Die Gedichte der

Großen Heidelberger

Liederhandschrift

Minnelieder

______________________________________________________________

VIII

C 267c.  Pfaff 878^4-32.  MSH 2,91a und b.  Singer 31

Jarlanc bloezet sich der walt,

und ouch diu heide

valwet von dem kalden sne.

Wie hant sich diu zit gestalt!

5

owe der leide!

schouwet wie der anger ste!

Zergangen ist der grüene kle.

wil diu reine,

diech da meine,

10

min vergezzen, so wirt mir vil dicke we.

Mine friunde, helfet mir

der lieben danken,

der ich singe uf hohen pris!

Guoten trost han ich von ir,

15

meht ich der blanken

machen brun ir goten gris.

Si gert des apfels, den Paris

gap durch minne

der gütinne:

20

füege ich daz, so mac ich heizen ir amis.

Swaz ich wil, daz ist ir nein.

muos ich daz liden

e, wie lange sol daz wern?

Alsus hellen wir enein.

25

künd ich gemiden

si, daz wolde ich füegen gern.

Si wil von mir den liehten stern

Tremuntanen

und den manen

30

zuo der sunnen, des enwil si niht enbern.