BIBLIOTHECA AUGUSTANA

 

Gottfried von Straßburg

um 1210

 

Tristan

 

XXII. Melot (14235 - 14582)

 

__________________________________________________________________________________

 

 

14235

Nu daz der truhsaeze ersach,

daz sînes willen niht geschach,

er versuohte ez aber anderswâ.

ein getwerc was in dem hove dâ,

daz selbe solte namen hân

14240

Melôt petit von Aquitân

und kunde ein teil, alsô man giht,

umbe verholne geschiht

an dem gestirne nahtes sehen.

ine wil aber nihtes von im jehen,

14245

wan alse ich'z von dem buoche nim.

nune vinde ich aber niht von im

an dem wâren maere,

wan daz ez kündic waere,

listic unde rederîch.

14250

daz was dem künege heinlîch

und ouch der kemenâten.

mit dem begunde er râten,

swenne ez zen vrouwen kaeme,

daz ez dâ war naeme

14255

Tristandes unde der künigîn.

möhte ez im dâ zuo guot gesîn,

daz man die wâren künde

der minne an in bevünde,

ez haete es iemer mêre

14260

wider Marken lôn und êre.

 

Dâ kêrte ouch ez spâte unde vruo

sîne lüge und sîne lâge zuo.

ez leite sîne vâre

an rede und an gebâre

14265

ze iegelîchen stunden

und haete ouch schiere ervunden

die liebe an den gelieben zwein.

wan si haeten under ein

sô süeze gebaerde,

14270

daz Melôt die bewaerde

der minnen al zehant dâ vant,

und seite ouch Marken al zehant,

daz binamen dâ minne waere.

sus triben si drî diz maere,

14275

Melôt und Marke und Marjodô,

biz si under in gevielen dô

mit gemeinem râte dar an:

würde mîn hêr Tristan

von dem hove gescheiden,

14280

man möhte an in beiden

die wârheit offenbaere sehen.

nu diz was al zehant geschehen

reht alse ez wart gerâten dâ.

der künec bat sînen neven iesâ

14285

durch sîn selbes êre,

daz er dekeine kêre

zer kemenâten naeme

noch niemer dâ hin kaeme,

da der vrouwen keiniu waere.

14290

der hof der tribe ein maere,

man wolte es hüetende sîn,

dâ von ime unde der künigîn

leit unde laster möhte enstân.

nu diz was al zehant getân,

14295

daz er gebôt und des er bat.

Tristan meit iegelîche stat,

dâ der vrouwen heinlîche was.

kemenâten unde palas

dâ enkam er niemer în.

14300

daz ingesinde daz nam sîn

und sîner vremede grôze war.

si redeten ime ze leide dar

vil übele und anders danne wol.

sîn ôren wurden dicke vol

14305

mit iteniuwem leide.

 

Er unde Îsôt, si beide

si triben die zît mit sorgen hin.

triure unde clage was under in

in micheler unmüezekeit.

14310

si haeten leit unde leit.

leit umbe Markes arcwân,

leit, daz sî niht mohten hân

keine state under in zwein,

daz sî geredeten in ein.

14315

ietwederem begunde

von stunde ze stunde

herze unde craft geswîchen.

bleichen unde blîchen

begunde ir varwe unde ir lîp.

14320

der man bleichete durch daz wîp,

daz wîp bleichete durch den man;

durch Îsôte Tristan,

durch Tristanden Îsôt.

daz tete in beiden michel nôt.

14325

es wundert mich cleine,

was ir nôt gemeine

und ir leit ungescheiden.

ez enwas ouch an in beiden

niemê wan ein herze unde ein muot.

14330

ir beider übel, ir beider guot,

ir beider tôt, ir beider leben

diu wâren alse in ein geweben.

swaz ir dewederem gewar,

des wart daz andere gewar.

14335

swaz sô dem einem sanfte tete,

des enpfant daz ander an der stete.

si wâren beide under in zwein

mit übele und mit guote al ein.

ir gemeiniu herzeswaere

14340

diu wart sô schînbaere

under ir beider ougen,

daz man vil cleine lougen

der minnen an ir varwe vant.

Und Marke enstuont sich al zehant

14345

und kôs wol an in beiden,

ir vremeden unde ir scheiden

daz in daz an ir herze gie.

westen sî wâ oder wie,

si saehen gerne ein ander.

14350

ein ursuoche vander

und hiez an den stunden

die jegere mit den hunden

ze walde sich bereiten.

er enbôt in unde seiten

14355

und hiez ouch in den hof sagen,

er wolte zweinzic tage jagen.

swer mit gejegede kunde

oder swer sô sîne stunde

dâ mite vertrîben wolte,

14360

daz sich der reiten solte.

urloup nam er zer künigîn

und hiez si nâch ir willen sîn

dâ heime vrôlîch unde vrô.

verholne bevalh er dô

14365

dem getwerge Melôte,

daz ez Tristande unde Îsôte

zuo z'ir tougenheite

lüge unde lâge leite.

ez genüzze es iemer wider in.

14370

er selbe vuor ze walde hin

mit michelem geschelle.

sîn weidegeselle

Tristan beleip dâ heime

und enbôt dem oeheime,

14375

daz er siech waere.

der sieche weidenaere

wolt ouch an sîne weide.

er unde Îsôt, si beide

beliben an ir triure

14380

und suohten âventiure

in anclîcher trahte,

mit wie getâner ahte

daz iemer kunde geschehen,

daz sî sich möhten gesehen.

 

14385

Nune kunden sî'z ertrahten nie.

under disen dingen gie

Brangaene zuo Tristande,

wan sî vil wol erkande,

daz sîn herzeswaere

14390

vil nâhe gênde waere.

si clagete ime und er clagt ir.

«â reine» sprach er «saget mir,

welch rât gewirdet dirre nôt?

wie gewirbe ich und diu arme Îsôt,

14395

daz wir sus niht verderben?

ine weiz, wie wir gewerben,

daz wir behalten unser leben.»

«Waz râtes mac ich iu gegeben?»

sprach aber diu getriuwe

14400

«daz ez got iemer riuwe,

daz wir ie wurden geborn!

wir haben elliu driu verlorn

unser vröude und unser êre.

wir enkomen niemer mêre

14405

an unser vrîheit als ê.

Îsôt ôwê! Tristan ôwê!

daz ich iuch mit ougen ie gesach

und allez iuwer ungemach

von mir ûf erstanden ist!

14410

und enweiz nu weder rât noch list,

dâ mite ich iu gehelfen müge.

ine kan niht vinden, daz iu tüge.

ich weiz ez alse mînen tôt,

ir komet es in grôze nôt,

14415

belîbet ir iht lange

in huote und in getwange.

Sit ez niht bezzer mag gesîn,

sô volget doch dem râte mîn,

nu meine ich und ze dirre zît,

14420

die wîle ir uns sus vremede sît.

als ir des werdet gewar,

daz iu diu state widervar,

sô nemet ein öleboumes rîs

und snîdet spaene in lange wîs

14425

und zeichent die mit nihte mê,

wan machet einhalp ein T

und machet anderhalp ein I,

daz niwan der êrste buochstap sî

von iuwer beider namen dar an,

14430

und leget dâ weder zuo noch van

und gât zem boumgarten în.

ir wizzet wol daz bechelîn,

daz von dem brunnen dâ gât,

hin dâ diu kemenâte stât.

14435

dar în sô werfet einen spân

und lât in vliezen unde gân

hin vür der kemenâten tür.

dâ gân wir z'allen ziten vür

ich und diu vröudelôse Îsôt

14440

und weinen unser herzenôt.

als wir in danne ersehen dâ,

dâ bî bekennen wir iesâ,

daz ir dâ bî dem brunnen sît.

dâ der öleboum schate gît,

14445

dâ wartet unde nemet war.

diu senede gât ie zuo z'iu dar,

mîn vrouwe und iuwer vriundîn,

und ich ouch, alse ez mac gesîn

und ez an iuwerm willen ist.

14450

hêrre, diu selbe kurze vrist,

die ich noch ze lebene hân,

diu sol mit iu zwein hine gân,

daz ich iu beiden gelebe

und iu ze lebene rât gegebe.

14455

solte ich umbe eine stunde,

in der ich iu zwein kunde

ze iuwern vröuden geleben,

mîner stunde tûsent geben:

ich verkoufte alle mîne tage,

14460

ine gesenftet iuwer clage.»

«Genâde schoene!» sprach Tristan

«ine hân dâ keinen zwîvel an,

an iu sî triuwe und êre.

der zweier wart nie mêre

14465

in einem herzen begraben.

solte ich dekeine saelde haben,

die solte ich iu wol kêren

ze vröuden unde z'êren.

swie kumberlîche ez aber nu stê,

14470

swie kûme sô mîn schîbe gê,

wiste ich, wie ich nu kunde

mîne tage und mîne stunde

ze iuwern vröuden hin gegeben,

ich wolte ouch deste kurzer leben.

14475

des getrûwet unde geloubet mir!»

weinende sprach er aber z'ir:

«getriuwe, saeligez wîp!»

hie mite twanc er si an sînen lîp

mit armen nâhe und ange.

14480

ir ougen unde ir wange

kuste er mit maneger quâle

dicke und ze manegem mâle.

«schoene» sprach er «nû tuot wol

und alse der getriuwe sol,

14485

und lâzet iu bevolhen sîn

mich und die seneden sorgaerîn,

die saeligen Îsôte.

bedenket ie genôte

uns beidiu samet, si unde mich.»

14490

«gerne hêrre, daz tuon ich.

gebietet mir, nu wil ich gân.

tuot, alse ich iu gerâten hân,

und sorget niht ze sêre.»

«got sî, der iuwer êre

14495

und iuwern schoenen lîp bewar!»

Brangaene neic weinende dar

und gienc trûrende dan.

der trûraere Tristan

der sneit und warf die spaene,

14500

als ime sîn rât Brangaene

ze sînen dingen lêre bôt.

sus kam er und sîn vrouwe Îsôt

zem brunnen an des boumes schate

vil heinlîch und ze guoter state

14505

in ahte tagen wol ahte stunt,

daz ez nie nieman wart kunt,

noch ez kein ouge nie gesach.

wan eines nahtes ez geschach,

dô Tristan aber des endes gie,

14510

dô wart sîn Melôt, ine weiz wie,

daz vertâne getwerc,

des vâlandes antwerc,

von ungelücke gewar

und sleich allez nâch im dar

14515

und sach in zuo dem boume gân

und niht vil lange dâ bî stân,

unz daz ein vrouwe zuo z'im gie

und er die nâhe zuo z'im vie.

wer aber diu vrouwe waere,

14520

des was ez ungewaere.

 

Des anderen tages wart,

Melôt sleich aber ûf sîne vart

ein lützel vor dem mitten tage

und haete mit velschlîcher clage

14525

und mit vil arger âkust

wol understôzen sîne brust

und kam ze Tristande hin.

«entriuwen» sprach er «hêrre, ich bin

mit sorgen her gegangen.

14530

wan ir sît sô bevangen

mit merke und mit vâre,

daz ich mich her zewâre

verstolen hân mit maneger nôt

und daz mich diu getriuwe Îsôt,

14535

diu tugenthafte künigîn,

erbarmet in dem herzen mîn,

diu leider nû ze dirre vrist

durch iuch in grôzen sorgen ist.

diu bat mich dâ her zuo z'iu gân,

14540

wan s'anders nieman mohte hân,

der ir ze disem maere

alse gevellic waere.

si bat mich unde gebôt mir,

daz ich iuch gruozte von ir

14545

und daz von herzen taete

und iuch vil verre baete,

daz ir si noch gespraechet dâ,

ine weiz, ir wizzet wol wâ,

da ir nâhest bî ir wâret,

14550

und ouch vil rehte vâret

der selben stunde unde der zît,

als ir gewon ze komene sît.

ine weiz, wes s'iuch dâ warnen sol.

und sult ir mir gelouben wol,

14555

ir leit und iuwer ungemach,

daz mir nie leider geschach,

dan mir geschehen ist dar an.

nu hêrre, mîn hêr Tristan,

ich wil varn, gebietet mir.

14560

swaz ir welt, daz sage ich ir.

in getar hie langer niht gesîn.

daz hovegesinde, würde ez mîn

an dirre verte innen,

ich möhte es schaden gewinnen.

14565

si jehent doch alle und ist ir wân,

swaz under iu zwein ist getân,

daz allez sî mit mir geschehen.

des wil ich hin ze gote jehen

und hin z'iu beiden, daz ez nie

14570

mit keinem mînem râte ergie.»

«Vriunt, troumet iu?» sprach Tristan

«waz maere trîbet ir mich an?

waz ist der hoveliute wân?

waz hât mîn vrouwe und ich getân?

14575

ûz! strîchet balde in gotes haz!

und wizzet waerlîche daz:

swes ieman waenet oder giht,

liez ich ez allermeiste niht

durch mîn selbes êre,

14580

irn geseitet niemer mêre

hin wider ze hove maere,

waz iu hie getroumet waere.»