B  I  B  L  I  O  T  H  E  C  A    A  U  G  U  S  T  A  N  A
           
  Sebastian Brant
1458 - 1521
     
   



D a s   n a r r e n   s c h y f f .

C X b .   V o n   f a s n a c h t   n a r r ē .
(Zusatz der 2. Auflage, Basel 1495)


__________________________________________


Von fasnacht narrē.

Ich weiß noch ettlich faßnacht narren
Die jnn der dorenkapp beharren
Wann man heilig zyt sol vohen an
So hyndern sie erst yederman
5
Eyn teyl / die důnt sich vast berutzen
Antlitt / vnd lib sie gantz verbutzen
Vnd louffen so jn bœucken wiß
Ir anschlag stat vff hælem yß
Mancher will nit / das man jn kennt
10
Der sich doch selbst zů letsten nennt
So jm der kopff schon ist vermacht
Will er doch / das man vff jn acht
Dz man sprech / schow min herr vō Rūckel
Der kumbt vñ bringt am arm eyn kunckel
15
Es můß jo ettwas groß bedütten
Das er doch kumbt zů armen lüten
Durch syn demůt vnß důt besehen /
Syn meynung ist / er wolt gern schmehen
Vnd eym zů faßnacht eyger legen
20
Die guckguck syngend jn dem meygen /
Kűcheln reicht man jn manchem huß
Do wæger wer man blib dar vß
Vrsach zů zelen / ist so vil
Das ich vil lieber schwigen will /
25
Aber die narrheyt hat erdacht
Das man sůch freüden zů faßnacht
So man der selen heyl solt pflegen
So gœnt die narren erst den segen
Vnd sůchent dann jr fæst har für
30
Das es vast nacht sy vor jr tür
Der narren / kyrchwych man wol kennt
Io wol vast nacht würt es genennt
Man loufft dar affter vff den gassen
Im moß / als solt man ymen fassen
35
Welcher dann mag syn schœllig gantz
Der meynt er hab billich den krantz
Von eym huß zů dem andern loufft
Groß füllen er on bar gelt koufft
Das selb dick wært noch mitter nacht
40
Der tüfel hat das spiel erdacht
So man solt sůchen selen heyl
Das man erst dantz am narren seyl
Mancher der füll důt so vergessen
Als solt er jn eym jor nit essen
45
Vnd loßt sich nit benűgen mit
Das er sich füll biß metten zytt
Verbottne spiß schadt dann nitt
Man isßt die selb biß gegen tag
Worlich ich das sprich / red / vnd sag
50
Das weder Juden / Heyden / Datten
Irn glouben als schentlich bestatten
Als wir die kristen wellen syn
Vnd důnt mit wercken kleynen schyn
So wir jm anfang vnser andacht
55
Zů rüsten erst dryg / vier / vaßnacht
Vnd werden erst on synnen gar
Das selb das wert dann durch das jar
Brechen das houbt der vasten ab
Do mitt sie mynder krefften hab /
60
Wenig sich zů der æschen nahen
Das sie mit andacht die entpfahen
Fœrchten die æsch die werd sie bissen
Lieber wendt sie jr antlitt bschissen
Vnd sich berœmen / wie eyn kol
65
Des tüfels zeychen gfelt jn wol /
Das zeichen gots / went sie nit han
Mit Christo went sie nit erstan
Die frowen gont dann gern zů strossen
Das man sie dest baß künn bemossen
70
Der kyrchen schonen ettlich nitt
Sie louffen dryn / vnd durch die mitt
Vnd důnt die frowen drynn beschmieren
Das halt man für eyn groß hofieren
Die wűst rott / důt den esel tragen
75
Der sie die gantz statt macht vmb jagen
So ladt man dann zů dantz vnd stechen
Do můß man erst die sper brechen
Vnd bringen narren recht zů samen
Buren / hantwerck / důnt sich nit schamen
80
Vnd nemen sich ouch stechens an
Der mancher doch nit ryten kan
Des würt mancher gestochen dick
Das jm der hals bricht oder rück /
Das soll eyn hübscher schympff dañ syn
85
Dar noch füllt man sich dann mit wyn
Von keyner vasten weiß man sagen
Das wesen wært ob vierzehen tagen
Die fast gantz vß / an ettlich enden
Die karwůch důt sie kum abwenden
90
So kumbt man zů der bicht zů zyt /
Wann man die hültzen tafflen lüt
So vacht man dann den ruwen an
Das man well morndes wider dran
Dem narren seil me hengen noch
95
Gon Emaus ist vnß allen goch
Die gwychten fladen vnß nit schmecken
Das houbt das důt man bald entdecken
Es mag gar licht eyn wynd har fegen
Er důt den frowen die sturtz ab wegen
100
Die hangen an den næchsten hecken
Die frowen went sich vngern decken
Reytzen do mitt die mañ vnd knaben
Die narrenkapp sie lieber haben
Das man die oren dar vß streck
105
Dann das man sich mit stürtzen deck
Do mit so mag ich wol beschliessen
Wie wol ettlich hant drab verdriessen
Das / wo man sůcht alleyn fastnacht
Das nyemer druß wurt recht andacht
110
Vnd wie wir schicken vnß zů gott
Loßt er vnß dick biß jn den dott
Die narrenkapp hat angst vnd nott
Vnd mag nit so vil růwen han
Das sie doch blib die fasten stan
115
Man streifft sie jn der karrwoch an