Der Nibelunge Nôt

35. Aventiure

___________________________________________________

Aventivre wie irinch

erslagen wart

2028

Do rief von tenemarche | der margrave irinch

ich han vf ere lazzen | nv lange miniv dinch

vnde han in volches stvermen | des besten vil getan

nv brinch mir min gewaeffen | ia wil ich hagenen bestan

2029

daz wil ich widerraten | sprach do hagene

so heiz vf hoher wichen | der hivnen degene

gespringent iwer zwene | oder dri in den sal

di sende ich vil vngesvnde | di stiegen wider hin ce tal

2030

darvmbe ichz niht laze | sprach aber irinch

ich han ovch e versvchet | sam sorchlichiv dinch

ia wil ich mit dem swerte | dich einen bestan

waz hilfet vebermveten | daz dv mit rede hast getan

2031

do wart gewaffent balde | der degen irinch

vnde irnfrit von dveringen | ein chvener ivngelinch

vnd hawart der vil starche | wol mit tvsent man

swes irinch begvnde | si woldens alles im gestan

2032

do sah der videlaere | eine vil groze shar

di mit iringe | gewaffent chomen dar

si trvgen vf gebvnden | vil manegen helm gvt

do wart der chvene volker | ein teil vil zornech gemvt

2033

seht ir vrivnt hagene | dort iringen gan

der ivh mit dem swerte | lobt eine bestan

wi zement helde lvgene | ich wil vnprisen daz

ez gent mit im gewaffent | wol tvsent recken oder baz

2034

nv heiz et mich niht liegen | sprah hawartes man

ich wilz gerne leisten | swaz ich gelobt han

dvrh deheine vorhte | wil ich es ab gan

swi grivlich si nv hagene | ich wil in eine bestan

2035

ze fvzen bot sich irinch | magen vnd man

do in eine liezen | di recken bestan

daz taten si vngerne | wand in was wol bechant

der vebermvete hagene | vzer bvrgonden lant

2036

do bat er si so lange | daz ez sit geschach

do daz ingesinde | den willen sin ersach

daz er warp nach eren | do liezen si in gan

do wart von in beiden | ein grimmez striten getan

2037

irinch von tenemarche | vil hohe trvch den ger

sich dachte mit dem schilde | der tiwer degen her

do lief er vf ce hagenen | vaste fver den sal

do hvb sich von den degenen | ein vil grozlicher schal

2038

do shvzen si di gere | mit chrepfte von der hant

dvrch di vesten shilde | vf liehtez ir gewant

daz di gerstangen | vil hohe draeten dan

do griffen zv den swerten | di zwene grimme chvene man

2039

des chvenen hagen ellen | daz was starche groz

do slvch ovch vf in irinc | daz al daz hvs erdoz

palas vnd tvrne | erhvllen nach ir slegen

do ne chonde niht verenden | des sinen willen der degen

2040

irinch der lie hagenen | vnverwundet stan

zv dem videlaere | gahen er began

er wande er moehte in twingen | mit sinen herten slegen

do chonde sich wol beshermen | volker der degen

2041

do slvch der videlaere | daz veber des schildes rant

draete daz gespenge | von volkeres hant

den liez er do beliben | ez was ein vebel man

do lief er gventheren | von den bvrgonden an

2042

do was ir ietweder | ce strite starch genvch

swaz gventher vnd irinch | vf einander slvch

daz brahte niht von wunden | daz vliezende plvt

daz behvte ir gewaeffen | daz was starch vnde gvt

2043

gventhern er lie beliben | vnd lief gernoten an

daz fiwer vz den ringen | er howen im began

do hete von bvrgonden | der starche gernot

den chvenen iringen | erslagen naehelichen tot

2044

do spranch er von dem fversten | snel er was genvch

der bvrgonden viere | der helt vil balde slvch

des edeln ingesindes | von wormez vber rin

do ne chvnde giselher | nimmer zorneger gesin

2045

got weiz her irinch | sprach giselher daz chint

ir mvezet mir di gelten | di vor iv tot sint

gelegen hi ce stvnde | do lief er in an

er slvch den tenlender | daz er mvse da bestan

2046

er shoz vor sinen handen | nider in daz plvt

daz si alle wolden waenen | daz der helt gvt

ce strite nimmer mere | geslvch einen slach

irinch doh ane wunden | hie vor giselhern lach

2047

von des swertes doze | vnde von des helmes chlanch

waren sine witze | worden harte chranch

daz sich der degen chvene | des lebens niht versan

daz het mit sinen chrepften | der starche giselher getan

2048

do im begonde entwichen | von dem hovbte der doz

den er e da dolte | von dem slage groz

er dahte ich pin noch lebende | vnd ninder wunt

nv ist mir allererst | daz ellen giselheres chvnt

2049

do hort er beidenthalben | di viande stan

wisten si div maere | im waere noch mer getan

ovch het er giselheren | da bi im vernomen

er dahte wi er solde | von den vianden chomen

2050

wi rehte tobeliche | er vz dem plvot spranch

siner snelheite | er mohte sagen danch

do lief er vz dem hvse | da er aber hagen vant

vnd slvch im slege grimme | mit siner ellenthafter hant

2051

do dahte hagen | dv mvst des todes wesen

dich en vride der vbel tivel | dv ne chanst niht genesen

doch wunte irinch hagenen | dvrch sinen helmhvt

daz tet der helt mit waschen | daz was ein waffen also gvt

2052

do der herre hagene | der wunden enpfant

do erwagt im vngefvge | daz swert an siner hant

al da mvse im entwichen | der hawartes man

hin nider vo den stiegen | hagen im volgen began

2053

irinch der vil chvene | den schilt veber swanch

vnd waere div selbe stiege | drier stiegen lanch

di wile liez in hagen | ni slahen einen slach

hey waz roter vanchen | ob sinem hovbte gelach

2054

wider zv den sinen | chom irinch wol gesvnt

do wurden disiv maere | criemhilde rehte chvnt

waz er von tronege hagenen | mit sinem strite het getan

des im div chveneginne | vil hohe danchen began

2055

nv lon dir got irinch | vil maere helt gvt

dv hast mir wol getroestet | daz herce vnde ovch den mvt

nv sihe ih rot von plvte | hagenen sin gewant

criemhilt nam im selbe | den schilt vor liebe von der hant

2056

ir mvget im mazen danchen | so sprach hagene

wold erz noch versvochen | daz zaeme degene

chom er danne hinnen | so waere er chvener man

div wunde frvmt ivch chleine | die ich von im enpfangen han

2057

daz ir von miner wunden | di ringe sehet rot

daz hat mich erreizet | vf maniges mannes tot

ich pin allererst erzvernet | als ein vnverzaget man

mir hat der degen irinch | shaden chleinen noch getan

2058

do stvnt gegen dem winde | irinch von tenelant

er chvlte sich in ringen | den helm er ab gebant

do sprachen al di livte | sin ellen waere gvt

des het der marchgrave | einen riche hohen mvt

2059

aber sprach do irinch | mine vrivnt wizet daz

daz ir mich wafent schiere | ich wilz versvchen baz

ob ich noch mvege betwingen | den vebermveten man

sin schilt was verhowen | einen bezern er gewan

2060

vil schiere wart der recke | do gewaffent baz

einen ger vil starchen | nam er dvrch den haz

damit er aber wolde | hagenen dort bestan

do warte im vientliche | der mortgrimmege man

2061

sin mohte niht erbiten | hagen der degen

er lief im hin engegene | mit shvezen vnde mit slegen

di stiegen vz an ein ende | sin zorn der was groz

irinch siner sterche | do vil wenech genoz

2062

si slvgen dvrch di shilde | daz iz lovgen began

von fiwerroten wunden | der hawartes man

wart von hagen swerte | chrepftechlichen wunt

dvrh schilt vnd dvrch di brvenne | des er wart nimmer mer gesvnt

2063

do der degen irinch | der wunden enpfant

den schilt er baz do rvchte | veber div helm bant

des schaden in dvhte der volle | den er da gewan

sit tet im aber mer | des kvenech gvntheres man

2064

hagen vor sinen fvzen | einen ger ligen vant

er shoz vf iringen | den helt von tenelant

daz im von dem hovbte | div stange ragete dan

im hete der recke hagene | den grimmen ende getan

2065

irinch mvst entwichen | zv den von tenelant

e daz man do dem degene | den helm ab gebant

man brach den ger von hovbte | do nahete im der tot

daz weinten sine mage | des gie in waerliche not

2066

do chom div chveneginne | veber in gegan

den starchen iringen | chlagen si began

si weinte sine wunden | ez was ir grimme leit

do sprach vor sinen magen | der recke chvene vnt gemeit

2067

lat di chlage beliben | vil herlich wip

waz hilfet iwer weinen | ia mvz ich minen lip

verliesen von den wunden | di ich enpfangen han

der tot wil niht langer | iv vnd eceln dienen lan

2068

er sprach zv den dveringen | vnt ce den von tenelant

di gabe sol enpfahen | iwer deheines hant

von der chveneginne | ir liehtez golt vil rot

vnde bestet ir hagenen | ir mvezet chiesen den tot

2069

sin varwe was erblichen | des todes zeichen trvch

irinch der vil chvene | ez was in leit genvch

genesen niht en chvnde | der hawartes man

do mvst ez an ein striten | von dem von tenemarche gan

2070

irnfrit vnde hawart | sprvngen fver daz gadem

wol mit tvsent helden | vil vngefvegen cradem

hort man allenthalben | chrepftech vnde groz

hey waz man scharpfer gere | zv den bvrgonden shoz

2071

irnfrit der chvene | lief an den spilman

des er den schaden grozen | von siner hant gewan

der edel videlaere | den lantgraven slvch

dvrch einen helm vesten | ia was er grimme genvch

2072

do slvch der herre irnfrit | den chvenen spilman

daz im mvsen brestn | div ringes gespan

vnt daz sich beschvte | div brvenne fiwerrot

doch vil der lantgrave | vor dem videlaere tot

2073

hawart vnde hagene | cesamne waren chomen

er mohte wunder chiesen | ders hete war genomen

div swert genote vielen | den helden an der hant

hawart mvst ersterben | von dem vzer bvrgonden lant

2074

do di tenen vnde di dverengen | ir herren sahen tot

do hvb sich vor dem hvse | ein vreislichiv not

e si di tver gewunnen | mit ellenthafter hant

des wart da verhowen | vil manech helm vnde rant

2075

wichet sprach do volker | vnde lat si her in gan

ez ist svs vnverendet | des si da habent wan

si mvezen drinne ersterben | in vil chvrcer zit

si erarnent mit dem tode | daz in div chveneginne git

2076

do di vebermveten | chomen in den sal

vil manegem wart daz hovbt | geneiget so ze tal

daz er mvse ersterben | von ir swinden slegen

wol streit der chvene gernot | sam tet ovch giselher der degen

2077

tvsent vnde viere | chomen in daz hvs

von swerten sach man blicken | vil manegen swinden svs

sit wurden doch di recken | alle drinne erslagen

man mohte michel wunder | von den bvergonden sagen

2078

darnach wart ein stille | do der shal verdoz

daz plvot allenthalben | dvrh div loecher vloz

vnt da cen rigelsteinen | von den toten man

daz heten di von rine | mit grozem ellen getan

2079

do sazen aber ruowen | di von bvergonden lant

div waffen den schilden | leitens vz der hant

do stvnt noch vor dem tvrne | der chvene spilman

er warte ob iemen wolde | noch zv zin mit strite gan

2080

der kvenech chlagete sere | sam tet ovch sin wip

megede vnd vrowen | di qvelten da den lip

ich waene des daz hete | der tot vf si gesworn

des wart noch vil der recken | von den gesten da verlorn