Vrowen dienst

1255

Turnier von Brixen.

Ulrich verliert einen Finger,

wird aber von einem meister geheilt.

Lied VI.

(Strophe 340 - 353)

__________________________________________________________________________________

Âventiure wie der herre Uolrich

sînen finger verlôs.

340

Dô ich ze Prihsen kom geriten,

die ritter mich nach ritters siten

enpfiengen ritterlîchen wol,

alsô man geste enpfâhen sol.

5

an ir gruozę mir niht gebrast:

ich was in ein vil lieber gast:

si buten mirz wol sust unde sô.

des dancte ich in und was sîn vrô.

341

Der turnei wart geteilet zuo.

wir zogten ûz des morgens fruo.

ein velt diu Merre ist genant:

dâ zogt wir ûf gar sâzehant.

5

der turnei huop sich und wart guot:

wol hundert ritter wolgemuot

mit manger hande arebeit

des tages erwurbęn dâ werdicheit.

[ . . . ]

Ein tanzwîse, und ist diu sehste wîse

(Bechstein I,125; Lachmann 110,5)

1

Wê daz mir diu guote

sô verret ir minne!

des bin ich in dem muote

vil ofte unfrô.

5

sol mir niht gelingen

an ir des ich sinne,

sô muoz mîn herze ringen

mit trûren sô

daz ich nimmer mêre

10

ze fröiden gesinnc.

si hât des lützel êre,

stêt mîn herze unhô.

2

Schœne bî der güete

stât vil wol den wîben:

sô stât ouch hôchgemüete

den mannen wol,

5

hôchgemüete wolde

vil gerne belîben

bî mir, het ich si holde,

von der ich dol

herzenlîche swære.

10

dâ von muoz ich mîden

vil fröiden, der mir wære

sus mîn herze vol.

3

Jâ man ich vil sêre

dich, frou, dîner güete,

daz dû mich durch dîn êre

bedenkest baz.

5

lâ mich gnâde vinden,

daz dich got behüete.

an dir sô müez mir swinden

der minne haz.

diu ist mir gevære;

10

dâ von mîn gemüete

ist nû vil fröiden lære.

guot wîp, wende daz.

352

Nu was ouch ich ze Bôtzen komen.

dô daz der meister het vernomen,

er kom zuo mir sâ an der stat

nâch mînem willen, als ich bat.

5

er schoute mir die wunden mîn;

er sprach: «ir sült ânę angest sîn.

ich mach iuch in vil kurzer stunt

an iwerm vinger wol gesunt.»

353

Er underwant sich mîn zehant:

die wunden mîn er schône bant,

vil meisterlîchen unde wol,

als von reht ein meister sol.

5

dô ich gelac dâ siben tage,

(nu mercket reht, waz ich iu sage)

ein vrowe sande ir boten mir.

des muoz ich immer danken ir.