Tristan

XX. Marjodo (13451 - 13672)

__________________________________________________________________________________

Tristandes lob und êre

diu bluoten aber dô mêre

ze hove und in dem lande.

si lobeten an Tristande

13455

sîne vuoge und sîne sinne.

er und diu küniginne

si wâren aber vrô unde vruot,

si gâben beide ein ander muot,

sô s'iemer beste kunden.

13460

In den selben stunden

haete Tristan einen cumpanjûn,

der was ein edeler barûn,

des küneges lantsaeze,

sîn oberster truhsaeze,

13465

und was geheizen Marjodô.

der selbe was Tristande dô

gevriunt unde geminne

durch die süezen küniginne.

der truog er tougenlîchen muot,

13470

als manec man maneger vrouwen tuot,

dâ sî sich lützel kêret an.

der truhsaeze unde Tristan

si zwêne haeten under in zwein

gemeine herberge in ein

13475

und wâren gerne ein ander mite.

Ouch was des truhsaezen site,

wan Tristan schoener maere phlac,

daz er'm ie nahtes sô bî lac,

daz er bereite hin z'im sprach.

13480

eines nahtes ez geschach,

dô haete er mit Tristande

vil unde maneger hande

rede unde maere getriben

und was slâfende beliben.

13485

der minnaere Tristan

der stal sich tougenlîche dan

an sîne strichweide

ze manegem herzeleide

im selben unde der künigîn.

13490

do er unvermeldet wânde sîn

und sicher sîner dinge,

dô haete im misselinge

ir stricke, ir melde, ir arbeit

an den selben pfat geleit,

13495

den er underwîlen ie

z'Îsôte vrôlîche gie.

der was des nahtes besnît.

ouch schein der mâne zuo der zît

vil liehte und vil clâre.

13500

Tristan nam keiner vâre

noch keiner slahte merke war,

wan gieng et baltlîche dar,

dâ man im sîne tougenheit

bescheiden haete und ûf geleit.

13505

nu er in die kemenâten kam,

Brangaene ein schâhzabel nam.

vür daz lieht leinde si daz.

nune weiz ich, wie si des vergaz,

daz sî die tür offen lie

13510

und si wider slâfen gie.

Die wîle und aber daz geschach,

der truhsaeze der gesach

in sîme troume, dâ er slief,

einen eber, der ûz dem walde lief,

13515

vreislîch unde vreissam.

ûf des küneges hof er kam

schûmende unde wetzende

und sich ze wîge setzende

ûf allez daz, daz er dâ vant.

13520

nu kam geloufen al zehant

des hovegesindes michel craft.

dâ lief michel ritterschaft

umbe den eber her unde hin

und enwas doch nieman under in,

13525

der in getorste bestân.

sus liez er allez hine gân

limmende durch den palas.

dâ Markes kemenâte was,

dâ brach er zuo den türen în.

13530

daz sîn bette solte sîn,

daz zewarf er hin unde her.

mit sînem schûme solget er

daz bette und al die bettewât,

diu küneges bette bestât.

13535

diz sâhen alle Markes man

und nam sich'z doch ir keiner an.

Nu Marjodoc erwachet was,

den troum er in sîn herze las.

wan er was ime sêre ande.

13540

hie mite rief er Tristande

und wolte im sagen maere,

waz ime getroumet waere.

nun antwurte im nieman dâ.

nu rief er aber und aber sâ

13545

und reichte mit der hant dô dar,

und alse er nihtes wart gewar

noch an dem bette nieman vant,

nû bewânde er in zehant

umbe tougenlîchiu teidinc.

13550

aber umbe sînen haelinc

hin zuo der küniginne

des enhaete er keine sinne,

ern haete keinen wân dar an.

doch nam er ime hin z'ime dâ van

13555

ein vriuntlîchez zornelîn,

sô liep als er im solte sîn,

daz er im niht enseite

von sîner tougenheite.

Marjodoc stuont ûf zehant

13560

und leite an sich sîn gewant.

er sleich vil lîse hin zer tür

unde wartete dervür

und sach Tristandes spor dervor.

hie mite sô volgete er dem spor

13565

hin durch ein boumgertelîn.

ouch leitete in des mânen schîn

über snê und über gras,

dâ er vor hin gegangen was,

unz an der kemenâten tür.

13570

dâ gestuont er vorhtende vür

und misseviel im al zehant,

daz er die tür als offen vant.

sus trahtete er dâ lange

nâch Tristandes gange.

13575

er bedâhte übel unde guot.

iezuo sô kam im in den muot,

Tristan der waere komen dar în

durch eteslîch juncvrouwelîn.

sô der wân iezuo was getân,

13580

sô was al zehant sîn wân,

er waere dar inne

durch die küniginne.

der wân gie hin unde her.

ze jungeste genante er

13585

und gie vil lîse dar în

und envant dâ lieht noch mânen schîn;

wan von der kerzen, diu dâ bran,

dâ gesach er lützel van.

dâ leinde ein schâhzabel vor.

13590

sus gieng er allez enbor

und greifende mit henden

an mûren unde an wenden,

biz er z'ir beider bette kam,

si beidiu samet dar an vernam

13595

und hôrte al ir gelegenheit.

diz was im inneclîche leit

und tete im in dem herzen wê,

wan er haete Îsolde allez ê

liebe unde holden muot getragen.

13600

nu was daz allez underslagen

mit hazze und mit leide.

er haete an ir dô beide

haz unde leit, leit unde haz.

in muote diz, in muote daz.

13605

ern kunde sich verrihten niht,

wie er ze dirre geschiht

alsô gewerben möhte,

als ez vuogete unde töhte.

in reizete haz unde leit

13610

ûf die grôzen unhöfscheit,

daz er ir ding lûtbaerete

und ez al dâ vermaerete.

sô zôch in aber Tristan

und diu vorhte dervan,

13615

die er hin z'ime haete,

ob er'm iht leides taete.

Sus kêrte er umbe und gie dan.

als ein geleidegeter man

leite er sich aber wider nider.

13620

nu kam ouch Tristan schiere wider.

vil lîse er an sîn bette seic.

er sweic unde jener sweic,

daz ir deweder nie wort gesprach,

daz in doch selten ê geschach

13625

und des ê wâren ungewon.

von dirre vremede und hie von

sô sach im Tristan daz wol an,

daz er eteswaz hie van

arcwânde in sînem muote,

13630

und haete sîne huote

an rede und an gelâze

in bezzerre mâze,

dan er ê mâles taete.

nu was ez aber ze spaete.

13635

sîn tougen was vermaeret,

sîn haelinc g'offenbaeret.

Der nîdege Marjodô

der nam den künec verholne dô

und seite im, daz ein maere

13640

dâ ze hove ensprungen waere

von Îsolde und Tristande,

daz liute unde lande

harte sêre missezaeme.

daz er es war naeme

13645

und rât dar umbe haete,

waz er dar zuo getaete.

ez gienge im harte sêre

an sîn ê und an sîn êre.

ern gewuoc im aber des niht,

13650

daz er die wâren geschiht

als endeclîche weste.

der getriuweste unde der beste,

der einvalte Marke

den wunderte es starke

13655

und volgete es ungerne,

daz er den leitesterne

sîner vröuden an Îsolde

iemer bewaenen solde

an keiner slahte unguote.

13660

doch truog er'z in dem muote

leitlîchen unde swâre

und was in staeter vâre

alle zît und alle stunde,

ob er s'ervinden kunde

13665

an keiner bewaerde.

ir rede und ir gebaerde

daz bemarcte er allez sunder

und enkunde sî hier under

an keiner wârheit ervarn.

13670

wan Tristan der bat si'z bewarn

und haete Îsolde kunt getân

des truhsaezen arcwân.