| |
|
-
- D a s n a r r e n s c h y f f .
V I I I . N i t v o l g e n g u t e m r a t t .
- __________________________________________
- Wer nit kan sprechen ja vnd neyn
Vnd pflegen ratt vmb groß vnd kleyn
Der hab den schaden jm allein
- Nit volgen gutem ratt.
- Der ist ein narr der wys will syn
Vnd weder glympf / noch moß důt schyn
Vnd wenn er wyßheit pflegen will
So ist ein gouch syn fæderspyl /
- 5
- Vil sint von worten wyse vnd klůg
Die ziehen doch den narren pflůg
Das schafft das sie vff ir wyßheit
Verlossen sich vnd bschydikeit
Vnd achten vff kein frœmden ratt
- 10
- Biß jn vnglück zů handen gat
Syn sůn Thobias allzyt lert
Das er an wysen ratt sich kert /
Dar vmb das nit folgt gůttem rott
Vnd den veracht die husfrow Loth
- 15
- Wart sie geplagt von got dar von
Vnd můst do zů eim zeichen ston /
Do Roboam nit volgen wolt
Den altten wysen / als er solt
Vnd volgt den narren / do verlor
- 20
- Er zehen gslecht / vnd bleib ein dor /
Het Nabuchodonosor Daniel ghœrt
Er wer nit jnn ein dier verkœrt
Machabeus der sterckest man
Der vil groß tugent hat getan
- 25
- Hett er gefolget Jorams rott
Er wer nit so erschlagen dot /
Wer allzytt volgt sym eygnen houbt
Vnd gůttem rott nit folgt vnd gloubt
Der acht vff glück vnd heyl gantz nüt
- 30
- Vnd will verderben ee dann zytt
Ein fründes ratt nieman veracht
Wo vil rætt sint / ist glück vnd macht
Achitofel sich selber dot
Das Saul nit volget synem rott
|
|