BIBLIOTHECA AUGUSTANA

 

Johans, der Jansen Enikel

um 1230/40 - nach 1300

 

Weltchronik

 

Herren und Knechte, Turmbau zu Babel,

heidnische und christliche Sprachen

Verse 3043 - 3456

 

__________________________________________________________________________________

 

 

 

Ich sag iu, an der selben zît

wart alliu werlt wît

3045

geteilet in driu teil.

diu zwei gewunnen grôzez heil;

daz dritt muost in fluoche stân,

als ich iu vor gesagt hân,

daz Sem unde Japhêt,

3050

ieslîcher grôz êre hêt

von irem vater Noê,

als ich iu hân gesaget ê,

und wie der dritt bruoder Cham

den fluoch von dem vater nam.

3055

des selben Noê kint zwâr

wârn gewaltic als gar,

daz in diu werlt was undertân

und muosten si ze herren hân.

ich sag iu daz ze mæren,

3060

swie frum Châm kint wæren,

si muosten dienen ze rehte

irn friunden sam ir knehte.

ez habent ouch die alten

den sit alsô behalten:

3065

alle die noch diener sint,

wîp, man und ouch kint,

diu an guot niht werdent rîch

hie ûf disem ertrîch,

daz wellent di selben wîsen man,

3070

daz si gehœrn Châmen an

und von im sîn bekomen.

daz hân ich dick vernomen.

si wellent daz die liute,

di dâ sam di briute

3075

rîtent und ouch gênt

und iriu hûs mit freuden stênt

und selten iht leides wirret

und si des nieman irret -,

die sint von Sem komen gar

3080

und ouch von Japhêt zwâr.

daz geschach von dem segen guot

daz si Noê hêt in huot.

 

Nû lâz wir sîn got pflegen,

der niht guots læt under wegen.

3085

nieman zen zîten was sô rîch,

daz weiz ich sicherlîch,

daz er niht kneht moht gehân,

der im was dienstes undertân,

wan ez was in den zîten reht,

3090

er wær ritter oder kneht,

dhein diener was im undertân.

für wâr ich iu daz sagen kan.

er hêt nieman dann sîn kint,

diu von im geborn sint.

3095

daz was dô in der werlt reht,

daz daz kint was des vater kneht.

von Cham kômen di êrsten kneht.

daz kom Japhêt und Sem reht.

die muoten bî irn jâren,

3100

daz Châmen kint ir diener wâren.

daz was allez von dem fluoch geschehen

den Noê tet, des muoz ich jehen.

nû habent die herren über al

einen strît gewunnen ân zal.

3105

daz selb ist ir aller sit

und volgt in ze allen zîten mit.

ob ich iu daz bediute?

si habent eigen liute

und jehent stæt, ez sî ir reht,

3110

si haben ritter unde kneht.

doch west ich gern diu mære,

von wiu ez komen wære

oder wer inz hiet beschaffen,

leien oder pfaffen.

3115

der nû daz kund suochen

an den alten buochen

oder an der niuwen ê,

daz wolt ich dienen immer mê.

ich weiz daz sicherlîchen wol

3120

swie gar mîn lîp sî tumpheit vol

doch hân ich dick vernomen,

daz wir von Evâ sîn bekomen

und von Adâmen

und von ir beider sâmen,

3125

herren unde knehte,

dâ von ich gern rehte

west diu wâren mære,

von wannen ez komen wære.

ze Rôm habent si einen sin,

3130

daz si jehent, daz von in

die fürsten kômen alle.

des strîtent si mit schalle.

swer mir niht geloubt der mær,

der frâg ze Rôm die Rœmær,

3135

wan si sint gemeine,

grôz unde kleine,

ez sî diu ganz wârheit

vor mangen jârn geseit,

daz Rôm sî diu êrst stat,

3140

dâ ie mensch în getrat,

hie dishalb meres. daz tuot bekant

di Rœmer in der kristen lant.

da von wellent si, die hêrsten sîn

bekomen von ir kindelîn.

3145

da von jehent si, daz iriu kint

sîn edler dann fürsten kint.

ich bin gewesen alsô kluoc,

daz ich hân gefrâget genuoc,

ob ieman west diu mære,

3150

von wannen ez komen wære

 

[Zusätzlicher Text aus HS B]

ob ez ieman hiet vernomen,

von wann die eigen wæren komen.

 

dâ wart mir von der wârheit

nie reht von geseit.

mîn frâg ich doch dicke kêrt

an di [die] der buoch wârn gelêrt.

3155

die jehent niht gelîche,

daz weiz ich sicherlîche.

es jehent sümlîch pfaffen,

ez hab got nie geschaffen.

sümlîch beginnent ouch jehen,

3160

ez sî von Noê geschehen,

daz er dem sun tet den fluoch,

als man ez schrîbet an diu buoch,

sînem sun Châmen

und allem sînem sâmen,

3165

und daz sîn sun Sem und Japhêt

den segen von dem vater hêt.

des wârn si frî und heten genuoc,

und allez daz diu erde truoc,

daz was in allez undertân.

3170

si wâren zwên werde man.

si jehent, daz si wæren vrî

und swaz geslehts von in sî,

daz si all frum wâren

nâch in bî irn jâren.

3175

daz geschach allez von der bet,

daz Noê in den segen tet

und daz sîn sun Cham

den fluoch von im vernam.

dâ sint di eigen von bekomen.

3180

alsô hân ich vernomen.

an got ich ez lâzen sol,

der weiz di wârheit all wol.

 

Ich wil iu allen kunt tuon,

daz Sem, Noê sun,

3185

Melchisedech wart genant,

als ich ez an dem buoch vant,

und wart der êrst priester ein,

der ûf daz ertrîch ie erschein.

der verriht daz volc bî den zîten

3190

beidiu nâhen unde wîten.

Sem, Noê sun, der guot kneht

sehs hundert jâr er lebt reht

und dar zuo zwei jâr.

daz ich iu sag, daz ist wâr.

3195

dar nâch wart er priester bekant;

Melchisedech wart er genant.

nû hân ich iu gesaget gar

von sînem alter zwâr.

 

Dar nâch tuon ich iu bekant,

3200

daz bi den zîten über alliu lant

chein künic noch künicrîch was,

als ich an dem buoch las.

dâ von wurden herren

nâhen unde verren,

3205

wan swer ze der selben zît

in der werlt wît

ein stat gestiften mohte,

diu sînen êren tohte,

dâ wart er herr inne.

3210

des hulfen im sîn sînne.

swer dô daz grœst kunn gewan,

der dûht sich ein biderman,

wan er wart gewaltic genuoc.

daz krenker kunn er nider sluoc.

3215

des moht dô nieman êr gehân

wan der vil kunnes gewan.

man vorht des selben bot

noch mêr dann got.

 

Bi den zîten was ein man bekant,

3220

der was Sale genant.

der selb stift ein stetelîn,

dâ wolt er herr inn sîn.

diu stat wart Salem genant.

dâ wart er herr inn bekant.

3225

er was mit hûs dar inn zwâr

mangen tac unde jâr.

doch wil daz buoch von im verjehen,

daz dâ wart von im gesehen

Samaritanischiu diet,

3230

als ez got wolt und riet.

daz selb was von im bekomen,

als ich ez hân von im vernomen.

 

Der des êrsten stiften began -

der was ein heidenischer man -

3235

Babilonie di heidenschaft,

der selb was vil manhaft.

Dare sô was er genant.

er was zwâr ein wîgant

des lîbes und des guotes.

3240

er was frîes muotes.

er lebt unlang biz an di zeit,

daz in der tôt dâ nider leit.

Babilonja was diu êrst stat,

die Dare gestiftet hât.

 

3245

Dar nâch als got wolde

und als ez wesen solde,

in Babylonja was ein man,

der wolt got niht sehen an

mit herzen und mit sinne,

3250

er noch sîn heideninne.

er was auch selb ein heiden,

dâ von er got muost leiden.

Babel sô was er genant.

ze Babylonje was sîn lant.

3255

herr und vogt was er zwâr

mangen tac unde jâr

und wart ouch herr dâ genant.

einen list er von im selben vant,

wan er was ân mâzen rîch.

3260

im dienten all gemeineclîch

Babylonja über al,

dâ von hêt er guot ân zal.

sîn gewalt was grôz und starc,

er hêt manic tûsent marc

3265

von silber und von golde,

dâ von er bouwen wolde

einen turn der an den himel rüeret.

dâ mit er sînen hort zerfüeret,

er sprach: «zwâr ich muoz besehen,

3270

des wil ich von schulden jehen,

wer oben ûf dem himel sî,

sô wirde ich aller sorgen frî,

wan ich hân des guoten sin,

daz ich an steg gê dar in.

3275

sô sich ich dann di wârheit.

swem ez sî liep oder leit,

durch den wil ich sîn niht enlân,

ich well sanft ze himel gân.»

 

Dâ mit sant Babel zehant

3280

dâ man mûrmeister vant.

zwên und sibenzic was ir zal.

ir kunst si kunden über al.

swaz man in von steinen nant,

daz was in allez wol bekant.

3285

Babel begunt si frâgen.

«wolt iuch niht betrâgen,

ich tæt iu gern bekant,

war umb ich nâch iu hân gesant.

ich wolt für sorgen und für trûren

3290

einen hohen turn mûren,

daz mir von dem wurd bekant

ze Babylonje in dem lant, - -

daz ir den turn sô hôch füert,

daz er an den himel rüert.»

3295

der red lachten di mûrær.

si sprâchen: «diu red ist uns swær.

doch tuot ir uns des stat,

wir mûren iu den turn drât.

unser kunst wir dar zuo kêrn,

3300

daz wir ander meister lêrn,

die mûren niht vil kunnen.

des sult ir uns wol gunnen,

wan ieslîch meister muoz under im hân

hundert mûrer sunder wân,

3305

die all meister sîn genant;

daz tuon wir iu für wâr bekant.»

dô sprach der herr Babel:

«grîft zuo dem turn snel.

ich gib iu allez daz ir welt:

3310

silber, golt iu nieman zelt.

dâ von lât iuch niht verdriezen.

kamer, kisten heiz ich iu entsliezen.

dar ûz nemt swaz ir welt,

sît iu daz guot nieman zelt.»

 

3315

Dô die mûrære

erhôrten disiu mære,

si griffen zuo dem turn drât

und mûrten fruo unde spât,

biz der turn wart sô hôch,

3320

daz man di stein hôch ûf zôch

und den morter gemeine.

ir tagwerc daz was kleine.

daz triben si biz an die zît,

daz der turn wart sô wît

3325

und an der hœch hêt die zal:

der turn aller über al,

fünf tûsent klâfter was er hôch

und vier und sibenzic dannoch.

dô daz allez geschach,

3330

ein stimm von dem himel sprach:

«vil lieben kint, wâ welt ir hin?

ir sît all âne sin.

der turn wirt niht sô lanc,

daz ir ân gotes danc

3335

müget gên dem himelrîch.

daz wizzet sicherlîch.

ez mac ân got niht geschehen.

daz lâz ich iuch besehen.»

dô diu stimm daz gesprach,

3340

di meister gewunnen ungemach.

daz was von grôzen vorhten,

daz si nimêr enworhten

und daz si stuonden stille.

daz was gotes wille.

3345

swelich meister vordert stein,

der brâht man im vil klein.

wolt er morter haben,

sô wart im stein dar getragen.

hiez einer [ein stein] her geben der leit [in] hin.

3350

alsô was verwandelt ir sin,

wan sich ir sprâch verkêrt,

als si got hêt gelêrt.

einer redet lût, der ander still,

daz was allez gotes will.

3355

bedorft einer iht,

des verstuont der ander niht.

des nam si michel wunder.

ieslîcher ret besunder:

einer ungerischen,

3360

der ander riuzischen,

der dritt bêheimischen ret,

der vierde tiutsch an der stet;

der fünft redet kriechischen

der sehst heidenischen.

3365

alsô hêt sich ir red verkêrt,

als si got selber hêt gelêrt,

in zwô und sibenzic zungen.

alsô was in gelungen:

 

[Zusätzlicher Text aus HS B]

welher meister vordert stein,

der brâht man im vil klein,

und wer reden began

mit sînem wercman,

5

des kund er vernemen niht.

daz was ein wunderlîch geschiht.

 

gegen swem ein mûrmeister ret,

3370

der wercman ie ein anderz tet.

wolt er stein, er brâht im sant,

wan im sîn red was unbekant.

dô liezen si den turn stên

und begunden an di erde gên.

3375

dhein mûrer kom hin wider.

alsô beleip der turn sider.

 

Di sprâch wil ich iu nennen,

daz ir si müget erkennen,

und wil ouch si bescheiden:

3380

der sprâch under den heiden

was ein und sibenzic bekant

über al in der heiden lant.

die juden habent ouch eine

und ouch mê deheine:

3385

ebraisch ist si genant,

wan sie got bî dem êrsten vant.

dâ von sô ist mir swær,

daz got unser schepfær

den kristen hât wan zwelf gegeben,

3390

di kristenlîchen solden leben.

und ist daz di zwelf zungen reht

lebent, sô sint si gotes kneht.

di sehzic zung verlorn sint,

die müezen sîn der helle kint,

3395

als uns die pfaffen habent geseit

für di ganzen wârheit;

sô sint wan zwelf genesen,

ob si reht kristen wellent wesen.

 

Die heiden machten grôzen spot,

3400

wan si ir abgot

sazten ûf di siul hôch.

daz volc vast zuo in zôch.

si knieten nider und bâten an.

daz was wider got getân.

3405

swelich heiden aller rîchest was,

der bereit dem abgot ein vaz

von lûterm golde,

als ez got wünschen solde,

und ziert di siul gemeine

3410

mit edelm gesteine.

er sazt di siul enbor

in einen schœnen kôr.

hei waz er im dâ êren tet

mit knievallen und mit bet!

3415

er bat ez an für got,

sîn verfluochtez abgot,

alle tag und alle zît.

si hêten in der werlt wît

ir alsô vil gemachet,

3420

dâ von der tievel lachet,

daz er hêt âne swære

sô mangen dienære,

die im bereit wâren

bî den selben jâren.

 

3425

Bî den zîten was bekant

ein man, was Reu genant,

bî dem diu lant enhalp mer

was vil volks und grôzez her,

diu all under im wâren.

3430

bî den selben jâren

wurden alliu rîch bekant,

als ich si geschriben vant,

daz bî den ziten hie dishalb mer

wârn weder stet, liut noch her,

3435

wan holz und ertrîch

was über al diu lant gelîch.

 

[Zusätzlicher Text aus HS B]

diu hie dishalb mers wâren

bî den selben jâren.

 

jenhalb mers wârn liut vil,

der ich niht all nennen wil.

Reu was ein stiftær.

3440

dâ mit hêt er grôz swær

mangen tac unde jâr,

alsô sagt daz buoch für wâr.

er stiftet dô manic lant,

als ich si geschriben vant.

3445

diu wurden bî im gemêrt,

als er di stifter lêrt.

zwei lant wurden dô bekant

und wurden dô bî im genant.

daz ein hiez Sydarum,

3450

daz ander Egylviorum.

dâ wârn heiden gesezzen,

di dûhten sich vermezzen

an êren und an guote.

si wârn in frîem muote.

3455

in dem selben lande

lebtens ân all schande.