BIBLIOTHECA AUGUSTANA

 

Das Nibelungenlied

1190/1200

 

 

Handschrift C

 

33. Aventiure

 

___________________________________________________

 

 

Auentv wie Danchwart div maer ze hove

sinen herren braht

 

<Uil> lvote rief do Danchwart     eime degene

ir sizzet al ze lange     brvoder Hagene

iv vn got von himele     chlage ich vnser not

ritter vn knehte     sint in der herberge tot

2006

Er rief im engegene     wer hat daz getan

daz hat der herre <Bloedel>     vn sine man

ovch hat ers niht genozzen     div wil ich iv sagen

ich han im sin hovbet     mit minen handen abe geslagen

2007

Daz ist ein schade kleine     sprach aber Hagene

swa man solhiv mære     saget von degene

ob er von rechen handen     verlivset sinen lip

in svln deste ringer     klagen wætlichiv wip

2008

Nv saget mir     lieber brvoder     wie sit ir so rot

ich wæn ir uon wnden     lidet groze not

ist er inder inme lande     derz iv hat getan

in erner der <vbel> tivfel     ez mvz im an sin leben gan

2009

Ir seht mich wol gesunden     min wat ist blvotes naz

von ander mannen wnden     ist mir geschehn daz

der ich also manigen     hivte han erslahen

ob ich des swern solde     ine chvndez nimmer gesagen

Er sprach     brvoder Danchwart     so hvtet vns der tver

vn enlat der Hvnen einen     chomen niht derfver

ich wil reden mit den rechen     des vns nv dwinget not

vnser ingesinde     lit vnverdienet hie tot

2011

Sol ich sin kamerære     sprach do der kvene man

also richen kvnegen     ich wol gedienen chan

<so> ich der stiegen     nach den eren min

den Chriemh' degenen     chvnde leider niht gesin

2012

Mich nimt des michel wnder     sprach do Hagene

rvnen in disem gademe

si wæn des lihte enbêrn     der an der tver dort stat

vn ovch div hovemære     gesaget den Bvrgonden hat

2013

Ich han gehort vil lange     von Chriemh' sagen

daz si ir hercen leide     wolde niht vertragen

nv trinchen wir die minne     vn gelten skvniges win

der [72r]ivnge vogt der Hvnen     der mvoz hie der erste sin

Do slvoc daz kint Ortlieben     Hagen der helt gvot

daz im an dem swerte     zer hende vloz daz blvot

vnt daz des kindes hovbet     spranch Chriemh' <in> ir schoz

do hvop sich vnder degenen     ein mort vil grimmech vn groz

2015

Ovch slvoger den magetzogen     einen swinden slac

mit beiden sinen handen     der Ortliebes pflac

daz im daz hovbet schiere     vor tischen nider lac

ez was ein iæmerlicher lon     den er dem magtzogen wach

2016

Er sach vor Ezeln tische     einen spileman

Hagen in sime zorne     gahen dar began

er slvog im vf der videlen     ab die einen hant

daz habe der boteschefte     in der Bvrgonden lant

2017

Owe mir     sprach Werbel     der Ezeln spileman

her Hagen von Tronege     waz het ich iv getan

ich kom vf groze triwe     in iwer herren lant

wie chlenche ich nv die doene     sit ih nv verlorn han die hant

Hagenen ahte ringe     gevidelter nimmer mer

do frvmt er in dem hvse     div werch grimmen ser

an den Ezelen rechen     der er so manigen slvoc

er braht ir in dem gademe     zvo dem tode genvoc

2019

Volker sin geselle     von tische spranch

sin videlboge im lvote     an siner hende erchlanc

do videlte vngefvege     der kunige spileman

hey waz er im ze vienden     der chvnen Hvnen gewan

2020

Do sprvngen von den tischen     die drie kvnige her

si woldenz gerne scheiden     e des schaden wrde mer

sine chvndenz mit ir sinnen     do niht vnderstan

do Volker vn Hagene     so sere weten began

2021

Do sach der vogt von Rine     vngescheiden den strit

do slvoc der fvrste selbe     vil manige wnden wit

dvrch die liehten ringe     den vianden sin

er was ein helt zen handen     daz wart da grozlichen schin

Do chom ovch zvo dem strite     der starche Gernot

ia frvomt er den Hvnen     vil manigen helt tot

mit dem scharpfen swerte     daz im gap Rvdeger

den Ezeln magen     frvmrer div grozlichen ser

2023

Der ivnge svon frovn Vten     zvo dem strite spranch

sin wafen herrenliche     dvrch die helme erchlanc

den Ezeln rechen     vzer Hvnen lant

da tet vil michel wnder     div Giselheres hant

2024

Swie frvom si alle wæren     die kvnige vn ovch ir man

doch sah man Giselhere     ze vorderest stan

bi den vianden     er was ein helt gvot

er schvf da mit den wnden     vil manigen nider in daz blvot

2025

Ovch werten sich vil sere     die Ezeln man

do sah man die geste     howende gan

mit den liehten swerten     dvrch des kvniges sal

do hort man allenthalben     von strite grozlichen schal     [72v]

Do wolden die dar vzen     mit frivnden sin dar in

si namen an der stiegen     vil kleinen gewin

do wolden si dar inne     vil gerne fvr die tver

done lie der portenære     ir deheinen dar fver

2027

Do hvop sich in der porte     vil grozer der gedranc

vn ovch von den swerten     vf helme lvoter klanc

des chom der kvne Danchwart     in vil starche not

daz bedahte Hagene     als im sin triwe gebot

2028

Vil lvte rief do Hagene     Volkern an

seht ir dort     geselle     minen brvoder stan

vor hvnischen rechen     vnder starchen slegen

frivnt     nert mir den brvoder     ê wir vliesen den degn

2029

Daz tvon ich sicherlichen     sprach der man

er begvnde vil videlende     dvrch den palas gan

ein scharpfez <swert> im diche     an siner hende erchlanc

die rechen bi dem Rine     sagten im des grozen danch

2030

Volker der vil chvene     zvo Danchwarte sprach

ir habt erliten hivte     grozen vngemach

mich bat iwer brvoder     dvrch helfe zv zw gan

welt ir nv sit dar vze     so wil ich inrethalben stan

2031

Danchwart der vil snelle     stvnt vzerhalp der tver

do wert er in die stiegen     swaz ir chom der fver

des hort man waffen hellen     an der helede hant

sam tet ovch inrethalben     Volker von Bvregonden lant

Der chvne videlære     rief zvo dem degene

daz hvs ist wol beslozen     frivnt Hagene

ez ist also verschranchet     div Ezeln tver

von zweier rechen handen     da <gent> wol tvsent rigel fver

2033

Do der starche Hagene     die tver so sach behvot

den schilt warf do zervcke     der chvne degen gvot

do erst begunder rechen     siner frivnde leit

sines zornes mvose engelten     vil manic ritter gemeit

2034

Do der voget von Berne     daz wnder reht ersach

daz Hagene der starche     so manigen helm brach

der kunic der Amelvnge     sprach vf einen banch

er sprach     hie schenchet Hagene     daz aller wirsiste tranch

2035

Der wirt het groze sorge     sin wip div het alsam

waz man im lieber frivnde     vor sinen ovgen nam

wander von sinen vinden     vil chvme da genas

er saz vil angestliche     waz half in daz er kunec was

Chriemh' div frowe     rief Dietrichen an

nv hilf mir von dem sedele     ritter     von in dan

dvrch aller fvrsten tvgende     vz Amelvnge lant

vn erreichet mich dort Hagene     ich han den tot an der hant

2037

Wie sol ich iv gehelfen     sprach do Dietrich

vil edeliv kuneginne     nv sorge ich vmbe mich

ez sint so sere erzvrnet     die Guntheres man

daz ich an disen citen     gevriden niemen enchan

2038

Neina     herre Dietrich     vil edel ritter gvot

laza hivte schinen     den tvgentlichen [73r]mvt

daz dv mir helfest hinnen     oder ich belibe tot

nv hilf mir vn dem kvnige     vz dirre angestlicher not

2039

Daz wil ich versvochen     ob ich iv helfen chan

wande ich in langen citen     niht gesehn han

so pitterlich erzvrnet     manigen ritter gvot

ia <sahe> dvrch die helme     von swerten vliezen daz blvot

2040

Mit chraft begunde rufen     der degen vz erchorn

daz im sin stimme erlvote     alsam ein wisents horn

vn daz der palas wite     von siner chraft erdoz

div sterche Dietriches     was vil vnmæzliche groz

Do gehorte Gvnther     rvfen disen man

in dem starchen stvrme     losen er began

er sprach     Dietriches stimme     ist in min ore chomen

ich wæn im vnser degene     etewen hie benomen

2042

Ich sihe in vf dem tische     er winchet mit der hant

ir frivnt vn mage     von Burgonden lant

gehabt vf des strites     lat hoeren vn sehn

waz hie Dietriche     von vns ze schaden si geschehn

2043

Do der kunic Gunther     bat vn ovch gebot

si habten vf mit swerten     in des stvrmes not

daz was gewalt vil grozer     daz do niemen streit

do reiten mit ein ander     die kvnen rechen gemeit

2044

Er sprach     vil edel Dietrich     waz ist iv hie getan

von den minen magen     willen ich des han

svne vn bvze     bin ich iv bereit

swaz iv iemen tæte     daz wær mir inneklichen leit

Do sprach der herre Dietrich     mir ist noch niht getan

des ich schaden deheinen     von iv mvge han

wan lar mih von dem strite     mit dem gesinde min

daz wil ich vmbe ivch degene     immer dienende sin

2046

Wie vleget ir so sere     sprach do Wolfhart

iane hat der videlære     die tver nie so verspart

wir entsliezen si so wite     daz wir dar fvre gan

nv swiget     sprach her Dietrich     ir habt den tivfel getan

2047

Do sprach der kunic Gvnther     erlovben ich iv wil

fvret vz dem hvse     lvzzil oder vil

ane mine vinde     die svln hie bestan

si habent mir zen Hvnen     leides vil getan

2048

Der herre von Berne     vnder einen arm besloz

die edeln kuniginne     der angest div was groz

do fvrt er anderthalben     Ezeln mit im dan

ovch giengen mit im dannen     sehs hvndert siner chvener man

Do sprach der marcgrave     der edel Rvdeger

sol aber ozem hvse     iemen chomen mer

die iv doch dienen gerne     daz lazet vns vernemen

so sol ovch fride der stæte     gvten frivnden immer zemen

2050

Des antwrte Giselher     sime sweher zehant

vride vn svone     si iv von uns bechant

sit ir sit triwen stæte     beide ir vn iwer man

svlt gemeinliche     mit iwern frivnden hinnen gan

2051

Do der marcgrave     gervmte den sal

fvnf hundert vn mere     [73v]im volgten zetal

die stiegen von dem hvose     daz warn sine man

von den der kvnec Gvnther     vil grozen schaden sit gewan

2052

Do sach ein Hvnen reche     Ezelen gan

bidem Bernære     genozzen wolders han

dem gap der videlære     einen swern slac

daz im vor Ezeln fvezen     daz hovbet schiere gelac

Do der wirt des landes     chom von dem hvse dan

do cherte er sich hin widere     vn sach Volkeren an

owe mir dirre geste     daz ist ein grimmniv not

daz alle mine frivnde     svln vor in ligen tot

2054

Ach we der hochgecite     sprach der kvnec her

da vihter einer inne     der heizet Volker

alsam ein eber wilde     vn ist ein spileman

ich danches mime heile     daz ich dem valande entran

2055

Sine leyche lvtent vbele     sine zvege die sint rot

ia velent sine doene     vil manigen helt tot

ine weiz niht waz vns wize     der selbe spileman

wan ich gast neheinen     nie so leiden gewan

2056

Zir herbergen giengen     die rechen also her

der herre von Berne     vn ovch Rvdeger

sine wolden mit dem strite     niht ze schaffen han

vn gebvten ovch ir degenen     daz sis mit fride solden lan

2057

Vn heten si getrowet     alsolher swære

daz in div von in beiden     so chvnftich wære

sine wærn von dem <hvse>     niht so sanfte chomen

si <heten> eine strovfe     an den vil chvnen ê genomen

Si heten die si wolden     lazen vz dem sal

<do> hvop sich inrethalben     ein grozlicher schal

die geste sere rachen     daz in ê geschach

Volker der vil chvene     hey waz er liehter helme brach

2059

Sich cherte gein dem schalle     Gunther der kunec her

hort ir die doene     Hagene     die dort Volker

mit den Hvnen videlet     swer gegen der tvor gat

ez ist ein roter anstrich     den er zem videlbogen hat

2060

Mich riwet ane maze     sprach do Hagene

daz ich vor Volkere     ie gesaz dem degene

ich was sin geselle     vn ovch er der min

vn chom wir immer widere     daz svln wir noch mit triwen sin

2061

Nv schowe     kvnec Gvnther     Volker ist dir holt

er dienet willechliche     din silber vn <din> golt

sin videlbogeim snidet     dvrch den herten stal

er brichet vf den helmen     div liehten schinende mal

2062

Man gesach nie videlære     so herlichen stan

also der degen Volker     hivte hat getan

die sinen leyche hellent     dvrch helm vn dvrch den rant

ia sol er riten gvtiv ros     vn tragen herlich gewant

Swaz der Hvnen mage     in dem hvse was gewesen

der enwas nv deheiner     dar inne genesen

des was der schal geswiftet     daz niemen mit in streit

div swert von [74r]handen legeten     die kvnen degene gemeit