BIBLIOTHECA AUGUSTANA

 

Konrad der Pfaffe

um 1170

 

Das Rolandslied

 

Verse 5000 - 5999

 

______________________________________________________________________________

 

 

 
 
5000

warf er in uon dem rosse;

da trorter daz wal bluot.

da huop sich manic helt guot

mit nide zesamene.

daz so grozem magene

5005

anderhalp tusent man

ie getorsten bestan,

swa iz nu gescahe,

man scribez wol zemare.

iuh en darf sin nicht wunder nemen:

5010

swer sich gote wil ergeben,

dem nelat er an nichte misse gan.

des wir gut urchunde han:

Gedeon het driu hundert man,

di er zedem wazzer uz nam

5015

ane allerslachte wicwer:

er uerswant ain uil michel hêr

ane stich unt ane slác.

ia iageter si allen ainen tac

mit prinnenten oluazzen:

5020

si ertrancten sich selben in dem wazzer.

sam wolter disen herren

ir froude gemeren:

si heten der prinnenten oluazze gesmechet,

mit dem heiligen gelouben stunten si uf gerechet.

5025

helede uil chuone

si macheten wise gruone

mit bluote gar berunnen,

mit swerten uaste durch drungen.

swelher in den schilt engegen bót,

5030

den was geraite der tot;

†noch di ringe noch der huot:

daz wafen ie durh wuot

uaste durch den uerch pán.

dane was nehain man

5035

der dem libe ichtes wolde getruwen,

wan so er mit den sporen machte erhouwen.

 

Di haiden waren do gelegen,

di des heres scolten phlegen.

di di aller uorderiste waren,

5040

mit pluote si bedechet lagen.

inoch lebeten ir zwene;

di waren so gewaltic unt so here

daz sine wolten rumen daz wal.

si erhuben alrest ir scal:

5045

Margariz unt Cornubiles

di uertriweten sich des,

si wolten Roulante an gesigen

oder tot uor im geligen,

unt ob si da gelegen,

5050

wa in so wol geschahe

so uor dem aller chuonisten

den si ander werlt wisten?

 

Cornubiles ledigete sine truwe

im zeuil micheler ruwe:

5055

er huop sich uaste an den man,

wol uerstach er den uan;

mit dem swerte hiwer uf den lewen.

do erbalc sich der degen

Roulant mit zorne:

5060

er ramte sin da uorne.

do geuie Durndart

aine egesliche durch uart

uon deme helme unze an di erde.

er sprach: «hiute ware du ain herre:

5065

nu bistu zease worden.

der tiuel hat dine sele erworuen.»

mit nide gesprancte Margariz;

er stach ain golt gewunden spiez

nach dem helde Oliuire.

5070

er zart im uon dem diehe

ain uach der halsberge.

si wanden alle er solde ersterbe.

inoch behilt in got gesunden

ane aller slachte wunden.

5075

er sluoc in mit dem swerte

uf ainen helm herten.

erne macht sin nicht gewinnen:

daz fiûr enzunte sich dar innen.

«daz hat Margariz getan;

5080

daz scol man uon mir zemare sagen!»

 

Do sprach der helt Oliuir:

«uil wol uergilte ich iz dir.

diniu numare

nesint nicht houebare.»

5085

er blies sin horn.

«min schilt ist ganzer chom

uon dem aller chunisten ainem.»

do riefer unter di haiden:

«ich pin ain uil ganzer man.

5090

du scolt uon mir etwaz sagen!»

den schilt sluger zestuchen,

er zart im die buchelen.

mit michelem gewalte

den helm er im erscalte:

5095

daz houbet sich dar unter chluop.

er sprach: «nu maht tu haben urloup.

man geloubet dir nu baz.»

aines sturzes er genas.

di haiden in da ernerten

5100

mit spiezen unt mit swerten.

 

Do chom der helt Samson:

er sluoc Scarpulon,

den chunc uon den Iren,

uil nahen sinem libe,

5105

daz im daz pluot uz den ougen spranc.

daz swert im erchlanc

uil suze inder hant;

do cherte der ware wigant

uaste in die helm dicke;

5110

sine ortpicke

waren harte fraissam:

swaz er erraichte an dem man,

iz ware stal oder horn,

daz was allez entsamt uerlorn.

5115

er gefrumete manigen haiden blaich.

der stal uor im waich

sam er bli ware:

er wart den haiden uil sware.

 

Otto unt Iue

5120

di wonten in dem wige

also mines trechtines chnechte,

want si dem rechte

nie ain fuoz entwichen.

swaz si mit swerten begriffen,

5125

di nirten mere niemen.

gute chnechte uor in uielen.

daz waren gotes rechen,

di mit ir scarphen ecken

den sige wol errungen:

5130

damit habent si gewunnen

daz si gotes antlutze sehent

unt iemir frolichen lebent:

daz worcht in der gute wille.

den heiligen gaist heten si dar inne,

5135

ir herce geliuteret unt gerainet:

uon diu sint si geziret unt gehailet.

 

Hatte unt Anseis

di furen alder selbin wîs.

si uachten nach ir gesaztdem zile:

5140

si slugen der haiden also uile

daz si daz uelt struoten.

wa fraist ir ie uon luten

also ummazen craft,

daz si den langen haizen tác

5145

in ir wafen waren,

unt di gerouweten uor in lagen,

in ir aigen pluote erworden?

si lagen ersticket unt uerdorben.

nu wer mahte daz getuon

5150

wan der ware gotes sun,

der si nie uon im uerliz

unt im selbe gehiz,

swelhes todes si ersturben,

daz ain har uon ir houbet icht uerlorn wurde?

 

5155

Da uacht der biscoph Turpin:

di haiden allenthalben sin

uielen in daz wál

sam di hunde zetal.

daz was der rechte chemphe,

5160

des heiligen Cristes schenche:

swaz er mit munde lerte,

mit werken er iz bewarte.

er uerliez alle werlt wunne,

paidiu erbe unt chunne.

5165

ain warer gotes urchunde,

gotes lop truger in sinem munde;

der marter gerter in alle zít,

zeiungist opherot er den líp.

zehen phunt wuocherot er sinem herren,

5170

nu lonet er im mit eren.

 

Alsam tete sin geselle Roulant:

daz her allenthalben uor im swant

sam der sunne tuot den sne;

inne tet niemen so we.

5175

er was ein rechter ecke stain,

want in wafen nehain

in der werlt nie geseret:

so het ‹in› got geret.

sin swert Durndart

5180

erchos im imer aine uart

in almitten durch di scár.

di haiden wurden sin gewar,

si huben di fluocht.

da wart posiu man zucht.

5185

si beuielen daz geuilde

unt fluhen an di perge.

si erstichten unt ertwalen;

di aue genaren,

di riefen nach ir herren.

5190

di christen furen mit eren.

 

Uon dem wale was ainer entrunnen,

doch was im misselungen:

der fuoz was im abgeslagen.

der chom an den chunc geuaren;

5195

er sprach: «herre, chunc uz Yspanie,

diu chrone gezimet ‹dir› nimere zetragene,

dune rechest dine toten.

ledige si uon den noten

di noch da leben!

5200

ia machtu hiute sehen,

sit disiu erde geleget wart,

daz so manc menske ‹nine› erstarp,

noch ne geschit ouch niemir mere.

nune sume dich nicht, herre,

5205

daz si genozen icht entrinnen

wider zu den Karlingen!»

 

Marsilie erzurnte harte,

er sprach: «Karl mit sinem grawen parte

hat menigiu riche pedwungen,

5210

di al swarzen Unger,

Pulle unt Latran.

do ich fride uon im gewan,

uil ubele mir geschach

daz ich daz ie zeprach,

5215

want er di chunen Sachsen bedwanc.

Genelun habe undanc,

daz ich in ie gesach:

allez diz ungemach

ist uon im ainen chom.

5220

ia du herzoge Grandon,

ich wil dich an mines sunes stete haben:

nim du, helt minen uanen,

daz her la dir beuolhen sin!

ich wil selbe den lip min

5225

wagen unt urtailen:

sine sculen nicht so hin scaiden,

ê si hin furen die ere.

Karl nerichsenet hi nicht mere,

want der wistum unt al sin rat

5230

an disen zweluen stat:

so wir die uon im gescieden,

so ne irrite uns niemen,

Karl nechome niemir an unser erbe.

mir ist liebir daz ich ersterbe,

5235

denne mich die Karlinge

so gewalticlichen dwingen.»

 

Haiden uermezen

ilten zu irn rossen;

da ilte man fur man.

5240

Roulant ‹sach› si zu uarn;

er sprach: «ir gelph ist inoch so groz.

Genelun hat uns in Sarraguz

alle uerraten.

helde, nu perait iuch drate!

5245

unt gemache wir si zagen,

unt gewinnent si den esten scaden,

so muzen si uns den ruche cheren

ersihe ich den ir herren,

ich gedringe im so uil nahen:

5250

sin scol hiute ramen

der uil gute Durndart.

der aller oberiste ewart

si selbe min urchunde:

mich ruwent mine sunde

5255

di ich wider sinen hulden han getan.

nune scol sich niemen spárn.

hi wirdet iz gar uerendet,

der tiuel wirt an uns geschendet.»

 

Do sprach der biscoph Turpin:

5260

«nu flehet alle minen trechtin,

want er durch uns dolte den tot,

daz er bechenne unser aller nót,

daz wir raine fur in chomen!

wir werden hiute geboren

5265

zu der ewigen wunne:

hiute werden wir der engel kunne,

hiute sculen wir frolichen uaren,

hiute werden wir liutere wester parn;

hiute ist unser froude tác,

5270

want sich sin frouwen mac

elliu die heilige cristinhait;

hiute uergilt man uns di arbait:

wir werden hiute enphangen

mit dem engelsange

5275

zu den himilischen eren.

hiute gesehe wir unseren herren:

da piren wir iemir mere fró.»

si sungen «gloria in excelsis deo!»

 

Di haiden plisen ir horn.

5280

michel grisgrammen unt zorn

was unter in erpluot;

geseret was in der muot.

si ranten di christen an,

si taten in sam.

5285

Ualdeprun chom ander stunt;

sin roz hiez Gratamunt.

er sluoc den tiweren herzogen,

daz was der mare Sampson;

den chlageten alle Karlinge.

5290

Roulant ‹rach in› mit grimme:

er sluc in almitten zetal.

di haiden uielen ane zal;

di haiden erchomen harte,

do si uon Durndarte

5295

di grozen tugente erchanten:

si uermiten gerne Roulante[n].

 

Alfrich uon Affrica

mit grimme stach er sa

Anseis durch den helm,

5300

daz der tiwerliche degen

uon dem marhe uiel nider tót:

unter di christen wart michel not

uon dem herten ualle.

di haiden riefen alle:

5305

«ir geltet uns genote

di unseren lieben tote.

wir haben di ere:

Karl enrichsenet hi niht mere.»

 

Do sprach Turpin der biscoph:

5310

«iz ist da uor ienoch.

der tot nahet iu uil palde zuo.

ir rumet uch des siges zefruo:

swer genozen hinne uare,

der habe di ere gare;

5315

swer morgen lebe ze dirre zît,

der habe di marche ane strit.

iwer nehain chumet niemir hinnen;

iwer armiu sele muz iemir da zehelle prinnen.»

er sluoc Alfrichen

5320

durch ain helm dicken,

daz er tot nider uiel.

di cristen riefen «monsoy, monsoy!»

der tac was haiz unt lanc.

da wart ein fraislich champh

5325

in zwischen den haiden unt den christen.

wer machte sich dar unter gefristen

wan den got wolde bewaren?

di haiden lagen alle erslagen

unze an den chunc uon Capadocia.

5330

sin marh cherter sa

an Gernises uan

uf Murmur ranter in an.

ia stach in der chunc Grandon

daz Gernis toter nider chom.

5335

er sluc Ekerichen,

ain helt herlichen,

er resluoc Peringeren

unt inoch ander zwene:

daz was uon Ualtia Antoir,

5340

sine swester het Oliuir,

†aldaz der Rodanus beslôz;

er resluoc Gwimuten, sinen genoz.

 

Roulant erbalc sich:

do hiwer Uelentich;

5345

er sprach: «ia du ualantes man,

waz du mordes has getan!»

doch er in nie gesach,

bi dem worte daz er sprach

do gezwiuelote der chunc Grandon,

5350

daz er mit nichte machte uon im chomen.

wi wol er in erchante,

den helt Roulanten!

Durndarten er uf huop,

durh den helm er in sluoc

5355

daz im die ougen uz sprungen.

er sprach: «swaz du hie has gewunnen,

daz hastu harte erchoufet:

du bis sere bestroufet;

dune beruomest dich sin niemir mere.»

5360

di Karlinge gaben im lop unt ere,

si sprachen alle bi ainem munde:

«so wol der wile unt der stunde

daz Roulant ie wurde geborn!

er ist uns zetroste her chom;

5365

er ist unser guote uoget:

er si iemir geret unt gelobet!»

 

Oliuir do cherte,

alse in sin ellen lerte,

mit dem guten Altecleren;

5370

da getet er seren

manigen haidenischen man.

do wider rait im Chartan,

der was michel unt egeslich.

mit swerten hiwen si sich.

5375

den schilt er im abe sluoc.

der stal was so guot,

des nemacht er nicht gewinnen.

«uerstu so ganz hinnen,

des was ich ungewon,

5380

swaz mir ie dar zu chom,»

sprach der helt Oliuir,

«zeware sage ich iz dir:

sone getruwe ich niemir mere

dem guten Altecleren.»

5385

er stach in durch den geren,

er warf den uerch seren

toten uon dem orte.

do chom ain michel uorchte

unter alle di haiden:

5390

daz uelt begunde in laiden.

 

Turpin ernante:

di scar er an rante.

wol huluen im sine notstreben.

da bewarte der degen

5395

al daz er mit dem munde lerte.

der tiuerliche cherte

da diu not aller maiste was.

daz tet der herre umbe daz:

er wolte gerne wagen den lip.

5400

enduchte sin ware zít,

daz in der wirt periete,

der in in den wingarten miete,

daz er im sinen phenninc gabe:

dar nach uacht der helt mare.

5405

manigen wunten unt uaigen

getet er unter di haiden.

er uacht ze iweder hant:

da ne was nehain isenin gewant,

nehain stalhuot

5410

nie so ueste noch so guot,

chom er im zeslage,

daz in uon deme tage

iemir gebuozte dehain smit,

oder dar unter daz lit

5415

der arzte imer dorfte gesalben.

er fulte allenthalben

di furhe mit den toten.

fluchte si si noten

mit ir scarphen swerten,

5420

daz si sich zeiungist nine werten.

 

Bischof Turpin greift an

(P, fol. 74v)

 

si uielen sam daz uihe zetal,

si slugen si uon dem wal

rechte sam di hunte.

si riefen alle mit ‹ainem› munde:

5425

«hilf uns chunc Marsilie, herre,

durch dine chuncliche ere!

di cristen sint starc unt fraissam.

di dine ligent alle erslagen,

uerwundet unt ueruallen.

5430

si heuent ir wansangen

rechte sam in nicht enwerre.

nu rich dich, herre!

uarent si also genozen hinnen,

daz nemachtu niemir uberwinden.»

 

5435

Marsilie hiz blasen siniu horn,

di haiden alle fur sich chom.

er swuor ain aît,

des chom er in groze arbeit,

swer der flucht huobe,

5440

daz man ‹in› zetode sluge.

er sprach: «scol Roulant gesigen,

so wil ich selbe ‹da beligen›.

behabent di cristen di ere,

so ne ruche ich mere

5445

nicht ze lebene,

noch chrone zetragene.

ê suoche ich den lip zeuerliesen

e daz lop zeuerchisen.

nune wil ich nicht fliehen.

5450

ist hi imen

der mir zeder note gestat,

wi wol iz im ergat!

er mac selbe gebieten

unt sich iemer nieten

5455

aller werlt wunne:

ich gere al sin chunne.

wol gehiezen im sine man,

si sprachen er hete in so liebe getan,

si wolten den grimmigen tot dolen,

5460

e si haim wolten chom

ane sige unt ‹ane› ere.

waz si denne mere

tochten zemannen?

si wurden uobele enphangen

5465

uon kinden unt uon wiben.

daz her begonde sigen

uaste andaz wal.

di haiden redeten uber al

daz di christen waren

5470

helde uil mare,

ain lut harte uneruorchten,

daz si mit ir libe worchten

so getaniu wunder uf der erde:

ir chuner nehain nedorfte nie geborn werde.

5475

in gezame wol zelebene:

ir tugent unt ir edele

heten sie wol erzaiget.

Genelun scolt iemir sin uermainet,

der mit sin aiden

5480

uerriet di christen unt di haiden.

 

Marsilie chom mit zorne.

siben tusent horne

uor im clungen.

uf di cristen si drungen;

5485

si wanten si nider treten.

owi wol si in gestaten

mit eruochten spiezen,

die di haiden an dem wal liezen!

si waren ir gewisse.

5490

der herzoge Abysse

furte Marsilien uan:

der was ain so ubel man

daz in niemen lachen uant.

sin sterche was erkant

5495

uber alle di erde.

er enphie daz lehen

daz er Roulanten sluoge,

daz houbit fur Machmeten truoge:

daz wolte got uerwandelen.

5500

er huop sich uz den anderen;

mit grozer siner craft

stach er ain eschinen scaft

dem biscof durch den schilt:

got in dar unter wol behilt.

5505

di haiden riefen alle gewisse:

«wol du herzoge Abysse,

du hast iz uermezenlichen erhaben!»

si wanten alle, er het in erslagen.

da wider rief der biscoph:

5510

«uil unnach ist iz noch:

ich uergilte dir ‹den› stich.»

mit zorne huber sich;

er stach in durch di halsperge,

er warf in unwerde

5515

dem rosse uber di goffen.

er sprach: «nu hastu gar uerstochen!»

 

Turpin wart innen

der haiden grimme,

daz si mit Roulante striten.

5520

er begonde unsiten.

er sprach: «ich sehe Roulant

unt Oliuir den wigant

mit nacheten swerten.

di haiden wellent inoch herten:

5525

heluen wir den lieben gesellen!

uil groz ist ir ellen.»

di helede gachten dar;

inoch heten si zwelf scar.

di uiente si umbe habeten,

5530

idoch si nicht erzageten:

di wile unt si lebeten,

uil grozlichen si sich werten.

si erslugen manigen christen man,

ouch was iz ir pan:

5535

si riefen selbe nach dem tode.

di ir charfunchel scone

uerluren gar ir schim.

des nemacht ander rat sin:

di maren herstrangen

5540

heten si umbe uangen:

sine machten nicht uon in chomen,

si musen alle samt dolen

daz in da uor was geheizen.

si cholten si mit spiezen,

5545

ir gewafen si in zeslugen;

di haiden begonden muoden.

der stal glute dar inne.

iz wart ain notlich gedinge.

si suchten selbe den tot:

5550

uil maniger den hals dar bot.

uon den rossen si uielen,

sich erbarmte da niemen.

 

Do sprach der biscoph Turpin:

«got scol sin iemir geret sin,

5555

daz wir gestriten haben hiute

mit unzalhaftem liute

ane ummazen scaden:

si sint erstichet unt erslagen,

unt wir noch gesunt leben.

5560

wer machte daz haben gegeben

wan der durch di werlt wart geborn?»

unter diu floch Malsaron,

sporen sazter zesiten;

er cherte an aine liten.

5565

Oliuir iagete im nach:

«war ist dir», sprach er, «so gach?

wer hat dir noch erloubet?»

er sluoc in uber daz houbet:

di ougen im uz sprungen.

5570

«du ware nach zefruo entrunnen!»

do sluger Torchen

unt sinen pruder Estorchen.

der spiez im in zwai prach.

Roulant zu zim sprach:

5575

«wa ist Alteclere?

Oliuir, tuot des nich[t] mere!

daz swert ist ain riterlich gewant,

iz zimt wol in iwer hant.»

Oliuir zoch Altecleren:

5580

uan Uallepecede

sluger Iustinen

durch den helm sinen.

er tailt in in zwai stucke.

daz swert er uf zuchte,

5585

er warf iz umbe inder hant.

do sprach der helt ‹Roulant›:

«nu friste dir got din leben;

den slac scolte got selbe haben gesehen!»

 

Pluot floz uber wal,

5590

der haiden ‹wart› ain michel ual.

Turpin sluc Sigeloten,

den anpetten di haiden fuor ain got.

Engelrirs sluoc Spemualriz;

da prast im sin guot spiez.

5595

Roulant wonte uf Uelentich:

nicht lebentiges im entlief.

iz wart gutes hailes:

iz ne lebete nicht uirpaines

daz im machte genahen.

5600

swes er wolte uaren,

daz muse da peliben.

Durndart tete zwiuelen.

di tiuren siges helede

iageten uon dem uelde

5605

mit nacten swerten.

di haiden nemachten da nicht mere herten.

lichte waren si ueriaget:

si waren selbe uerzaget.

diu ir ros taten sam si waren gespannen:

5610

si huluen in ubele dannen.

 

Di christen riten widere an daz wal.

der wuoft wart uber al:

si funden liebe toten.

si baten got den guten

5615

durch siner muter ere,

er rebarmot sich uber di sele,

want si durch in gemarteret waren,

daz er in sin himilriche gabe

durch aller siner truten willen.

5620

si wainten uil grimme.

ze himele begunden si ruofen.

si schuten sich uz dem gewaffen:

nach grozer muode

wolten si gerne rouwe.

5625

wol troste got siniu chint:

uon himil chom aín suoze wint;

sich eríuncte aller ir lip

sam si waren ander ersten tagezit.

do uerstunden si sich gnaden;

5630

si sprachen alle amen.

 

Uon dem wale entran ain man,

alse ich iu gesaget han:

er was ain furste mare,

alzoges ain hubiscare;

5635

gehaizen was er Margariz.

in dem ruche furt er ain spiez,

harte was er uerhouwen.

mit flize chlageten in di frouwen.

daz houbit was im gechloben.

5640

flihende er an den kunc chóm,

er rief: «chunc Marsilie, herre Marsilie!

di dine ligent alle da nidere.

din pruder ist erslagen,

din sun en mugen wir niemir uerchlagen:

5645

ich sach in ‹in› den gebaren

daz ich wolte wanen,

er scolte Rolanten erslahen.

daz ne was nicht der zagen

daz er in durch den helm sluoc.

5650

ia gefrumte der helt guot

manige wunden fraissam.

da pestunter alrest den mán

der daz lop hat gewunnen

uz allem irdiskem chunne.

5655

uor dem ist er tot gelegen:

wi macht im imer baz geschen?

herre, du macht wol dinen willen haben:

di christen ligent aller maiste da reslagen.

di aue noch da lebent,

5660

unlange si sich werent:

di ir spieze sint gar zeprochen,

di schilte sint ab in gestochen,

ir helme sint gar zehouwen.

ich nemac nicht getruwen

5665

daz si andem wal gebaiten.

heiz in nach riten!

sine mugen nicht uerre.

din craft scol uns rechen, herre!»

 

Do sprach der chunc Marsilie:

5670

«chumet uns imen mere widere

wan du ainer,

oder lebet der gesellen dehainer?

ist da wider dehainer hi bestanden?

wi stet iz umbe Roulanten

5675

unt sine gesellen alle?

ist ir dehainer geuallen?»

«daz soltu mir, herre, gelouben:

si sint uerslagen unt uerhouwen.

ich sluoc den aller besten

5680

durch ainen helm uesten,

den herzogen Urtannen

unter allen sinen mannen,

daz ich in toten liez.

ouch gefrumte ich minen spiez

5685

wol nach minem willen.

da sluoc ich ain helt snellen,

den chunen Oliuiren.

e wir unsich da schieden,

da wart der christen ain michel ual.

5690

do chomen si uf daz wal

mit ainer halscar;

die entworchtin unsih gár,

di uns den scaden allen taten:

Genelun hat uns uerraten.

 

5695

Der chunc sin selbes har uz prach,

daz wort er grimmiclichen sprach:

«wanu friunt unt man,

den ich zeliebe icht han getan!

wanu di mir heluen wellen,

5700

daz wir die gesellen

ir gelphes wider prengen!

ich gesuche si ze Karlingen,

ich zestore Paris,

des sin si in alle uil gewis,

5705

oder ich wirde also wider geslagen

daz iz alle haiden imer wol muzen chlagen.»

 

Di haiden wol garwe

ilten zu ir marhen;

ia peraiten di genoze

5710

zwaincec scare groze.

du hizer zehen tusent fur uaren;

er sprach: «ersuchet holz unt graben,

rechet mine grimme,

daz di selben getelinge

5715

sich sin niemir geruomen,

daz si den sige furen

heim zu ir chinden!

irne scult niemir erwinden

unz an des chunc Karles uan.

5720

hete wir iz inzít getan,

so were Karl hi bestanden

mit samt Roulante,

unt heten wir di ere

mih ruwet uil sere

5725

daz ich Genelune so uerre geuolget han:

des muoz daz riche imer scaden han.»

 

Di christen wurden gewarnot,

alse iz got selbe gebót.

Turpin was ain listeger man:

5730

uz den sinen er sich nam,

er gehabete an ainer warte.

do gesach er gahen harte

manigen ‹haiden› wol garwen,

manigen schilt golt uarwen,

5735

manigen liechten helm schinen.

do rant er wider zu den sinen;

er sprach: «wol uf, Roulant!

der tiuel hat uz gesant

sin geswarme unt sin her.

5740

Marsilie ritet da her.

waz mag ich iu sagen?

so getan magen

gesamt sich nie uf di erde.

der fluch muoze uber si werde,

5745

da got mit sinem gewalte

Pharaonem mit erualte:

den uerswalch daz mêr

unt al sin wotigez hêr;

den sin half er uzer not:

5750

in der wuoste gab er in daz himilprot.

der ruche ouch uns gewisen!

enphahet iwer wege wise

ze unser haim uerte!

hi wirt ain sturm uil herte».

 

5755

Di helde uf sprungen,

daz gotes lop si sungen;

si sluffen in wiges gewate,

also si des state heten.

si suchten di stole,

5760

si ilten ze dem trone

da in got mit wolte gelten,

dem uon angenge der werlte

den heiligen martereren gehaizen was.

si haizent diu prinnenten liecht uaz.

5765

swaz si gote in der toufe gehiezen,

wi war si daz allez liezen!

si waren lutter unt raine

ane rost unt ane mailen,

sam diu heiligen chindelin

5770

di durch selben minen trechtin

Herodes hiez erslahen.

den chor sculen si mit rechtir urtaile haben,

want si dem heiligen gelouben nicht entwichen:

aller slachte lastere waren si sicher.

 

5775

Di heren gotes ewarte[n]

mit flieze si sih pewarten:

si sprachen in den antlaz.

daz wuocher der heilige gaist was.

zesamne si gingen,

5780

ain ander si umbe uingen.

si peswieffen ze den brusten,

ain ander si chusten.

daz pace si ainander gaben,

si wönsten in gnaden.

5785

der biscof Turpin

habete in mittin unter in;

er sagete in uon dem gotes riche.

uil harte geduldicliche

rachten si uf ir hente.

5790

in allen uir ente

uielen si ir uenie.

sich erfroute elliu himelische menige,

daz so manc heiliger marterare

geuolgote sinim schephare,

5795

der in di suze lere uor truoc.

des erbat in sin heilige deumuot,

daz er loste wip unt man,

do er sich an daz cruce li slahen.

 

Do di waren gotes degene

5800

mit gebet unt mit segene

pegiengen ir gehorsam,

†ir aller igelich zu síním uan

nach ir gewonehaite.

di engel waren ir gelaite.

5805

si suchten aine wal stat.

Roulant in den satel trát;

er sprach: «wol ir suozen Karlinge,

ich pit iuch in der waren gotes minne:

furchtet nehain ir grozen magen:

5810

si sint di aller bosisten zagen.

habent si grozer riterscaft,

got gibet uns urmare craft.

si werde[n]t hiute unser fuz schamel,

si geligent uil iamer:

5815

wir zetreten si in ir pluote.

owol ir helde guote,

gedenchet waz iu dar umbe gehaizen si!

machen wir di sele fri!

swem got die gnade git

5820

daz er durch sinen schephare hi geliget,

(daz ist der heilige Crist

der durch unsich gemarteret ist)

der hat daz cruce ansich genomen,

(er ist uolliclichen chomen

5825

ze chunclichen eren)

der sihet sinen herren

insiner gothaite:

dar muget ir gerne arbaite.»

 

Marsilie sprach zu den sinen:

5830

«irne scult in nicht entliben.

nemet zehenzec tusent man:

Grandon fure den uan,

der furet si wol dar.

uil schiere peraitet funfzehen scar!

5835

habet manlich gemuote!

den uaigen nemac nieman behuote,

diu erde enmacht in nicht uf gehaben:

scol er da werden erslagen,

er sturbe doch da haime,

5840

unt entrinnet ir dehaine,

an dem libe unt an den eren

uberwindet ir iz nimer mere.

waz mugen si uns gescaden?

ir spieze habent si zeslagen,

5845

ir schilte sint zeprochen,

der stal ab in gestochen,

ir helme garwe zehouwen.

wert iuh also ich iu getruwe!

rechet Alroten!

5850

huotet uil genote

daz ir dehainer entrinne:

al iwer chunne hat mine minne.»

 

Di haiden huben michelen scal,

si draueten an daz ‹wal›,

 

Die Heiden blasen zum Angriff

(P, fol. 80v)

 

5855

ir wiclît si sungen,

ir herhorn chlungen:

uil michel wart ir duz.

Thibors uon Sarraguz,

ain wirt in der helle,

5860

Genelunes geselle,

ain grunt aller ubele,

Engelirsen uon Wasconie

stach er durch di halsperge:

du muser zu der erde.

5865

er warf in nider toten,

er sprach: «ich han Alroten

mit michelen eren gerochen.

diu ainunge ist zeprochen:

der zwelue ist der turisten ainer gelegen;

5870

si muzen hiute uns den cins geben.»

di haiden huben ir rufen,

zetoben unt zewouffen.

des siges heten si sich zefruo geruomet.

di christen waren da harte getruobet.

 

5875

Oliuir der edele man,

uz den sinen er sich nam.

uor der scar er in errait,

uil sere er in uersnait

uon dem helme unze an di swertes schaiden:

5880

tot uiel der haiden.

do sprach der helt Oliuir:

«wol uergolten han ich dir

mit dem guten Alteclere.

dune darft dich der eren

5885

niemir gerumen

di du uon uns macht gefuren.»

er sluoc Alfabinem

durch den helm sinen

unz an sin sculterplat:

5890

unter den anderen er tot lác.

dar nach sluger siben herren:

«dine machen uns nehainen werren,

wir birn uor in gewis.

gerochen ist Englirs;

5895

iwer sint niúne gevallen.

iz ist inoch unergangen:

ir werdet unterdrungen!»

daz swert was mit pluote berunnen

uaste unze di hant.

5900

do sprach der helt Roulant:

«din muter truoc aine salige purde;

got wile daz du geborn wurde:

du hast daz riche hiute wol geret.

Altecleren sint si geleret.

5905

der †iou ist widir gewunnen.

si heten zefroue gesungen.

Englirs tot

pringet si hiute in groze not.

ich gelere si Durndarten,

5910

ich gemache helm scarten,

ich slahe si uon dem uelde.»

duo huben sich die helde

an ir wider winnen.

da wart michel grisgrimmin.

5915

Egeries da uor was,

wem gescach ie baz?

daz swert er umbe graif,

manic haiden im entwaich:

sine bliche waren fraislich.

5920

ain geuelle hiwer umbe sich

daz er selbe chume uz gebrach.

Peringer daz ersach,

sin herce im spilte:

den helm sazter ze schilte,

5925

daz ros hiwer mit den sporen.

harte rach er sinin zorn:

er sluoc allenthalben

di haiden uon den marhen.

er uant den helt gesunden

5930

ane aller slachte wunden;

er half im da widere.

der haiden gelac uor im nidere

siben hundert unt mere.

daz ist ain rechter herre

5935

der durch sin liut

also groz wunder tuot.

inoch hat er den selben sit:

swer im mit truwen ist mit,

wil er zu im ruofen,

5940

er chan im wol geheluen.

 

Oliuir unt Roulant

di huben sich entsamt:

di uil lieben her gesellen

ubten ir groz ellen.

5945

wol huluen in di Karlinge.

da macht man sehen prinnen

den flins stal herten.

si hiwen sich mit den swerten,

daz si selben wolten wane

5950

daz daz himilfûr ware

chomen uber alle di erde,

daz der suontac scolte werde.

daz fur gegen den luften pran.

da uiel manic haidenischer man,

5955

manc furste edele.

di Turpines helede

drungen nach ir herren;

tote unt sere

frumten si williclichen:

5960

si uachten nach dem gotes riche,

daz in dar umbe gehaizen was.

wa gescach imen ze dirre werlt ie baz?

want siu ellu laster an in erslugen

unt Christes ioch uf in truogen

5965

unz an ir ende,

des enphi zu siner hende

der al waltente herre

ir uil raine sele.

 

Di christen an dem wal

5970

uielen ummazen zetal.

lutzel di haiden des genuzzen:

inir pluote si hin fluzzen,

erstichet unt ertrunchen,

in den helle grunt uersunchen.

5975

di cristen riefen alle samt:

«owol du herre Roulant,

uoget der Karlinge,

durch soteniu gimme,

aller riter ere,

5980

ne spar si nicht mere!»

also Roulant ersach

der christen groz ungemach,

er muse uor iamer wainen.

do cherter uf di haiden;

5985

wol hancte im Uelentich;

er gefrumte umbe sich

daz man wol uon im scriben mac

unz an den iungisten tac.

swelhen er da errait,

5990

also sere er in uersnait

daz er mere niemen irte.

er sluoc in an der uerte

mere denne uir hundert man.

do cherter auer uon in dan,

5995

er sprach zu Oliuire:

«owi hergeselle liebe,

wi gerne plise ‹ich› min horn,

ob uns ‹der kaiser› zehelue machte noch chom!

daz liut ist in grozen fraisen.