BIBLIOTHECA AUGUSTANA

 

Das Nibelungenlied

1190/1200

 

 

Handschrift B

 

2. Aventiure

 

___________________________________________________

 

 

Do wohs in Niderlanden.     eins vil edelen kvneges kint

des vater der hiez Sigemvnt.     sin mvoter Sigelint

in einer rîchen bverge     wîten wol bechant

nidene bi dem Rine     div was ze Santen genant

Sivrit was geheizen     <der> snelle degen gvot

er versvochte vil der riche     dvrch ellenthaften mvot

dvrh sines libes sterche     er reit in menegiv lant

hey waz er sneller degene     sit cen Bvrgonden vant

20

In sinen besten ziten     bi sinen ivngen tagen

man mohte michel wnder     von Siveride sagen

waz eren an im wechse     vn wi scoene was sin lip

sit heten in ce minne     div vil wætlichen wip

21

Man zoch in mit dem vlize     als im daz wol gezam

von sin selbes mvote     waz tvgende er an sich nam

des wrden sit gezieret     sines vater lant

daz man in ze allen <dingn>     so rehte herlichen vant

22

Er was nv so gewachsen     daz er ze hove reit

di livte in sahen gerne     manech frovwe vn manech [292a] meit

im wnschten daz sin wille     in immer trvege dar

holt wrden im genvoge     des wart der herre wol gewar

23

Vil selten ane hvote     man riten lie daz kint

in hiez mit chleidern ziern     Sigmvnt vn Siglint

sin phlagen ovch di wisen     den êre was bechant

des moht er wol gewinnen     beide livte vnde lant

24

Nv was er in der sterche     daz er wol wafen trvoch

swes er dar zvo bedorfte     des lag an im genvoch

er begvnde mit sinnen     werben scoeniv wip

di trvten wol mit eren     des chvenen Sivrides lip

<Do> hiez sin vater Sigmvnt     chvnden sinen man

er wolde hohgecite     mit liebn vriwenden han

div mære man do fvorte     in ander chvnege lant

den vremden vn den chvnden     gab er ross vn gvot <gwant>

26

Swa man vant deheinen     der riter solte sin

von art der sinen mage     div edeln kindelin

div ladet man zvo dem lande     dvrh di hohgecit

mit dem ivngen kvnege     swert genamen si sit

<Von> der hohgecite     man mohte wnder sagn

Sigmvnt <vnde> Siglint     di mohten wol beiagn

mit gvote michel ere     des teilte vil ir hant

des sach man vil der werden     nv zin riten in daz lant

28

Vier hvndert swertdegene     di solden tragn chleit

mit samt Sivride     vil manech scoeniv meit

von werche was vnmvezech     wan si im waren holt

vil der edelen steine     die frovwen leiten in daz golt

29

die si mit porten wolten     wrchen vof ir wat

den ivngen stolzen rechen     des newas niht rat

der wirt der hiez do sideln     vil manegn chvenen man

ce einen <Svnewenden>     da sin svn Sivrid wol riters namn gewan

Do gie ce einem mvenster     vil manech richer chneht

vn manech edel riter     di wisen hetn reht

daz si den tvmben dienten     als in was ê getan

si heten chvrzewile     vnd ovch vil maneger vrevden wan

31

Got man do cen ern     eine messe sanch

do hvop sih von den livten     vil michel der gedranch

da si ce riter wrden     nah riterlicher ê

mit also grozen ern     daz wætlich immer mer ergê

32

Si liefen da si fvnden     gesatelt manech march

in hove Sigmvndes     der bvhvrt wart so starch

daz man erdiezen horte     Palas vn Sal

di hohgemvoten degene     di heten grozlichen schal

33

Von wisen vn von tvmben     man horte manegen stoz

daz der scefte brechen     gein <den> lveften doz

trvonzvne sach man vliegen [292b]     fver den palas dan

von maneges rechen <hende>     daz wart mit vlize getan

Der wirt der bat ez lazen     do zoch man div march

man sach ovch da cebrochen     vil manege bvkel starch

vil der edelen steine     gevellet v^f daz gras

ab liehten schildes spangen     von hverten daz gescehen was

35

Do giengens wirtes geste     da man in sizzen riet

vil der edelen spise     si von ir mvede sciet

vnt win der aller beste     des man in vil getrvoch

den vremden vn den chvnden     bot man ern genvoch

<Swi> vil si chvrzwile     pflagn al den tach

vil der varender diete     rwoe sich bewach

si dienten nach der gabe     di man da riche vant

des wart mit lobe gezieret     allez Sigmvnds lant

37

Der herre der hiez lihen     Sivrit den ivngen man

lant vn bvrge     als er het ê getan

sinen swertgenozen     den gap do vil sin hant

do liebt in div reise     daz si chomn in daz lant

38

Div hohgecit div werte     vnz an den sibenden tach

Siglint div riche     nach alten siten pflach

dvrh ir svns liebe     teilen rotez golt

si chvndez wol gedienen     daz im di livte waren holt

39

Vil lvcel man der varnder     armen da vant

ross vnd chleider     daz stovb in von der hant

sam si celebne heten     niht mer deheinen tach

ich wæn ie ingesinde     so grozer milte gepflach

<Mit> loblichen eren     sciet sich div hohgecit

von den richen herrn     horte man wol sit

daz si den ivngen wolden     ce eime herren han

des engerte niht her Sivrit     der vil wætliche man

41

Sit daz noch beide lebten     Sigmvnt vn Siglint

niht wolde tragen chrone     ir beider liebez chint

doch wolder wesen herre     fver allen den gewalt

des in den landen vorhte     der degen chven vnd balt