bibliotheca Augustana

<<< Übersicht <<< vorige Seite nächste Seite >>>

BIBLIOTHECA AUGUSTANA

Sente Elsebede leben

nach 1297

	Von sente Elsebede der heilegen frouwe
___________________________________________________
	Hi hebit sich an daz erste bůch von sente Elizabeth Ei welch ein selic mahelschaft, Daz in so grozer liebe craft
1495	Zwein gemecheden under ein Was gefuget, daz in zwein So reine minne sich erhůb, Daz si flecken nit entsůb. Ane alle brodecliche gelust,
1500	Mit dugentlicher wollust Was ir fruntschaft understriht, Daz si zu brodekeide niht Was geneiget noch gestalt. Ir beider dugent manicvalt
1505	Wůs unde ir geistliche zuht, Daz si dugentlicher fruht In beiden hatten wol gedaht Unde euch mit werken vollebraht, Kusche lebende an der e.
1510	Waz solde lange rede me?
[32b]	Zu gode stunt ir beider můt. Die frŏwe selec unde gůt, Nu junge brut, nu junges wip, Mit flize kestigede iren lip
1515	Mit gůder werke menje. Vasten unde venje, Wachte unde ouch gebedes vil Daz was ir vrŏde, ir selen spil: Mit flize si der dinge pflac.
1520	Seht, wan si bi ir herren lac Unde in ir mude si vernam, Daz ir zit, ir stunde quam, Daz si wolde uf an ir gebet, Ei horet wie si danne tet
1525	(Wande ir daz bette was zu weich) Dar abe si gar lise entsleich Unde dachte ir herren wider zů, Daz er iht innen wurde nu Ir andacht, die si danne treib.
1530	Der furste ligende also bleib In aller der gebere, Alse er entslafen were: Her umme daz der herre tet, Daz si ir andacht, ir gebet
[C1b,8]	Wol stedeliche dribe Und des ungeirret blibe. Den edelen fůrsten wol gemut Duhten alle ir wise gůt, Wande allez ir gemeine
1540	Was seleg unde reine. Des liz er sie irn willen han, Wen daz die frauwe wol getan Zu kindes was der jare: Des hatte er weizgot vare
1545	Daz sie arbeit swechte, Ob sie zu lange wechte. Daz was in rechter warheit Der frauwen gros otmůdeckeit, Daz sie irs wirtes bette liz,
1550	Der lipliche ir mahel hiz, Unde suchte ir zarten herren Crist, Der war ir selen mahel ist.
[a30,11]	Auch was des herren minne groz, Daz in ir wise nicht verdroz,
1555	Wan daz er dogentlich enphing Was guder werke sie beging, Des er mit willen hangete Unde ir mit nichte endrangete. Doch under wilen daz geschach,
1560	Wann er ir ubermaze sach, Daz er mit siner wisheit Meziget ir die erbeit, Wachen, venjen, ir gebet, Daz sie zu girlichen det:
1565	Hie wulde er sie entziehen von. Des was der kusche man gewon,
[30b]	Wann sie von deme bette ging Unde ir andacht ane fing, Daz ir der furste lobesam
1570	Ware mit gudem flize nam. Er hielt sie bi der hende, So ir gebet ein ende Nach guder maze hette, Daz sie dan an daz bette
1575	In rechter liebe ginge Unde aber ruwe enphinge: Des bat sie truweliche Der werde furste riche. Soliche liebe was in zwein,
1580	Daz sie beide sich von ein Verdolten keine wile. Des für sie manege mile Mit ime in dugentlicher plege Gar lange unde auch gar swere wege,
1585	Nicht in brodelicher gelust, Wan alles in fruntlicher lust. Kein ungewidder sie enthielt,
[C1c]	Kein sache sie von ime schielt, Waz endes er sich wante,
1590	Wande sie daz wole erkante, Daz sin geinwůtekeit Werte niht ir arbeit, Ir andaht unde auch ir gebet Unde waz sie guder werke det,
1595	Wen daz er mildecliche nů Sie manete unde hielt dar zů. Die frauwe seleg onde gůt Sa groze ger, solichen můt Hatte zu irn wachene,
1600	Gebedes vil zů machene, Daz sie den megeden druwelich Beval in ganzer libe sich, Ob iz also erghinge, Daz sie der slaf bevienge
1605	Mit dracheit al zů sere, Daz sie dorch godes ere Von slafe sie erwehten, Iren unmůnst abe lehten. Die junge frauwe clare
1610	Gab in bisůnder lare, Heimeliche ůrkunde, Wel sie verslafen funde,
[a31,22]	Daz sie vil dogentliche Durch got von hiemelriche
1615	Sie mit der zehen dreckete, Von slafe sie erweckete,
[31b]	Daz sie nu muste wachen. Von diesen selben sachen Isendrut die wise
1620	Ir frauwen nu vil lise Sulde also erwecken: Wan sie vergreif und drecken Mit der zehen sie began Iren herren, den wol suzen man.
1625	Der furste selig unde klug Gedulteclich ir daz verdrug In aller der gebere Als ez ir frauwe were, Der andacht er dar an entsub,
1630	Do sich daz zehen drecken hub. Die reine iedoch erwachte: Wol balde sie sich machte Her abe vor daz bettebret: Da dreib sie aber ir gebet
1635	In andacht uf irme teppit. Do lag sie also lange zit Vor irs herren bette, Daz sie bi wilen hette Gewachet also lange,
1640	Daz sie nu von getwange Gebedes unde der erbeit
[32]	Geving soliche drakeit, Daz sie mit slafe wart bedrat. Nu mochte sie nit haben rat,
1645	Ir augen die entsliefen. Herumme sie beriefen Ir megde in guder wise.
[C1d]	Sie sprach also vil lise: „Ir liben frundin, nemet war,
1650	Mag ich niht alle stunde gar Gebeden alse ich were Notdorftig, in der swere Wil ich min fleis iedoch gewern, Daz iz die wile muz enbern
1655	Gemaches unde der senftekeit, Die mir were iesa gereit Ligende also warme An mines frundes arme.“ Die frauwe wolde irs libes lust
1660	Unde aller fleislichen gelust Durch godes libe nicht begern. Sie wolde auch weicher bette enbern, Daz sie irs wirtes bette floch Unde sich von senftekeide enzoch,
1665	Wa sie des stade mohte han. Die reine frauwe wolgedan Hatte groze swere, Wie lieb der man ir were, Wert vor allen richdům,
1670	Daz sie jungfrauwelichen rům Unde auch der megede crone Niht sůde dragen schone;
[a32b,6]	Hie bi so kastiget sie iren lip, Wie godes dirne kusches wip,
1675	Mit strichen unde mit slegen vil. Noch horet waz ich uch sagen wil, Wes sie von aneginne plag In der fasten allen dag Unde alle fritage durch daz jar.
1680	Die frauwe selig unde clar, Die edele unde die fine Nam ir discipline Also heimelichen gar, Daz es niman wart gewar,
1685	Unde oiget sich den luden Glich fro den jungen bruden. So nu der zide me verging Unde auch sie krefte me gefing, So daz sie gnade me entsub,
1690	Von irem bette sie sich hub An eine sunderliche stat, Da sich die frauwe ire meide bat Villen bitterliche. Hernach die selden riche,
[33]	Wanne die slege sie enphing, Frolich sie an ir bette ging In aller der gebere, Recht alse des icht were. Hie was nach gotlicher kraft
1700	Gehaufet gude mahelschaft. In der geselleschefte was Reinekeit, als ich es las, Unde in iren worten kuscheit Ommerme an underscheit.
1705	Godes liebe an diesen zwein Verjagete brodelichen mein; Ir beider reine otmudekeit
[C1e]	Verdreip des fleishes geilheit; Des heiligen geistes hitze
1710	Verjagete in unwizze Des slafes, und ir gůd gebet Wol sicher ir gewizzen det. Die minne gab in aller meist Zu guden werken volleist.
1715	Nu hort ein lutzel furbaz, Wie dise clare frauwe saz Zu des fůsten disse, Anders vil gewisse Danne ander hohe frauwen důnt.
1720	Nahe saz sie bi ir frunt Sie wolde ie bliben deilhaft Ir vil gedruwen mahelshaft: Des sie in allen zitin Saz an irs herren sitin,
1725	Allein sie doch mit unstaden Dicke was al da beladen, Mit gebresten ůberdrat. Ir bihter, meister Cůnrat, Der sie nach guden dingen
1730	Geistliche solde twingen Nach godelicher kunste, Doch mit irs wirtes gunste
[a33b,13]	Der frauwen disciplinen plag, Seht, der gebot ir allen dag,
1735	Daz sie mit flize neme war, Was kuste unrechte queme dar, Als es uf brgen dicke dut. Mit raube unrecht gewonnen gut, Was endes sie geseze,
1740	Daz sie des nit eneze. Hie zu sich auch verbunden In diesen selben stunden Ir werdesten juncfrauwen dri, Die ir gesazen nahe bi.
1745	Laube sie doch namen Des fursten lobesamen,
[34]	Der ez mit willen hengete, Ir andacht nicht enengete. Hie von die frauwe dicke saz,
1750	Daz sie nicht ander spise enaz, Recht als ich underwiset bin, Mit iren juncfrauwen allen drin, Dan under wilen idel brot. Als ir bichter in gebot,
1755	Ader ein honigkuchelin. Idoch det sie den luden schin Daz sie die spise neme. Was endes sie ir queme. So nu der furste wart gewar
1760	Daz sie solicher spise enbar, Er plag intruwen ommer sit Daz er sie warnet alle zit, Wanne soliche spise Gewonnen in der wise
1765	Da zu dische were, Daz ir die frauwe entbere Unde ir gewizzen kleine
[C1f]	Bliebe unbewollen reine. Hungermal sie dicke leit
1770	Unde auch von dorste smahtekeit Daz was ir allez doch ein wiht: Ir ghing vil naher die geshiht, Daz ir jungfrauwen sazin, Endrunken joch enazen.
1775	Hie von sie leide me enfing, Wen daz sie selber ane ghing Der fürste seleg unde gůt Hatte auch wol solichen můt, Daz er daz selbe dede,
1780	Ob er die volleist hede: Nu můste er schuhen aller stede Des idewizes hinderrede. Er hatte auch selecliche ger, Hulfe ime got da zu, daz er
1785	Alle unmaze wolde ergeben Unde unfrideliches leben Nach godelichen eren Wolde allez umme keren. Die frauwe fragen nů began
1790	Die knehte unde auch die dinstman, Wanne da spise were Reine unwandelbere,
[a34b, 21]	Daz sie daz wulden sagen ir. Des wart erfollet ir begir.
1795	So balde sie des icht vernam, Fro sie zu den meiden quam, Wa sie die fant gesezzen. „Sehet, hude sollet ir ezzen“, Sprach sie in fruntlicher ger.
[35]	Brachte ir aber etteswer Nu soliche mere, Daz reine drang da were, Zu hant began sie winken: Sie sprach „nu sullet ir drinken.“
1805	Wanne die frauwe lobesam Von irme gesinde auch icht vernam, Daz nu zu hove were Beide unwandelbere, Noch grozer froude sie enphing.
1810	Zu den meiden sie dan ging. Sie sprach in froliche zu: „Sit fro, want got wil unser nu Zu selden nit vergezzen. Wir sullen drinken, ezzen:
1815	Reine ist unser spise.“ Auch dachte nu die wise, Was ir zu widemen was gegeben, Daz sie da abe sulden leben, Ja daz sie da von zerte
1820	Unde ir gesinde nerte. Nu horten sie dicke uber lut, Die reine unde auch der godes drut, Daz man in idewizes jach Unde in auch dicke hindersprach
1825	Umme ir sunderliches leben.
[35b]	Daz konden sie doch gode ergeben Beide dugentliche. Wie nu die gnaden riche Des raubes nicht an sicb ennam,
1830	Was endes er zu hove quam, Doch hatte sie soliche plege, Wa sie des irgen hatte wege, Daz sie gein dirre unkuste Die armen nach verluste
1835	Was alle zit begnadende, Mit gabe sie beradende, Wa sie des hatte volleist: Daz larte sie der heilige geist. Hie mogen schauwen jung unde alt
1840	Herliche wonder manigfalt, Beide frauwen unde man Her nach ir leben riechten an, Daz sie, daz selecliche wip, Ein junge brut, ein junger lip,
1845	Eines koniges dochter uz erkorn, Edel unde hoch geborn, An eines fursten dische Bi wiltprede unde bi fische Und ander weher spise
1850	So zuchtig unde so wise, So mezig, so gefuge
[36]	In aller dirre genuge Wollust nit geruchte Joch libes gelust ensuchte
1855	An des fursten bette, Den sie so zart doch hette, Lieb vor allen dingen gar. Ei lieben, nemet alle war, Was mochte irre dogent glichen,
1860	So nu die dugentrichen, Die uz erwelten frauwen Got vorbaz wulde schauwen Unde umme ir dogentliches leben Hoer gnade wulde geben,
1865	Ufbaz aber furen, Mit grozer minne ruren? Er sant in ir gemude Solicher minne gude, Daz sie nu gnade me enphing,
1870	Eines tages sie zu kirchen ging Mit ir swieger in der zit Zu der feste, die da lit Nidden under Warperg. Sie wulde ir dogentlichen werg
1875	Uben als sie dicke det,
[36b]	Mit andacht triben ir gebet Nach gewonheit, der sie plag. Nu was es gar ein hoher dag, Der da in godtes ere erschein.
1880	Ir ging ein michel teil mit ein, Uz der burge ein groze schare. Die alle irer frauwen namen ware. Sie was mit schonheit ummelacht Nach ir furstelichen acht.
1885	Ir cleider gaben liechten schin. Sie hatte bratschen, vingerlin, Spenalden unde vorspan, Surkot unde mantel an, Bestellet an den orten
1890	Mit zabelin und mit borten. Ir houbet luchte schone: Dar ufe stunt ein krone Edel unde reine. Gezieret mit gesteine,
1895	Gewirket uzer golde. So nu die frauwe sulde Zu der kirchen treden in (Nu was alle zit ir sin, Wanne sie in die kirchen drat,
1900	Daz sie mit andacht uf der stat
[37]	Ir augen uf zu gode hub), Grozer minne sie entsub. Do blickede an die milde Des crucifixes bilde,
1905	Daz hohe da gesetzet was, Dan an sie schauwete unde las Marien eingebornen Grekronet sten mit dornen In betrubnisse unde in pine,
1910	In jamerkeide schine, Gefillet bitterliche. Auch sach die minnen riche Sin hende unde sine fuze Durchslagen gar unsuze
[A41a]	Mit nageln bitter unde scharp, Wie godes sun durch uns erstarp An deme cruce here. Si dahte „ach ummer mere Mir armen creature!
1920	Waz gibet mir di sture, Daz ich mit gulde sten iezu Vor mines herren ougen nu Gechronet also schone Unde doch ein durnen crone
1925	Sin zartes houbet drucket? Auch sten ich hie gesmucket Mit golde, mit samite, Unde ist sin frone site Verseret jemerliche!“
1930	Sa nu die gnaden riche Diz alles hatte wol bedraht, Di reine viel in unmaht, So daz si von ir selber quam. Alse ir gesinde nu vernam
1935	Ir werden vrŏwen uncraft, Mit schrecken wurden si behaft Sa daz si wurden missevar: Doch namen si ir vrouwen war.
[41b]	Man drůc si vor di kirchdur
1940	An des windes blach hin fur, Daz si den luft enphienge Unde aber maht gevienge. Wichwasser was alda gereit: Da mide wart si sa bespreit,
1945	Daz si begunde kůlen. Seht, nu began si fůlen, Waz got suzer gnade An si geleget hade. Zu hant di frouwe minnesam,
1950	Da si zu ir selber quam, Globte stetecliche Unde hilt iz druweliche Alle ir dage unde alle ir zit Biz an ir seleg ende sit,
1955	Daz si in Cristes ere Weizgot ummer mere Solicher zirde enbere. Da ubermaze an were. Des nummer niht geplege,
1960	Da uppekeit an lege Unde werltliche gunst. Die frouwe ir dugentlichen munst
[42a]	Wante ummer me zu gode. Wie si nach sime gebode
1965	Ir selbes lib vernihte Unde alle ir sache rihte Zu gode selecliche. Wi nu di dugentriche Gar nach kuneclicher art
1970	Geboren unde gezogen wart Mit al ir wandelunge, Iedoch di frouwe junge Nach dirre stunde schiere Alle uppeclich geziere
1975	Versmehete same ein crankes mist Umme iren herren Jhesum Crist, Ir brudegamen, iren frunt, Der nacket da gesperret stunt, Den die clare frŏwe sach
1980	Liden solich ungemach, An deme cruce pine gnůc, Den si iesa zu herzen drůc Nach gar fruntlicher e. Des enwolt si weizgot nummer me
1985	Keiner hande floiir, Winpeln oder sloiir
[42b]	Gegilwen joch geverwen Joch me nach glänze gerwen In uppeclicher wise:
1990	Ir ermeln ane prise, Ane knoufeln, ane twanc, Ir cleider eben, nit zu lanc, Mezlich alles ir gewant Goltborten unde harbant,
1995	Alle uppeclich geziere Verwarf di frouwe schiere: Daz was ir gar ein smehelinc. Si kante daz soliche dinc Niewan ein uppeclicher můt
2000	Eischen unde machen důt. Hi von di frouwe nu vermeit Hochgulde unde uberfluzekeit An cleidern aller leie. Ir fleische enstunt ein zweie:
2005	Nu wŏllen, nu herin gewant Ir zarten libe wart erkant. Wanne ez doch bi wilen quam, Daz dise frouwe lobesam Det cleidere uzene an den lib,
2010	Same eins hohen fursten wib
[43a]	Nach eren dragen solde, Von samit unde von golde, Nach gewonheit an gesniden, Ungerne hede si vermiden
2015	Nach cristenlicher geistlicheit, Si inhete maze iedoch geleit Inwert an ir gecleide, Wie si vor wirdekeide Ir furstentůmes aller meist
2020	Hette urlob unde volleist. Diz selbe si ouch larte Waz iergen zu ir karte Der werltlichen frouwen Durch fruntschaft unde durch schouweu:
2025	Di bat si ummer mere Mit druwelicher lere, Daz si nach ir bescheidenheit Uf geben uppege idelkeit. Di selege unde die milde
2030	Mit Worten unde an bilde Diz larte druweliche. Sa nu die dugentriche Der stade mohte nit gehan, Daz iz di frouwen wolten lan
[43b]	Gerne als si dede, Si bant si mit ir bede, Daz si doch wolten etteswaz Idelkeide furbaz In godelicher minne enbern:
2040	Des muste man si dan gewern. Wel sich des groben nit verzech, Die frouwen si doch uberdech Daz si willeclich iezu Der minren sich verzigen nu.
2045	Di selege unde die milde Gab in alsolich bilde Bi heileclicher lare, Daz si nu uffenbare Gebruchen mohten guder side,
2050	Da si wurden selec mide. Alsus di reine godes maget, Gedruwe, an dugenden unverzaget, Der mildekeide ein helic schrin, Der selegen selen minnerin,
2055	Gnůc frouwen von ir idelkeit, Gar vil ir zu bescheidenheit Kuscher wandelunge Die selege unde die junge
[44a]	Zoch mit gůder lere.
2060	Di werc unde ander mere Begienc di reine godes drut, Wie junges wib, wi nuwe brut Di godes dirne were, Gar wider der gebere,
2065	Da junger lude unwizzenkeit Ist stedecliche zu gereit. Daz was von Cristes minne, Der alle zit ir sinne Zu heiligen dingen wante,
2070	Da zu ir gnade sante, Unde gab ir der heilige geist Gar wizzentliche volleist. Di frouwe selic unde gůt Hatte also dugentlichen můt,
2075	Daz si gevil ir wirte wol. Niht waz di werelt haben sol, Wene alles godelichen rat Di frouwe her gehabet hat. Ir wirtes herze hatte an ir
2080	Steder hoffenunge gir, Wande di frouwe ime alles plac Gut zu fugende allen dac
[44b]	Unde unwirdecliches niht. Nu was ez auch also geschiht,
2085	Daz der furste ir herre Fůr under wilen verre In deme lande here unde dar: Siner dinge nam er war, Alse er besezzen wolde
2090	Sine herschaft alse er solde. Sin furstentůn was also wit, Des herren, daz er lange zit Under wilen uze bleip, Biz er der stunde me verdreip
2095	Danne ir gemude were. Nu was der wec zu swere Unde underwilen also lanc, Daz di reine ane iren danc Da heime muste bliben,
2100	Die zit ane in verdriben, Wande ir der wec endohte Joch niht gevolgen mohte Ferre unde lange mile. Sehet, alle dise wile,
2105	Daz ir herre nit enquam, Di frouwe ir schonheit abe nam
[45a]	Unde alles ir geziere Drůg si gehalden schiere In laden unde in schrine.
2110	Di selege unde die phine Ginc beden an ein ende. Si wandelte ir gebende Unde zoch ir an demudeg cleit; Si lebete in otmudekeit,
2115	In heileclichem prise Nach reiner witewen wise. Venjen, wachen, ir gebet Mit strichen vil di frouwe tet: Also di nachte si verdreib.
2120	Mit drůwen si an warte bleib, Wanne si nu verneme Daz ir geselle queme, Den si mit truwen hatte wert Unde ouch siner kunft begert.
2125	Sa wanne daz si nu vernam Daz ir frunt, ir herre quam Unde ir die warheit wart irkant, Si nam wider ir gewant Unde alles ir geziere
2130	Nam si dan wider schiere.
[45b]	Di frouwe selege unde gůt Sprach unde dachte in iren můt: „Nu wizze got der riche, Daz ich nit uppecliche,
2135	Nit in werltlicher gelust Joch in libes wollust Zierde han an mich geleit, Wene allez in bedehtekeit Gotlicher minne.
2140	Der sache ich mich entsinne, Daz ich bescheidenliche var Wa ich sunden růch bewar: Dar umme ich missehage enber, Daz min der reine furste ger
2145	Zu frundin alters eine, Daz unser truwe reine Blibe umbewollen. Wir zwei von gode sollen, Der die e geheliget hat,
2150	Warten ane missetat An unser druwelichen e, Daz wir hienach ummer me Der ewigen geselleschaft Mit gode bliben deilhaft.
[46a]	Alsus di junge vrouwe dar Wise, milde, an alle var Sa dugentlicher minne wielt, Daz si gar ganze druwe hielt An dugentlicher crefte
2160	Ir reinen mahelschefte Ir fursten deme herren, Daz si an allen werren, Wanne ir frunt was uz gevarn, Da heime kunde sich bewam
2165	Idewizes ane, Di reine wolgedane Zu gode wol andechtec, Zu dugende fruchtbrechtec. Wanne aber er zu huse quam,
2170	Sa vant er si gar minnesam, Lieblich ir antlitze In mildekeide witze. Auch was di gnade ir unverzihen, Ir hette got den sin verlihen
2175	Der e getruwen mahelschaft, Daz si wart kinde berhaft. Ir wart von gode selekeit, Solicher eren richeit,
[46b]	Daz ir lib reine unde zart
2180	Geburte nu berheftec wart, Kinde selec unde gůt. Her ane di frouwe wart behůt Des idewizes smacheit, Ir libes unberhaftekeit:
2185	Si wart solicher dinge erlost, Von kindes liebe iesa gedrost. Di clare frouwe ein kint gewan, Daz wart geheizen Herman, Gar ein lobelicher sun,
2190	Der sider an daz furstendun Nach sinem vader uffer stat An di herschaf aber drat, Daz er lantgrave wart genant In Duringen unde in Hessen lant.
2195	Nach dem dirre frouwen dar Von godes willen uffenbar Ein dochderlin geboren wart Gar lobelich, von bilde zart, Wollustec ouch von libe,
2200	Di sider nam zu wibe Ein furste in Niderlanden, Der herzoge in Prabanden.
[47a]	Noch ein dochter si gebar, Di an magetume gar
2205	Unde in geistlicher wat Gode sit gedienet hat, Ein reine clostervrouwe, Di in der megde ouwe Zu Aldenburg vil manegen dac
2210	Der frouwen meisterschefte plac Ane alle missewende Biz an ir libes ende. Di reine vrouwe lobesam, Wanne di zit ein ende nam
2215	Ir kindebettes innekeit, Daz si dan nach gewonheit Solde nach den vierzic dagen Ir kindelin zu kirchen dragen, Si liz alle ubermaze sin,
2220	Di an den vrouwen wirdet schin, Di mit der werlte umme gent Unde an hochverte stent: Seht, daz begap di vrouwe gar. Si ginc an iren fuzen bar
2225	Unde ein demudeg cleit Di reine hatte an sich geleit.
[47b]	Si gienc andehtecliche: Si nam ouch dugentliche In bede arme ir junges kint
2230	Si schuhte weder oder wint, Steine joch die sweren wege: Si ginc in dugentlicher plege Von der burge hin zu tal, Da man zu kirchen komen sal
2235	In der stede verre gnuc. Ir kint si uffen alter druc In ir beiden armen da: Si beval iz gode iesa. Da bi ein kerze brante.
2240	Di reine wol erkante Di wise unde ouch daz selbe spor, Wie godes muter ouch hie vor, Di kindes magedin genas (Di reine wandels ane was),
2245	Ir kint zu alter brahte. Hi bi si ouch gedachte, Di furstinne lobesam, Wanne si heim zu huse quam, Daz si dan gab ir ummecleit
2250	Unde einen roc in mildekeit
[48a]	Einer armen vrouwen etteswa: Also erschein ir dugent da. Sa nu der reine furste gůt Gesach der claren vrouwen můt
2255	Zu gode wol gerihtet, Zu dugenden verplichtet, In suzer minne sunder leit Bequam er ir andechtekeit. Zu guden werken er began
2260	Si reizen furbaz aber dan, Daz si zu gnade wurde balt. Der furste gab ir di gewalt Unde volleist aber me Dan si mohte haben e,
2265	Waz si ummer mere In godelicher ere Gudes iht gedede, Daz si des urlob hede Nach allem irem mude.
2270	Iedoch enwolte di gude Der loube niht geniezen, Daz si di me it fliezen Wolte an werltliche dinc: Wande iz was ir ein smehelinc.
[48b]	Di selige in ir bescheidenheit Fleiz sich ime an heilicheit. Des kunden si erbarmen Wol di godes armen, Di si gar dugentliche
2280	Machte ir gabe riche, Ir almůsen, der si plac. Di clare vrouwe naht unde dac Ouch godes rechtvertekeit Ummer me ane underscheit
2285	Mit flize wol bedachte: Hi von si vollebrachte Mit vrolichem antlizze, Mit steteclicher wizze Dugentlicher sinne
2290	Di werc der waren minne. Si was zu barmherzekeit Dugentlich also gereit. Nu ginc di vrouwe lobesam Herliche alse ir gezam,
2295	Riliche in ir gewande. Di reine iesa erkande, Daz ein siecher bedelman Unlustic gnůc zu sehen an
[49a]	Was nach der almůsen komen.
2300	Nu hatte er, als ich han vernomen, Ein al zu siechez houbet. Niht ist mir erloubet Zu sagene von der krancheit, Di an den armen was geleit,
2305	Wenne ich sagen uffenbar, Daz ime houbet unde har Was zu schouwene eissam. Den kranken man di frouwe nam Gutliche bi der hende,
2310	Si fůrte in uf ein ende Verre in iren boumgart. So nu di selege inne wart Daz si waren eine, Si nam, di frouwe reine,
2315	Des armen houbet also bloz Dugentliche in iren schoz: Mit ir hant si in beschar, Daz he wart der hare bar. Di frouwe selic unde clůg
2320	Ime ouch daz sieche houbet twůg Mit einer scharpen laugen. Si was geslichen daugen
[49b]	Von der lude angesiht: Doch bleip iz unvermeldet niht,
2325	Ir megde iz sa vernamen. Da si gegangen quamen, Ir werg si niht verdespeten, Di frouwen si berespeten Umme ir mildeclichen dat:
2330	Si sulde is billiche haben rat. Gůtliche lachen si began Unde twoc iedoch dem armen man. Die frouwe selic unde gůt Niht alles hate ir reinen můt
2335	An lustecliche ding geleit Joch ensůhte senftekeit, Alse andere hohe frouwen dunt: Gar starke dinc si understunt. Einen rocken si begreif,
2340	Dar ane was ein ummeweif Von wollen, da si ane span: Solicher dinge si began, Eins kuniges dochter here. Ir megde ouch spunnen sere.
2345	Si zugete manic lachen. Hi von si wolde machen
[50a]	Doch ane hargeplocke Minren brudern rocke Unde anderen heiligen kinden,
2350	Wa si di künde finden, Den si allen cleider gap, Di man irzugete unde wap Uz ir reinen arbeit: In dugent unde in mildekeit
2355	Si wolde frostes si bewarn. Wa si ouch junge westebarn. Armer vrouwen kinder vant, Den nade si ir doufgewant Mit ir selbes hende.
2360	Da bi was si genende, Daz si zu ir doufe quam: Di kinde si zů gotten nam, Daz si in von gevaderschaft Zu druwen were ime behaft;
2365	Daz si di beldeclicher, Di me verbundenlicher Gevaterlicher wise Den armen brechte ir spise In godelicher minne.
2370	Wa arme vrouwen inne
[50b]	Kindelbettes lagen, Nach den began si vragen, Di wolde si ummer schouwen Unde mit ir gabe erfrouwen.
2375	Seht, daz di reine wol gedan Ouch mideliden mochte han Der siechen bette sehende, Ir jamer selbe spehende. So was der wec ir niht zu lanc,
2380	Zu swere was ir niht der ganc, Si wolde ie selbe komen dar Unde ir mit droste nemen war. Si enwolde nit den unflat Schuhen, den armude hat
2385	Unde ouch der siechen bette, Waz herschaft si doch hette: Wanne drivalteclichen lon Di selege wolde han da von, Nu von des weges arebeit,
2390	Nu von der gabe mildekeit, Nu von der midelide, Di si in aller zide Drug in irme herzen, Gar mildeclichen smerzen.
[51a]	Ei aber horet wunder, Wi di selege under Allen disen dingen Hoher kunde ringen Nach folleclicher gnade,
2400	Dan si hefunden hade. Da zu gab ir der heilige geist Werder sture volleist. Ein licht er ir enphengete, Daz ir herze sengete
2405	Mit heizer minnen glude. Er zougete ir hohe gude. Gnaden er si werte, Daz si in minnen gerte Arm iezu zu wesene
2410	Nach deme reinen lesene Der gotlichen lere. Si wolde in Cristes ere Ein arme godes dirne sin, Wi si doch rilichen schin
2415	Von der herschaft hette, Wi wol man si begette Mit dinste hoher herren, Daz si nit hette werren,
[51b]	Wene alle uberfluzzekeit
2420	Unde aller gnuge richeit. Zu allen disen dingen Mochte si kein lust gedringen: Di reine was inbinnen Erlucht also von minnen,
2425	Daz herze unde ir gemude Rang alles nach armude. Hi von iz dicke also bequam, Daz dise vrouwe lobesam Uz zu Worte brachte
2430	Wes ir beger erdachte, Sa daz si mit ir meiden Mit Worten underscheiden In dugentlicher gude Sagete von armude.
2435	Sit nu des herzen girde Ane werkes wirde Mac underwilen nit gesin, Des machte ir wol di frouwe schin, Wanne si uf ir palas
2440	Bi ir gurtelmeiden was: Si legete abe ir her gewant, Ein armes cleit si umme want.
[52a]	Si warf abe ir gefloiir, Si want ein snodiz sloiir
2445	Wider umme ir houbet. Der zirde sich verloubet Si hatte otmudecliche. Si ginc ouch dugentliche Fůr ir gurtelmeide sten: <
2450	„Vil lieben, also wil ich gen Unde armude liden Mit willen in den ziden Durch minen herren Jhesum Crist, Der arm um uns gewesen ist,
2455	Wanne die liebe zit erstet, Sa mich daz armude ane get.“ Also sprach si vil lise In prophetissen wise, Wande ir gab der heilige geist
2460	Zu wizene gude volleist, Daz si ir kunftic ungemach In deme geiste vor gesach. Ein leben, daz ir sulde ensten, Alse ir her nach sehet gen,
2465	Sam in der buch sal werden schin, Wanne wir ok des endes sin.
[52b]	Daz sach man an der claren Bi iren jungen jaren, Bluwende an ir jugende,
2470	An crefte hoher dugende, Doch werltlicher ere Di blůme dorren sere Began in ir gemůde, Wi doch ir dugent blůde;
2475	Vonde dise frouwe here Niht werltlicher ere Uzerliche ensůchte Joch anders niht gerůchte, Wene alles geistlicher dugent,
2480	Unde ouch an innerliche mugent Ir gemude wante. Sa daz ir frunt erkante, Ir zarter herre Jhesus Crist, Der otmude kunec ist
2485	Unde den mit flize minnet, Der si zu frunt gewinnet, Er wolde si uf zucken, An wirdekeide uf rucken, Uzene ouch floiieren,
2490	Nach sime lobe zieren
[53a]	Di reinen frouwen lobesam. Hi vone eins dages also quam, Daz der here Andreas, Der dirre frouwen vater was,
2495	Ein kunec Ungerlande. Herliche boden sande Verre uber lange stige Deme fursten Lodewige, Daz si in solten sprechen,
2500	Mit worten underbrechen. Sa nu der furste lobesam Solich botschaf vernam, Daz dise herren quamen dar, Er nam vil dugentliche war
2505	Wa die furstinne were. Er sagete ir di mere, Waz der dinge solte sin. Er sprach „getruwe suster min, Dines vater boden komen sint,
2510	Frien unde herren kint: Nu ist mir ielanc leider, Daz du niht richer cleider Hast zu disem male Von golde unde ouch zindale,
[53b]	Di dir eben quemen Unde al zu wol gezemen, Daz man dich mochte schouwen Alse eines fursten vrŏwen Zu disse unde zu gespreche.
2520	Wi daz mir nit gebreche Stunde unde ouch der wile. Ich sente verre mile, Daz man dir cleider brehte Wi ir din můt erdehte.“
2525	Da sprach di dugentriche Also gezogenliche: „Brůder unde herre min, Lazet uwer leide sin. Got lichte alle uwer swere.
2530	Ich han mich dirre mere Vor langen ziden uz gedan, Daz ich icht rumes welle han An gewandes richeit.“ Ein bode was iezu gereit,
2535	Er bat die furstinne, Daz si in rechter minne Zu den herren queme, Ir vater grůz verneme.
[54a]	Seht, da si gen den herren gienc,
2540	Ein herlich wunder si bevienc, Ein zeichen grozer ere. Der milde got, der here Gab ir soliche ziere, Daz si nu hette schiere
2545	Ein also rilich gewant, Daz nieman gliches ime envant; Daz die lude sahen an, Beide vrŏwen unde man, Wi di furstinne hede
2550	Gar rilich gewede Herlich unde garwe, Liecht in gruner varwe, Gezieret mit gesteine, Von margariten cleine,
2555	Gemachet von samite. In deme kursite Irschein di frouwe dougen Vor dirre herren ougen. Hi von iesa besunder
2560	Den fursten hatte wunder, Von waz hande mere Daz cleit bekomen were,
[54b]	Ein also rilich gewant, Von weme iz mohte sin gesant.
2565	Des fragete er alleine Di claren frouwen reine, Dirre tugentriche man. Di frouwe smunzen nu began Mit zuchten miltecliche.
2570	Si sprach „ei furste riche, Frunt, getruwer henre min, Di frage ir moget lazen sin: Wanne min lieber herre wil, So kan er dirre dinge vil
2575	Erzougen sinen kinden, Asse er uns dut befinden.“ Ei prüfet wol gereide, Wi dugent rilichkeide Ist frien luden an geborn,
2580	Zu sunderlicher zierde erkorn, Ir edelkeide ein zeichen, Wan an si muge reichen, Der tugent schein di reine Niht von geburte alleine,
2585	Di kuneges dochter here, Weiz got michel mere
[55a]	Von gotlicher gnade, Di si begozzen hade. Ez hatte ein willig mildekeit
2590	Me dan geburte clarheit In ir herze ein bilde Gedrucket suzer milde: Hi von di frouwe here Niht umme uppege ere
2695	Joch von geburte friheit Ubete dise mildekeit, Wenne in rechter minne Barmeclicher sinne, Der si innerliche wielt,
2600	Die reine dise dugent hielt Gein manne unde ouch gein wibe. Si was von muter libe Mit ir an dise werelt bracht: Si wůs in rechter andacht
2605	Mit ir aller degelich, Sa daz di frouwe minneclich Arm mensche nummer ane gesach, Si inhette sunder ungemach Unde innerlichen smerzen
2610	Mit ime in irme herzen.
[55b]	¶ Eins dages, alse ich han vernomen, Was ein groz gesinde komen Um ein dugentliches werc Uffez hus zu Wartberc,
2615	Daz ober Isenache lit, Uf eine groze hochgezit, Rittere unde herren vil. Durch lust unde umme ritter spil Daz hergesinde komen was
2620	Uf in des fursten palas: Der herre ir dugentliche plag. Nu was ez umme mitten dag, Daz di spise was gereit; Lange hatten si gebeit
2625	In dugentlichen eren Des küneges dochter heren, Des werden fursten frouwen. Si wolten ummer schouwen, Wanne die clare queme
2630	Unde ouch e wazzer neme. Von welcher hande mere Si nu gesumet were, Di furstinne lobesam, Daz si nit e zu hove quam.
[56a]	Daz wizzet, lieben, uber lut: Da dise reine godes drut Gein hove von der kirchen gienc Unde die steffel ane vienc, Daz si di wolde uf stigen,
2640	Alda gesach si ligen Einen siechen bedelman, Der si rief mit druwen an, Daz si umme ewic leben Wolde ime almusen geben.
2645	Der reinen was zu hove gach: Der arme rief ir alles nach, Daz si durch got ime etteswaz Gůdes dede. sunder haz Sprach daz reine selic wip
2650	Mit zuchten: „ei vil lieber lip, Nu han ich stunde joch di stade, Daz ich dir gůdes icht begade Iezu bi disem male.“ Der arme hatte quale
2655	Rufende ummer mere: „Gab in godes ere!“ Des růfes nam di frouwe war: Si gab im iren mantel dar,
[56b]	Den di reine sunder wan
2660	Zu der wirtschaft solde han. Der sieche iesa den mantel zoch, Er fielt in weizgot unde floch Von dannen endeliche. Di frouwe dugentriche
2665	In hoffenlichem wane Was nu ir mantels ane, Des si nu gienc an ir gemach; Zu hove si da nieman sach. Nu sprach der spisere
2670	„Ei herre, ist üch iht swere, Daz unser frouwe lobesam Noch zu hove nit enquam? Zu lange si hude uze lit, Si sumet uwer hochzit.
2675	Di spise wile ist bereit: Si lazzet uwer wirdekeit, Froude alle uwer geiste Mit driezes uberleiste. Daz moget ir wol anden.
2680	Si gab auch uzen handen Ir mantel so gewere Eim armen bedelere:
[57a]	Seht, den hat si becleidet. Nu denket wes ir beidet.“
2685	Da nu der furste lobesam Di hezzen rede also vernam Von deme unbrahten hoveman, Ein lutzel lachen er began. Er ginc so dugentliche
2690	Zu der furstinnen riche, Da er si wiste an ir gemach. Lieblich ir zů der herre sprach: „Ei getrüwe suster min, Wi lange maht du hude sin?
2695	Wilt du nit dalanc ezzen? Wir weren nu gesezzen, Wan daz wir din gebiden han. Ouch sage, suster wolgedan, Sa rechte lieb als ich dir bin,
2700	Wa ist din mantel komen hin, Den du zu kirchen drůge?“ Di reine unde die gefůge Sprach iesa ir herren zu: Gedruwer frunt, wie frages du
2705	Wa min mantel moge sin? Ich jehe bi den truwen min,
[57b]	Min mantel ist unferre: Nu sich, vil lieber herre. Er hanget anme ricke.“
2710	Zu disem ougen blicke Lif ein kammereren dar. Si nam der selben rede war: Den mantel vant si hangen da, Den unser herre hatte iesa
2715	Mit sin er gotlichen hant Zeichenliche dar gesant. Si sprach „ei herre, brůder min, Ich wil nach dime willen sin Mit dir zu disse nu gereit.“
2720	Di frouwe nam ir ummecleit, Daz ir di godes gnade Also geschicket hade: Si gienc gezogenliche Mit deme fursten riche
2725	In dugentlichen witzen Nu bi ir geiste sitzen, Bi ir frunt, ir dissegader. Sus kunde der himelische vader Sine zarte lilien,
2730	Sine uzerwelten filien,
[58a]	Elizabeth di claren Mit clarheit uffenbaren, Innerliche zieren Unde uzene ouch floiieren
2735	An libe wirdecliche, Daz Salomon der riche. Ein kunec hoher ere, Ein meister wiser lere, In aller eren hochfart
2740	So zierlich nie gesehen wart. Di selege unde die gude Hatte in stedem mude Der messen ammet also wert, Ir heilekeit also begert,
2745	Daz si da dugentliche mide Was nach cristenlicher side. Hi von di frouwe lobesam Mit flize zu der kirchen quam Gar andechtecliche.
2750	Si was gezogenliche Zu godes lobe iesa gereit In forchten unde otmudekeit Same ein getruwe godes maget. An dienste godes unverzaget
[58b]	Quam si zu kirchen also frů, Daz si di gurtelmeide iezů Mochten nit erziehen. Si wolde di lude fliehen An eine sunderliche stat:
2760	Alda si kniwete unde bat Ir scheppere umme gnade. Gewonheit si ouch hade Von ir jugentlichen zit, Daz si hat wol gehalden sit,
2765	Daz si mit flize was gereit In grozer demudekeit Wa der priester messe sanc. Nu was alles ir gedanc, Ir innerlichen ougen
2770	Geschicket also dougen Zu godes lichame. So nu di lobesame In ir herzen ahte Unde alles wol bedrahte,
2775	Waz herlicher wirdekeit Were an daz sacrament geleit, Di selege unde di gude Gedahte in irem mude
[59a]	An sich selben widere,
2780	Wi kranc unde ouch wi nidere Menschlich brode were. Von dirre selben mere Began die frouwe schiere Al ir libes ziere,
2785	Houbetes unde bruste, Waz zu libes luste Hort an keinem ende, An armen unde an hende, Unde alles ir cleinode
2790	Entweder machen snode Ader aller dinge legen hin, Alse ich underwiset bin, Daz si des nit begerte Di wile di messe werte.
2795	Di selbe demůtekeit Was an di frouwen ouch geleit Bi dem ewangelio. Si gevil ir aber do Wanne di stille ane gienc
2800	Unde der priester ane vienc Daz sacrament zu handelne, Win unde brot zu wandelne
[59b]	In Cristes lichamen. Der frouwen lobesamen
2805	Branten alle ir sinne In furiger minne Gein dirre heilekeide. Si wunderte ouch gereide Der minnesamen wirde,
2810	Der wertsamen girde, Di der godeliche rat Geleget an daz mensche hat. An eime dage iz also quam, Daz di frouwe lobesam
2815	Nach allen iren willen In der zit der stillen Stunt in der kirchen unde bat An ir gewonlichen stat: Ir hende in ein si beide vielt,
2820	Die si iedoch verborgen hielt Unde ir ummecleide. Si hatte iesa gereide Ir innerliche andacht Alle bi einander braht
2825	In brinnender minne. Si wante ouch alle ire sinne
[60a]	In der selben friste Zu irme herren Criste In gar inneclicher ger.
2830	Nu was ein lieht von himel her In wunderlicher clarheit Der godes megde ummeleit, Daz dise clare frouwe In wunneclicher schouwe,
2835	In zierlicher wunne Erschein alsam ein sunne. Dabi ein selic priester stunt, Ein gedruwer godes frunt An wandelunge dugentlich,
2840	An andechte lobelich, Der sich nach godes labe hilt Unde innerlicher gnade wilt. So man die stillen uz gelas, Der licham unsers herren was
2845	Gebenediet dougen, Des reinen priesters ougen Von gode wurden uffenbar. Er sach ir antlitz also clar Erluchtet wunnecliche,
2850	Der claren sunnen gliche,
[60b]	Di ir schin erguzet, Daz er alumme fluzet Mit ir wunneclichen brehen. Diz wunder was an ir geschehen,
2855	Daz ir libes clarheit Machte ein uffenbarekeit, Waz innerlicher ziere Were an der frouwen phiere. Di clarheit was so rehte groz,
2860	Di dise frouwen ummegoz, Daz ir reinen libes glast Was nu zu male also verlast Von godelicher clarheit, Daz libliche ougen ungereit
2865	Weizgot iezu waren Zu schouwene an di claren. Hi von der priester tougen Mit liblichen ougen Dise frouwen fine
2870	Vor godelichem schine, Den er schouwen da began, Mochte nit gesehen an. Den priester ie bisunder Nam innerliche wunder
[61a]	Der herlichen gnade, Di he beschouwet hade. Er lobete sinen heilant, Deme alle wunder sint bekant Hi nidene unde dort obene.
2880	In godelichem lobene Machte er wol offenbere Diz lobeliche mere. Di reine frouwe gude Hielt ouch mit festen mude
2885	In heiliclicher stedekeit Waz di heilige cristenheit Zu haldene uns gesetzet hat. Ouch was ir dugentlicher rat, Daz si der fierzeg dage gar
2890	Nam mit gůten werken war Ir selber abe zihende, Ubermaze flihende, Mit venje, vil zu wachene, Gebedes vil zu machene,
2895	Nach godes e zu lebene, Almusen vil zu gebene, Di armen wol zu richene, Ir reinen lib zu strichene
[61b]	Mit gerten bitterliche.
2900	Wi ouch di dugentriche In ganzer hoffenunge Di zit der losunge In andacht wol enphienge, Nach werde wol begienge,
2905	Mit waz erberekeit Zu beden an si was gereit, Mit welicher minne Si begreif zu sinne, Wi mildecliche si enpfienc,
2910	Mit waz glouben si begienc Di zit der trostlichen dage, Ich wene iz ieman vollesage, Ir werc, ir andacht, ir gebet. Vernemet waz di frouwe tet,
2915	Wi si daz wol bedrechte, Daz si sich gelich gemechte Von godelicher volleist Mit guden werken aller meist Unserme herren Criste,
2920	Der ouch zu dirre friste, An den grunen dunresdag Sin cleit ouch hine zu dune plag
[62a]	Nach dem abentdisse: Alsus det vil gewisse
2925	In dirre selben lere Di kunges dochter here. So der mittendag vergienc, Ir herren spor si ane vienc Legende abe ir gůt gewant:
2930	Si det ein snodes sazehant Wider an otmudec cleit. Ir fuzen hatte si gereit Schůhe an disen stunden Mit rimen an gebunden.
2935	Alsus andechtecliche Ginc si, di dugentriche. Ei wer hat diz verstanden mer Von eines kuneges dochter her? Di reine frouwe ouch aber plac
2940	An disen grůnen dunresdac Ir herren spor beduden. Si machte ie armen luden Ein mandat wirdecliche. Sie wůsch ouch dugentliche
2945	Zwolfen nu ir fůze; Ouch gab in di sůze,
[62b]	Den zwolfen sunder ummen ring Iegelicheme einen schilling Unde důch zu eime cleide;
2950	Si gab in ander weide Ie dem man ein simelbrot. Si hatte ouch zu der selben not Eins jares an den selben dag, Also ir gewonheit alles plag,
2955	Unde in der selben dude vil malader lude Gehoufet an ihr mandat. Si schuhete kein ir unflat, Si entwůge in doch, di suze,
2960	Ir hende unde ouch ir fuze; Si kuste ouch ane widerrede Di lude an eissamer stede Mit dugent milder sinne; Si viel in rechter minne
2965	Mit andacht vür ir fuze nider. Wa si di siechen ummer sider, Der malaten lude sach, Si droste iesa ir ungemach Mit dugentlichen witzen;
2970	Si gienc auch zu in sitzen.
[63a]	Ir was in aller stunde Sieche alse der gesunde Nach godelicher meine, Malater alse der reine;
2975	Si enschuhete ir unfrude niht. Si bat in dugentlicher pliht, Daz si geduldec weren In allen iren sweren: Iz were ir hellewize.
2980	Si gab in ouch mit flize, Di frouwe dugentriche, Ir gabe vollecliche. Sa nu di zit was vollebraht Mit dugentlicher andaht
2985	Der selben heileclichen naht, Daz di reine wol bedraht Hate unsers herren bitter not Unde sinen bitterlichen dot In otmudekeide,
2990	In mildeclicher leide, Unde die reine iesa vernam Daz di morgenfruwe quam, Si sprach ir gurtelmeiden zu: „Gedruwen frunden, wizzet nu
[63b]	Wie unse sache hude lit: Hude ist betrubekeide zit. Ein dac der jamerkeide, Ein zit fruntlicher leide, Ein stunde der otmude.
3000	Ich bide in rehter gude, Daz ir keine wirdekeit Habet hude an mich geleit.“ Di furstinne riche Gienc nu demutecliche,
3005	Wande di clare machte sich Otmudec armen luden gelich. Di reine frouwe lobesam Bi sich in iren bůsen nam Alles ir gewasses
3010	Gar cleine risten flasses; Ir was doch manige an der zal. Ei hort waz ich üch sagen sal: Di frouwe an selekeide clůg Auch mit ire eine bussen drůg,
3015	Seht, da was wirouch inne. Si drůg ouch in der minne Von wasse liechte cleine; Noch drůg di frouwe reine
[64a]	Penninge etteliches punt.
3020	Si mischete sich iesa zu stunt Nu zu der gemeinen diet. Si hatte weizgot schuhe niet, Di clare an iren fuzen, Di frostes mochten buzen:
3025	Si gienc an beiden fuzen bar Zu den kirchen her unde dar, Zu sunderlichen alteren. Si kunde sich verwalteren Gebedes unde andechte,
3030	Wie daz di reine brechte Ie zu des alters listen Flasses eine risten Unde ein waskerzelin. Daz solte der claren opper sin;
3035	Auch gab di frouwe hochgeborn Deme altere ein wirouches korn. Si neig, si venjete unde floch: Zu eime andern aber si gezoch, Da si sunder gnade enphienc.
3040	Wanne si durch die strazen gienc, Si warf den armen sunder bar Penninge wol riliche dar.
[64b]	Sus gienc di clare frouwe In otmuder schouwe,
3045	Sa daz si wart gerucket, Gedrungen, sere gedrucket Alse ein armes uzer diet: Di selege enwolte ouch anders niet. Ir herschaft was verdespet.
3050	Si wart ouch sa berespet, Daz si ir opper smelte. Di frouwe me erwelte Alles einvaldekeit Danne uzer eren schonheit,
3055	Wi doch die fursten solden, Wanne si oppern wolden, Riliche gabe bringen Von golde, von penningen. Nu wist di frouwe lobesam
3060	Daz iz von karcheit nit enquam, Wene allez von einvaldekeit. Di reine erkante ouch anderweit, Daz got gabe nit engert Unde ubermaze hat unwert.
3065	Eins menschen otmudec geist Ist godes opper aller meist:
[65a]	Des achte si der straphe niet. Nu solte die cristenliche diet In den drostlichen dagen
3070	Umme gnade ire cruce dragen. Da mide lude giengen, Di weizgot widerviengen Der heligen gesezze: Si giengen mit gesuezze,
3075	Gewandes riliche, Gezieret uppecliche. Hie gienc nach godes ere Di kuniges dochter here Da here uz Ungerlande
3080	Wullen an gewande Unde an beiden fuzen bar Alles in der lude schar Nach deme heildůme. In uppekeide rume
3085	Quam si fur die cruce niet, Wene allez after in der diet Wol andehtecliche Was ie di dugentriche. Sa nu di reine godes maget
3090	Hoher dugent unverzaget
[65b]	Ginc mit reinen witzen Zu godes worte sitzen, Da man predegen solde, Di clare frouwe wolde
3095	Nach dugentlichen eren Niergen anders keren Dan alles in di armen diet. Si hatte zwivelunge niet, Wer in di grunde sewet,
3100	Der snidet unde mewet Daz da mit vollen dihet, Alse ime got verlihet: Wande di berge sint zu hoch, Da man ie lutzel gudes zoch.
3105	Nu dunket mich gar wunneclich, Daz wir den fursten lobelich, Den man in Duringer lande Zu rihtere ouch erkande, Lantgraven Lůdewigen
3110	Zu lobe niht verswigen, Alse er in dugentlicher craft Der frouwen reine mahelschaft Geselle hie gewesen ist, Daz er nach mugelicher wist
[66a]	Ir lobes deilhaft blibe, Daz in ieman verschribe Der vrŏwen wirdekeide, Wen daz si wesen beide Noch an ir geselleschaft
3120	Lobes ummer deilhaft, Wand der reine furste gůt Der frouwen dugenthaften můt, Alse er ir wise merkete, Gar dugentliche sterkete
3125	Zu guden werken aller meist Mit dugentlicher volleist, Mit rade suzer munste, Mit helfe steder gunste, Mit maniger werden stüre:
3130	Also was der gehure Der dugentrichen alles bi. Doch wene ich daz nu ieman si, Daz sollich dichter iergen lebe, Der sine dugende rehte ergebe,
3135	Der sine mildekeit erjage, Sin lob nach wirdekeide sage, Sines frien mudes frumekeit, Sines werden libes schonheit,
[66b]	Daz ieman di erile:
3140	Doch sage ich ůch bi wile, Der reine furste, alse ich iz las, Gemeszenlicher lenge was, Nach tugentlicher witze Gar frolich sin antlitze
3145	Unde an herzen milde. Man saget daz sin bilde An schonheit mochte gelichen, An formen wol anlichen Unseme herren Criste,
3150	Der doch bi libes friste Der schonste menschen kinde was, Des muder ie joch ie genas. Sin bilde was so minneclich, Daz nieman wol verzihen sich
3155	Kunde siner angesiht. Er was in aller der geschiht Sa lusteclicher minne Kusche gar von sinne, Wollusteg an gescheine,
3160	Doch gar von libe reine. Von geschihte iz also quam, Daz der furste lobesam
[67a]	Gestanden an ein finster was In siner burge palas,
3165	An der kemmenaden ort. Nu sach er under ime dort Komen einen reigen. Da sa giengen leigen, Beide vrouwen unde man
3170	Nach werltlichen siden an; Ir was ein wunneclicher danz. Nach luste wol ir vrŏde ganz. Dar ane gienc ein frouwe In lustsamer schouwe:
3175	Si was ein minnecliches wip. Gezieret wunnecliche ir lip. Auch was ein man von dummer rede Bi deme fnrsten sa zu stede, Da dise frouwen quamen her.
3180	Er sprach: „ei herre, ist üwer ger Zu deme stolzen libe, Ich helfe ir üch zu wibe, Daz ir si moget haben wol.“ Der kusche furste zornes vol
3185	Sprach balde: „la di rede varn: Wilt du dich rechte an mir bewarn,
[67b]	So endů solicher rede niht.“ Der dumme floch in der geschiht Von sime herren so zu hant
3190	Verstummet, ummer me geschant. So schein des herren kuschekeit. Der furste was ouch anderweit Mit suzen reden wol bedaht, An senften siden vollebraht.
3195	Menlich, stede was sin můt: Waz ouch ein strenge ritter důt, Wie man zu stride komen sol. Da zu was er behende wol. Ein lewe in dirre burge was,
3200	Ein grimme dier, alse ich iz las: Der bleip eines nachtes umbewart. Von sinem meister umbespart, Fri er in der burge lief. Sa der furste nu geslief,
3205	Daz er wolte sich ergen, Uf geriet der herre sten. Er hatte linen cleider an, Dar uber warf der reine man Einen blozen surkot.
3210	Er hatte hoffenunge an got,
[68a]	An den er sich mit druwen liz. Butschuhe an der herre stiz: Zu kampe was er ungereit. In den hof er nu geschreit.
3215	Sa daz der lewe wart gewar, Er quam mit frechen sprungen dar, Er wolte sime herren zu. Der furste drowete ime nu Mit fuste unde ouch mit worten.
3220	Er stunt gar unvervorhten Gein deme lewen unde sprach: „Irn habet, arger wicht, gemach, Iz get uch weizgot an daz fel.“ Der helt was ellenthafte snel,
3225	Gein deme lewen unfervort: Der lewe entsaz des herren wort, Daz det sin ellentlicher můt. Sus wart der arge lewe gůt, Geleme sam ein junges wider:
3230	Er stracte sich vor ime nider, Weibezelen er began Gein dem ellenthaften man. Der lewe nu mit stangen wart
[68b]	Gezemet siner hohfart;
3235	Sa wart des lewen meister ouch Gestraphet als ein dummer gouch Mit swinden worten unde bar: Baz nam er des lewen war, Daz er det sider arges niht.
3240	Me wolde ich jehen der geschiht Des glouben wirdekeide, Denne beides kunheide. Des werden fursten sůzer munt Vant nie drugelichen funt,
3245	Daz er gelogen hede: Sine antwurte stede Besniden ordenliche was, Nein unde ja, alse ich iz las. Sine spruche sander var
3250	Waren gloubec unde war; Sin munt niemannen dorte. Wer sine wort gehorte, Der geloubete in gereide Alse eime geswornen eide.
3255	In mochten alle frouwen Erbere in zuhten schouwen:
[69a]	Daz kunde schame duden. Er was gein armen luden Milte weizgot unde gůt.
3260	Fro gesellic was sin můt Rittern unde kunden; Er was in allen stunden Herren unde frien wert. Fursten hatten sin begert,
3265	Daz si in gerne schouweten, Gein siner kunft sich frouweten. Er zougete allen luten sich Gefuge, wol behagelich Unde an gruze minnesam.
3270	Er hatte guter wise ram Zu dugentlicher sache. Daz ich des ende mache, Di rede gar beslieze E daz üch ir verdrieze,
3275	So wizzet ane lougen, Er hatte got vor ougen. In forte, in steder minne Dugentlicher sinne Ubete er unsen herren
3280	Ane undugende werren.
[69b]	Alle tage sunder wanc Messe man vor ime sanc: Da bi stunt dirre furste rich Andechtec, wol otmudeclich.
3285	He rif in druwelicher mane Gebedes sinen schepper ane, Zu reinen dingen wol geschiht. Ez was in siner angesiht Ziere unde alle reinekeit,
3290	Lob in sine werc geleit Unsers herren allen dac. Zuchte sin gesinde plac An werke unde ouch an worten: Vor des herren forchten
3295	Nieman gedorste missevarn. Wer sich des wolde nit bewarn Daz er arges iht begienc, Groze siege der enphienc. Da wider horte kein gebet:
3300	Der herre in weizgot strichen det Mit gerten ummer mere. Nu det der furste here Sam ein gesundes houbet frut, Daz sine glider leben dut:
[70a]	Sus machte er doch an zuchten balt Daz ingesinde junc unde alt, Daz si nu alle gliche Wurben dugentliche Alumme iesa besunder.
3310	Nieman des habe wunder, Wande edel lude waren Warhaft in den jaren; Den herren fride fugete, Den rittern ouch benugete
3315	Mit gabe unde an ir solde, Wi man in sturen wolde; Daz folg was alles in der schar Geruweg unde otmude gar. Der furste lobebere
3320	Was gar ein gut rihtere: Des wart den luden fride. Da wonte warheit mide; Bi disen zwein gefuge Was folle unde alle gnuge:
3325	Des bliben sunder leide Di lude in sicherheide. In dirre zit was Duringenlant An wirde lobesam erkant:
[70b]	Daz volc was alles eingemůt,
3330	Geneme, andechtec unde frůt. Iz was ouch sunder spotes gamen Von des werden fursten namen Gezieret wunnecliche: Ouch was iz lobeliche
3335	Genamet von der wirdekeit, Di an di claren was geleit, Frouwen sente Elizabet, Der lob in allen zungen stet. Der werde furste riche
3340	Lebte dugentliche, Kusche an libes jugende: Der furste zu der dugende Hatte alle zit geselleschaft Alse ein juncfrouwe schamehaft.
3345	Der edele furste lobesam Eines dages nu geriden quam verre in ein sins mages lant Er wart enphangen so zu hant Nach labe wirdecliche:
3350	Man plac sin dugentliche, Alse eime fursten wol gezam. So nu di wirtschaf ende nam,
[71a]	Der reine furste wol gedan Wolde ein lutzel ruwe han:
3355	Er legete an ein bette sich. Nu wart getriben sunder wich Mit ime ein lutzel schimpes, Unwehes ungelimpes, Daz si erkanten sine schame:
3360	Iz wart ein junges wibesname Geworfen an sin bette dar. Sa des der furste wart gewar. Er dachte ime ungemůde. Da bi was ouch der gude
3365	Her Walter von Pharila. Zu deme sprach der herre iesa: „Walter, an den druwen din, Verschicke mir diz frouwelin, Die man důrg gamen hie verbarg:
3370	Da gib ir silbers eine marg, Daz si mit liebe hinnan ge. Ouch wil ich dir sagen me: Entseze ich deheine missetat, Noch wil ich is haben rat,
3375	Daz ich hie mide ervere Unde ouch also beswere
[71b]	Elizabeth di reinen, Di ich mit truwen meinen.“ Des herren wille also geschach:
3380	Di frouwe gienc an ir gemach. Nu schouwet welch ein nuwer Joseph so getruwer An dem herren da erschein, Der durch druwe disen mein
3385	Dirre unkuschekeide Versagete iesa gereide. In disem lande ein ritter was, Des vrouwe kinde nie genas; Der werre was des mannes scholt
3390	Er bat di vrouwen in gedolt Durch got, daz si bedehte Wi si ime erben brehte Verholen etteswanne Von einem duren manne,
3395	Von einem ritter etteswa. Der ritter selbe reit iesa Zu hove an sinen herren. Er clagete sinen werren, Daz er nit wol begette
3400	Sa daz er erben hette;
[72a]	Er bat den fursten riche Gar einvaldecliche, Daz er ein sache were, Wi ime kint gebere
3405	Sin frouwe iesa zu stunde. Lachen er begunde, Der furste hogelich gemůt: Er nam die affenheit für gůt Uzwert in gedůlde,
3410	Also er is volgen wŏlde. Er sprach „nim min da heime war: Kurzlich wil ich komen dar.“ Der werde furste frie Bat um arzetie,
3415	Alse er si selbe muste han. Der reine herre wol gedan Bat nu den arzet machen Nach fruntlichen sachen Ein edel lattewerjen:
3420	Di hiez er starke gerjen, Daz si in mochte reizen Unde innerliche heizen. Dise arzetie wart gemaht. Der furste, alse er hate uf gelaht,
[72b]	Zů des ritters huse quam. Da wart der herre lobesam Enpangen froliche: Man plac sin wirdecliche Mit dranke unde ouch mit ezzene.
3430	Der herre gab nu zeszene Di arzetie sinen man: Zu hant si ruren in began. Er sprach „ei werder herre, Zergangen ist min werre:
3485	Ich fůlen ander mere Danne ich gewon e were. Wir durfen dirre sache niet, Alse ich von üch zu jungest schiet.“ Da sprach der furste lobesam:
3440	„Nu wizzes daz ich nit enquam Uf ander aventure, Wen daz dich dise sture Smacheide uberhebete Unde ouch din vrouwe id snebete
3445	An keiner missewende.“ Daz immez nam ein ende: Der ritter was iezu gemeit. Der furste ouch heim zu hove reit
[73a]	In aller der gebere,
3450	Rechte alse des iht were. Ei schouwet wi der reine man Den ritter keren nu began Von sunderlicher swere; Unde daz er ober were
3455	Des lumundes forte, So bleib er in dem worte, Der edele unde der frie, Da er dise arzetie Iesch in so druwelicher mane,
3460	Alse in der werre lengete ane. Nu was ez in der jargewant, Daz man an der zale vant Von Cristes geburte fůr alwar Zwolf hundert funf unde zwenzic jar:
3465	Da hatte keiser Friderich Uf einen hof gesetzet sich In Pulle zu Cremone. Da hielt der keiser schone Mit der fursten plihte
3470	Hof unde ouch gerihte, Da manec herre lobesam Zu hove in grozen eren quam
[73b]	Uber manegen langen stic. Do was ouch furste Ludewic,
3475	Daz er ane scholde Bleib in des keisers hŏlde. In disen ziden ane vieng Ein hungernot, die umme gienc Alle dusche riche
3480	Also gebrestenliche, Daz in der kummerlichen not Vil armer lude bliben dot: Want der kummer vor alwar Vil nahe werte zwei jar
3485	Mit grozer hungernode; Brot unde ouch zubrode Was uzer mazen dure. Di selege unde di gehure Ir kornhus hiz ersuchen
3490	Unde daz ir becker bůchen Brot in godes ere: Seht, daz gebot di here, Elizabeth di wise, Daz si mit sůzer spise
3495	Di armen da gedroste. Von hungernot erloste.
[74a]	Di frouwe gab al umme sich Iegelichem aller degelich Da von iz hatte libes nar.
3500	Wi cleine in gab di frouwe dar, Dem menschen ie besunder, Sa det got aber wunder, Daz ie der mensche hatte gnůc Des dages waz iz dannen drůc.
3505	Nu was ein hoher abeganc, Swere weizgot unde lanc Von der burge hin zu dal, Da man zu der stede sal, Di an des berges fuze lit.
3510	Da hiez di frouwe in dirre zit Machen nu zu disem mal Ein lobeliches spital: Da inne solten ligen Siechen, di gestigen
3515	Zu berge nit enmochten Joch zu gene endochten Nach der almůse uffen berg. Diz selbe dugentliche werg Begienc di frouwe lobesam.
3520	Da hin si alle dage quam:
[74b]	Der wec inwas ir nit zu lanc, Zu swere inwas ir nit der ganc, Zu we inkunde ir nit geschehen, Si wolde iedoch ir siechen sehen
3525	Dicke, weizgot allen dac, Der si gar druweliche plac. Di aller unfrudes waren, Mit den kunt si gebaren Aller dugentliches.
3530	Besorget was si gliches Mit den godes armen: Di konden si erbarmen. Ir ezzen si in brachte, Ir kummer si bedachte;
3535	Si hůb unde drůc die cranken Uf asselen unde uf anken; Ir bette si in mahte, Nider si sie lahte; Iegelichen si gewerte
3540	War nach sin herze gerte, Drankes oder spise. Si ummegienc die wise Gar gedruweliche. Wi dise dugentriche
[75a]	Mochte in keinen ziden Nie bosen ruch geliden, Si leit doch hi ir dankes Unmazen vil gestankes Mit dugentsamer witze
3550	In somerlicher hitze Vor der siechen betten, Di doch ir megde hetten Gerne iesa vermiden Unde ouch undankes liden:
3555	Daz leit iedoch di frouwe In frolicher schouwe. Si ummegienc ir siechen Unde achte ir ubelriechen, Di frouwe lobebere,
3560	Alse ob iz mirre were. Ich geren loube hi zu stede, Ob ich di sache vollenrede Unde iz den oren missehage, Daz ůwer zuht iz doch verdrage.
3565	Di selbe dugentriche Den siechen mildecliche Handelte also dougen, Ir sweiz von iren ougen,
[75b]	Wa mide ein armer sieche qual,
3570	Ir speichel unde ir giversal Unde ouch ir nasen unflat Di reine wisschete an ir wat Unde an ir selbes hullen, Die si hatte um ir nullen
3575	Unde umme ir houbet so geleit. Ouch det si barmherzekeit Gen armer lude kinden. Daz mohte man befinden Dicke ieso zu male
3580	In disem hospitale. Wanne dar in di vrouwe gienc, Der kinde menje si enphienc Mit frouden ummer mere. Di reine in godes ere
3585	Den kinden brachte ir spise: Des hatten si di wise, Daz si gein ir liefen, „Můter, muter“ riefen In aller der gebere,
3590	Ob si ir muter were. Wer hat diz gesehen ie? Di kinder liefen umme sie
[76a]	In kintlichen witzen Bi ir siten sitzen:
3595	Si nam ir houbet also bloz, Unlustec grinte in iren schoz. Di aller unfrudes waren. Mit den kunt si gebaren Aller dugentliches;
3600	Di muwe leit si gliches Unde alle dise swere Durch iren scheppere. Nu sehet wi unse herre Crist, Der mildekeide ein minner ist,
3605	Sin lob an snoden dingen Kan ouch zu liechte bringen. Daz ist hi worden offenbar: Wand dise reine vrouwe clar Koufte aller hande kindes spil,
3610	Kruseln, fingerline vil, Di gemachet werden Von glase unde ouch uz erden, Unde ander cleinode gnůc, Daz die reine frouwe druc
3615	In ir ummecleide Nach suzer mildekeide
[76b]	Uzer Isenache Den kinden zu gemache Unde ouch zu kurzewile.
3620	Bi dirre selben ile Quam der frouwen nu ein phert: Daz drug iz gein der burge wert Umme ein dugentliches werg. Nu was ein alzu hoher berg,
3625	Ein rotsche, ein swinde gehe: E man sich umme sehe, Daz cleinode alles vil mit ein Di rotschen abe uf einen stein, Daz iz zubrochen solte sin:
3630	Wen da wart godes minne schin. Man nam der dinge balde war. Man wande iz were zerbrochen gar: Da was iz weizgot sunder schranz Von godes willen bliben ganz
3635	Unde in der frouwen namen, Di durch milden gamen Den kinden brachte dise dinc. Si gab in allen ummen rinc Ie deme kinde ein zwidesal;
3640	Si wurden vrolich uber al
[77a]	Unde in frŏden wol gemeit. Di selege hatte ouch anderweit Ein deil der krenkeren uz gelesen Unde det si vor der burge wesen,
3645	Den si durch godes ere Gab alle ir ummerere, Waz man von ir disse drůg. Di frouwe selioc unde clůg Gab uz ir selbes henden
3650	Den siechen enelenden Waz vor ir uf gehaben wart Si hatte uber iren munt erspart Unde ouch ir megden abe genomen, Daz si di baz mochte umme komen.
3655	Eins dages quam iz aber nu, Daz di reine hatte iezu Um ein dugentliches leben Ir almuse umme unde umme gegeben. Da was ein lutzel wines doch
3660	In eime fazze bliben noch: Daz wolte di frouwe lobelich Den siechen deilen umme sich. Wi vil si dan uz ummer goz, Ieme dar in von gode floz:
[77b]	Wie lange si daz giezen dreib, Ir maz in glicher fulle bleib Unde des wines gliche vil. Noch hort waz ich üch sagen wil. Di vrouwe seleclich gemůt
3670	Det nit alleine ir siechen gůt In diseme hospitale: Alumme iesa zu male Hiz si irsůchen schiere Ir herschaft alle viere,
3675	Alumme in der gewande Des werden fursten lande, Ir hovet unde alle ir forweg Unde ouch ir hus zu Wartberg: Waz si von fruchte ok iergen vant
3680	Daz quam zu dage iesa zu hant Wa kornes iht verborgen lag, Daz muste weizgot an den dag: Daz gab di seldenriche Den armen mildecliche.
3685	Waz di werelt glanzes hat, Des wolte di vrouwe ouch haben rat: Wande si verkoufte schiere; Alle ir libes ziere,
[78a]	Daz si di baz bedechte
3690	Unde ouch vollenbrechte, Wi zu libe quemen wider Di armen unsers herren gelider, Daz si dar nach geringen Mochte an allen dingen.
3695	Sa wart ir wol gezeme Daz andern ungeneme Luden in der werlte ist, Do dise frouwe in dirre frist, In rechter einfalte
3700	Zu melkete sich stalte, Daz si di siechen mochte erlaben, Di milch zu droste solten haben. Waz ouch di werelt schuhet, Hazzet unde fluhet
3705	Joch nieman wirdecliche gert, Daz hatte iezu di clare wert, Da si der siechei, hoi,ßt blc, Nam dugentliche in i,en Bot,j Di si mit flize batte
3710	Unde in gemach begatte. Si hatte ouch in dem male In diseme hospitale
[78b]	Echte unde zwenzic siechen do Besetzet ordenliche also,
3715	Wanne der ein gesturbe, Liblicher e verdurbe, Daz ie des selben bette Zu hant ein ander hette. Da lac ein siecher inne,
3720	Der nach godes minne Sin leben wol bedrachte: Zu jungest er volachte Daz er noch schuldic were. Seht, des gwan er swere
3725	vil groz in sime herzen. Den ruwelichen smerzen Di frouwe machte lichte: Si galt nach siner bichte Alles daz er schuldic was.
3730	Auch hatte si, als ich iz las, Nun hundert menschen allen dac, Der man mildecliche plac Vor der frouwen angesiht: Daz det ir ammetlude plicht
3735	Von der almusen sture. So nu di wolgehure
[79a]	Diz alles hatte wol bedacht, Daz zu der erne waren bracht Von hungernot di arme diet,
3740	Daz ieder man gein lande schiet: Waz lude da zu dochten, Daz si arbeiden mochten, Den gab di frouwe here Aber in godes ere
3745	Sicheln hemmede unde schu, So daz si sich beholfen nu Mit ir selbes arbeit. Di frouwe nam ouch anderweit Goume in mildeclicher dugent,
3750	Wer nit hette dise mugent, Daz ime arbeit dochte, Di sache nit vermochte, So gab in aber stüre Di reine unde die gehüre,
3755	Cleiderlin unde alte wat, Wi man si dicke veile hat, Uz ir selbes henden. Wanne si wolden lenden, So drůgen frouwen unde man
3760	Ir gabe unde ouch ir segen dan
[79b]	In frolichem mude. Di selege unde di gude, Wanne si lichte nu gesach, Daz der penninge ir gebrach,
3765	So nam si von ir nullen Ir wimpeln unde ir hullen, Siden ducher, di si drůc, Cleinode aller leie gnůc: Daz gab si sunder gamen
3770	Armen wibesnamen. Daz musten si doch fugen, Daz si ir nit endrugen Zn werltlicher idelkeit: Si mochten si wol anderweit
3775	Verkoufen umme ir libes nar; Si globeten ouch in druwen dar Der frouwen bi ir eide, Daz si ir arbeide Druweliche selten leben.
3780	Di reine hatte iezu gegeben Einer armen frouwe umme got Ein hemmede unde ein surkot Unde zwene gude schuhe ho. Di arme wart unmazen fro
[80a]	Si rief mit inneclicher ger: „Ei, lieben, schouwet alle her! Wa wart ie grozer froude erkant Alse an mich armen ist gewant?“, Da si der frode also bejach,
3790	Si quam in ein groz ungmach: Si lac in dirre selben not, Alse obe si were in frouden dot. Daz sach di frŏwe lobesam: Von schrecken si des underquam,
3795	Sorgen si begunde, Si forhte zů der stunde, Daz si von dirre mere Ir dodes schuldec were. Der armen unmaht sa zugienc:
3800	Iren wec si ane vienc Fro gein iren landen. Di frouwe mit ir handen In suzer mildekeide Den doden ir gecleide
3805	Nade selbe unde schriet. Si inhatte keine schuhe niet, Beide frouwen unde man Di greif si mit ir handen an.
[80b]	Si ummegienc di liche
3810	Weiz got dugentliche, Biz man si nu bestatte. Di reine frouwe ouch hatte Ein weppe lanc zu fromen wiz: Her ane si legte iren fliz,
3815	Wi si daz gesnide Unde da becleite mide Waz armer lude sturben, Von dode hi verdurben. Waz richer doden waren,
3820	Di man zu der baren Solde iesa bereiden, Di hiez di frouwe cleiden Nu mit alder wede: Ouch was iz ir gerede,
3825	Daz si daz nuwe solten geben Durch got umme ewecliches leben Armen luden etteswa. Seht, daz erwarb di frouwe iesa. Di werg unde ander gude gnůc
3830	Begienc di reine frouwe clůc Zuchtec unde milde An worte unde ouch an bilde
[81a]	Nach ir bescheidenheide In rechter mildekeide
3835	Zu guden sachen ebene Bi ir wirtes lebene. Der si zu mildekeide hilt, Wande er ouch selikeide wilt. Hi von si wart erbeizet,
3840	Zu dugent me gereizet: Von siner druwelichen mane Was die frouwe an rechter bane, Daz si guder dinge plag Mit grozer almuse allen dag,
3845	Mit faste, venje, mit gebede Daz si gar vollecliche dede. Sa nu der mande me vergienc Unde der winter ane vienc, Daz der furste lobesam
3850	Von hove heim zu lande quam, Daz volc wart alles samet vro, Daz ir edel furste ho Zu lande komen were. Si vrouweten sich der mere
3855	Unde enphiengen gliche Den fursten wirdecliche.
[81b]	Di edele unde die frie Frouwe nu Sophie, Des werden fursten muder,
3860	Unde zweine sine brůder Cůnrat unde Heinrich Frouweten uzer maze sich: Noch vrouwete sich mere Di furstinne here,
3865	Elizabeth die clare Mit sůzer ampare Uz aller ir vernunfte Gein ir herren kunfte. So der furste lobesam
3870	Eins dages nu za saze quam, Des herren scheffenere Brachten ime mere, Daz di dugentriche Hette ubermezecliche
3875	Korn daz jar verzeret, Da mit si hette erneret Armer lude onmazen vil Unde ouch siechen ane zil Von dem dode erloset.
3880	Sus weren gar eroset
[82a]	Ir hove onde alle ir vorwerg: Hi von daz hus zů Wartberg Stůnde kornes lere. Do sprach der lobebere,
3885	Der werde furste riche: „Da tet si dugentliche, Daz si sich lieze erbarmen Di selegen godes armen. Waz uwer frouwe gůdes důt,
3890	Daz habet ummer me vür gůt. Wi vil daz ummer kosten mag, Lat si ir almůse allen dag Driben unde ir guden werg Biz an daz hus zu Wartberg:
3895	Daz heiz ich mir behalden, Daz ich des moge walden, Unde Nuwenburg da mide. Nieman enstrafe ir gaden side.“ Hi bi ist worden uffenbar,
3900	Daz unser herre fur alwar Durch des wisen mannes munt Hat wilen uns gemachet kunt, Waz ime an unser e behaget Sus hat er in der schrift besaget:
[82b]	„Dru under allen dingen sint, Di mime geiste ane underbint Behagent inneclichen wol, Rechte also ich üch sagen sol Unde ouch mit worten duden.
3910	Di dru sint vor den luden Geprufet wol zu lobene: Si sint ouch wol dort obene Vor gode sunderliche Gelobet wirdecliche
3915	Daz eine ist druweliche zwein Brudern hellen wol in ein; Daz ander dragen minne Gedruwelicher sinne Gegen dem ebencristen;
3920	Daz dritte sunder fristen, Wa ein wib unde ouch ein man Ein ander liebe dragen kan Glich sin selbes libe, Der man gen sinem wibe,
3925	Daz wib gein irem manne.“ Nu prufet aber danne, Wi daz vollekomen ist In mildeclicher midewist
[83a]	An deme fursten riche,
3930	Daz er so lustecliche Mit sinen brudern allen zwein Kunde dragen uber ein In dugentlicher munste Zu bruderlicher gunste.
3935	Der furste drug ouch minne Dugentlicher sinne In mildeclichen listen Gein sinen ebencristen, Zu den armen aller meist
3940	Mit suzer gabe volleist. Waz ouch werder fruntschaft In minne dugentlicher craft Der werde furste riche Unde ouch di lobeliche,
3945	Elizabeth di clare In zarter antbare Beide ein ander hilden, Waz mildekeit si wilden Ein ander alle stunde
3950	In herzen unde in munde, Daz hilfet uns beweren Diz buch mit zarten meren.
[83b]	Bischove in disen jaren Unde ander prister waren,
3955	Under den man lude vant Milde, an dugenden sa gewant, Selec unde reine, Daz sich di lude alleine Mit dugentlicher milde
3960	An lare unde ouch an bilde Wanten gar in heilikeit. Bi disen sine cristenheit Got nach sime lobe hielt; Under den ouch gnade wielt
3965	Von Marburg meister Conrat, Der in duschen landen hat Sam ein liechter sterre Geschinen umme verre. Er was an kunsten wol gelart.
3970	Sin leben hatte er ie gekart An reine wandelunge. Zu hoher predegunge Was er al zu wol bereit, Ein minner guder cristenheit,
3975	Ein echter ketzerie Mit strenger jagerie.
[84a]	Richtům was ime unmere: Ich wene der lobebere Lutzel ie gestunde
3980	Nach kirchen joch nach prunde. Peffelich was sin gewant, Mezlich allewege erkant: Einvaldeg unde otmude Bi dugentlicher gůde
3985	Was der lobebere, An guden sitten swere, An formen erneslich gevar. Er nam guder lude war: Seht den was er geneme,
3990	Si ieme ouch wol gezeme; Den bosen was er herte, Er strafte ir geverte An gerichte strenge, Zu ir straphe genge.
3995	Er predigete uffenbare Heilecliche lare. Wande in der babest sande Diseme dutschen lande Mit guder brive urkunde,
4000	Daz man dar an befunde,
[84b]	Daz er in ganzer stede Gewalt des stules hede Godes wort zu sagene, Ketzere nu zu jagenne
4005	Mit fure unde uffer hurde, Wa er der innen wurde. Ouch volgete ime ein michel schar, Di siner predige namen war, Paffen unde lude vil,
4010	Des volkes menje an endes zil. Di lude in alle forchten An werken unde an worten Alse einen heileclichen man, Der strengen rechtekeit began,
4015	Iedoch mit underscheide: Di vorchten in durch leide Unde di in rechter gnade, Di man zu ime hade. Der werde furste here
4020	In godelicher ere Den lerer also lobesam Zu male in sine plichte nam. So dugentliche wirdekeit Der furste hatte an in geleit,
[85a]	Daz er sin mit rade wielt Unde in also zu meister hielt, Daz er ime alles nu beval, Waz von godes gabe sal Zu der herschaft hangen:
4030	Daz muste er alles langen, Besetzen wi er wolde, Alse er ez lihen solde. Ouch was des fursten wille, Daz sich di frouwe stille,
4035	Elizabeth di reine In geistlicher meine Zu meister Conrade Bestrickete umme gnade Gehorsamekeide,
4040	Doch in bescheidenheide. Si gelobete in sine hende Biz an ir libes ende Kusche ummer me zu lebene. Si nam ir uz vil ebene
4045	Ir elichen mahelschaft: Di wolde si halden unbehaft Fursten Ludewige. Der rede ich me geswige:
[85b]	Si hielt in ganzer stede
4050	Wes si verjehen hede, Ir gehorsamekeit Mit vorgenanten underscheit Otmude bi ir jungen dagen. Di sache wart ouch an gedragen
4055	In Isenacher veste In der juncfrouwen reste Sente Katherinen, Da man sihet schinen In geistlicher minne
4060	Closterfrouwen inne. Nu quam iz alse verre Eins dages, daz der herre Meister Cunrat wolde Predigen, alse er solde:
4065	Er sante nach der frouwen, Daz si sich lieze schouwen Zu godelicher lere. Nu was iezu di bere Frouwe Agnes ir geswie,
4070	Di edel unde di frie, Zu Misene ein furstinne, Ein werde margravinne,
[86a]	Ir wirtes suster komen dar: Der solt di frouwe nemen war
4075	Mit dugentlichen dingen. Des muste ir misselingen Daz si zu kirchen nit enquam Sus bleib si ungehorsam, Des ir enstunt ungenade
4080	Von meister Cůnrade. Daz er durch die geschihte Wolde abe sin ir plihte, Ledec dirre frouwen plege, Daz wolde er herten alle wege,
4085	Wen daz di frouwe gude In ruwelichem mude, Di edel furstinne In dugentlicher minne Lac vur des herren vuze,
4090	Di reine unde ouch di suze. Di selbe gnaden riche Bat otmudecliche Mit andacht umme gnade: Des wart er doch zu rade,
4095	Das er di frouwen obesam In sine plege wider nam,
[86b]	Unde streich ire megede Durch dise missehegede, Daz si versumet haden
4100	Des applazes gnaden Unde ouch daz here godes wort; Daz hiez er si bewaren vort. Di frouwe selic unde clar Hielt vollecliche zwei jar
4105	Di gehorsamekeit Unde ander ir bescheidenheit An allen dingen ebene Bi ir wirtes lebene, An ir druwelichen e;
4110	Sit beginc si dannoch me In godelichem prise Vil dugentlicher wise.

<<< Übersicht <<< vorige Seite nächste Seite >>>

Von sente Elsebede

der heilegen frouwe

Hi hebit sich an

daz erste bůch von sente Elizabeth

Ei welch ein selic mahelschaft,

Daz in so grozer liebe craft

1495

Zwein gemecheden under ein

Was gefuget, daz in zwein

So reine minne sich erhůb,

Daz si flecken nit entsůb.

Ane alle brodecliche gelust,

1500

Mit dugentlicher wollust

Was ir fruntschaft understriht,

Daz si zu brodekeide niht

Was geneiget noch gestalt.

Ir beider dugent manicvalt

1505

Wůs unde ir geistliche zuht,

Daz si dugentlicher fruht

In beiden hatten wol gedaht

Unde euch mit werken vollebraht,

Kusche lebende an der e.

1510

Waz solde lange rede me?

[32b]

Zu gode stunt ir beider můt.

Die frŏwe selec unde gůt,

Nu junge brut, nu junges wip,

Mit flize kestigede iren lip

1515

Mit gůder werke menje.

Vasten unde venje,

Wachte unde ouch gebedes vil

Daz was ir vrŏde, ir selen spil:

Mit flize si der dinge pflac.

1520

Seht, wan si bi ir herren lac

Unde in ir mude si vernam,

Daz ir zit, ir stunde quam,

Daz si wolde uf an ir gebet,

Ei horet wie si danne tet

1525

(Wande ir daz bette was zu weich)

Dar abe si gar lise entsleich

Unde dachte ir herren wider zů,

Daz er iht innen wurde nu

Ir andacht, die si danne treib.

1530

Der furste ligende also bleib

In aller der gebere,

Alse er entslafen were:

Her umme daz der herre tet,

Daz si ir andacht, ir gebet

[C1b,8]

Wol stedeliche dribe

Und des ungeirret blibe.

Den edelen fůrsten wol gemut

Duhten alle ir wise gůt,

Wande allez ir gemeine

1540

Was seleg unde reine.

Des liz er sie irn willen han,

Wen daz die frauwe wol getan

Zu kindes was der jare:

Des hatte er weizgot vare

1545

Daz sie arbeit swechte,

Ob sie zu lange wechte.

Daz was in rechter warheit

Der frauwen gros otmůdeckeit,

Daz sie irs wirtes bette liz,

1550

Der lipliche ir mahel hiz,

Unde suchte ir zarten herren Crist,

Der war ir selen mahel ist.

[a30,11]

Auch was des herren minne groz,

Daz in ir wise nicht verdroz,