B  I  B  L  I  O  T  H  E  C  A    A  U  G  U  S  T  A  N  A
           
  Sebastian Brant
1458 - 1521
     
   



D a s   n a r r e n   s c h y f f .

L X X X I .   v o n   k o c h e n   v n d   k e l l e r

__________________________________________


 
Hie kumen keller / kœch / eehaltten
All die des huses sorg / důnt waltten
Die redlich jnn dem schiff důnt schaltten



von kochen vnd keller

Eyn bœttlin erst vor vns hyn lyeff
Das froget noch dem narren schiff
Dem goben wir versaltzen suppen
Das er dem flæschlin wol mœcht luppen
5
Im wasß zů louffen also goch
Das flæschlin es on duren zoch
Wir wolten jm brieff geben han
Wolt es doch nit so lang still stan /
Des kumen wir die straß hie schlecht
10
Keller / vnd kœch / megde / eehalt / knecht
Die mit der kuchen sint behafft
Wir tragen all vff noch kuntschafft
Dar vß keyn duren vns bestat
Vß vnserm seckel es nit gat
15
Vor vß wann vnser herschafft nycht
Zů huß ist / vnd es nyeman sycht /
So schlēmen wir / vnd tabernyeren
Frœmde prasser / wir mit vns heym fűren
Vnd geben do gar manchen stoß
20
Der kannen / krusen / fleschen groß
Wañ nachts die herschafft schloffen gat
Vnd rygel / tor / beschlossen hatt
So drincken wir dann nit des bœsten
Wir lossen vß dem vaß / dem grœsten
25
Do mag man es nit wol an spűren
Ans bett / wir dann eynander fűren
Doch důnt wir vor zwen socken an
Das vns die herschafft nit hœr gan
Vnd ob man schon hœrt ettwas krachen
30
Mann wænt die katzen důnt das machen
Vnd wenn eyn kleyn zyt vmbhar gat
So wænt der herr / das er noch hat
In sym væslin eyn gůten drunck
So macht der zappf dañ glunck glunck glunck
35
Das ist eyn zeychen dar zů / das
Gar wenig ist me jnn dem faß
Dar zů / wir dar vff flißlich achten
Wie wir zů richten vil der trachten
Do mit den glust / vnd magen reytzen
40
Mit kochen / syeden / broten / schweytzen /
Mit rœsten / bachen / pfeffer bry
Voll zucker / wurtz / vnd spetzery
Geben wir eym eyn oxymell
Der by der stægen leidt gewell
45
Oder můß das von jm purgyeren
Mit Syropen / vnd mit klystieren
Des achten wir gantz nütz zů mol
Dann wir ouch werden dar by vol
Vnser selbes wir nit vergessen
50
Das best / wir ab dem hafen essen
Dann ob wir hungers sturben schon
Man sprech / es wer von vœll gethon
Der keller spricht / brot mir eyn wurst
Her koch / so lesch ich dir den durst
55
Der keller ist des wyns verræter
Der koch der ist des tüfels bræter /
Hye důt er gwonen by dem für
Das jm dort kumen würt zů stür /
Keller vnd kœch sint seltten lær
60
Sie tragen vff alls by der schwær
Ins narren schiff stat all jr bgær
Do joseph jnn Egypten kam
Der fürst der kœch jnn zů jm nam
Iherusalem gwann Nabursadam