B  I  B  L  I  O  T  H  E  C  A    A  U  G  U  S  T  A  N  A
           
  Sebastian Brant
1458 - 1521
     
   



D a s   n a r r e n   s c h y f f .

X C .   E r e   v a t t e r   v n d   m u t t e r .

__________________________________________


 
Ere vatter und můtter allzyt
Do mit dir gott lang leben gytt
Vnd würdst gesetzt jn schanden nytt



Ere vatter vnd mutter.

Der ist eyn narr der kynden gytt
Do er syn zyt solt leben mytt
Verlossend sich vff gůten won
Das jnn / syn kynd nit sollen lon
5
Vnd jm ouch helffen jnn der not /
Dem wünscht man allen tag den dot
Vnd wurt gar bald eyn über last
Den kynden syn / eyn vnwert gast
Doch jm geschicht wol halber recht
10
Worlich ist er an wyttzen schlæcht
Das er mit wortten jm loßt klusen
Des soll man jm mit kolben lusen
Doch lebt der selb nit lang vff erdt
Wem vatter / můter synt vnwerdt /
15
Inn mit der vinster / lescht des lyecht
Wer vatter / vnd můter ert nycht
An sym vatter bschuldt Absolon
Das jnn solt vnglück jung an gon
Des glichen wart verflůchet Cham
20
Do er entbloßt syns vatters scham /
Balthesar hatt nit vil glück
Das er syn vatter hűw jnn stück /
Sennacherib von syn sűnen starb
Ir keyner doch das rich erwarb
25
Thobias gab sym sůn die ler
Er solt syn můtter han jn ere
Dar vmb stund künig Salomon
Synr můtter vff / von synem tron
Als Corylaus ouch hat gthon
30
Die sűn Rechab / lobt selber gott
Das sie hieltten jrs vatters gbott /
Wer leben will spricht gott der herr
Der bűt vatter / vnd můtter ere
So würt er alt / vnd richen sere