BIBLIOTHECA AUGUSTANA

 

Sente Elsebede leben

nach 1297

 

 

Von sente Elsebede

der heilegen frouwe

 

___________________________________________________

 

 

 

Diz ist die forrede

von sente elsebede

der heilegen frouwe

 

Gude aventure zů sagene

Ist gar wol zů verdragene,

Want si lerent einen man,

Der sich da bi geziehen kan,

5

Daz er gewinnet reinen můt

Unde ummer dugentliche dut.

Des ist ein Spiegel uns gegeben

Der heiligen altvedere leben,

Daz wir ein bilde můgen han

10

Ir werke die si hant gedan,

Wie man geziehe sich da bi

Unde ielang dugenthafter si.

Hie von der kunic David

In deme salter also quid:

15

Cum sancto sanctus eris,

Perverso perverteris,

Mit den guden wirdes du gůt.

Mit den bösen wirt din můt

Von dugenden verwiset.

20

Wer nu daz beste priset

Geistliche zu genesene,

Der flize sich zu lesene

[1b]

An tugentliche mere:

Seht, daz ist fruhtbere

25

Unde ist eweclich gewin.

Ei herre, were iezu min sin

Zu diechten wol also bereit,

Daz ich der claren wirdekeit,

Die als ein morgenlieht uf get,

30

Der heren sante Elizabet

Unde ir dugentliches leben

Zu worte kunde wol ergeben,

Nach labe wirdecliche sagen,

Daz gude lute icht dorften clagen

35

Keiner hande swere.

Die in dutscher mere

Gerne ir dugent wisten:

Nicht langer wolde ich fristen

Dichten unde schriben.

40

Nu můz si leider bliben

Von mir deren under wegen,

Vonde ich ir nicht inkan geplegen

Mit hovelichen worten.

In disen selben forten

45

Lide ich innerliche krot.

Des helfet alle biden got,

Den minnesamen herren,

[2a]

Daz he mir minen werren

Mit siner gnade bůze,

50

Daz ich ein lützel muze

Gesagen von der selekeit,

Die an die vrŏwen was geleit

Hie an disem lebene.

Obe ich ez dan nit ebene

55

Nach rehte vollebrengen

Joch ir lob ersprengen

Mit spruchen, als ich dede,

Ob ich die volleist hede.

So bide ich üch durch minne,

60

Daz ir alle üwe sinne

Da zů wollet rihten,

Daz ir min swaches dichten

Wollet gerne also vernemen,

Alse üwer dugent mac gezemen,

65

Baz dan ich unwiser man

Mit worten uz gelegen kan.

Geschihet daz, so dunket mich

An üch allen tugentlich,

Daz ir mit flize nemet war

70

Wie dise rede si gevar.