Der Nibelunge Nôt

11. Aventiure

___________________________________________________

Aventivre wie sifrit sin wip heim ze lande fvrte

vnd wie er sit da heime brvotten

690

Do di geste waren | alle dan gevarn

do sprach ce sinem gesinde | sigemvndes barn

wir svln vns ovch bereiten | haeim in miniv lant

liep was ez sinem wibe | do ez div vrowe reht ervant

691

si sprach zv zir manne | wenne svl wir varn

daz ich so harte gahe | daz heiz ich wol bewarn

mir svln e mine brveder | teilen mir div lant

leit was ez sifride | do erz an criemhild ervant

692

di fvrsten zv zim giengen | vnt sprachen alle dri

nv wizet daz her sifrit | daz iv immer si

mit triwen vnser dienest | bereit reht vnz an den tot

do neig er den daegenen | do man imz so gvtlich erbot

693

wir svln ovch mit iv teilen | sprach giselher daz chint

lant vnt bvrge | di vnser eigen sint

vnd swaz der witen riche | ist vns vndertan

der svlt ir teil vil gvten | mitsamt criemhilde han

694

svn der sigemvndes | zv den fvrsten sprach

do er der herren willen | gehorte vnd sach

got laz iv iwer erbe | immer saelich sin

vnt ovch di lvete darinne | ia getvt div liebe wine min

695

des teiles wol ce rate | den ir ir woldet geben

da si sol tragen chrone | vnt sol ich daz gelaeben

si mvz werden richer | danne iemen lebendiger si

swaz ir svs gebietet | des pin ich iv dienestlichen bi

696

do sprach div vrowe criemhilt | habt ir der erbe rat

vmb bvrgende daegene | so liht ez niht en stat

si mvg ein chvnich gerne | fvren in sin lant

ia sol si mit mir teilen | miner liben brvoder hant

697

do sprach der herre gernot | nv nim dir swen dv wil

di gerne mit dir ritent | der vindestv hi vil

von drizech hvndert rechen | wir geben dir tvsent man

di sin din heimgesinde | criemhilt do senden began

698

nach hagen von tronege | vnd ovch nach ortwin

ob di vnt ovch ir mage | criemhilde wolden sin

do gewan darvmbe hagene | ein zornlichez leben

er sprach ia ne mach vns gvnther | ce werlde niemen gegeben

699

ander iwer gesinde | di lat iv volgen mite

want ir doch wol bechennet | der tronegaere site

wir mvoezen bi den chvnigen | hir en hove bestan

wir svln in langer dienen | den wir alher gevolget han

700

daz liezen si beliben | do bereiten si sich dan

ir edel ingesinde | vrov criemhilt zv zir gewan

zw vnt drizech meide | vnt fvmpfhvndert man

eckewart der grave | der volgete sifride dan

701

vrlovp si alle namen | beidiv ritter vnt chneht

maegede vnd vrowen | daz was michel reht

gescheiden chvssende | wurden si cehant

si rvmten vroelichen | des kvnech gvntheres lant

702

do beleiten si ir mage | vil verre vf den wegen

man hiez in allenthalben | ir nahtsaelde laegen

swa si se gerne namen | al dvrch der chvnige lant

do wurden botten balde | sigemvnde dan gesant

703

daz er daz wizen solde | vnt ovch sigelint

daz sin svn chomen wolde | vnd ovch vrovn vten chint

criemhilt div vil schone | von wormez vber rin

do ne chvnden in div maere | nimmer lieber gesin

704

so wol mich sprach do sigmvnt | daz ich gelaebet han

daz criemhilt div vil schone | sol hie gechronet gan

des mvozen wol getiwert | sin al div erbe min

min svn der edel sifrit | sol hie selbe chvenech sin

705

do gap div edele sigelint | vil manigen samit rot

silber vnt golt vil swaere | daz was ir bottenbrot

si vrevte sich der maere | div si do vernam

sich chleidete ir ingesinde | mit vlize als in do wol gezam

706

man sagete wer da chome | mit im in daz lant

do hiezen si gesidele | rihten sa cehant

darzv er gecrhonet | vor vrivnden solde gan

do ritten im engegene | des chvnich sigemvndes man

707

ist iemen baz enpfangen | daz ist mir vmbechant

danne di helde maere | in sigemvndes lant

sigelint div schone | criemhilt engegene reit

mit maniger vrowen schonen | ir volgeten ritter gemeit

708

in einer tageweide | da man di geste sach

di chvnden vnt di vremden | liden vngemach

vnz daz si chomen | ceiner bvrge wit

div was geheizen santen | da si chrone trvgen sit

709

mit lachendem mvnde | sigelint vnt sigmvnt

chvsten criemhilt | dvrch liebe ce maniger stvnt

vnt ovch sifrit | in was ir leit benomen

allez ir gesinde | was in groze willechomen

710

man bat di geste bringen | fvr sigmvndes sal

di schonen ivnchvrowen | di hvp man da ce tal

nider von den moeren | da was vil manich man

do man den schonen | vrowen mit vl vlize dienen began

711

swi groz ir hohzit | bi dem rine was bechant

noch gap man den helden | hie vil bezer gewant

denne si ie getrvgen | noch bi allen ir tagen

man mohte michel | wunder von ir richeite sagen

712

do si in ir hohen eren | sazen vnd heten genvch

waz goltvarwer geren | ir ingesinde trvch

perln vnd edel gesteine | verwieret wol darin

svs pflach ir vlizechlichen | sigelint div edel chvenegin

713

do sprach vor sinen vrivnden | der herre sigemvnt

den sifrides magen | tvn ich allen chvnt

er sol vor disen recken | di mine chrone tragen

div maere horten gerne | di von niderlande sagen

714

er bevalch im sin | gerihte crone vnd ovch daz lant

sit was er ir aller meister | di er ce rehte vant

vnt dar er riten solde | daz wart also getan

daz man sere vorhte | der shonen crimhilden man

715

in disen grozen eren | lebet er daz ist war

vnd rihte vnder chrone | vnz an daz cehende iar

daz div vil schone vrowe | einen svn gewan

daz was des chvneges magen | nach ir willen ergan

716

den ilte man do tovffen | vnd gap im einen namen

gvnther nach sinem oheim | des en dorft er sich niht schamen

geriet er nach den magen | daz waer im wol ergan

do zoh man in mit vlize | daz was von shvlden getan

717

in den selben ziten | starp vrov sigelint

do het den gewalt mit alle | der edeln voten chint

der so richen vrowen | ob landen wol gezam

daz chlagten do genvge | ds si der tot von in genam

718

nv het ovch dort bi rine | so wir horen sagen

bi gvnther dem richen | einen svn getragen

prvnnhilt div schoene | in bvergvnden lant

dvrch des heldes liebe | wart er sifrit genant

719

wi rehte vlizechlichen | sin man hveten hiez

gvnther der edele | im magezogen liez

di ez wol chvnden ziehen | ce einem biderbem man

hey waz im vngelveche | sit der vrivnde an gewan

720

maere zallen ziten | der wart vil geseit

wi rehte lobelichen | di recken vil gemeit

lebten zallen stvnden | in sigemvndes lant

alsam tet ovch gvnther | mit sinen magen vzerchant

721

daz lant cen nibelvngen | sifride diente hie

richer siner mage | wart noch deheiner nie

vnt ovch nibelvnges recken | vnt ir beder gvt

des trvch der vil chvene | deste hoehern mvt

722

hort den allermeisten | den helt ie gewan

ane di es e pflagen | haete nv der chvene man

den er vor einem berge | mit siner hende erstreit

darvmbe slvch er ce tode | vil manigen ritter gemeit

723

er heten wunsh der eren | vnt waere des niht geshehen

so mvese man von schvlden | dem edeln rechen iehen

daz er waere ein der beste | der vf oerss ie gasaz

man vorhte sine sterche | vnt tet vil pilliche daz