wirt zem gaste, «und mac iuch riuwen vaste daz ir her komen sît. iuch hât verleitet iuwer strît. nû sehet selbe die wârheit
8785	daz ich niht hân misseseit. ob irz noch geloubet, sehet, daz sint diu houbet: diu hât der ritter abe geslagen. ouch wil ich iu mêre sagen:
8790	der stecke der noch lære stât, der ist der iuwer gebiten hât, dâ wol iuwer houbet ûfe stân. würdet ir aber des erlân oder dehein ander man
8795	der disem ritter gesigete an, daz doch niht geschehen mac (ez sûmet sich sô manegen tac), der solde blâsen diz horn (dar zuo ist ez erkorn)
8800	drîstunt vil lûte, dâ mite er daz dûte daz er gesiget hæte. des êre würde stæte, unde würde ouch erkant
8805	über elliu disiu lant vür alle ander man. waz sol diu rede? dâst doch niht an. ich wæne er iender sî geborn dem ze blâsen sî geschehen diz horn:
8810	alle ritter die nû sint, daz ist et wider in ein wint. sît daz dûs entwesen enwilt, edel ritter, got sî dîn schilt und müeze dir der sêle phlegen:
8815	dir enmac et niemen des gewegen, ez ensî ein ende umbe dînen lîp.» Alsô dô daz schœne wîp dirre vreise war genam unde dar zuo vernam
8820	disen grôzen untrôst, dô wart ir herze belôst liebes unde vreuden gar, ob si deheine bræhte dar. diu kraft ir zuo der varwe entweich,
8825	und wart tôtvar und bleich und viel vor leide in unmaht. der liehte tac wart ir ein naht, wan si gehôrte noch gesach. swie dicke ir leide geschach,
8830	als ir gebærde verjach, sô enwart ir herzen ungemach nie zir lebenne merre. der wirt und ir herre die labeten si dô
8835	und wurden mit ir unvrô. Als si ûf sehen began und sich widere versan, Êrec vil manlîchen sprach: «vrouwe, lât den ungemach,
8840	mîn süeziu Ênîte. ir weinet zunzîte. waz gât iu solher klage nôt? weder bin ich siech oder tôt? jâ stân ich bî iu wol gesunt.
8845	ir möhtet beiten an die stunt daz ir mich sæhet bluotvar oder mînen schilt zehouwen gar oder mînen helm verschrôten und mich dar under tôten.
8850	dannoch hetet ir guote zît. nû heizet ez doch ein strît daz under uns sol geschehen. wem noch des siges werde gejehen, desn hân wir dehein gewisheit.
8855	ouch ist mir daz vür wâr geseit, got sî als guot als er ie was. hei wie dicke er noch genas dem er genædic wolde wesen! wil er, sô trûwe ich wol genesen.
8860	iuwer weinen ist mir swære: und westet ir wie mir wære, sô endörftet ir niht sô sêre klagen, wan ich wil iu zewâre sagen, enhæte ich aller manheit
8865	niender eines hâres breit, wan der die ich von iu hân, mir enmöhte nimmer missegân. swenne mich der muot iuwer mant, sôst sigesælic mîn hant
8870	wan iuwer guote minne die sterkent mîne sînne, daz mir den vil langen tac niht widere gewesen mac.» Hie muoste er sich scheiden
8875	von sînen gesellen beiden und eine rîten vürbaz. vil sêre muote si daz und hâten sorcsamen muot, Ênîte und der künec guot,
8880	umbe den herren Êrecken. in wîste vür die stecken der wirt selbe mit der hant ûf einen stîc den er dâ vant: der was grasic und niht breit.
8885	si beliben alle, er eine reit. ich enweiz wie ez im ergie: ez enwas et ritter nie mê guntrœstet dan er wart. er vuor ein angestlîche vart.
8890	des trûrte sîn geselleschaft. nû bewar et in diu gotes kraft, daz im der lîp belîbe: des helfet sînem wîbe durch got biten alle,
8895	daz im der sige gevalle. Hin reit der künec Êrec eine den grasigen wec wol drîer rosseloufe lanc durch bluomen und durch vogelsanc
8900	in jenen boumgarten vort. nû sach er vor im dort eine pavelûne stân, rîch unde wol getân, beide hôch unde wît,
8905	zweier slahte samît, von strichen swarz unde wîz und gemâl en allen vlîz. dâ stuonden entworfen an beidiu wîp unde man,
8910	und die vogele sam si vlügen, doch si die liute dar an trügen, diu tier wilde unde zam, ob iegelîchem sîn nam, diu bilde von golde.
8915	daz der knoph wesen solde, daz was ein wol geworht ar, von golde durchslagen gar. si was gespannen überz gras. an dirre pavelûne was
8920	êre und gevüere. dise zeltsnüere wâren sîdîn garwe und niht von einer varwe, rôt grüene wîz gel
8925	brûn, geworht sinewel. Hie under er gesitzen sach ein wîp, als im sîn herze jach, daz er bî sînen zîten âne vrouwen Ênîten
8930	nie dehein schœner hete gesehen. wan der muoste man et jehen daz ir wünneclîcher lîp geprîset wære über elliu wîp diu dô wâren oder noch sint.
8935	Ênîte was des wunsches kint, der an ir nihtes vergaz. diu vrouwe diu nû hie saz was vil schône gekleit. ane hâte si geleit
8940	einen mantel hermîn langen: dâ hete si sich in gevangen. daz dach ein rîcher samît was, var als ein brûnez glas, vil wol gezobelt vür die hant.
8945	ein wimpel ir hâr zesamene bant. welh ir roc wære? des vrâget ir kamerære: ich gesach in weizgot nie, wan ich niht dicke vür si gie.
8950	ouch enmohte si Êrec niht gesehen: daz muoste dâ von geschehen daz dâ vor alumbe hie der mantel dâ si sich in vie. daz bette dâ si ûfe saz,
8955	wol erziuget was daz: die stollen grôz silberîn, von guotem gewürhte der schîn. Dô er si dâ sach sitzen, mit zühteclîchen witzen
8960	sô erbeizete der gast. sîn ros bant er an einen ast. an den stam leinte er beide schilt unde sper sînen helm er abe bant
8965	und sturzte in ûf des schiltes rant. des hüetelîns wart sîn houbet blôz, wan sîn zuht was vil grôz. alsô gienc er vür si stân. daz wære ir lieber verlân,
8970	wan si vorhte irz gewerren. doch gruozte si den herren, wan sis diu gewonheit niht erlie mit solhen worten si in emphie: «herre, ich gruozte iuch gerne wol,
8975	wan daz nieman dem andern sol bieten ungetriuwen gruoz. wan daz iu sol unde muoz schade und laster hie geschehen, sô hæte ich gerne iuch gesehen.
8980	wes rât hât iuch her brâht? oder habet ir iuz selbe erdâht durch iuwers herzen gelust? sô traget ir under iuwer brust einen ungetriuwen râtgeben,
8985	wan er hât verrâten iu daz leben. herre, gât durch got von mir stân. ez muoz iu an den lîp gân, und ersiht iuch mîn herre: er ist von uns unverre».
8990	Ê si die rede getæte und in gewarnet hæte, nû gehôrte er eine stimme starc unde grimme, diu lûte sam ein horn dôz,
8995	wan im was der drozze grôz, von dem si gie. diz was ir man. von ir was er geriten dan, gewâfent daz im nihtes gebrast und alsô wol sam der gast,
9000	durch jenen boumgarten, baneken unde warten ob er iht ze tuone vunde. nû ersach er dâ ze stunde disen gâst vor der vrouwen stân
9005	daz dûhte in tœrlîch getân und wolde im versmâhen, und begunde gâhen wider umbe zuo dem vremden man. nû gesach in Êrec dan
9010	rîten von verre. des boumgarten herre was lanc unde grôz, vil nâch risen genôz. der underwant sich grôzer drô.
9015	sîn ros was grôz unde hô, starc rôt zundervar. der varwe was sîn schilt gar: sîn wâpen roc alsam was, er selbe rôt, als ich ez las,
9020	gewâfent nâch sînem muote. ich wæne sîn herze bluote swenne er niht ze vehtenne vant: sô mordic was sîn hant. Nû reit er zuo dem gaste
9025	und gruozte in ein teil vaste, gelîch einem übelen man. er sprach: «valschære, nû sage an, wer hiez iuch der vrouwen sô nâhen gân?» «waz hân ich dar an missetân?»
9030	«ez ist et vil tœrlich.» «herre, wes scheltet ir mich? «dâ dunket ir mich ze balt.» «herre, ir sprechet iuwern gewalt.» «saget, wer brâhte iuch her?»
9035	«guote vriunt.» «nû saget doch, wer?» «mîn herze und mîn selbes muot.» «dâ enriet ez iu dehein guot.» «ez hât mich noch gewîset wol.» «daz endet sich hie.» «ez ensol.»
9040	«zwiu sihe ich iuch gewâfent sîn?» «herre, dâst der harnasch mîn.» «wiltû vehten wider mich?» «welt dan ir, sô wil ouch ich.» «wes ist dir, tumber gouch, gedâht?»
9045	«des werdet ir wol innen brâht.» «ez wirt dir ein vil leidez spil.» «ir sprechet niht: ob got wil.» «wie versmâhet dir mîn rede sô?» «ich enahte niht ûf iuwer drô
9050	und wil si wol genôzen zwein bergen grôzen. die swuoren bî ir sinnen daz si wolden gewinnen in selben ein gezæmez kint.
9055	ein grôzez, als ouch si dâ sint. dô verhancte des got daz ez wart der liute spot, und gebâren eine veltmûs. ouch sint verbrunnen grôziu hûs
9060	von wênigem viure. in ist daz ellen tiure, die sô gremelîch wellen sîn. daz selbe sol hie werden schîn. ê wir uns hiute scheiden,
9065	unser einem oder uns beiden ist daz giuden gar gelegen.» «jâ, des wil ich dir verphlegen». alsô jach der rôte man. mit dirre rede schiet Êrec dan.
9070	Vil drâte er hin wider gie dâ er sîn ros stânde lie. sinen helm er ûfe bant und bereite sich zehant. ûf sîn ros er drâte saz.
9075	der ander des ouch niht vergaz, ern bereite sich alsam. ir ietweder den schilt nam und lîmte in an sich vaste. dem wirte und dem gaste
9080	begunden schenkel vliegen. si erzeicten âne triegen einen grimmeclîchen zorn. diu ros si nâmen mit den sporn und liezen zesamene strîchen
9085	vil genendeclîchen von aller ir krefte. die eschînen schefte wurden dô geneiget und in diu vart erzeiget
9090	zen vier nageln gegen der hant. ir mezzen wart dô wol bewant, wan si gerieten beide: hie wart diu sperweide vor dem lîbe durch gesant
9095	durch beide schilte unz an die hant. die starken schefte ganz beliben, swie sêre si würden dar getriben. wider zugen si diu sper in manlîcher ger
9100	und riten von ein ander dan, die zwêne gelîch gemuote man, durch tjostieren mêre. diu ros wurden aber sêre und vaste mit den sporn gemant
9105	und wider zesamene gesant. hie huop sich herzeminne nâch starkem gewinne. si minneten sunder bette: diu minne stuont ze wette,
9110	sweder nider gelæge, dem wart der tôt wæge. mit scheften si sich kusten durch schilte zuo den brusten mit solher minnekrefte
9115	daz die eschînen schefte kleine unz an die hant zekluben und daz die spiltern ûfe stuben. mit der manne laste kâmen diu ros sô vaste
9120	zesamene gestôzen daz den kamphgenôzen wurden ir houbet vil sêre betoubet und daz diu ros gelîche
9125	an daz ertrîche hinder sich gesâzen. die zoume wurden lâzen, und erbeizten zuo der erde. got herre, nû gewerde
9130	des künec Êreckes phlegen! wan er bestât einen degen der hât ellen unde kraft: des bin ich umbe in angesthaft. Nû schieden si beide
9135	diu swert von der scheide und wurfen si umbe in der hant. hie gienc ez über der schilte rant dô si zesamene trâten. die grimmen slege si tâten.
9140	die schilte buten si dar: die wurden ouch alsô gar unz anz gestelle zeslagen, daz si ir niht mêre getragen vor den armen mohten
9145	und in ze wer entohten. dô wurfen si die von der hant. nû schirmte in daz îsengewant vor dem tôde dicke. die heizen viures blicke
9150	vrumten diu wâfen swâ si ein ander trâfen. hie ergie sô manec grimmer slac daz die werlt wol wundern mac von helmen und von swerten
9155	daz si ez erwerten. vil ofte kam ez dar an daz der harte grôze man den minnern vor im dan sluoc vaste und verre genuoc:
9160	sô sluoc in aber Êrec her widere den selben wec. der kêre si sô vil tâten unz daz si gar vertrâten beide bluomen unde gras,
9165	daz dâ niht grüeners enwas dan umbe mitte winterzît. alsô werte dirre strît von morgen unz nâch mittem tage. «Geselle Hartman, nû sage,
9170	wie erwerte inz der lîp?» die kraft gâben in ir wîp. diu dâ gegenwürtic saz, diu geschuof ir manne daz: ob im dehein zwîvel geschach,
9175	swenne er si wider ane sach, ir schœne gap im niuwe kraft, sô daz er unzagehaft sîne sterke wider gewan und vaht als ein geruoweter man.
9180	des enmohte er niht verzagen. sô wil ich iu von Êrecke sagen: Êrec, ze swelhen zîten er gedâhte an vrouwen Ênîten, sô starcten im ir minne
9185	sîn herze und ouch die sinne, daz er ouch mit niuwer maht nâch manlîcher tiure vaht. Dô si diz lange genuoc getriben unde beide ganz beliben,
9190	dô gedâhte der grôze dar an: «mirst zorn daz dirre kleine man alsô lange vor mir wert.» mit grimme begreif er daz swert und gedâhte et vellen
9195	sînen kamphgesellen. er warf ez umbe in der hant: der vil michel vâlant enkunde sich erbarmen: sîn herze gap den armen
9200	krefteclîcher sterke genuoc. mit guotem willen er ez sluoc: ûf den helm er in erriet, dâ die swarte daz mittel schiet, und sluoc ez alsô vaste
9205	daz von dem slage erglaste ein breitiu vlamme vriurîn, daz daz viur möhte sîn gevangen mit einem schoube. got lône im derz geloube,
9210	wan ich niht drumbe geswern enmac. dirre grimmeclîche slac Êrecke in sîn houbet erschal, daz er vil kûme meit den val. sîniu ôren und diu ougen
9215	begunden ir ambetes lougen, daz er gehôrte noch gesach. wan daz daz swert enzwei brach, ez wære gewesen sîn ende. vil schiere der ellende
9220	sîne kraft herwider gewan, daz er gesach und sich versan und gehôrte alsam ouch ê. schade und schame tete im wê, daz sîn ie dehein man
9225	solhe oberhant gewan. daz er von sîner meisterschaft in sô grôze unkraft sînes lîbes was komen, des wart râche hie genomen.
9230	der gedanc an sîn schœne wîp der kreftigete im den lîp. sînen schaden begunde er anden und gap ze beiden handen daz swert mit grimmen muote
9235	und vaht im nâch dem bluote ûf daz herte stahelwerc. doch er wider in schine ein berc, dô et im der wer zeran, dô muoste er vor im dan
9240	sînen slegen entwîchen. daz tete er unlasterlîchen. wan ich weiz benamen daz und deheine sache baz, er enwære vergebene niht gebert,
9245	er enhæte sich gewert, wære im daz swert ganz beliben. alsus wart er getriben mit gewalte von dem gaste. Êrec begunde et vaste
9250	rechen den grôzen slac. er ensluoc niht sam er ê phlac, sîn slege wâren grimmeclîch, zagen slegen ungelîch. er gap slac umbe slac,
9255	daz slac neben slage lac. sus berte er daz îsengewant unz im daz swert vor der hant von den slegen erglüete und daz im sîn güete
9260	umbe die ecke vaste entweich. sîn brûniu varwe diu wart bleich und muoste bresten sam jenes ê. nû waz welt ir daz er tuo mê? daz im sîn in der hant beleip,
9265	dâ mite warf er den er dâ treip ûf sîne brust sô vaste daz jener von dem laste vil nâch gestrûchet was und gevallen ûf daz gras.
9270	Iedoch gestuont der vâlant und gesach im îtel die hant und daz swert zebrochen. «nû wirde ich wol gerochen» gedâhte im der rôte man.
9275	mit grimme lief er in an und wolde in allen gâhen in vaste zuo im vâhen, ûf heben unde stôzen mit sînen kreften grôzen,
9280	daz er aller zevüere. nû hete ouch ze sînem gevüere Êrec in sîner kintheit zEngellande, sam man seit, vil wol gelernet ringen
9285	zandern behenden dingen. ouch half in daz man îsengewant vil müelîchen mit der hant an dem manne mac begrîfen. des begunde er im entslîfen,
9290	daz sîn wille niht ergie. vor in die gürtel er in vie, unden er sich von im bôt: dô was dem andern dar zuo nôt daz er in zuo im vienge,
9295	doch des niht ergienge. Êrec sîn kraft erzeicte. als sich jener neicte, dô sazte er sîn ahselbein daz ez an jenes brüsten schein,
9300	sô daz er in niht zuo im liez. vil vaste er in von im stiez unde zuhte in wider dan sô gâhes daz der michel man sîgen begunde.
9305	von swaere er niht enkunde sich erholn, er ensuochte die erde. hie beviel in der werde, Êrec der wunderære machete im sô swære
9310	als et in wol luste. er kniete im ûf die bruste und gap im sô manegen stôz daz jenen lebennes verdrôz der dâ under ime lac:
9315	aller wer er gar verphlac. Als er zwîveln began, dô bat im der rôte man den minnern einen vride geben. er sprach: «ritter, lât mich leben
9320	eine wênige stunt und nemt mir danne den gesunt.» «welt ir mir des siges jehen?» «des enmac noch niht geschehen.» «waz ist danne daz ir welt?»
9325	«edel ritter, dâ twelt unde saget mir wer ir sît.» sus antwurte der obene lît: «daz habet ir selten ê gesehen, ouch ensolz mir niht geschehen:
9330	wan dâ ergienge ein wunder an, swenne sich der ober man müeste dem undern ergeben. welt ir eine wîle leben, sô volget guotem râte
9335	und saget mir vil drâte von wanne ir sît oder wer, und dar zuo swes ich vürbaz ger.» sus antwurte im der rôte man: «iuch triuget diu rede, wan dâst niht an.
9340	swie ir mir habet an gesiget und mit gewalte obe liget, ioh wil ê werden erslagen, ir enmüezet mir sagen wer ir sît oder welher hande.
9345	ja mac mir disiu schande von solhem manne sîn geschehen dem nimmer siges wirt gejehen und daz ich mich ê toeten lan. hâtz ein unadels man getân,
9350	sô enwolde ich durch niemen leben. hât aber ez mir got gegeben daz irs wert von gebürte sît, sô geruochet lâzen den strît, wan sô tuon ich iu sicherheit
9355	daz ich gerne bin bereit allem iuwerm gebote. ich man iuch verre bî gote inwer triuwe, und wizzet dâ bî, ob des niht ensî,
9360	daz hie mîn leben endet, wan sô bin ich geschendet. mioh bedunket des vil verre daz mir daz minner werre ob ich mit êren sterbe
9365	dan an êren verderbe.» Des antwurte im der guote mit lachendem muote: «ich wil mich lâzen twingen vil gerne an disen dingen.
9370	dochz wider dem site sî getân, sô wil ich iuchz wizzen lân: mîn vater ist ein künec rîch, mîn muoter wol sîn gelîch, über Destrigâles lant,
9375	Êrec bin ich genant.» «sol ich des gewis wesen?» «jâ ir.» «sô lât mich genesen und nemet mîne sicherheit. sehet, der bin ich iu bereit:
9380	sô muget ir dienest von mir hân, des iu sus muoz abe gân, ob ich von iu wirde erslagen. ich wil iu mînen namen sagen. Mâbonagrîn heize ich.»
9385	Êrec erbarmte sich, alsô daz er in leben lie. Als er die sicherheit emphie, nû half er im ûf bî der hant. ir ietweder enbant
9390	des andern wâfenriemen, wan in enhalf ander niemen, und entwâfenten ir houbet. hie wurden si beroubet hazlîches muotes:
9395	êren unde guotes gunden si ein ander wol, als ein geselleschaft sol. si sâzen zesamene ûf daz gras, wan ir ietweder was
9400	vil müede von dem strîte. Nû redeten si zuo der zîte vil und maneger slahte von ietwederes ahte und daz in ensamt geschach.
9405	der künec Êrec dô sprach: «iuwer dinc ich wol vernomen hân, daz hie der künec von Brandigân, der wirt, ist iuwer oeheim. ez enist iuwer dinge dehein,
9410	ich enhabes etewaz vernomen und ensî es an ein ende komen wie ez umbe iuch sû gewant. wan ein dinc ist mir unerkant: sô lange ir hinne gewesen sît,
9415	saget, wie vertribet ir die zît? iu enwære mê der liute bî? swie wünneclîch et hinne sî und swie deheiner slahte guot Sô sêre ringe den muot
9420	Sô dâ liep bî liebe lît, als ir und iuwer wîp sît, Sô sol man wærlîchen den wîben doch entwîchen zetelîcher stunde.
9425	ich hân ez ûz ir munde heimlîchen vernomen daz hin varn und wider komen âne ir haz mac geschehen. swie sis niht offenlîche enjehen,
9430	si wellent daz man in niuwe sî und niht zallen zîten bî. ouch zæme disiu vrouwe baz, diu disiu jâr hinne saz, under anderen wîben.
9435	wie ir mohtet belîben ein alsô wætlîcher man, wie mich des verwundern enkan! wan bî den linten ist sô guot. nû weder habet ir disen muot
9440	von iemannes gebote? oder welt irs lôn haben von gote ? Oder sult ir immer hinne sîn?» des antwurte im Mâbonagrîn: «ich wil iu des ein ende geben.
9445	ich enhan mir ditze leben von deheinem vrîen muote erkorn, wan er nie wart geborn der liute gerner sehe. nû loset durch welhe spæhe
9450	ich mir daz selbe leben erkôs. ich enwolde werden triuwelôs, sô muoste ich ez behalten und solde ich hinne alten, mir enschüefe sîn got rât,
9455	als er von sînen genâden hât. hiute nimt ez ende, ein teil mit missewende, daz ich lîhte sol verklagen. herre, nû wil ich iu sagen
9460	wem ich umbe ditze leben mîne triuwe hân gegeben. ez kam alsô daz ich gereit hie vor in mîner kintheit von hinnen in ein ander lant.
9465	dâ ich dise vrouwen vant in ir muoter gewalt, ein kint wol einlif jâr alt, von edelem künne: ouch ensach ich groezer wüune
9470	nie an kindes lîbe von manne noch von wîbe, als mir mîn sin dô verjach. und dô si mîn ouge ersach so edel und sô wünneclich,
9475	dô nam si mîn herze an sich, wan wir dô beidiu wâren junc von gelîchen jâren. zehant ich umbe ir minne warp. der selbe gewerp ouch niht verdarp.
9480	wande si mit mir entran. als ich si dô brâhte dan ûf diz selbe hûs her heim, dô enwolde mir mîn œheim des niht langer beiten,
9485	ich enmüeste swert leiten. Dô nam ich swert hie inne. als dô mîn vriundinne und ich ze tische sâzen, dô wir wol halp gâzen,
9490	dô begreif si mich sus verre. si sprach: «gedenket, lieber herre, waz ich durch iuch habe getân» und bat si des geniezen lân. vil tiure wart ich gemant,
9495	und hiez mich loben an ir hant ze leisten swes si bæte. des lobete ich ir stæte, als mich et diu liebe twanc: ouch enhete ich des deheinen gedanc
9500	daz si mich ihtes bæte wan daz ich sanfte tæte. doch wære si gewert swes si hæte gegert, swaz ich bringen möhte
9505	und mir ze tuone töhte, und tuon noch swes si gert ze mir. des selben bin ich gewis an ir. swaz si wil daz wil ouch ich, und swaz ich wil des wert si mich.
9510	wie möhte diu geselleschaft hân deheiner liebe kraft under manne und wîbe, diu niuwan mit dem lîbe schînent gesellen guot,
9515	und dâ sich scheidet sô ir muot daz daz eine lützel oder vil gert des daz ander niht enwil? dâz diu ungevuoge geschiht, des enist under uns zwein niht.
9520	von hiute über hundert jâr gewancte ichs nimmer umbe ein hâr, ir wille ensî mîn bestez heil, wan daz ist der meiste teil rehter vreude die ich hân,
9525	swâ ich iht des mac begân dâ ir wille an geschiht: des selben enwenket si mir niht. von diu swenne ich niht entæte gerne swie si bæte,
9530	dâ missetæte ich an mir michels harter dan an ir. Und als diu sicherheit ergie, von vreuden si mich umbevie. si sprach: «wol mir daz ich lebe
9535	alsô wünneclîcher gebe der mich got hât gewert. allez des mîn herze gert, daz hân ich umbevangen. ez ist mir wol ergangen.
9540	ouch wil ich mich vermezzen, wir haben hie besezzen daz ander paradîse. die selben stat ich prîse vür alle boumgarten.
9545	als ir selbe muget warten, hiest inne michel wünne von aller vogele künne und von missevarwer bluot: hie wærez wesen inne guot.»
9550	si sprach: «hie wil ich inne mich nieten iuwer minne. diz ist diu gâbe der ich bite: hie beherte ich wol mite deich iuwer müge belîben
9555	âne angest vor andern wîben: daz ir hie inne mit mir sît, wir zwei, unz an die zît daz iu hie inne ein man gesige alters eine an,
9560	alsô daz ez vor mir geschehe, daz ich die wârheit selbe sehe.» nû war umbe tete si daz? daz wil ich iu bescheiden baz. des enhâte si deheinen wân
9565	daz ez immer möhte ergân oder man in iender vunde der mich überwunde. sô rehte tiure dûhte ich sî. ouch bin ichs noch gewesen vrî
9570	unze hiute an disen tac, daz ich vil wol erziugen mac, ob irz niht wol geloubet. sehet et ir diu houbet? diu hân ich elliu abe geslagen.
9575	ouch wil ich iu mêre sagen: der stecke der dâ lære stât, daz er niht houbetes ûf enhât, und dâ daz horn hanget an, der beitet eines niuwen man:
9580	den solde ich mit iu hân bestat und iuwer houbet drûf gesat. des hât uns beide got erlân. ich wæne hiute erworben hân ein schadelôse schande,
9585	sît mich von disem bande hât erlœset iuwer hant. got der hât iuch her gesant. hiute ist mînes kumbers zil: nû var ich ûz und swar ich wil.
9590	und sî iu daz vür wâr geseit: ir sît ze grôzer sælikeit disem hove her komen, wan mit mir was im benomen elliu sîn wünne gar,
9595	und was et schœner vreuden bar. sît daz in mîn abe gie sô enwart et hie nie deheiner slahte spil erhaben: durch daz in lebende was begraben
9600	mîn jugent unde mîn geburt, sô ist et Joie de la curt genzlîchen nider gelegen. nû suln si ir aber phlegen, wan nû hânt si wider ir trôst.
9605	ez hât von michelm sêre erlôst iuwer ellenthaftiu hant diz vil riuwige lant und gar ze vreude gekêret: des sît ir immer gêret.
9610	herre, nû sult ir ûf stân unde vrœlîchen gân blâsen daz selbe horn, wan daz ist dar zuo erkorn, ob mich iemen überwunde,
9615	daz erz dâ ze stunde dâ mite tæte den liuten kunt daz erz bliese drîstunt. daz ist dâ nû gehangen, unz michs mac belangen,
9620	ungeblâsen manegen tac, daz ich dises heimuotes phlac.» nû nam erz abe dem stecken und bat ez Êrecken blâsen. dâ ze stunde
9625	sazte erz ze munde. vil michel wart der horndôz, wan ez was lanc unde grôz. Als si dô über al hôrten disen hornschal,
9630	die vor dem boumgarten des siges solden warten, nû sâhen si alle ein ander an, wan dâ enwas dehein man, der des hete deheinen wân
9635	daz ez sus wære ergân daz der ritter Mâbonagrîn solde überwunden sîn, und rieten die burgære daz ez ein trüge wære,
9640	unz inz Êrec anderstunt mit dem horne tete kunt, und dô zem dritten mâle. nû wart âne twâle wider dem alten site getân.
9645	der künec Îvreins von Brandigân der nam vrouwen Ênîten und vuorte si besîten ze jenem boumgarten in. daz enweste niemen dâ âne in
9650	wâ man in solde komen, daz geleite enwære von im genomen. nû îlten si alle mit vrœlîchem schalle dâ si die herren sâhen an.
9655	hie wurden dise zwêne man, Êrec und Mâbonagrîn, von aller dirre menigîn schône gesaluieret und der tac gezieret
9660	mit vrœm wîcsange. dâ wider und in lange daz herze was getrüebet, sô wart nû vreude güebet und Êrec schône gêret,
9665	sîn prîs wol gemêret. si riefen dâ ze stunde mit gelîchem munde beide man unde wîp: «ritter, gêret sî dîn lîp!
9670	mit sælden müezest immer leben! got hât dich uns ze trôste gegeben und in daz lant gewîset. wis gevreuwet und geprîset, aller ritter êre!
9675	jâ hât dich immer mêre got und dîn ellenthaftiu hant gekrœnet über elliu lant. mit heile müezest werden alt!» hie was diu wüene manecvalt.
9680	Ouch enwas zuo den zîten der schœnen vrouwen Ênîten herzenleides niht geschehen. des swer ich wol und wil es jehen daz disen vrouwen beiden
9685	ir gemüete was gescheiden, diu under der pavelûne saz unde dirre der dâ baz an dem strîte gelanc: in sweic der munt, ir herze sanc.
9690	diu eine vreuden krône truoc, diu ander hâte leides genuoc geladen mit herzensêre dâ von daz si niht mêre in dem boumgarten solde sîn
9695	und ir âmîs Mâbonagrîn. ouch want si die hende umbe solhe missewende diu ir manne dô geschach. als si vrouwe Ênîte gesach
9700	dort sitzen unde weinen, nû begunde si dô bescheinen ein wîplîch gemüete. ir vil grôziu güete betwanc et die süezen
9705	daz si si muoste grüezen, swie doch jener swære. manec wehselmære sageten si dô beide von liebe und ouch von leide
9710	und geselleten sich dâ mite nâch wîplîchem site. von lande und von ir mâgen begunden si dô vrâgen und sich mit rede engesten
9715	und sageten swaz si westen. ze künde rechenten si sâ daz si genifteln wæren nâ. nû wie möhtez næher sîn? sît daz der herzoge Îmaîn,
9720	der herre von Tulmein, vrouwen Ênîten œheim, dirre vrouwen veter was. ouch wâren si beide, als ich ez las, von einer stat ze Lûte erborn.
9725	sehet, hie wart trûren verkorn. zesamene hIelsen si sich dô und wâren beide ein ander vrô: daz si dâ mite bescheinten, wan si von vreuden weinten.
9730	daz weinen schiere ende nam, und lachten, daz in baz gezam. ze handen sich dô viengen die vrouwen unde giengen dâ si ir herren vunden.
9735	vor vreuden si enkunden diz niht langer verdagen, si enmüesten offenlîche sagen daz si genifteln wæren. nâch disen niuwen mæren
9740	jâhen si alle gelîche daz si got wunderlîche zesamene hæte gesant in ein alsô vremdez lant. Nû vuoren wîp unde man
9745	ûz dem boumgarten dan. diu houbet, als ir hôrtet sagen, diu drinne wâren abe geslagen, diu nam man abe den stecken (des êre got Êrecken),
9750	unde wurden boten gesant nâch der phafheit in daz lant daz man si begrüebe nâch êren. hie begunde sich êrste mêren diu vreude ûf Brandigân.
9755	diz was von schulden getân. wan alsô schiere diz erschal in daz lant über al, von solhem mære daz des hoves vreude wære
9760	widere gewunnen der in was zerunnen, des küneges mâge und dienestman die vuoren ze hove alle dan mit den lantvrouwen
9765	die niuwen genâde schouwen. Hie samenten sich die besten. der wirt mit sînen gesten, die er dar mohte bringen, erbiten und betwingen,
9770	si macheten ein hôchzît diu mit wirtschefte sît werte vier wochen. mit vreuden wirt zebrochen diu swære gewonheit
9775	die er durch sînen neven leit: der wirt er hie ergetzet und ist im wol ersetzet mit vil wünneclîcher kraft. Êrec und sîn geselleschaft
9780	was dâ zen hôchzîten: die enliez der künec niht rîten. doch was er âne vreude hie, alsô daz er sîn herze nie von swærem kumber brâhte.
9785	swenne er dar an gedâhte, sô entweich im aller sîn muot, als ez dem erbarmherzen tuot: dem ervollent dicke diu ougen offenlîch und tougen,
9790	swenne er iht des gesiht daz wol zerbarmenne geschiht. ouch was diz genuoc erbarmeclîch: ez enwart nie man sô vreuden rîch, dem doch iht erbarmen sol,
9795	ich enwizze daz benamen wol, hæte er die nôt ersehen, im wære ze weinenne geschehen. im erbarmte diu ellende schar, die ahzec vrouwen die dâ gar
9800	ir vreuden weise wâren, als dâ an ir gebâren was vil riuweclîche schîn, den der rôte Mâbonagrîn ir âmîse hâte erslagen.
9805	beide trûren unde klagen daz was ir ambet alle tage. rehte alsam der hase en jage schiuhet sîne weide, sô vluhen si daz von leide
9810	daz si dar inder kæmen dâ si vreude vernæmen. ouch enwolden si den man zallem ir lebenne an mit ir danke nie gesehen
9815	von dem in leide was geschehen. Nû half in Êrec trûric sîn. daz wart doch hier an wol schîn daz er ze deheinen zîten mit vrouwen Ênîten
9820	sînes dankes von in kam. mit guotem trôste er in benam ir herzeleides etewaz. nû waz tuot dem manne baz wan der in nâch leide trœstet wol?
9825	des ist vriunt vriundes schol. Doch begunde er in râten, daz si vil gerne tâten, daz si dâ niht mê beliben und si ir jâr baz vertriben
9830	und daz si urloup næmen unde mit im kæmen zem künege Artûse, wan si dâ ze hûse nimmer wolden werden vrô.
9835	urloubes gerten si dô. daz enwas dem wirte niht leit, wan im was wol daz geseit daz si hæten des gejehen, in wære sô leide dâ geschehen
9840	daz si ûf dem hûs ze Brandigân nie dehein vreude möhten hân. nû wolde er in gerne urloup geben, ob si ze bezzerunge ir leben möhten verkêren,
9845	und ob nâch sînen êren si wolden vreude walten, sô sæhe er si ungerne alten inder wan in sîner phlege. vil gerne bereite er si after wege.
9850	der wirt ir willen huote: sît er si nâch ir muote riuweclîchen kleite, ros ouch dar nâch bereite sô daz ir varwe beider,
9855	pherde unde kleider, gelîch und wol zesamene schein, swarz riuwevar al ein. Diu hôchzît hete ende. nû schiet der ellende
9860	mit disen vrouwen von dan. dâ geschach im hovelîchen an daz er si von danne nam dâ in wesen niht enzam. nû saz der wirt von Brandigân
9865	ûf ein schœne kastelân unde die sîne ûf ir ros von rabîne, sô si si heten beste, und kondewierten die geste
9870	von dem hûs genuoc verre. sô bat si Êrec der herre mit heile dâ belîben. dan reit er mit den wîben und brâhte si ze hûse
9875	dem künege Artûse. Dar was er michel willekomen, und wart des guot war genomen daz si sô gelîche wâren gekleit und ze pherden bereit,
9880	und begunden des von schulden jehen daz si nie enhæten gesehen deheine seltsænern schar, sô manege vrouwen in einer var. und die dar umbe enwesten,
9885	die vrâgeten von den gesten wiez umbe si wære gewant, unz inz Êrec tete erkant. hie emphie der valsches vrîe von al der massenîe
9890	sîner arbeit ze lône alsô der êren krône daz er zem prîse wart geseit daz von grôzer manheit nieman zer werlde kæme
9895	tiurre oder baz genæme, wan nie manne von den landen sô grôz dinc wære erstanden von rîcher âventiure. wan daz vrou Sælde ir stiure
9900	gap sîner ammen diu sîn phlac dô er in der wagen lac, sô enmöhtez nimmer sîn geschehen. als si die vrouwen heten gesehen, daz dûhte si ein vremdiu sache.
9905	nû vuorte si ze gemache diu vil edel künegîn. ir sêle müeze sælic sîn, wan si vil gerne âne bete vol tugentlîche tete.
9910	Nû weste der künec Artûs die geste gerne in sînem hûs. und als er in beite sît sô lange unz in des dûhte zît daz er möhte zuo in gân,
9915	hie was Êrec und Walwân joch Guivreiz, si drîe und diu ander massenîe under ein ander vil vrô. zuo in sprach der künec dô:
9920	«ir herren, wir suln gân schouwen unser niuwekomen vrouwen, und trœsten si nâch ir leide.» ûf stuonden si dô beide, der künec Artûs und Êrec.
9925	bî handen giengen si den wec in ir kemenâten. dô was diu baz berâten mit vrouwen dan vordes ie. der wirt zuo in sitzen gie:
9930	die andern sazten sich ouch sâ, der eine hie, der ander dâ. Und als si der künec ersach lîden umbe ir ungemach gelîche klage, gelîche riuwe,
9935	gelîcher stæte, gelîcher triuwe, gelîcher schœne, gelîcher jugent, gelîcher zuht, gelîcher tugent, gelîcher wæte, gelîcher güete, gelîcher ahte, gelîcher gemüete,
9940	diz dûhte in wîplîch und guot und bewegete im den muot und muoste im wol gevallen. er sprach vor in allen: «Êrec, lieber neve mîn,
9945	dû solt von schulden immer sîn geprîset unde gêret, wan dû hâst wol gemêret unsers hoves wünne. swer dir niht guotes günne,
9950	der enwerde nimmer mêre vrô.» «âmen» jâhen si alle dô, wan si im guotes gunden. si wurden überwunden, diu vil riuwigen wîp,
9955	daz si ir muot und ir lîp ze vreuden verkêrten und den künec dar an êrten daz er in die wât nam diu in ze vreuden niht enzam,
9960	und kleite si mit solher wât sô si ze vreuden beste stât, von sîden und von golde. Êrec der Êren holde und Guivreiz le pitîz
9965	die wurden dô en allen vlîz gêret und enthalten und ir alsô gewalten als ir namen wol gezam, unz daz Êrecke ein mære kam
9970	daz sîn vater wære tôt. nû was des sînem lande nôt daz er sich abe tæte solher unstæte und daz er heim vüere:
9975	daz wære gevüere sînen landen und sîner diet. mit urloube er dô danne schiet von dem künege Artûse, ze varne heim ze hûse.
9980	Dô er von dem hove schiet, dô trôste er nôtige diet die sînes guotes ruochten, und ob siz nimmer gesuochten, nâch iegelîches ahte
9985	und als erz haben mahte, alsô daz si einen gemeinen segen mit triuwen tâten über den degen, daz got sîner êren wielte und im die sêle behielte.
9990	ouch schiet der wênige man, der künec Guivreiz, mit im dan, engegen sînem rîche. nû wurden si wirdeclîche gekondewieret beide
9995	unz an ir wegescheide. nû schieden si sich under in, als ich des gewis bin, sô nie gesellen zwêne baz, âne nîtlîchen haz,
10000	Guivreiz gegen Îrlant, Êrec gegen Karnant. Nû was den sînen wol kunt beidiu der tac und diu stunt wenne er ze lande solde komen.
10005	zehant heten sich ûz genomen, sô man si von dem lande zen tiuristen erkande, sehs tûsent oder mêre. durch ir herren êre,
10010	wan si in gerne sâhen, sô îlten si in emphâhen engegen im wol drîe tage. ez ensî daz er missesage, sô enmac niemen des gejehen
10015	daz er ie habe gesehen dehein willeclîchern antvanc. als si ir schuldic triuwe twanc, sô emphiengen si in alle mit zühteclîchem schalle,
10020	mit rossen bedahten, und die ez haben mahten unde ritter wâren genant, die heten besunder zuo ir hant ir baniere rîche,
10025	der kovertiure gelîche, undersniten wæhe mit vil vremder spæhe. daz gevilde hie geverwet was rôt wîz gel und als ein gras
10030	von ir sîdînen wât, sô si diu werlt beste hât. sus emphiengen die von Karnant ûz Destrigâles lant ir herren der wider kam,
10035	als einem rîchen künege zam, in sînem künecrîche. dô hâte er sæliclîche in manegem lande daz bejaget, als uns diu wârheit von im saget,
10040	daz niemens lop enstuont sô hô under den die et lebeten dô von manlîcher getât. an sînem lobe daz stât daz er genant wære
10045	Êrec der wunderære. ez was et sô umbe in gewant daz wîten über elliu lant was sîn wesen und sîn schîn. sprechet ir: wie mohte daz sîn?
10050	waz von diu, schein der lîp nû dâ, sô was sîn lop anderswâ. alsô was sîn diu werlt vol: man sprach et niemen dô sô wol. Als in got heim gesande,
10055	ze vreuden sînem lande gebôt er ein hôchzît, daz vordes noch sît in dem selben lande nie dehein sô wünneclîche ergie
10060	und von herren alsô grôz. dar kam vil manec sîn genôz, die ich iu gerne nande, ob ich ir namen erkande. hie emphienc er lobelîche
10065	die krône von dem rîche der sîn vater, der künec Lac, unz an in mit êren phlac, wan er vil manege tugent begie. ouchn wart dehein vrumer vater nie
10070	mit sînem sune baz ersat. wer zæme baz an sîner stat? got segene im sîn rîche: er hât ez billîche. wir suln im sîn wol gunnen,
10075	wan er hâts wol begunnen mit vreuden und mit wirtschaft. man mohte et dâ grôze kraft von rittern und von vrouwen wol sehs wochen schouwen.
10080	swie lange si werte, swes man ze vreuden gerte wie vil des menlîch dâ vant! hie sazte er sô sîn lant daz ez vil vridelîchen stuont.
10085	er tete sam die wîsen tuont, die des gote genâde sagent swaz si êren bejagent und ez von im wellent hân. sô triuget manegen ein wân
10090	der in benamen beswîchet, sô er sich des muotes rîchet, ob im iht guotes widervert, daz im daz sî beschert niuwan von sîner vrümekeit,
10095	unds gote dehein genâde seit. wie lîhte ein ende des geschiht! alsô entete der künec niht. sît in got hâte gêret, dô wartz ouch im gekêret
10100	ze lobe in allen stunden. des wart er schœne ervunden als im sîn herze gerte, wan im sîn êre werte unze an sînen tôt,
10105	als ez der himelvoget gebôt, âne alle missewende. In dem ellende hâte vrouwe Ênîte erliten übele zîte:
10110	daz hât si wol bewendet, wan sich daz hie endet, und muoz sich verkêren ze gemache unde zêren und ze wünne manecvalt.
10115	ze wunsche wurden si beide alt, wan si got hâte gesant ze vreuden in ir eigen lant, ir vater und ir muoter. der künec selbe huoter
10120	ir willen swâ er mohte, und doch als im tohte, niht sam er ê phlac, dô er sich durch si verlac, wan er nâch êren lebete
10125	und sô daz im got gebete mit veterlîchem lône nâch der werlde krône, im und sînem wîbe, mit dem êwigen lîbe.
10130	durch got des bitet alle daz uns der lôn gevalle der uns gote gehulde (deist goldes übergulde) nâch disem ellende.
10135	hie hât diz liet ein ende.

<<< Übersicht <<< vorige Seite

Erec

vollendet um 1185,

nach Chrestien de Troyes

Textgrundlage:

Hartmann von Aue, Erec

Hrsg.: Thomas Cramer, Frankfurt 1972

· · · · · · · · · · · ·

bî ir und bî ir wîben.

diz was Êrec fil de roi Lac,

der vrümekeit und sælden phlac,

durch den diu rede erhaben ist.

5

nû riten si unlange vrist

neben einander beide,

ê daz si über die heide

verre in allen gâhen

zuo rîten sâhen

10

einen ritter selbedritten,

vor ein getwerc, dâ enmitten

eine juncvorouwen gemeit,

schœne unde wol gekleit.

Nû wunderte die künegîn

15

wer der ritter möhte sîn.

er was ze harnasche wol,

als ein guot kneht sol.

Êrec der junge man

sîn vrouwen vrâgen began

20

ob erz ervarn solde.

diu vrouwe des niht enwolde:

si bat in dâ bî ir tweln.

ein juncvrouwen begunde si ûz weln

die si möhte senden dar.

25

si sprach: «rît und ervar

wer der ritter müge sîn

und sîn geverte, daz magedîn.»

diu juncvrouwe huop sich an die vart,

als ir geboten wart,

30

dâ siz getwerc rîten sach.

mit zühten si zuo im sprach:

«got grüeze iuch, geselle,

und vernemet waz ich welle.

mîn vrouwe hât mich her gesant,

35

diu ist künegîn überz lant:

durch ir zuht gebôt si mir

daz ich iuch gruozte von ir,

und weste gerne mære

wer der ritter wære

40

und disiu maget wol getân.

muget ir mich daz wizzen lân,

âne schaden ir daz tuot:

mîn vrouwe vrâget wan durch guot.»

daz getwerc enwolde ir niht sagen

45

unde hiez si stille dagen,

unde daz si in vermite:

ez enweste war nâch si rite.

diu maget enlie niht umbe daz

si enwolde rîten vürbaz,

50

den ritter vrâgen mære

selben wer er wære.

daz getwerc werte ir den wec:

daz sach diu künegîn und Êrec

daz ez si mit der geisel sluoc

55

die ez in der hant truoc,

über houbet und über hende

ze sîner missewende,

daz si mâl dâ von gewan.

Mit solher antwurt schiet si dan

60

wider zuo ir vrouwen

unde liez si schouwen