Tristan

XXVI. Die Verbannung (16403 - 16678)

__________________________________________________________________________________

Aber haete Tristan unde Îsôt

überwunden ir sorge unde ir nôt

16405

und wâren aber des hoves wol.

der hof was aber ir êren vol.

ir beider lobes enwart niemê.

si wâren aber heinlîch als ê

ir beider hêrren Marke.

16410

ouch hâlen sî sich starke;

wan sô s'ir state under in zwein

niht wol mohten gehaben inein,

sô dûhte sî der wille guot,

der gelieben dicke sanfte tuot.

16415

der trôst und der gedinge,

wie man daz vollebringe,

dar an daz herze danne lît,

daz gibet dem herzen alle zît

lebende lust und blüende craft.

16420

diz ist diu rehte trûtschaft,

diz sint die besten sinne

an liebe und an der minne.

swâ man der tât niht haben müge,

dâ nâch als ez der minne tüge,

16425

daz man ir gerne habe rât

und neme den willen vür die tât.

swâ der gewisse wille sî,

dâ ensî diu guote state bî,

man sol gelangen stillen

16430

mit dem gewissen willen.

gespilen unde gesellen

die ensulen niemer gewellen,

daz in diu state widerseit,

oder sî wellent al ir leit.

16435

sô man enmac, der danne wil,

daz ist ein harte unwaege spil.

sô man wol müge, sô welle:

daz ist guot spilgevelle,

dane lît niht herzeleides an.

16440

die gespiln Îsôt und Tristan

sô sî der state niht mohten hân,

sô liezen sî die state gân

mit dem gemeinen willen hin.

der wille der sleich under in

16445

lieplîchen unde suoze

in micheler unmuoze.

gemeine liebe, gemeiner muot

die dûhten sî süeze unde guot.

die gelieben die hâlen

16450

ir liebe z'allen mâlen

vor dem hove und vor Marke

als verre und alse starke,

sô sî diu blinde liebe lie,

diu mit in beiden umbe gie.

16455

Nu ist aber der minnen arcwân

und sîn sâme alsô vertân:

swâ sô er hin geworfen wirt,

daz er diu wurzelîn gebirt,

dâ ist er alsô vrühtic,

16460

sô biric und sô zühtic,

die wîle er keine viuhte hât,

daz er dâ kûme zegât

und joch niemer mac zegân.

Der unmüezege arcwân

16465

der begunde aber genôte

an Tristande unde Îsôte

sînen wuocher bern unde spil.

dâ was der viuhte gâr ze vil

der süezen gebaerde,

16470

an der man die bewaerde

der minne z'allen zîten sach.

er haete vil wâr, der dâ sprach:

swie man es hüetende sî,

si sint doch gerne ein ander bî,

16475

daz ouge bî dem herzen,

der vinger bî dem smerzen.

des herzen leitesterne

die schâchent vil gerne

dar, dar daz herze ist gewant.

16480

ouch gât der vinger und diu hant

vil dicke und ze maneger zît

des endes, dâ der smerze lît.

als tâten die gelieben ie.

sine mohten noch enkunden nie

16485

durch keine ir angest verlân,

sin bûweten den arcwân

mit manegem süezem blicke

vil ofte und alze dicke.

wan leider, alse ich iezuo las,

16490

des herzen vriunt, daz ouge, was

gewendet nâch dem herzen ie,

diu hant ie nâch dem smerzen gie.

si begunden dicke under in zwein

ir ougen unde ir herze in ein

16495

mit blicken sô verstricken,

daz sî sich ûz ir blicken

oft und ze manegen stunden

nie sô verrihten kunden,

Marke envünde ie dar inne

16500

den balsemen der minne.

durch daz er nam ir allez war.

sîn ouge daz stuont allez dar.

er sach vil dicke tougen

die wârheit in ir ougen

16505

und anders aber an nihte

niwan an ir gesihte.

daz was sô rehte minneclîch,

sô süeze und alsô senerîch,

daz ez im an sîn herze gie

16510

und solhen zorn dâ von gevie,

solhen nît und solhen haz,

daz er diz unde daz,

zwîvel unde arcwân

allez z'einer hant lie gân.

16515

im haete leit unde zorn

sinne unde mâze verlorn.

ez was sîner sinne ein tôt,

daz sîn herzeliep Îsôt

ieman solte meinen

16520

mit triuwen wan in einen.

wan ime was ie genôte

niht dinges vor Îsôte

und was ie dar an staete.

swaz zornes er haete,

16525

sô was im ie sîn liebez wîp

liep unde lieber dan sîn lîp.

swie liep s'im aber waere,

doch brâhte in disiu swaere

und diz vil tobelîche leit

16530

in alsô grôze tobeheit,

daz er sich es gâr bewac

und niwan an sîme zorne lac.

ern haete niht gegeben ein hâr,

waere ez gelogen oder wâr.

16535

In disem blinden leide

besande er si beide

vür den hof in den palas,

dâ al daz hovegesinde was.

z'Îsôte er offenlîche sprach,

16540

daz al der hof hôrte unde sach:

«mîn vrouwe Îsôt von Îrlant,

liut unde lande ist wol erkant,

wie sêre ir g'arcwaenet sît

nu lange und vor maneger zît

16545

mit mînem neven Tristande.

nu hân ich maneger hande

lâge unde list ûf iuch geleit,

ob ir iuch dirre tumpheit

durch mich woltet mâzen.

16550

nun wellet ir'z niht lâzen.

ine bin niht ein sô tumber man,

ine wizze und sehe iu daz wol an

offenlîche und tougen,

iuwer herze und iuwer ougen

16555

daz diu sint z'allen stunden

ûf mînen neven gebunden.

dem bietet unde erzeiget ir

süezer gebaerde danne mir.

bî der gebaerde erkenne ich mich,

16560

daz er iu lieber ist dan ich.

swaz ich mir huote genime

beidiu hin z'iu und hin ze ime,

dazn mac ze keinen staten gestân.

ez ist allez umbe niht getân,

16565

swie vil ich es getrîbe.

ich hân iuch an dem lîbe

sô dicke gesundert,

daz mich es iemer wundert,

daz ir sô lange und alle zît

16570

des herzen sô gemeine sît.

iuwer süeze blicke

hân ich gescheiden dicke

und enkan doch an iu beiden

der liebe niht gescheiden

16575

und hân iu des ze vil vertragen.

Nu wil ich iu daz ende sagen.

ine wil diz laster und diz leit,

daz ir mir habet ûf geleit,

mit solhen arbeiten

16580

mit iu nimêre leiten.

ine lîde dirre unêre

nâch dirre zît nimêre.

ouch enwil ich mich durch dise geschiht

an iu sô sêre rechen niht,

16585

als ich von rehte solte,

ob ich mich rechen wolte.

neve Tristan, mîn vrouwe Îsôt:

daz ich iu beiden den tôt

oder iht herzeleides tuo,

16590

dâ sît ir mir ze liep zuo,

des ich doch vil ungerne gihe.

sît ich nu an iu beiden sihe,

daz ir ein ander alle zît

wider allem mînem willen sît

16595

lieber dan ich iu beiden sî,

sô weset ouch beide ein ander bî,

als iu ze muote gestê.

durch mîne vorhte lât nimê.

sît iuwer liebe sô grôz ist,

16600

sone wil ich iuch nâch dirre vrist

beswaeren noch betwingen

an keinen iuwern dingen.

nemet ein ander an die hant

und rûmet mir hof unde lant.

16605

sol mir leit von iu geschehen,

daz enwil ich hoeren noch sehen.

diu gemeinde under uns drîn

diu enmac niht langer gesîn.

ich wil iuch zwei derbî lân,

16610

ich eine wil dervon gân,

swie ich mich dervon geloese.

disiu gemeinde ist boese.

ich wil ir gerne haben rât.

der künec der wizzentlîche hât

16615

an minnen cumpanîe,

deist michel dorperîe.

vart ir beidiu gote ergeben,

leitet liebe unde leben,

als iu ze muote gestê.

16620

dirre cumpanîe wirt niemê!»

Nu diz ergie und diz geschach,

reht alse ez Marke vor gesprach.

Tristan und sîn vrouwe Îsôt

si nigen mit maezlîcher nôt,

16625

mit küelem herzeleide

dem künege ir hêrren beide,

dâ nâch der massenîe.

diu getriuwe cumpanîe

bîhanden sî sich viengen,

16630

ûf den hof sî giengen.

Brangaenen ir gesellîn

die hiezen sî gesunde sîn

und bâten si, daz sî belibe

und dâ ze hove die zît vertribe,

16635

biz s'aber von in vernaeme,

wie in zwein ir dinc kaeme.

daz bevulhen s'ir vil starke.

Tristan nam zweinzic marke

von Îsolde golde

16640

im selben unde Îsolde

z'ir nôtdürfte und z'ir lîpnar.

dar zuo sô brâhte man im dar,

des er zer verte haete gert:

sîne harphen und sîn swert,

16645

sîn pirsarmbrust und sîn horn.

dâ zuo sô haete er ime erkorn

ûz sînen bracken einen

beidiu schoenen unde cleinen

und was der Hiudan genant.

16650

den nam er selbe an sîne hant.

sîn gesinde bat er got bewarn

und hiez si wider ze lande varn

an sînen vater Rûâlen

wan eine Curvenâlen,

16655

den behabete er an sîner schar.

dem bôt er ouch die harphen dar.

daz armbrust er selbe nam,

daz horn unde den hunt alsam,

Hiudanen, niht Petitcreiu.

16660

sus riten sî dan von hove si driu.

Brangaene diu reine

diu beleip alterseine

mit jâmer und mit triure.

diu trûrege âventiure

16665

und daz vil leide scheiden

von ir gevriunden beiden

daz gieng ir sô mit smerzen

und alsô gâr ze herzen,

daz ez ein michel wunder was,

16670

daz sî vor leide genas.

ouch schieden jeniu beide

von ir mit manegem leide,

wan daz si sî dâ durch den list

eine kurzlîche vrist

16675

tweln unde belîben hiezen

und sî bî Marke liezen,

daz sî die suone von in zwein

wider Marken aber trüege in ein.